Ապրիլի 29-ից մայիսի 1-ը Երևանի Կ. Դեմիրճյանի անվան մարզահամերգային համալիրում տեղի կունենա 4-րդ տարածաշրջանային մասնագիտացված «Շինարարություն և ինտերիեր 2011» խորագրով ցուցահանդեսը, որը կազմակերպել է «Պրոմ Էքսպո» ընկերությունը: Ինչպես ներկայացնում են ցուցահանդեսի կազմակերպիչները, վերջինս հետաքրքրություն է առաջացնում ոչ միայն տեղական, այլև արտասահմանյան ընկերությունների շրջանում: Հրավիրված են կազմակերպություններ Ռուսասատանից, Գերմանիայից, Անգլիայից, Իրանից, Իտալիայից և այլն: «Արմենպրես»-ին տրված հարցազրույցում ընկերության կոմերցիոն տնօրեն Վահագն Միրիջանյանն ասել է, - «Ընդհանուր առմամբ ցուցահանդեսին կմասնակցի շուրջ 160 գործարար: Նրանց շարքում են միջազգային կազմակերպություններ, որոնք նոր են սկսել գործել Հայաստանում կամ հետաքրքրված են հայաստանյան շուկայով: Այնուամենայնիվ, հիմնական շեշտը դնում ենք հայրենական արտադրողի գործունեությունը խթանելու և նրա պոտենցիալը ներկայացնելու վրա»: Նշեն նաև, որ վերջերս տեղի ունեցած «Կովկաս. Շինարարություն և վերանորոգում EXPO 2011» ցուցահանդեսը ցույց տվեց նմանատիպ միջոցառումների նկատմամբ հետաքրքրության բավականին անկում, սակայն, հույս ունենանք, որ գալիք ցուցահանդեսը առավել հետաքրքրություն կառաջացնի բոլոր շահագրգիռ կողմերի մոտ և կբերի նրանց ավելի ակտիվ մասնակցություն: Ցուցահանդեսը Բացվեց Այսօր տեղի ունեցավ «Շինարարություն և ինտերիեր 2011» ցուցահանդեսի բացումը: Ցուցահանդեսին մասնակցում է ավելի քան հարյուր կազմակերպություն, որի թիվը գերազանցում է նախորդ՝ «Կովկաս. Շինարարություն և վերանորոգում EXPO 2011» շինարարական ցուցահանդեսի մասնակիցների քանակը: Սակայն մասնակիցների քանակը տարեցտարի նվազում է ինչը թույլ է տալիս ենթադրել, որ կազմակերպություններն իրենց նոր արտադրանքի կամ ծառայութունների ներկայացման համար այլընտրանքային ուղիներ են փնտրում:
Նոր տարին սկսվեց այն լուրով, որ The World (Աշխարհ) արհեստական կղզիները աստիճանաբար սուզվում են ծովը: The World-ը բաղկացած է 300 կղզիներից՝ 55 քառակուսի կիլոմետր ընդհանուր մակերեսով և 232 կիլոմետր ափամերձ տարածքով: The World արհեստական կղզիների գործերը ի սկզբանե լավ չէին ընթանում և ի տարբերություն մեկ այլ բացառիկ նախագծի՝ Փալմ Ջումեյրաի (Palm Jumeirah), այս նախագիծը այդպես էլ չկարողացավ բավականաչափ ներդրումներ ներգրավել: Սակայն այսօրվա իրադարձությունների զարգացումը բոլորին զարմացրեց: Նախորդ շաբաթ Google-ը հայտարարեց, որ պատրաստվում է գնել այս արհեստական կղզիները և վերածել դրանք ընկերության- «Google» լոգոտիպի: Ըստ մտադրության, կղզիների վերակառուցումից հետո, Google բառի մեծատառ "G" տառը, որը կազմավորվելու է հինգ կղզիներից, կծառայի որպես կազմակերպության Դուբայի գլխավոր գրասենյակ ու աշխատողների հանգստավայր: Google-ը հայտնի է ապրելակերպի իր «կանաչ» մոտեցմամբ, և այս կղզիները նույնպես բացառություն չեն կազմի: Կղզիների բարեկեցիկ կյանքն ապահովելու նպատակով դրանք կհամալրվեն հողմային տուրբիններով, արեգակնային էներգիայի վահանակներով, ինչպես նաև մակընթացային էլեկտրակայաններով: Բացի դրանից Google-ը պատրաստվում է հրավիրել առաջատար ինժեներների, ովքեր կգնահատեն ջրի կողմից կղզիներին հասցրած վնասը և կներկայացնեն առաջարկներ, կղզիների ապահով ամրացման աշխատանքների համար:
Այս շաբաթ Ավիլեսում (քաղաք Իսպանիայի հյուսիսում) տեղի ունեցավ Նիմեյերի մշակութային կենտրոնի(Centro Niemeyer) բացման արարողությունը: Այս հավակնոտ նախագիծը կյանքի է կոչել հռչակավոր և փայլուն բրազիլացի ճարտարապետ Օսկար Նիմեյերը (ծնվել է 15.12.1907թ): Մշակութային կենտրոնի շինարարությունը սկսվել է 2007 թվականի ապրիլին: Պարուրաձև աստիճաններով այս արտասովոր կառույցը բաղկացած է եռահարկ գմբեթավոր թանգարանից, 1000 հանդիսատեսի համար նախատեսված դահլիճից, մոտ 4.000 քառակուսի մետր ցուցասրահից և դիտահարթակից, որից հիանալի տեսարան է բացվում դեպի քաղաքը և գետը: Ի հավելումն ցուցասրահների և դահլիճի, Centro Niemeyer-ում նախատեսված է կինոթատրոն, փորձերի համար նախատեսված սենյակներ, կոնֆերանս դահլիճներ և բաց տարածքեր տարաբնույթ մշակույթային ու հասարակական միջոցառումներ անցկացնելու համար: Centro Niemeyer-ը 103 տարեկան ճարտարապետի միակ ստեղծագործությունն է Իսպանիայում: Նախնական, սև հաստ մարկերով կատարված էսքիզները, այս մշակութային կենտրոնի ստեղծման հիմք են հանդիսացել, իսկ Օսկար Նիմեյերի խոսքերով, Centro Niemeyer-ը Բրազիլիայից դուրս եղած իր ստեղծագործություններից ամենասիրվածն է: «Ես առաջին անգամ եմ այսպիսի եզակի աշխատանք կատարում, և այն իմ ջանքերի ամենաբարձր կետերից է հանդիսանում՝ որպես ճարտարապետության փոխակերպումը դեպի արվեստ», - ասում է ճարտարապետը: Ըստ հեղինակի մտահաղացման, կենտրոնն իր դռներն է բացում դեպի արվեստը իր բոլոր ուղղվածություններով, ոճերով և ավանդույթներով՝ երաժշտություն, թատրոն, կինո, կոնֆերանսներ, կրթական ծրագրեր, ցուցահանդեսներ բաց երկնքի տակ և փակ սրահներում: Օսկար Նիմեյերը ժամանակակից բրազիլական ճարտարապետական դպրոցի հիմնադիրներից մեկն է, իսկ երկաթբետոնե ճարտարապետության առաջին նախաձեռնողներից ու փորձարկողներից է հանդիսանում: Նիմեյերի ճարտարապետությունը տարբերվում է ճկունությամբ, արտահայտչությամբ և ջերմությամբ: Ինչպես ճարտարապետն ինքն է նշում, - « Ինձ գրավում են ոչ՞ թե մարդու ձեռքով ստեղծված ուղիղ և անծռելի գծերն ու անկյունները: Այն ինչն ինձ գերում է, ազատ և զգայական գծերն են, որոնք ես գտնում եմ իմ երկրի սարերում, գետերի ոլորապտույտ հոսքում, սիրելի կնոջ մարմնում: »
Այս գարնանը Skype-ը իր հյուսիսամերիկյան գրասենյակը տեղակայել է Պալո-Ալտո (գտնվում է Սան Ֆրանցիսկոյից 60 կմ հեռու, Սիլիկոնային հովտում) քաղաքում : Այստեղ Skype-ը 5000 քառակուսի մետր գրասենյակային և տեխնիկական տարածք է զբաղեցնում նախատեսված 250 աշխատատեղերի համար: Գրասենյակի դիզայնը կատարել է ամերիկյան Blitz ճարտարապետական և դիզայնի ստուդիան: Blitz –ի մասնագետները ուսումնասիրել են աշխատանքային տարածքի տիպաբանությունը և թե ինչպես է շրջակա միջավայրը ազդում մտածական գործընթացի վրա: Այս հետազոտությունը հնարավորություն տվեց լիարժեքորեն հաղորդել Skype-ի հայեցակարգը և քաղաքականությունը: Ճարտարապետների ստեղծագործական խմբի ստեղծած այս ինտերիերի դիզայնը արտահայտում է Skype-ի «ազատ ոգին», իսկ մանրամասն մտածված հատակագիծը, դեկորի տարրերը, կահավորանքը և տեխնիկական հնարքները, ինչպես օրինակ “skype-its” շարժական սպիտակ գրատախտակներն են, օգնում են զգալ այդ ամենը: «Ազատ ոգին» ավելի վառ ընդգծելու համար Blitz-ի մասնագետները տեխնիկական տարածքների նախագծումն իրականացրել են լոֆտ ոճով (լոֆտ – տարածքների «բաց» դիզայնի տեսակ է, որը հիմնականում արդյունաբերական նշանակության տարածքները բնակելի կամ գրասենյակային տարածքների ձևափոխման արդյունք է), իսկ արդունավետ հանգստի համար աշխատանքային տարածքներին մոտ բազմաթիվ փոքրիկ «հանգստի կղզյակներ» են տեղակայված, որտեղ կարելի է ճաշել, սուրճ վայելել կամ սեղանի խաղեր խաղալ: Skype –ը հիմնադրվել է 2003 թվականին երկու ձեռներեցների ՝ շվեդացի Նիկլաս Զեննստրյոմի և դանիացի Յանուս Ֆրիիսի կողմից, իսկ ծրագրավորման հեղինակներն են էստոնացի ծրագրավորողներ Ահտի Հեյնլան, Պրիիթ Կասեսալուն և Յան Տալինը:
Բաթումիում տեղադրված արձանները խորհրդանշում են Ալիի և Նինոյի սիրո պատմությունը , Այս արձանների ամենահատկանշական առանձնահատկությունն այնն է, որ մետաղե կինն ու տղամարդը, գտնվելով մշտական շարժման մեջ յուրաքանչյուտ 10 րոպեն մեկ հանդիպում են: Այս ստեղծագործության հեղինակը հայտնի վրացի արվեստագետ Թամարա Կվերիտաձեն է: Մասնագիտությամբ ճարտարապետ Թամարան, Թբիլիսիում 1990-ականներին դրամ վաստակելու համար տիկնիկներ էր պատրաստում: Հետագայում նա տեղափոխվում է ԱՄՆ, որտեղ և հայտնի է դառնում իր ստեղծագործություններով, մի քանի ցուցասրահների կողմից առաջարկներ ստանալուց հետո: “Տղամարդը և Կինը” երկար ճանապարհ են անցել. ստեղծագործության փոքր տարբերակը վաճառվել էր Իտալիայում, հետագայում այն ցուցարդվել է Լունդոնի ցուցահանդեսներից մեկում, իսկ այսօր արձանի յոթ մետրանոց տարբերակը կանգնած է Բաթումիի ծովափում: Ամենադժվարը Սիրո արձանների մեծ տարբերակով ստեղծելն էր, և շուրջ տասն ամիս Գերմանիայի “Art Engineer” կազմակերպությունը աշխատել է նախագծի իրականացման վրա: յոթ տոննա քաշ ունեցող այս կառույցը հատուկ նախագծվել է և հաշվարկվել դիմակայելու բոլոր հնարավոր կլիմայական ազդեցություններին: Տղամարդու և Կնոջ արձանները սկսվում են շարժվել ամեն օր երեկոյան ժամը 7-ից, ղեկավարվում են համակարգչի օգնությամբ և հնարավորություն ունեն տարբեր գույների լուսավորության ընտրության, իսկ ծովը այս շարժվող կոմպոզիցիայի համար հիանալի լրացում է հանդիսանում:
