Պրագայում 18 մլն ԱՄՆ դոլարով վաճառվել է յուրօրինակ ճարտարապետություն ունեցող գրասենյակային համալիր «Պարող Տունը»: Հանրահայտ ճարտարապետներ Ֆրենկ Գերիի և Վլադո Միլունիչի նախագծած խորհրդանշական կառույցը գնել է աշխարհահռչակ անշարժ գույքի կոլեկցիոներ և ներդրող Վացլավ Սկալան: Նշենք, որ նրանից բացի յուրօրինակ շինության սեփականութան իրավունքի համար պայքարում էին ևս 10 ներդրողներ հիմնականում Չեխիայից: «Պարող Տան» նախկին սեփականատերը, որը կառույցը ձեռք էր բերել 2011 թ-ին, «ՍիԲիԱռԻ» (CBRE) գլոբալ ներդրումների ընկերությունն էր: «Պարող Տունը» բաղկացած է 2 գլանաձև աշտարակներից, մեկը` բնական, մյուսը` դեստրուկտիվ: Նշենք, որ այս յուրօրինակ շինությունն ունի ևս մի անվանում` «Ջինջեր և Ֆրեդ»` ի պատիվ աշխարհահռչակ պարային զույգ Ջինջեր Ռոջերսի և ֆրեդ Աստերի: Գլանաձև աշտարակներից մեկը խորհրդանշում է տղամարդու, իսկ մյուսը կանացի մարմին: Գրասենյակային համալիրը կառուցվել է 1994-1996 թթ-ին 19-րդ դարում կառուցված և Երկրորդ համաշխարհային պատերազմի ժամանակ ավերված տան տեղում: 8 հարկանի գրասենյակային համալիրի ընդհանուր մակերեսը կազմում է մոտ 4 հազար քառակուսի մետր: «Պարող Տան» 6 հարկերը բացառապես օգտագործվում են որպես գրասենյակային տարածքներ ընդհանուր 2965 քառակուսի մետր մակերեսով: Շինության վերին հարկում տեղակայված է 679 քառակուսի մետր մակերեսով ռեստորանը, իսկ առաջին և ստորգետնյա հարկերում գտնվում է 400 քառակուսի մետր մակերեսով խորհրդակցությունների սրահը:
Չինաստանի Շանսի նահանգի Սիան քաղաքի իշխանությունների անուշադրության հետևանքով բնակելի շենքը հայտնվել է նորակառույց մայրուղու տարածքում: Բազմաբնակարան շենքը կառուցվել է բնակիչներին մեկ այլ շրջանից տեղափոխելու նպատակով, որտեղ նախատեսված էր այգի կառուցել: Վերաբնակեցումից մի քանի ամիս անց պարզ է դառնում, որ քաղաքային իշխանությունները ճանապարհային ծանրաբեռնվածությունը թեթևացնելու նպատակով պլանավորել են այս տարածքով ավտոմայրուղի կառուցել: Հենց այդ ժամանակ էլ պարզվում է, որ իշխանությունները կառուցապատող ընկերությանը թույլ են տվել կառուցել շենքի մեկ ավելորդ հատված: Արդյունքում ստացվել է այնպես, որ շենքը զբաղեցնում է մայրուղու երթևեկելի 8 գծերից 4-ը: Շենքի բնակիչները դժգոհ են նմանատիպ հարևանությունից, սակայն կրկին տեղափոխվել համաձայն են միայն խոշոր փոխհատուցման պարագայում: Քաղաքային իշխանությունները հաշվարկել և եկել են այն եզրակացության, որ բնակիչներին տեղափոխելը և շենքն ապամոնտաժելը բավականին թանկ է, ուստի որոշել են ամեն ինչ թողնել այնպես, ինչպես կա: Չինաստանում շատ են հանդիպում նմանատիպ շինարարական պատահարներ: Մասնավորապես, 2012 թ-ի դեկտեմբերին նույն Շանսի նահանգում բարձրահարկ թաղամասի շինարարությունը որոշ առումով ներգրավեց տեղական գերեզմանատան մի հատվածը: Հանգուցյալներից մեկի հարազատները, մատնանշելով առաջարկված ցածր փոխհատուցումը, հրաժարվեցին վերահուղարկավորել մարմինը: Արդյունքում շինարարական աշխատանքերը ծավալվեցին հողե հսկա բլրի շուրջը, որտեղ թաղված էր հանգուցյալը: Կրկին անցած տարի չինական Վենլինգ քաղաքում ընտանեկան զույգը հրաժարվեց լքել իրենց կիսաքանդ տունը, որը նախատեսվում էր ապամոնտաժել նոր մայրուղի կառուցելու համար: Նրանց հնարավոր եղավ համոզել միայն մայրուղու կառուցման ավարտին, երբ փոխհատուցման գումարը 35.3 հազար ԱՄՆ դոլարից բարձրացավ մինչև 41.8 հազար: Շինարարների կամ տեղական իշխանությունների անուշադրության հետևանքով նմանատիպ դեպքեր գրանցվում են ամբողջ աշխարհում: Վերջերս իսպանական մի ընկերություն կառուցել էր 47 հարկանի երկնաքեր և «պատահաբար» մոռացել էր վերելակի մասին :
Ճապոնիայի հյուսիս-արևելքում գտնվող Հոնսյու կղզու Տոհոկու շրջանում կառուցվել է աշխարհի խոշորագույն փչովի համերգասրահը, որը ստացել է «Արք Նովա» (Ark Nova) անվանումը, տեղեկացնում է Inhabitat կայքը: Կիսաթափանցիկ նյութից կառուցված հսկայական կառույցը կարելի է փչել ընդամենը 2 ժամում: Ներսում տեղակայված են բեմ և հանդիսասրահ՝ նախատեսված 500 հանդիսատեսի համար: Հարկ է նշել, որ նստատեղերը պատրաստված են եղենափայտից, որոնք 2011 թ-ին վնասվել էին Տոհոկու շրջանում մոլեգնած ցունամիից: Այս նախագծի հեղինակներն են ճարտարապետներ Անիշ Կապուրն ու Արատա Իսոձակին: Ենթադրվում է, որ ժամանակավոր կառույցը կճանապարհորդի ամբողջ շրջանում՝ հյուրընկալելով բազմաթիվ միջոցառումներ: Յուրօրինակ կառույցի բացումը նախատեսվում է հոկտեմբերի14-ին:
Լոնդոնյան «Սիթիում» կառուցվող «Ֆենչերչ սթրիթ 20» (20 Fenchurch Street) երկնաքերը դարձել է հարևանությամբ կայանած «Յագուար» մակնիշի ավտոմեքենայի որոշ հատվածների հալվելու պատճառ: Գործարար Մարտին Լինդսի (Martin Lindsay) խոսքերով, նա իր մեքենան կայանել է Իսթչիփ (East cheap) փողոցի վրա ընդամենը 2 ժամ, իսկ վերադառնալուց հետո տեսել է, որ մեքենան շրջապատված է բազմաթիվ հետաքրքրասեր լուսանկարիչներով: Բանն այն է, որ հալվել են բավականին ներկայանալի մակնիշի ավտոմեքենայի արտաքին և ներքին որոշ պլաստմասե հատվածներ, «Յագուար» պատկերանիշը, ինչպես նաև վնասված է կողային հայելին: Վերադարձից հետո ավտոմեքենայի սեփականատերը դիմային հայելու վրա գտել է հետևյալ երկտողը «Ձեր ավտոմեքենան ձևափոխվել է, կարող եք մեզ հետ կապնվել»: Հետագայում «Լենդ Սեքյուրիթիս» (Land Securities) և «Քանարի Վորֆ» (Canary Wharf) կառուցապատող ընկերությունները ներողություն են խնդրել Լինդսիից և համաձայնել վճարել «Յագուար» ավտոմեքենայի վերանորոգման ծախսը, որը կազմել է 1470 ԱՄՆ դոլար: Նշենք, որ ավելի վաղ նույն Իսթչիփ փողոցում վնասվել էր օդորակիչներ տեղադրող Էդի Քեննոնի «Վոքսհոլ Վեվարո» (Vauxhall Vevaro) ավտոմեքենան: Ներկայումս երկնաքերի կառուցապատողները ուսումնասիրում են ավտոմեքենաների վնասվելու պատճառները: Հավանական է, որ մեքենաների նմանօրինակ հալվելը կապված է երկնաքերի ոչ սովորական ձևի հետ՝ գոգավոր ապակիներից կազմված դիմային հատվածն անդրադարձնում է արևի ճառագայթները երկնաքերի կողքով անցնող փողոցի վրա: Հետաքննության ընթացքում երկնաքերի շրջակայքի որոշ հատվածներում կայանելն արգելվել է: Կառուցապատողները հույս ունեն, որ ապակիների հզոր անդրադարձը կարող են մեղմել հատուկ պաշտպանիչ թաղանթի միջոցով: 160 մետր բարձրությամբ, 37 հարկանի «Ֆենչերչ սթրիթ 20» երկնաքերը, որը հանրությանը հայտնի է նաև «Վոքի Թոքի» (Walkie-Talkie) անվանմամբ, կառուցվում է հայտնի ուրուգվայցի ճարտարապետ Ռաֆայել Վինոլիի նախագծով: Ըստ նախնական տվյալների՝ 200 մլն ֆունտ ստերլինգ բյուջեյով նախագիծը շահագործման կհանձնվի արդեն 2014 թ-ին:
Չինական Շենչժեն քաղաքի Նանշան շրջանում 19 հարկանի էլիտար բնակելի շենքի տանիքին կառուցվել է անօրինական տաճարանման կառույց, տեղեկացնում է China Daily պարբերականը: Ինչպես նշում է պարբերականը, տաճարի նմանվող շինությունը մի քանի տարի առաջ կառուցել է շենքի վերնահարկի բնակիչներից մեկը: Հարևանների խոսքերով, նա պարբերաբար այնտեղ անց է կացրել չինական ավանդական ծիսակատարություններ և խարույկներ է վառել: Անօրինական կառույցի վերաբերյալ բողոքներ ստացած իշխանական մարմինները մի քանի անգամ ստուգումների համար այցելել են տաճարի սեփականատիրոջը, սակայն վերջինս հրաժարվել է ընդունել նրանց: Դեպի տանիք էլ նրանց մուտքը փակել է հաստ մետաղյա դուռը և մատնահետքերով կոդավորված կողպեքը: Բացի այդ տանիքի մուտքին տեղադրված է տեսախցիկներ, իսկ բակից լսվում է շների հաչոց: Շինության կառավարիչ ընկերությունը հրաժարվել է որևէ տեղեկություն տրամադրել խորհրդավոր բնակչի մասին՝ հղում կատարելով մարդու իրավունքերից անհատի անձնական կյանքի անձեռնամխելիության դրույթին: Ընդ որում, ինչպես նշել է իշխանության ներկայացուցիչը, կառույցի անօրինականության մեջ համոզվելու համար ամենևին էլ անհրաժեշտ չէ այն ուսումնասիրել տեղում: Ինչպես նշել է նա հետաքննությունը կշարունակվի և անհրաժեշտության դեպքում դուռը կկոտրվի: Նշենք, որ ավելի վաղ նմանատիպ անօրինական կառույց էր հայտնաբերվել նաև Պեկինում : Հիվանդանոցների ցանցի տնօրեն Չժան Լինը 6 տարվա ընթացքում 26 հարկանի բնակելի շենքի տանիքին գտնվող փենթհաուսը վերածել էր բույսերով պատված արհեստական լեռան: ԶԼՄ-ների ահազանգից հետո իշխանության ներկայացուցիչները հրամայել են քանդել այն:
