«ՍքայԹրան» (SkyTran) ընկերությունը նախատեսում է կառուցել 500 մետր երկարությամբ երկնային երկաթգիծ Իսրայելի «Աերոսփեյս Ինդասթրիս» (Israel Aerospace Industries) կոնցեռնի տարածքում: Ըստ նախնական տվյալների` տրանսպորտի նորագույն այլընտրանքային մեթոդը շահագործման կհանձնվի 2015 թ-ին: Յուրաքանաչյուր երկնային ավտոմեքենա կկարողանա տեղափոխել 2 ուղևորի, բայց ոչ թե ավանդական եղանակով, այլ կախված՝ մագնիսական երկաթգծի օգնությամբ: Ավտոմեքենաները սկզբնական շրջանում կերթևեկեն 70 կմ/ժամ արագությամբ, հետագայում, իհարկե, արագության բարձրացման հնարավորությամբ; Ի դեպ, ուղևորները կկարողանան երկնային ավտոմեքենա պատվիրել և կառավարել սմարթֆոնների օգնությամբ` նախապես նշելով այն անհրաժեշտ կայարանը, որտեղ պետք է մոտենա մեքենան: Նշենք, որ այս նախագիծը փորձնական ծրագիր է, որի հաջողությունից է կախված վերջինիս հետագա կենսունակությունը: Եթե այս փոքրիկ յուրօրինակ երկաթգիծն իրեն արդարացնի, ապա «ՍքայԹրան» ընկերությունը նախատեսում է ավելի երկար երկնային երկաթգծեր կառուցել Հնդկաստանում և ԱՄՆ-ում: «ՍքայԹրան» ընկերությունը ստեղծվել է Կալիֆորնիայում «NASA»-ի գիտական կենտրոնի հիման վրա, և նպատակն է հեղափոխություն կատարել ավանդական տրանսպորտային միջոցների շրջանում:
Դավիթ Ազրիելին՝ «Ազրիելի Գրուփ» (Azrieli Group) ընկերության գլխավոր բաժնետերը, մարտի 25-ին ղեկավարել է 200 մետր բարձրությամբ «Սարոնա Կենտրոնի» (Sarona Center) հիմնարկեքի արարողությունը: 50 հարկանի, 400 մլն ԱՄՆ դոլար արժողությամբ աշտարակը կկառուցվի Թել-Ավիվի Կիրյա (Kirya) գործարար թաղամասում, տեղեկացնում է The Jerusalim Post-ը: 2016 թ-ին շինարարության ավարտից հետո «Սարոնա Կենտրոնը» կդառնա Իսրայելի խոշորագույն գրասենյակային աշտարակը: Ըստ նախնական տվյալների՝ աշտարակի 125 հազար քառակուսի մետր մակերեսը կզբաղեցնեն գրասենյակային տարածքները, ինչպես նաև այնտեղ կլինի 1.6 հազար ավտոմեքենայի համար նախատեսված կայանատեղի և 3 հարկանի առևտրային կենտրոն՝ 11 հազար քառակուսի մետր մակերեսով: Նշենք, որ շինարարության ավարտից հետո «Սարոնա Կենտրոնը» կդառնա երկրի բարձրությամբ երկրորդ աշտարակը՝ առջևում թողնելով միայն 244 մետր բարձրությամբ, 68 հարկանի բազմաֆունկցիոնալ «Մոշե Ավիվ Աշտարակին» (Moshe Aviv Tower): «Ազրիելի Գրուփ» ընկերությունը շինարարության համար նախատեսված հողատարածքը ձեռք է բերել Իսրայելի իշխանություններից 140 մլն ԱՄՆ դոլարով անցած տարի: Նշենք, որ այս նոր աշտարակը նախագծել է Իսրայելի հայտնի ճարտարապետ Մոշե Ցուրը (Moshe Zur) «Դավիթ Ազրիելի Արքիթեքթս» (David Azrieli Architects) ընկերության ճարտարապետների հետ համատեղ: Վերջիններս աշտարակը նախագծել են պարզ երկրաչափությամբ, իսկ գրավչություն հաղորդելու համար այնպես են արել, որ ամբողջ շինությունից բացվի հիասքանչ տեսարան դեպի ծովը:
Երկար վեճերից և հետաձգումներից հետո Թել Ավիվում սկսվել է հանրային տրանսպորտային ցանցի շինարարությունը, տեղեկացնում է Constructiondigital կայքը: Լայթ Ռեյլ (Light Rail) նախագծի բյուջեն կկազմի 2.5 մլն ԱՄՆ դոլար, իսկ շինարարությունը, ըստ նախնական տվյալների, կավարտվի 2017 թ-ին: Դեռևս 2006 թ-ին նախագիծն իրականացնելու նպատակով Իսրաելում արտասահմանյան և տեղական կապալառուների կոնսորցիում էր ստեղծվել, սակայն 2010-ին ծրագիրը հետաձգվել էր: Այսօր վերսկսվել է նախագծի իրականացումը: Շինարարներն արդեն աշխատում են ծրագրի Կարմիր գծի 25 մետր խորությամբ թունելի վրա: Ըստ նախնական տվյալների՝ Կարմիր գիծը կունենա 23 կիլոմետր երկարություն, կսկսվի Թել Ավիվի հյուսիսային Պետահ Տիկվա (Petah Tikya) արվարձանից, կանցնի քաղաքի կենտրոնով և կհասնի հարավային Բատ Յամ (Bat Yam) արվարձան: Նախագծի 22 ենթադրյալ կայարաններից 10-ը կլինեն ստորգետնյա: Թել Ավիվը Իսրաելի երկրորդ խոշորագույն քաղաքն է՝ 3.3 մլն բնակչությամբ: Շինարարության ավարտից հետո Լայթ Ռեյլ նախագիծը կդառնա երկրի խոշորագույն և ամենաթանկ հասարակական տրանսպորտային ցանցը:
