Նոր Տարվա նախօրեին հայտնի բոստոնյան Ջոն Հենքոք երկնաքերը (John Hancock Tower) գնել է Բոստոն Փրոփերթիսը՝ (Boston Properties) ԱՄՆ $ 930 մլն-ով: Այս շենքը պատկանում էր Նորմանդի Ռեալ Իսթեյթ (Normandy Real Estate Partners) և Ֆայվ Մայլ Քէփիտալ Փարթներս (Five Mile Capital Partners) ընկերություններին, ովքեր 18 ամիս առաջ այն ձեռք էին բերել աճուրդի ժամանակ՝ ընդամենը ԱՄՆ $ 660,6 մլն-ով: Մեկ ու կես տարվա ընթացքում անշարժ գույքի վերավաճառքից ունենալ այսպիսի շահույթ՝ փայլուն գործարք է, ինչը մասնակիորեն ԱՄՆ-ի անշարժ գույքի շուկայի քաոսային վիճակի արդյունք է: Նշենք, որ այս հայտնի երկնաքերի արժեքը 2006-ին մոտ ԱՄՆ$1.3 մլրդ է եղել: Երկնաքերի հատակների ընդհանուր մակերեսը կազմում է 158.000 քմ: 60 հարկանի և 241 մետր բարձրությամբ Ջոն Հենքոք երկնաքերը կառուցվել է 1976 և դեռևս պահպանում է Բոստոնի ամենաբարձրահարկ շենքի տիտղոսը: Շենքը նախագծել է I.M. Pei & Partners ճարտարապետական բյուրոն, որը սույն նախագծի համար 1977 թվականին Ամերիկյան Ճարտարապետության Ինստիտուտի կողմից արժանացավ Ազգային Պատվո մրցանակի: Մասնագետների կարծիքով, լինելով ամբողջովին ապակեպատ, շենքի ճակատները արտացոլում են շրջակա պատմական կառույցների պատկերները, ինչի շնորհիվ քաղաքի պատմական մասի ճարտարապետությունը չի տուժում: Այս «ապակե փորձը» I.M. Pei & Partners-ը իրականացրեց նաև Փարիզի պատմական մասում՝ Լուվրի հանրահայտ ապակե բուրգի նախագծման և շինարարության ժամանակ: Իհարկե այս անգամ, ապակե բուրգը բավական քննադատության արժանացավ: Շենքը կրում է Ամերիկյան հեղափոխության պատրիոտ, Ամերիկայի Անկախության հռչակագրի ամենահայտնի ստորագրության հեղինակ և Մասաչուսեթսի առաջին նահանգապետ՝ Ջոն Հենքոքի (1737-1793) անունը: Ջոն Հենքոք անունը կրում է մեկ երկնաքեր ևս ՝ Ջոն Հենքոքի Կենտրոնը Չիկագոյում: Նրա բարձրությունը 344 մետր է և այն 100 հարկանի է:

Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) ամեն տարի անցկացնում է աշխարհի «Լավագույն բարձրահարկ շենք» մրցույթը: Նախապես ընտրվում են 4 աշխարհագրական տարածաշրջաններից լավագույնները, իսկ հետագայում նրանցից ամենալավը արժանանում է տարվա լավագույնի տիտղոսին: Այսպես, 2010 –ի արդյունքներով՝ Ամերիկայից լավագույնն է ընտրվել Նյու Յորքի «Բանկ օֆ Ամերիկա» երկնաքերը, (Bank of America Tower), Ասիական-Խաղաղօվկիանոսյան տարածաշրջանից՝ The Pinnacle@Duxton բնակելի համալիրը, Սինգապուր, Միջին Արևելքից և Աֆրիկայից՝ Դուբայի Բուրջ Խալիֆան (Burj Khalifa), իսկ Եվրոպայից՝ Լիդսում գտնվող «Broadcasting Place» համալսարանական համալիրը: Այս չորս ֆինալիստների մրցույթում «2010-ի լավագույն բարձրահարկ շենքի» պատվավոր տիտղոսին արժանացավ Լիդսի 70 մետրանոց «ժանգոտ երկնաքերը», որն իր այս ոչ պաշտոնական անունն է ստացել արտաքին ժանգոտ տեսքի պատճառով: Բայց, իհարկե, ատաքին տեսքի համար չե, որ այս շենքը արժանացել է ամենաբարձր գնահատականի: Մրցանակաբաշխման հանձնաժողովը, որը բաղկացած է ոլորտի առաջատար մասնագետներից, հաշվի է առնում գերազանցության բոլոր հատկանիշները՝ ճարտարապետական արտաքինը, կառուցվածքը, շինարարության իրականացման ձևերը, կյանքի համար անվտանգությունը, ազդեցությունը արտաքին միջավայրի վրա, ինժեներական լուծումներով կոմունալ ծախսերի նվազեցումը և շատ այլ պարագաներ: Այս «Ժանգոտ» շենքում գերազանց լուծումներ են տրվել լուսավորության օպտիմալ օգտագործմանը, բնական օդափոխությանը և երկրի ընդերքի ջերմության օգտագօրծմանը: Այս մրցույթը CTBUH-ն անցկացնում է 2007 թվականից, իսկ անցյալ տարվա մրցանակառուն Պեկինի Linked Hybrid բնակելի համալիրն էր: 220 000 քռ.մ տարածքով այս համալիրը, որը մաքսիմալ ուղղված է հետիոտների պահանջները բավարարելուն, իր բաց և հյուրընկալ ճակատներով հանդիսանում է քաղաքային հնարավոր զարգացման մի հիանալի օրինակ: Մի այլ CTBUH-ի պատվավոր ՝ 2010 Global Icon Award մրցանակի արժանացավ Դուբայի Բուրջ Խալիֆան (Burj Khalifa): Այս երկնաքերի աննախադեպ բարձրությունը (828մ), պահանջեց նախագծման և շինարարության իրականացման լրիվ նոր մոտեցումներ, իսկ «Y»-նման հատակագիծը թույլ տվեց մաքսիմալ օգտագործել բնական լուսավորությունը շենքի բնակիչների համար:

Դուբայը ցանկանում է սահմանել բարձրահարկ շինարարության բոլոր ռեկորդները: Տարվա սկզբին աշխարհի ամենաբարձր շենքը՝ 823 մ բարձրությամբ Բուրջ Խալիֆան իր դռներն էր բացել հասարակության առջև, իսկ հաջորդ տարվա վերջում Դուբայը պատրաստվում է մեկ այլ նոր համաշխարհային ռեկորդ սահմանել, այժմ «ամբողջովին բնակելի» երկնաքերերի մրցությունում: Ինչպես հաղորդում է Tameer կառուցապատող ընկերությունը, 414 մետր բարձրությամբ Արքայադստեր Աշտարակը (The Princess Tower) պատրաստ կլինի 2011 թվականի չորրորդ եռամսյակում: Դուբայ Մարինա (Dubai Marina) էլիտար թաղամասում գտնվող այս 723 բնակարան ունեցող 107 հարկանի երկնաքերը, սակայն, իր ռեկորդը երկար չի պահպանի, քանի որ 2013 թվականին, նույն թաղամասում, կավարտվի 516 մ բարձրությամբ 120 հարկանի լյուքս Pentominium Tower- ի շինարարությունը, որի նախագիծն արդեն արժանացել է մի քանի մասնագիտական մրցանակների: Ըստ Council on Tall Buildings and Urban Habitat-ի սահմանման, աշխարհի թիվ մեկ «ամբողջովին բնակելի» շենքի ռեկորդը այժմ պատկանում է 323 մ բարձրութամբ 78 հարկանի Q 1 երկնաքերին (Queensland Number One), որը գտնվում է Ավստրալիայում (Surfers Paradise, Gold Coast).

6 տարվա նախագծային և շինարարական աշխատանքներից հետո, 2010 թվականի սեպտեմբերի 30-ին Գուանջոուի «Կանտոնի Աշտարակը» այցելուների համար իր դռներն է բացել, և արդեն 2011 թվականի գարնանն այն պատրաստ կլինի ընդունելու առաջին բնակիչներին: 600 մետրանոց Գուանջոուի Աշտարակը այժմ աշխարհի ամենաբարձր հեռուստատեսության աշտարակն է, որը Տորոնտոյի 553 մ բարձրությամբ CN աշտարակից խլել է ռեկորդը: Սակայն աշխարհի ամենաբարձր աշտարակի այս ռեկորդը կտևի միայն մեկ տարի՝ մինչև 2012 թվականի գարունը, երբ Տոկիոյի Sky Tree 634 մետրանոց աշտարակը պատրաստ կլինի: Գուանջոուի Աշտարակը աշխարհում ամենատպավորիչ աշտարակներից մեկն է: Այս 130 հարկանի շենքում նախատեսված են գրասենյակներ, իսկ վերին հարկերը կզբաղեցնի Four Seasons շքեղ հյուրանոցային համալիրը , ինչը թույլ կտա հյուրանոցի այցելուներին վայելելու քաղաքի տեսարանը: Ինչպես նշում են ճարտարապետներ Մարկ Հեմելը և Բարբարա Կուիտը, նրանք ցանկացել էին նախագծել ազատ ոճի ոչ սիմետրիկ աշտարակ՝ որպեսզի «շարժման մեջ» տպավորություն ստեղծեն: Արդյունքում նրանց հաջողվեց ստեղծել «Սեքսուալ Կին», որն արդեն ձեռք է բերել «Սուպեր Մոդել» մականունը: Ըստ մասնագետների, այս սեյսմակայուն աշտարակը կօգտագործվի ավելի քան 100 տարի, և օրեկան կարող է մինչև 6000 այցելու ընդունել: Աշտարակի կրող կառուցվածքը նրա արտաքին պողպատե ցանցավոր ծածկույթն է, որը ներսից պահվում է «օղակների» համակարգի օգնությամբ: Վերին դիտահարթակը գտնվում է 450 մետր բարձրության վրա: Տոմսի գինը տատանվում է $ 7, $ 14 և $ 22 միջև`կախված տարբեր բարձրություններից: Գուանջոուի Աշտարակը հագեցած կլինի չորս արագընթաց վերելակներով՝ 10 մետր վայրկյան արագությամբ: Տեղադրվելու է նաև բարձրակարգ հակահրդեհային անվտանգության համակարգ՝ 1200 տոննա տարողությամբ երկու մեծ ջրի բաքերով, որոնք գտնվելու են աշտարակի 84-րդ հարկում:

Ճապոնական Obayashi Corp. շինարարական ընկերությունը, որը 2009 թվականի արդյունքներով աշխարհի խոշոր շինարարական կազմակերպությունների ցուցակում պատվավոր 22-րդ տեղն է զբաղեցնում, նախատեսում է մինչև 2012 թվականի գարնանը ավարտել աշխարհի ամենաբարձր շինություններից մեկի՝ 634մ բարձրությամբ Տոկիոյի Tokyo Sky Tree-ի շինարարարությունը: Նախկինում շինարարության ավարտը նախատեսվում էր 2011 թվականի վերջին: Հեռուստաաշտարակը, որի վերին մասը նախատեսված է թվային ալեհավաքների համար, կունենա աշխարհի ամենաբարձր դիտահարթակը՝ 450 մ նիշի վրա: Շինարարության պատվիրատուն է հանդիսանում Tobu Tower Sky Tree Co. Ltd.-ն, իսկ աշտարակի նախագծողն է Nikken Sekkei Ltd. ճարտարապետական բյուրոն: Աշտարակը կհամալրվի 6 Toshiba վերելակներով, որոնցից 4-ը նախատեսված են 40 հոգու համար և կսլանան 600 մ/րոպ արագությամբ: Դրանք Ճապոնիայում այսպիսի մեծ տարողությամբ վերելակներից ամենաարագն են լինելու: Հեռուստաաշտարակը կառուցվում է Obayashi կազմակերպության կողմից մշակված հատուկ հիմքերի վրա, ինչը կերաշխավորի աշտարակի բարձր կայունությունը երկրաշարժերի, ուժեղ քամիների և այլ ուժերի նկատմամբ: Նշենք, որ աշխարհի ամենաբարձր շենքի ռեկորդը դեռ պատկանում է Դուբայի Burj Khalifa երկնաքերին, որի բարձրությունը հասնում է 828 մ: