Լոս-Անջելոսում սկսվել է մասնավոր առանձնատան շինարարությունը, որի ավարտից հետո այն հավակնում է դառնալ ամենաթանկն ամբողջ աշխարհում և ամենամեծն ԱՄՆ-ում: Ինչպես գրում է Bloomberg լրատվական գործակալությունը, շինարարության ավարտից հետո կառուցապատողը նախատեսում է այն վաճառել 500 մլն. ԱՄՆ դոլարով: Ամերիկացի կառուցապատող Նիլ Նիյամին (Nile Niami) հայտարարել է ԱՄՆ-ի խոշորագույն մասնավոր առանձնատան շինարության մեկնարկի մասին, որը գտնվում է Լոս-Անջելոսի Բել Էյր (Bel Air) շրջանում: Մասնավոր սեփականության գլխավոր առանձնատան մակերեսը կազմելու է 6,9 հազար քառակուսի մետր, իսկ մյուս շինությունների հետ միասին, ներառյալ հյուրերի համար նախատեսված 3 առանձնատները, կազմելու է 9,3 հազար քառակուսի մետր: Հայտնի է նաև, որ տանտիրոջ ննջասենյակի մակերեսը, որն առանձին մուտք է ունենալու դեպի սպա-սրահ և հանդերձարան, կազմելու է 465 քառակուսի մետր: Առանձնատունն ունենալու է նաև 30 ավտոմեքենայի համար նախատեսված փակ կայանատեղի: Մասնավոր սեփականության հողի ընդհանուր մակերեսը կազմում է 1,6 հեկտար: Այն գտնվում է յուրօրինակ մի վայրում՝ բլրի վրա, որտեղից էլ գեղեցիկ տեսարան է բացվում դեպի Խաղաղ օվկիանոսը, Բեվերլի-Հիլսը, Լոս-Անջելոսը և Սան-Ֆերնանդոյի հովիտը: Նախագիծը ենթադրում է հսկայածավալ նախապատրաստական աշխատանքներ: Բանն այն է, որ տարածքը շինարարության համար մաքրելու նպատակով անհրաժեշտ է տեղափոխել մոտ 30 հազար խորանարդ մետր հող: Շինարարության ավարտից և առանձնատան վաճառքից հետո, այս բնակելի համալիրը հավակնում է դառնալ 21-րդ դարի մեկ ընտանիքի բնակության համար նախատեսված խոշորագույն անշարժ գույքը ԱՄՆ-ում: Bloomberg լրատվական կայքի տվյալներով, որպես այս նոր նախագծի մրցակից հանդես է գալիս Ֆլորիդայում կառուցվող 8,3 հազար քառակուսի մետր մակերեսով առանձնատունը: Վերջինս պատկանում է «Վեսթգեյթ Ռեզորթս» (Westgate Resorts) ընկերության սեփականատեր Դեյվիդ Սիգելին (David Siegel): «Քրիստիս միջազգային անշարժ գույքի» (Christie’s International Real Estate) գործակալության տվյալներով, անցած տարվա ընթացքում վաճառվել է 5 անշարժ գույք 100 մլն. ԱՄՆ դոլար արժողության սահմաններում, և ևս 20 անշարժ գույք, որոնց գինը կազմել է 90 մլն ԱՄՆ դոլար: Ի դեպ, վերջին շրջանում վաճառված ամենաթանկ անշարժ գույքը գտնվել է Լոնդոնում: Գործակալության տվյալներով՝ գործարքն իրականացվել է 2011 թ-ին, և ընդհանուր բյուջեն կազմել է 221 մլն. ԱՄՆ դոլար: Այսօր միջազգային անշարժ գույքի շուկայում կան մի շարք բազմամիլիոնանոց առաջարկներ, որոնցից կարելի առանձնացնել որոշները՝ • ԱՄՆ-ի «Վագգոներ» ռանչոն : 750 մլն ԱՄՆ դոլարով վաճառվող ռանչոյի ընդհանուր մակերեսը կազմում է 2060 քառակուսի կիլոմետր, և այն տարածվում է Հյուսիսային Տեխասի 6 շրջանների վրա: Ռանչոյի տարածքում տեղակայված են հարյուրավոր տներ, 20 կովբոյական ճամբարներ, 120 քառակուսի կիլոմետր վարելահողեր, հարյուրավոր ձիեր, հազարավոր գլուխ խոշոր եղջերավոր անասուններ և այլն: • Ֆրանսիայում գտնվող «Վիլլա Լեոպոլդան» (Villa leopolda): Այս յուրօրինակ առանձնատունը կառուցվել է 20-րդ դարում Բելգիայի արքա Լեոպոլդ 2-րդի կողմից: Այն առաջին անգամ վաճառքի է հանվել 2009 թվականին 750 մլն ԱՄՆ դոլարով: 1 տարի անց անշարժ գույքի գինը կազմել է 506 մլն ԱՄՆ դոլար, իսկ արդեն 2014 թվականին առանձնատան գինը նվազել է մինչև 425 մլն ԱՄՆ դոլար: • Մոնակոյում կառուցվող 49 հարկանի «Տուր Օդեոն» (Tour Odeon) երկնաքերի փենթհաուսը: Փենթհաուսի մակերեսը կազմում է 3.3 հազար քառակուսի մետր: Անշարժ գույքի նախնական արժեքը սահմանվում է մոտ 400 մլն ԱՄՆ դոլար: Անշարժ գույքի այսպիսի բարձր գինը պայմանավորված է Մոնակոյում նորակառույցների արգելքով: Բանն այն է, որ 1960-ական թվականներից ի վեր այս երկնաքերը երկրի միակ նորակառույցն է:

Աշխարհահռչակ նկարիչ Պաբլո Պիկասոյի թոռնուհի Մարինան մանկության տխուր հիշողություններից ազատվելու նպատակով վաճառում է Կաննում գտնվող առանձնատունն ու 126 կերամիկական աշխատանքներից կազմված հավաքածուն: Ինչպես նշում է Մարինան, այս առանձնատան վաճառքը հնարավորություն կտա նրան թերթել իր կյանքի ամենատխուր էջը: Կաննում գտնվող առանձնատունը նրան հիշեցնում է անտարբեր պապիկի և աղքատության մեջ անցկացրած մանկության մասին: Մասնավորապես նա հիշում է՝ ինչպես էր հայրիկի հետ կանգնում եռահարկ առանձնատան դարպասների մոտ անտարբեր Պիկասոյից ողորմություն խնդրում: Մարինա Պիկասոն տունը ժառանգություն է ստացել 22 տարեկանում, և մինչ օրս, երբ նա արդեն 64 տարեկան է, բազմիցս հայտարարել է, որ առանձնատունը նրա մեջ տխուր հիշողություններ է արթնացնում: Ըստ նախնական տվյալների՝ նա արդեն 172 մլն ԱՄՆ դոլար գումարի առաջարկ է ստացել: Նա նաև նախատեսում է վաճառել նկարչի կերամիկական հավաքածուն, որը, համաձայն «Սոթբի» աճուրդային տան տվյալների, կվաճառվի ավելի քան 9.3 մլն ԱՄՆ դոլարով: Պաբլո Պիկասոն այս առանձնատունը գնել է 1955 թ-ին և այնտեղ ապրել է 6 տարի: 1961 թ-ին, երբ նորակառույց շինությունը փակեց առանձնատնից ծով բացվող գեղեցիկ տեսարանը, նկարիչը տեղափոխվեց այնտեղից: 1987 թ-ին Մարինա Պիկասոն վերանորոգել է այն և վերանվանել «Դե Ֆլոր տաղավար» (Pavillon de Flore), սակայն առանձնատունն ամբողջ աշխարհում հայտնի է որպես «Լա Կալիֆորնիա» (La Californie): Վաճառքից գոյացած գումարը Մարինան մտադիր է ծախսել բարեգործության վրա: Նա ֆինանսավորում է Վիետնամում գտնվող մանկական հիվանդանոցը և մի շարք նախագծեր Շվեյցարիայում, որոնց նպատակն է օգնել կարիքավոր դեռահասներին և տարեցներին: «Լա Կալիֆորնիա» առանձնատանը Պիկասոն ապրել է երկրորդ կնոջ՝ Ժակլին Ռոկի հետ: Նշենք, որ Ժակլինը թույլ չտվեց Պիկասոյի թոռներին ներկա գտնվել նկարչի հոգեհանգստի արարողությանը: Այդ իրադարձություններից հետո Պիկասոյի թոռը, Մարինայի եղբայր Պաբլիտոն, ինքնասպանություն գործեց: Մարինա Պիկասոն նկարիչի թոռուհին է բալետի պարուհի Օլգա Խոխլովայի հետ առաջին ամուսնությունից: Օլգա Խոխլովան և Պաբլո Պիկասսոն 1 որդի են ունեցել Պաուլոն, ով իր հոր մոտ աշխատել է որպես նրա առաքիչ ու վարորդ չնչին աշխատավարձով:

Կենտրոնական Ֆրեզնոյում վաճառքի կհանվի այն առանձնատունը, որտեղ իր կյանքի վերջին 17 տարիների ընթացքում ապրել է հայ-ամերիկյան մեծանուն գրող Վիլյամ Սարոյանը: 2729 W. Griffith Way հասցեում գտնվող տունը 1981 թ-ին Սարոյանի մահվանից հետո ունեցել է 3 տարբեր սեփականատերեր: Ըստ փաստաթղթերի՝ վերջին սեփականատերը անշարժ գույքը ձեռք է բերել 2006 թ-ին և վարձակալության հանձնել: Սարոյանի հարևան Էրնի Բակայի խոսքերով, գրողի մահից հետո նրա առանձնատունը հետզհետե քանդվում և քայքայվում է: Նոր սեփականատերերից ոչ մեկը հոգածություն չի ցուցաբերել տան նկատմամբ: Այն անընդհատ վարձակալության է հանձնվել և կամաց-կամաց ավերվել: Այսօր մեծանուն գրողի հարևանը սրտի ցավով է նշում այն փաստը, որ տունն ամայի է, պատուհանները փակված են, իսկ դռան վրա վաճառքի ցուցանակ է կախված: Վիլիամ Սարոյանի 114 քառակուսի մետր մակերեսով առանձնատունը կառուցվել է 1964 թ-ին: Այնտեղ գտնվում են 3 ննջարաններ և 1 լոգասենյակ: Երբ Սարոյանը տեղափոխվում է, նա իր նոր առանձնատան արևմտյան մասում փոքրիկ այգի է տնկում պտղատու ծառերով: Բական հիշում է, որ երբ Սարոյանը ճամփորդում էր, նա իրեն 30 ԱՄՆ դոլար էր վճարում փոքրիկ այգին ջրելու համար: 1989 թվականից առանձնատունը գրանցված է տեղական ռեգիստրի պատմական ռեսուրսների ցանկում: Տան պատին ցուցանակ է փակցված այն ստեղծագործությունների ցանկով, որոնք հեղինակը գրել է առանձնատանը ապրելու տարիներին: Սակայն ինչպես պնդում է գրողի հարևանը, առանձնատանը պատմական ռեսուրսին վայել հոգածություն չի ցուցաբերվում: Պատասխանատու անձինք էլ հակառակվում են, բացատրելով, որ տանը շնորհված աստիճանը վերաբերում է միայն տան ապամոնտաժմանը, իսկ վերանորոգման ծախսերը պետք է հոգան սեփականատերերը: Վիլիամ Սարոյանի նախկին առանձնատան աճուրդը կկայանա ընթացիկ տարվա մայիսի 5-ին Ֆրեզնոյի քաղաքային դատարանում:

Եթե ձեզնից որևէ մեկը ցանկանում է առավոտյան արթնանալ՝ շրջապատված ստորջրյա աշխարհով և բազմաթիվ ձկներով, ապա Դուբայի «Աշխարհ» (The World) արհեստական կղզիներում առաջարկվող ընթացիկ նախագիծը լավագույն տարբերակ է ձեզ համար: Փետրվարի 5-ին «Քլեյնդիենսթ Գրուփ» (Kleindienst Group) ընկերությունը պաշտոնապես հանրությանը և պոտենցիալ գնորդներին է ներկայացրել ստորջրյա առանձնատների յուրօրինակ նախագիծ, որոնք գտնվում են Դուբայի ափամերձ գոտուց 4 կիլոմետր հեռավորության վրա տեղակայված «Աշխարհ» արհեստական կղզիներում: Ընկերության կողմից ներկայացված պաշտոնական առաջարկից անմիջապես հետո 5 յուրօրինակ առանձնատներ գտել են իրենց սեփականատերերին: Ինչպես տեղեկացնում են տեղական պարբերականները, գնորդներից 2-ը Եվրոպայից են, իսկ մյուս 3-ը Հնդկաստանից և Պարսից ծովածոցին հարող երկրներից: Այսօր ընկերությունը յուրօրինակ առանձնատները կառուցում է «Եվրոպայի Սիրտ» (Heart of Europe) նախագծի մաս կազմող Մոնակո կղզում: Յուրաքնաչյուր առանձնատան գինը կազմում է մոտ 1,36 մլն ԱՄՆ դոլար: Եռահարկ առանձնատների վերգետնյա 2 հարկը գտնվում է ջրի վրա, իսկ ներքևի հարկը 4 մետր խորությամբ ընկղմված է ստորջրյա յուրօրինակ աշխարհում: Առանձնատների մակերեսը կազմում է 156 քառակուսի մետր և նախատեսվում է, որ վերջիններս իրենց սեփականատերերին կարող են հյուրընկալել արդեն 2017 թ-ին: Ըստ նախնական տվյալների՝ «Եվրոպայի Սիրտ» արհեստական կղզիները կառուցապատող ընկերությունը նախատեսում է կառուցել 42 ստորջրյա առանձնատուն, որոնցից 20-ն արդեն ներկայացվել են հանրությանը, իսկ մյուս 22-ն ընկերությունը տեղափոխել է նախագծի հաջորդ փուլ: «Աշխարհ» արհեստական կղզիները, որոնց լայնությունը կազմում է 9 կիլոմետր, երկարությունը 7 կիլոմետր, իսկ ընդհանուր մակերեսը 931 հեկտար, գտնվում են Դուբայի ափամերձ շրջանից 4 կիլոմետր հեռավորության վրա: Առանձին կղզիների մակերեսը տատանվում է 14-ից 42 հազար քառակուսի մետր մակերեսի սահմաններում: Վերոնշյալ նախագծի մաս է կազմում «Եվրոպայի Սիրտ» նախագիծը, որը բաղկացած է 6 կղզիներից՝ Գերմանիա, Ավստրիա, Շվեյցարիա, Մոնակո, Շվեդիա և Սանկտ Պետերբուրգ:

Միլիարդատեր Ջեֆ Գրինը վաճառքի է հանել Լոս-Անջելոսի Բևերլի Հիլլս շրջանում գտնվող իր առանձնատունը: Ինչպես գրում է The Wall Street Journal պարբերականը, առանձնատան արժեքը սահմանվել է 195 մլն ԱՄՆ դոլար, ինչի արդյունքում այն ճանաչվել է երկրում երբևէ վաճառված ամենաթանկ բնակելի տարածքներից մեկը: «Սիրո պալատ» ( Palazzo di Amore` իտալերենից թարգմանաբար նշանակում է սիրո պալատ) առանձնատունը գտնվում է 10 հեկտար հողակտորի վրա և բաղկացած է մի քանի շինություններից: Բոլոր շինությունների ընդհանուր մակերեսը կազմում է 4920 քառակուսի մետր, իսկ գլխավոր առանձնատան մակերեսը, որը կառուցված է միջերկրածովյան ոճով, կազմում է 3250 քառակուսի մետր: Տան ներքին հարդարման մեջ գերակշռում են մարմարի հազվագյուտ տեսակները և կարմիր փայտը: Գլխավոր առանձնատանը գտնվում են 12 ննջասենյակ, 23 լոգարան, գրադարան, գինու 2 մառան, հանդիսությունների սրահ նախատեսված 250 անձի համար, բոուլինգ սրահ և կինոթատրոն: Նշենք, որ տարածքի հիմնական մասը գրավում են խաղողի այգիները, իսկ առանձնատնից յուրօրինակ տեսարան է բացվում դեպի Լոս-Անջելոսը: Առանձնատան բակում կան նաև ոչ մեծ շատրվաններ, բաց լողավազան՝ շրջապատված զեյթունի թփերով: Առանձնատան ընդարձակ ավտոկայանատեղին նախատեսված է 27 ավտոմեքենաների համար, իսկ հյուրերի համար նախատեսված ավտոկայանատեղում հնարավոր է կայանել 150 ավտոմեքենա: Գրինն առանձնատունը գնել է 2007 թ-ին 35 մլն ԱՄՆ դոլարով Սաուդյան Արաբիայի գործարարից: Առուվաճառքից հետո սեփականատերը իրականացրել է 8 տարի տևած վերակառուցման աշխատանքները, որոնք արժեցել են 25 մլն ԱՄՆ դոլար և ավարտվել են ընդամենը 1 ամիս առաջ, ինչի արդյունքում առանձնատան գինն էականորեն աճել է: