Ի ուրախություն բոլոր ափամերձ հանգստյան գոտիների, ռեստորանների և սրճարանների սեփականատերերի` Արփա-Սևան թունելը (անվանափոխվել է Հայաստանի Կոմկուսի 1960-1966թթ. 1-ին քարտուղար Հակոբ Զորաբյանի անվամբ) վերակառուցվելու է, և Սևանա լճի մակարդակը չի կարողանալու բարձրանալ մինչ աշխատանքների ավարտը, իսկ մինչև ձմեռ այն նույնիսկ կիջնի 20 սմ-ով: Աշխատանքների կատարման համար հայտարարված մրցույթում հաղթող է ճանաչվել Արփա-Սևան համանուն կազմակերպությունը, որը նախատեսված աշխատանքների կատարման համար ամենացածր գինն է առաջարկել՝ 11.8 միլիարդ դրամ (32 միլիոն ԱՄՆ դոլլար): Ծրագրի ֆինանսավորումը իրականացվելու է Հայաստանի կառավարության կողմից և Աբու Դաբիի (ՄԱԷ) զարգացման հիմնադրամի աջակցությամբ: 48.2 կմ երկարություն ունեցող Արփա-Սևան թունելի շինարարությունը սկսվել էր 1961 թ. և ավարտվել էր 1981թ.-ին: Գլխավոր կապալառուն եղել է «Արփասևանշին» տրեստը՝ Արփա-Սևան կազմակերպության իրավահաջորդը: Թունելի շահագործումից հետո որպես Սևանը փրկելու ծրագրի շարունակություն կառուցվեց 21.6 կմ երկարությամբ Որոտանի թունելը՝ Որոտան գետի ջուրը Արփա գետ փոխադրելու համար: Վերանորոգման աշխատանքները շատ տեղին են ոչ միայն ափամերձ ձեռնարկատերերի համար, այլ նաև կառավարության համար, քանի որ վերջինս ժամանակ կշահի նախկին սխալները ուղղելու համար: Լճի ջրի բարձրացումը ծովի մակարդակից մինչև 1901մ բացարձակ նիշի (նախատեսվում է մինչև 2032 թվականը այն բարձրացնել մինչև 1903.5մ+1.5մ ալիքների համար) լուրջ խնդիրների հանգեցրեց՝ հեղեղելով ափամերձ տարածքները: Անհասկանալի է, թե ինչպես ջրի տակ հայտնվեցին անտառներ, բազմաթիվ կառույցներ, ճանապարհ ու խողովակաշարեր, և ինչու՞ ժամանակին չէր կարգավորվել ջրի հոսքը Արփա-Սևան թունելի միջով կամ լճից բացթողումներով, որպեսզի կանխվեր այս ամենը: Պետությանը հսկայական վնաս է հասցվել, քանի որ հեղեղված տարածքների մաքրումը արդեն իսկ շատ ավելի թանկ կարժենա: Համալիր միջոցառումները, որոնք մշակվել էին դեռևս 80-ականների սկզբին, նախատեսում էին մինչև 1905մ բարձրության ջրի բարձրացմանը զուգահեռ աստիճանաբար մաքրել ափամերձ տարածքները բոլոր կառույցներից, ծառերից ու բուսականությունից՝ բերրի հողի շերտից ամբողջությամբ: Նախատեսվում էր նոր անտառների, ինչպես նաև ճանապարհների և կառույցների ստեղծումը ավելի բարձր նիշերի վրա: Նշենք, որ մինչ Սևանի ջրի պաշարների օգտագործումը լիճը աչքի էր ընկնում աշխարհում եզակի ձկնատեսակներով: Դեռևս 40-50 տարի առաջ արված կանխատեսումների համաձայն` Սևանի ջրի ցածր մակարդակը պետք է հանգեցներ լճի ճահճացմանը, ինչն այսօր տեղի է ունենում: Սևանը փրկելու համար ջրի մակարդակը պետք է բարձրացվի առնվազն մինչև 1903,5 մ` միաժամանակ կատարելով տարածքների մաքրման բոլոր նախատեսված գործողությունները, քանի որ առանց հատակի մաքրման լճի մակարդակի բարձրացումը կհանգեցնի հակառակ արդյունքի և ավելի կարագացնի լճի ճահճացումը:

Իհարկե վախենում եք, այլապես Դուք շատ վատ եք տեղեկացված: Արդյոք տեղյակ եք, որ Global Facility for Disaster Reduction and Recovery կազմակերպության 2009 թվականի հաշվետվությունում երկրաշարժերի նկատմամբ խոցելիության տեսակետից Հայաստանը զբաղեցրել է առաջին տեղը: Երկրաշարժը կարող է հատկապես ծանր հետևանքներ ունենալ Երևանում, քանզի որոշ փորձագետների գնահատմամբ, եթե Հայիթիի (2010) կամ Սպիտակի (1988) մագնիտուդի ուժգնությամբ երկրաշարժ տեղի ունենա մայրաքաղաքում, ապա շենքերի մոտ 80% կփլուզվեն: Հնարավոր ուժեղ երկրաշարժը Երևանում կործանարար հետևանքների կբերի՝ ստիպելով բազում–անհամար մարդկանց լքել երկիրը, և գրեթե անհնարին կդարձնի մայրաքաղաքի և պետության վերականգնումը: Մենք տեսել ենք Սպիտակի երկրաշարժի հետևանքների վերացումը, որը շարունակվում է արդեն 21 տարի, և հետևում ենք Հաիթիի երկրաշարժից հետո վերականգնողական աշխատանքների ընթացքին... Եզրակացությունը մեկն է. չնայած տրամադրվող ահռելի միջոցներին՝ երկրաշարժից հետո ստեղծված քաոսային իրավիճակում գրեթե անհնար է արդյունավետ կազմակերպել վերականգնողական աշխատանքներ՝ հատկապես մայրաքաղաքում: Նույնիսկ վերակառուցման սցենարի հաջող ընթացքի դեպքպում մենք, միևնույնն է, չենք կարող հետ բերել հարյուր հազարավոր կորցրած մարդկային կյանքեր: Արդյոք՛ մենք դրան ենք սպասում: Այսօր գրեթե բոլոր մեր հիվանդանոցները և դպրոցները (առաջին հերթին), կառավարական, հասարակական, բնակելի և այլ նշանակության շենքերը վերակառուցման կարիք ունենք: Նրանց հիմնական մասը չի համապատասխանում սեյսմակայունության նորմերին, և եթե այժմ հնարավորություն չկա լայնածավալ համազգային վերակառուցում իրականացնելու, ապա պետք է սկսել գեթ մեկ սեյսմակայուն հիվանդանոցի կառուցումից: Աշխարհում աճում է տարերային աղետների թիվը, և ավելի դժվար է դառնում դրանց դիմակայելը, իսկ պետությունների օգնությունների հնարավորությունները հետզհետե սպառվում են... Խնդրում ենք բոլոր հետաքրքրված անձանց իրենց կարծիքն արտահայտել հարցի վերաբերյալ, ինչպես նաև խորապես գիտակցել հարցի կարևորությունը և իրենց հերթին անել հնարավորինս աջակցելու խնդրի լուծմանը:

Սեպտեմբերի 3-ին Կ. Դեմիրճյանի անվ. մարզահամերգային համալիրում բացվել է տասներորդ ունիվերսալ տարածաշրջանային “Armenia Expo 2010” ցուցահանդեսը, որը տարածաշրջանի ամենախոշոր է հանդիսանում: Ցուցահանդեսը տևեց երք օր՝ մինչև սեպտեմբերի 5-ը: Ցուցահանդեսի կազմակերպիչներն էին Հայաստանի Արդյունաբերողների և Գործարարների Միությունը և LOGOS EXPO կենտրոնը, իսկ գլխավոր ինֆորմացիոն հովանավորը հանդիսանում էր VivaCell-MTS: Ցուցահանդեսին մասնակցում էին ավելի քան 150 կազմակերպություններ՝ ինչպես Հայաստանից, այնպես 14 այլ երկրներից: Ցուցահանդեսը բացեցին Հայաստանի վարչապետ Տիգրան Սարգսյանը և Հայաստանի Արդյունաբերողների և Գործարարների Միության նախագահ Արսեն Ղազարյանը: Ցուցահանդեսի բացման արարողության ժամանակ վարչապետը իր ելույթում հատկապես կարևորեց արտասահմանյան կազմակերպությունների մասնակցությունը, ինչը թույլ է տալիս պահպանել ցուցահանդեսի միջազգային կարգավիճակը: Հիշեցնենք, որ ցանկացած ցուցահանդեսի նպատակն է ցուցադրել մարդու ձեռքբերումները որևէ բնագավառում, իսկ “Armenia Expo 2010” ցուցահանդեսինը՝ տնտեսության: Հուսով ենք, որ այն դրական դեր է խաղացել տարածաշրջանի տնտեսության ինտեգրման և զարգացման մեջ, չնայած այն հանգամանքի, որ ցուցահանդեսի 3-րդ օրը որոշ կազմակերպությունների տաղավարներ արդեն դատարկ էին:

Կարեն Դեմիրճյանի անվան մարզահամերգային համալիրում մեկնարկեց 7-րդ միջազգային Կովկաս Շինարարություն և Վերանորոգում ցուցահանդեսը որը կտևի օր 3՝ ապրիլի 2-4: Կազմակերպիչ` LOGOS EXPO Center-ը հավաստիացնում է, որ վերջին 10 տարիների ընթացքում այս շինարարական ցուցահանդեսը խոշրագույնն է Հայաստանում, որտեղ մասնակցում են տարբեր երկրներից ավելի քան 100 կազմակերպություններ: Ցուցահանդեսը միջազգային փորձի փոխանակման և շինարարական շուկայի ընդլայնման լայն հնարավորություն է ստեղծում:

Երևանում ստորգետնյա ավտոկայանատեղիների շինարարություն իրականացնելու համար ներկայումս ճշտվել է տարածքների ցանկը, ծրագրի իրագործման հեռանկարային ժամկետները և ֆինանսավորման աղբյուրները: Այս մասին Aysor-ի հետ զրույցում հայտնեց Երևանի գլխավոր ճարտարապետ Սամվել Դանիելյանը: «Ստորգետնյա ավտոկայանատեղիների շինարարությունն իրականացվելու է հիմնականում մասնավոր ներդրումների հաշվին, որոնցից թվով 5` «Ազատության», «Շահումյան», «Ազնավուրի», «Սախարովի» և «Ֆրանսիայի» հրապարակներում, ստորգետնյա ավտոկայանատեղերի ստեղծման կառուցապատման աշխատանքները նախատեսվում է ըստ առաջնահերթության ավարտել 2014 թ., որի արդյունքում կունենանք 2496 ավտոկայանատեղի»,- ասաց Ս. Դանիելյանը: Ըստ Երևանի գլխավոր ճարտարապետի, Գլխավոր հատակագծով և Երևան քաղաքի վարչական շրջանների գոտիավորման նախագծերով նախատեսված է ևս 9 ստորգետնյա ավտոկայանատեղիների կառուցում` «Հանրապետական մարզադաշտ», «Տաշիր հանրախանութ», Զավարյան փողոցի վրա` շուկայից դեպի ձախ ընկած հատված, «Կիլիկիա-1», «Կիլիկիա-2», «Կիլիկիա-3», «Ծիծեռնակաբերդի խճուղի-1», «Ծիծեռնակաբերդի խճուղի-2», Օղակաձև զբոսայգու «Արարատ» թենիսի կորտեր, «Էրեբունի հյուրանոցին հարող հրապարակ» տարածքներում: Դրանց կառուցապատման աշխատանքները նախատեսվում է ավարտել մինչև 2020 թ., որի արդյունքում կստեղծվի 2355 ավտոկայանատեղի: «Այդպիսով, ընդամենը 4851 ավտոկայանատեղի` միայն Կենտրոն վարչական շրջանում»,- ընդգծեց Ս. Դանիելյանը: Ազատության հրապարակում ստորգետնյա ավտոկայանատեղիի շինարարությունը, որը սկսվել էր 2008 թ. հոկտեմբերին, մոտենում է իր ավարտին: Այն նախատեսվում է շահագործման հանձնել 2010 թ. գարնանը: Եռահարկ ավտոկայանատեղին նախատեսված է 500 մեքենայի համար: Ս. Դանիելյանը նաև հայտնեց, որ մշակվել է 2009-2020 թթ. համար ստորգետնյա և վերգետնյա բազմահարկ ավտոկայատեղիների ստեղծման ծրագիր` Երևան քաղաքի թաղային համայնքների գոտիավորման նածագծերով նախատեսված ներբակային տարածքներում: Երևանում ստորգետնյա ավտոկայանատեղիների կառուցման հիմնական նպատակը փողոցները տրանսպորտային միջոցների կայանումից ազատելն է, հատկապես քաղաքի փոքր կենտրոնում: Հավելենք, որ ավտոկայանատեղիները լինելու են վճարովի: