Երևանում ստորգետնյա ավտոկայանատեղիների շինարարություն իրականացնելու համար ներկայումս ճշտվել է տարածքների ցանկը, ծրագրի իրագործման հեռանկարային ժամկետները և ֆինանսավորման աղբյուրները: Այս մասին Aysor-ի հետ զրույցում հայտնեց Երևանի գլխավոր ճարտարապետ Սամվել Դանիելյանը: «Ստորգետնյա ավտոկայանատեղիների շինարարությունն իրականացվելու է հիմնականում մասնավոր ներդրումների հաշվին, որոնցից թվով 5` «Ազատության», «Շահումյան», «Ազնավուրի», «Սախարովի» և «Ֆրանսիայի» հրապարակներում, ստորգետնյա ավտոկայանատեղերի ստեղծման կառուցապատման աշխատանքները նախատեսվում է ըստ առաջնահերթության ավարտել 2014 թ., որի արդյունքում կունենանք 2496 ավտոկայանատեղի»,- ասաց Ս. Դանիելյանը: Ըստ Երևանի գլխավոր ճարտարապետի, Գլխավոր հատակագծով և Երևան քաղաքի վարչական շրջանների գոտիավորման նախագծերով նախատեսված է ևս 9 ստորգետնյա ավտոկայանատեղիների կառուցում` «Հանրապետական մարզադաշտ», «Տաշիր հանրախանութ», Զավարյան փողոցի վրա` շուկայից դեպի ձախ ընկած հատված, «Կիլիկիա-1», «Կիլիկիա-2», «Կիլիկիա-3», «Ծիծեռնակաբերդի խճուղի-1», «Ծիծեռնակաբերդի խճուղի-2», Օղակաձև զբոսայգու «Արարատ» թենիսի կորտեր, «Էրեբունի հյուրանոցին հարող հրապարակ» տարածքներում: Դրանց կառուցապատման աշխատանքները նախատեսվում է ավարտել մինչև 2020 թ., որի արդյունքում կստեղծվի 2355 ավտոկայանատեղի: «Այդպիսով, ընդամենը 4851 ավտոկայանատեղի` միայն Կենտրոն վարչական շրջանում»,- ընդգծեց Ս. Դանիելյանը: Ազատության հրապարակում ստորգետնյա ավտոկայանատեղիի շինարարությունը, որը սկսվել էր 2008 թ. հոկտեմբերին, մոտենում է իր ավարտին: Այն նախատեսվում է շահագործման հանձնել 2010 թ. գարնանը: Եռահարկ ավտոկայանատեղին նախատեսված է 500 մեքենայի համար: Ս. Դանիելյանը նաև հայտնեց, որ մշակվել է 2009-2020 թթ. համար ստորգետնյա և վերգետնյա բազմահարկ ավտոկայատեղիների ստեղծման ծրագիր` Երևան քաղաքի թաղային համայնքների գոտիավորման նածագծերով նախատեսված ներբակային տարածքներում: Երևանում ստորգետնյա ավտոկայանատեղիների կառուցման հիմնական նպատակը փողոցները տրանսպորտային միջոցների կայանումից ազատելն է, հատկապես քաղաքի փոքր կենտրոնում: Հավելենք, որ ավտոկայանատեղիները լինելու են վճարովի:

Կ. Դեմիրճյանի անվան մարզահամերգային համալիրում ապրիլի 2-4-ը կայանալիք «Կովկաս. շինարարություն եւ վերանորոգում 2010» միջազգային ցուցահանդեսին կմասնակցեն 30-ից ավելի թուրքական շինարարական կազմակերպություններ: «Բիզնես 24»-ի փոխանցմամբ՝ «Logos Expo» կենտրոնի կազմակերպած ցուցահանդեսին, ընդհանուր առմամբ, կմասնակցեն մոտ 100 ընկերություններ՝ Հայաստանից, Վրաստանից, Ռուսաստանից, Ուկրաինայից, Իրանից եւ Թուրքիայից: Ցուցահանդեսի շրջանակներում կներկայացվեն շինարարական տեխնոլոգիաներ, նյութեր, պատուհաններ, գորգեր, դռներ, սանտեխնիկա, կահույք եւ այլն: Նշենք, որ «Logos Expo» կենտրոնը համագործակցում է թուրքական «Turkel Fair organization»-ի հետ` 2009թ-ի նոյեմբերին կնքելով համաձայնագիր: «Համաձայնագրի շրջանակներում նախատեսվում է, որ թուրքական ընկերությունները կմասնակցեն կենտրոնի կողմից կազմակերպված բոլոր ցուցահանդեսներին, որը միանշանակ հանդիսանում է երկու երկրների տնտեսական զարգացման խթան»,- ասել է կենտրոնի ներկայացուցիչը:

Հայաստանի կառավարության օգոստոսի 20-ի նիստում փոփոխություն է կատարվել «ՀՀ Ազգային Ժողովում ՀՀ վարչապետի ելույթից բխող միջոցառումների ցանկը հաստատելու մասին» ՀՀ կառավարության արձանագրային որոշման մեջ: Մասնավորապես, որոշման հավելվածի «Ռեգիոնալ նշանակություն ունեցող նոր էներգետիկ նախագծերի իրականացում» բաժինը շարադրվել է նոր խմբագրությամբ եւ նրանում ներառվել է Մեղրիի ՀԷԿ-ի կառուցումը, որ նախատեսվում է իրականացնել 2010-2015թթ.-ի ընթացքում: Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ կառավարության Տեղեկատվության եւ հասարակայնության հետ կապերի վարչությունից, փոփոխության անհրաժեշտությունն առաջացել է ՀՀ նախագահի` Իրանի Իսլամական Հանրապետություն կատարած այցի ընթացքում երկու երկրների էներգետիկայի նախարարությունների միջեւ Մեղրի ՀԷԿ-ի կառուցման մասին Փոխըմբռնման հուշագրի ստորագրման կապակցությամբ: Հավանություն տալով ընդունված որոշմանը, ՀՀ վարչապետ Տիգրան Սարգսյանն անդրադարձել է հանրապետության էներգետիկ համակարգի ֆինանսական կայունության խնդիրներին: Նա առաջարկել է արձանագրային որոշում ընդունել նաեւ էներգետիկայի համակարգի ֆինանսական կայունությունն ապահովելու նպատակով: «Որպեսզի թույլ չտանք նաեւ վերջնական սպառողներին վաճառվող էլեկտրական էներգիայի սակագնի աճ, անհրաժեշտություն կա, որպեսզի էներգետիկ համակարգում առաջացող ֆինանսական ճեղքվածքները փակվեն այս ոլորտում աշխատող պետական ձեռնարկությունների հաշվին, մասնավորապես Որոտանի ՀԷԿ-ի, Երեւանի ՋԷԿ-ի առաքվող էլեկտրական էներգիայի հզորությունների եւ բարձրավոլտ էլեկտրացանցերի կողմից էլեկտրաէներգիայի հաղորդման ծառայության մատուցման սակագների հաշվարկներում ներառված շահույթի եւ մաշվածության, ինչպես նաեւ Հայկական ատոմակայանի առաքվող էլեկտրական էներգիայի սակագների հաշվարկում ներառված հատուկ ֆոնդերի եւ որոշ ծախսային հոդվածների նվազման հաշվին»,- ասել է Տ.Սարգսյանը:

ՀՀ վարչապետ Տիգրան Սարգսյանն այսօր մասնակցել է Վերակառուցման եւ զարգացման եվրոպական բանկի (ՎԶԵԲ) եւ «Էլիտ գրուպ» ընկերության միջեւ միջնաժամկետ փոխառության պայմանագրի ստորագրման արարողությանը, որը տեղի է ունեցել Ազգային պատկերասրահի Որմնանկարների դահլիճում։ Պայմանագիրը ստորագրել են «Էլիտ գրուպ» ընկերության տնօրեն Արմեն Մկոյանը եւ Վերակառուցման եւ զարգացման եվրոպական բանկի հայաստանյան գրասենյակի ղեկավար Վալիրու Ռազլոգը։ Կառուցապատման ոլորտում առաջատար հանդիսացող «Էլիտ գրուպ» ընկերությանը պայմանագրով կտրամադրվի 5,5 միլիոն ԱՄՆ դոլար վարկ եւ 130 հազար եվրո դրամաշնորհ` էներգախնայողության բնագավառում կիրառվող նորարարությունները խրախուսելու համար։ ՀՀ կառավարության ղեկավարն իր ելույթում նշել է. «Այս պայմանագրի ստորագրումը կարեւոր նշանակություն ունի այն առումով, որ ՎԶԵԲ-ը վերջին ամսվա ընթացքում երկրորդ անգամ է Հայաստանին տրամադրում ֆինանսական միջոցներ։ Նախորդը աննախադեպ մեծ ծավալի վարկ էր, որ բանկը տրամադրեց Հայաստանի էներգետիկայի ոլորտին, իսկ այսօր 5.5 մլն դոլար վարկ է տրամադում Հայաստանի լավագույն կառուցապատողին։ Վերջերս կառավարությունը որոշում է ընդունել եւ նույն կառուցապատողին տրամադրել վարկային միջոցներ ստանալու պետական երաշխիք։ Դա այն ծրագրի շրջանակում է, որի նպատակն է օժանդակել կառուցապատողներին։ Ինչպես հայտնի է շինարարությունը վերջին հինգ ամսվա ընթացքում արձանագրելով մեծ անկում, էական ազդեցություն է թողնում տնտեսության բոլոր ճյուղերի վրա։ Կառավարության ջանքերն ուղղված են աջակցելու շինարարներին` գտնել լրացուցիչ ֆինանսական միջոցներ, որպեսզի ոլորտը վերականգնի իր նախկին ծավալները։ Մի կողմից անհրաժեշտ է, որպեսզի պետության աջակցությունը լինի վարկային միջոցներ ներգրավելու առումով, մյուս կողմից վստահությունը, որ կա մեր կառուցապատողների նկատմամբ, իր հերթին, պետք է տարածվի մասնավոր հատվածի վրա, որպեսզի այն նույնպես կատարի իր ներդրումները։ Այս պայմանագրի առանձնահատկությունն այն է, որ տրամադրվող վարկային միջոցներն ունեն գրանտային բաղադրիչ, քանի որ «Էլիտ գրուպը» նաեւ ժամանակակից տեխնոլոգիաներ է կիրառում եւ այդ գրանտային բաղադրիչը կարեւոր տեղ է գրավում վարկային փաթեթի մեջ։ Շնորհավորում եմ պայմանագիրը ստորագրելու կապակցությամբ, շնորհակալություն հայտնում Լոնդոնից ժամանած մեր գործընկերներին, ՎԶԵԲ-ի տարածաշրջանային տնօրեն Պոլ Անրի Ֆորսթիերին, քանի որ այս պայմանագիրը կօգնի մեղմել ֆինանսական եւ տնտեսական ճգնաժամի հետեւանքները»։