Չնայած այն փաստին, որ վերջին տարիներին Գերմանիան բազմաթիվ հաջողություններ է գրանցել վերականգնվող էներգիայի աղբյուրների ոլորտում, իսկ Ֆրանսիան համեստորեն լռել է, այսօր Եվրոպայի խոշորագույն արևային ֆոտովոլտայիկ տիպի էլեկտրակայանը կառուցվում է հենց այս երկրում: 300 մեգավատ հզորությամբ նորագույն արևային էլեկտրակայանը կառուցվում է ֆրանսիական Սիստաս (Cestas) քաղաքի մոտակայքում (Ակվիտանիա): Ըստ նախնական տվյալների՝ 450 մլն ԱՄՆ դոլար արժողությամբ էլեկտրակայանը 2015 թ-ի հոկտեմբերից կսկսի էներգիայով ապահովել հարևան Բորդո քաղաքը: Ի դեպ, շինարարության ավարտից հետո այս արևային էլեկտրակայանը կդառնա խոշորագույնն ամբողջ Եվրոպայում: Reuters լրատվական գործակալության տվյալներով, արևային էներգիայի արտադրությունը Ֆրանսիայում շատ դանդաղ է զարգանում: Ընթացիկ տարվա հունիսին երկրում արտադրվել է 5095 մեգավատ հզորությամբ էներգիա, այնինչ Գերմանիայում նույն ցուցանիշը կազմել է 37 հազար մեգավատ: Սակայն ինչպես պնդում է նախագծի հեղինակ և կառուցապատող «Նեոեն» (Neoen) ընկերությունը, խելամիտ մոտեցումը կարող է դառնալ հաջողության բանալի: Նշենք, որ վերջին տարիներին մի շարք եվրոպական երկրներ, այդ թվում նաև Իսպանիան, կանգնեցին «արևային փուչիկի» առաջ: Իսկ ահա Ֆրանսիան չունի ոչ մի անհաջող և կիսատ նախագիծ տվյալ ոլորտում, ինչն էլ օգնեց ընկերությանը շատ արագ և հեշտ ֆինանսավորում գտնել իր նախագծի համար: Դրանից բացի գրավիչ է նաև արտադրված արևային էներգիայի ցածր ինքնարժեքը, որը կազմում է 131.46 ԱՄՆ դոլար 1 մեգավատ ժամի համար ապագա 20 տարիների ընթացքում: Ինչպես հայտնել է Reuters գործակալությանը «Նեոեն» ընկերության գործադիր տնօրեն Քսավյե Բարբարոն (Xavier Barbaro), այսօր արևային էներգիան ավելի էժան է ատոմային էներգիայից: Բացի այդ, արևային էներգիայի գինը հետզհետե նվազում է և հասել է այնպիսի մակարդակի, որը 4-5 տարի առաջ կանխատեսում էին 2020 թ-ի համար:

Փարիզում հոկտեմբերի 20-ին երկրի նախագահ Ֆրանսուա Օլանդի գլխավորությամբ հանդիսավոր կերպով բացվել է նորագույն մշակութային կենտրոն: Louis Vuitton բրենդի ժամանակակից արվեստների թանգարանը կառուցվել է ֆրանսիացի միլիարդատեր Բեռնար Առնոյի ֆինանսավորմամբ: Բեռնար Առնոն ոչ միայն շքեղ աքսեսուարների արտադրությամբ և վաճառքով զբաղվող LVMH (Louis Vuitton - Mout Hennessy) ընկերության սեփականատերն է, այլև հազարավոր ժամանակակից արվեստի հավաքածուների սեփականատեր: Յուրօրինակ շինության նախագծման և կառուցման համար Առնոն հրավիրել է մերօրյա հայտնի և ամենաշատ վարձատրվող ճարտարապետներից մեկին` 85-ամյա Ֆրենկ Գերիին: Ի դեպ, Ֆրենկ Գերիի նախագծած իսպանական Բիլբաո քաղաքում գտնվող Գուգենհեյմի հիմնադրամի ժամանակակից արվեստի թանգարանի շենքով ոգեշնչված` միլիարդատերը ցանկացել է ունենալ նմանատիպ ոճով կառուցված մեկ այլ կառույց: Սառցաբեկոր հիշեցնող 46 մետր բարձրությամբ թանգարանի շենքը գտնվում է փարիզյան Բուլոնյան անտառի մի հատվածում: Շենքի ապակե ծածկույթը հիշեցնում է 12 առագաստներ, որոնք պատրաստված են 3800 ապակե վահանակներից, որոնցից յուրաքանչյուրի վրա յուրօրինակ նախշ է պատկերված: Թանգարանի պատշգամբներից գեղատեսիլ տեսարան է բացվում դեպի Փարիզն ու շրջակա բնակավայրերը: Միլիարդատիրոջը գոհացնելու նպատակով մեծանուն ճարտարապետը ստիպված է եղել թանգարանի շուրջ 60 տարբեր մակետ ներկայացնել: Նախագծի բյուջեն չի հայտարարվում, սակայն հայտնի է, որ վերջինիս նախնական գինը` 142.5 մլն ԱՄՆ դոլլար, էականորեն ավելացել է նախագծման և շինարարական աշխատանքների ընթացքում, որոնք տևել են 12 տարի: Ամբողջ շինարարական գործընթացին մասնակցել են ավելի քան 100 ճարտարագետներ: Վերջիններս ստիպված են եղել գտնել բարդ տեխնիկական լուծումներ, որոնք հնարավորություն են տվել ստեղծել փայտե և պողպատե ճառագայթների վրա հենվող ապակե հովանոց: Ցուցասրահի բացման հանդիսավոր արարողության ժամանակ Ֆրանսիայի նախագահը Ֆրենկ Գերիին խոստովանել է, որ ճարտարապետը յուրօրինակ երևակայություն ունի և ստեղծել է հրաշալի շինություն, որը կարելի է համարել 21-րդ դարի ճարտարապետության գոհար: Թանգարանում տեղակայվել են 11 ցուցասրահներ, լսարաններ, համերգասրահ և կինոդիտման սրահ: Ներկայումս թանգարանում ցուցադրված են հատուկ բացման արարողության համար նախատեսված մոտ 10 ժամանակակից արվեստի ցուցանմուշներ, ինչպես նաև Ֆրենկ Գերիի կողմից նախագծված բոլոր 60 մակետները: Հավաքածուների հիմնական մասը թանգարան կտեղափոխվի միայն հաջորդ տարվա սկզբին: Թանգարանն այցելուների առաջ իր դռները կբացի հոկտեմբերի 27-ից: Նշենք, որ ընդամենը 3 օր թանգարանի դռները բաց կլինեն բոլոր այցելուների համար, այնուհետև մուտքը կդառնա վճարովի: Նախատեսվում է, որ տարեկան թանգարան կայցելի 600-700 հազար մարդ: Ի դեպ, Փարիզի քաղաքապետարանի հետ կնքված պայմանագրի համաձայն` 55 տարի անց թանգարանի վարձակալած տարածքը կդառնա քաղաքի սեփականությունը:

Ամբողջ աշխարհից միլիոնավոր զբոսաշրջիկներ, որ գալիս են Փարիզ «Էյֆելյան Աշտարակը» դիտելու, այսուհետ կարող են զբոսնել ապակե հատակի վրա, որը կառուցվել է 38 մլն ԱՄՆ դոլար արժողությամբ աշտարակի վերականգնման նախագծի շրջանակներում: Նոր ապակե հատակը, որը տեղակայված է 57 մետր բարձրության վրա, այսօր իրենից կրկնակի զվարճանք է ներկայացնում` այցելուներին առաջարկելով հիասքանչ տեսարան դեպի քաղաքը և միևնույն ժամանակ յուրօրինակ տեսարան դեպի աշտարակը: Նշենք, որ մինչ օրս աշտարակի առաջին հարկն այնքան էլ հանրաճանաչ չէր: Զբոսաշրջիկներն այն դիտարկում էին որպես միջանկյալ հատված, որտեղով պետք է արագ անցնել, որպեսզի հասնեն 115 մետր բարձրությամբ երկրորդ հարկ և, իհարկե, ամենաբարձր` 279 մետր բարձրության վրա գտնվող դիտահարթակ, որտեղից բացվում է ֆրանսիական մայրաքաղաքի տպավորիչ տեսարանը: Այսուհետ ապակե հատակի շնորհիվ առաջին հարկը իր յուրօրինակությամբ կհավասարվի իր 2 «գործընկերներին»: «Սեն Գոբեն» ընկերությունը, որը զբաղվել է ապակե հատակի կառուցմամբ, հաշվի է առել այն փաստը, որ հատակի թափանցիկությունը պետք հասցնել առավելագույնի, իսկ սահելու հավանականությունը` նվազագույնի: Այդ է պատճառը, որ ամբողջ ապակու մակերեսին իրականացվել է տրաֆարետային տպագրություն բազմաթիվ կետերից (էմալ և հղկող մասնիկներ): Ավելի քան 18 ամիս են տևել այն հետազոտությունները, որոնց արդյունքում հնարավոր է եղել ստեղծել այնպիսի տեխնոլոգիա, որը ապահովի մեխանիկական հատվածներին գերազանց դիմակայություն` միևնույն ժամանակ պահպանելով արտադրանքի գրավչությունն օգտագործման ընթացքում: Հատակի համար նախատեսված ապակե թիթեղները պատրաստվել են լամինացված եռաշերտ ապակուց և գերդիմացկուն երկշերտ թաղանթից: Կառուցվածքի հաստությունը կազմել է 32 միլիմետր, իսկ բեռնատարողությունը` 500 կիլոգրամ 1 քառակուսի մետրի վրա: 1889 թ-ին կառուցված Գուստավ Էյֆելի ստեղծագործության վերակառուցումը, որի 125 ամյակը լրացել է այս տարի, տևել է 2 տարի` սկսած 2012 թ-ի մայիսից մինչ այս տարվա հոկտեմբեր: Բացի ապակե հատակի տեղադրումից առաջին հարկը հագեցել է էներգիա խնայող տեխնոլոգիաներով: Այստեղ տեղադրվել են 4 արևային մարտկոցներ, որոնց արտադրած էներգիան հնարավորություն է տալիս տաք ջրով ապահովել աշտարակի կարիքների կեսը: Բացի այդ տեղադրվել է անձրևաջրերի հավաքման տեխնոլոգիաներ, որոնց հավաքած ջուրը կօգտագործվի զուգարաններում: Նշենք, որ «Երկաթյա տիկնոջը» տարեկան այցելում է մոտ 7 մլն զբոսաշրջիկ, որոնց 85 տոկոսը օտարերկրացիներ են: Վերակառուցման նախագծի հեղինակները կարծում են, որ նմանատիպ նախագծից հետո աշխարհի ամենաայցելված զբոսաշրջիկային գեղատեսիլ վայրն ավելի շատ փարիզցիների կգրավի:

Փարիզի գործարար և բնակելի Լա դեֆանս (La Défense) թաղամասի կենտրոնական ճարտարապետական գլուխգործոցը`«Մեծ կամարը» (La Grande Arche), կառուցվել է 25 տարի առաջ, սակայն վերջինիս ճակատային մարմարե երեսպատումը արդեն վերանորոգման կարիք ունի, քանի որ քարերը կարող են ընկնել անցորդների վրա: Որոշակի ուսումնասիրություններից հետո Ֆրանսիայի կառավարությունը որոշել է մոտ 267.5 մլն ԱՄՆ դոլար գումար հատկացնել վերանորոգման աշխատանքների համար: «Մեծ կամարի» վերականգնումը նախատեսվում է սկսել արդեն այս տարվա հոկտեմբերին: «Մեծ կամարի» բարձրությունն ու լայնությունը կազմում է 110 մետր, և այն իր չափերով գերազանցում է «Փարիզի Աստվածամոր Տաճարը», բացի այդ վերջինիս ընդարձակ դիտահրապարակներն ու առևտրային կենտրոնները տարեկան գրավում են մոտ 250 հազար զբոսաշրջիկների: Փարիզի կարևորագույն գեղատեսիլ վայրերից մեկը նախագծել է դանիացի ճարտարապետ Իոհան Օտտո ֆոն Սպրեկելսենը (Johann Otto von Spreckelsen), սակայն հանկարծակի հիվանդության պատճառով շինարարության պատասխանատվությունն իր վրա է վերցրել ճարտրապետ Փոլ Անդրյոն (Paul Andreu): Որպես Փարիզի ծաղկման և տնտեսապես հզորացման խորհրդանիշ «Մեծ կամարը» հանդիսավոր կերպով բացվել է 1989 թ-ին: Վերջին ուսումնասիրությունները ցույց են տվել, որ այս հիանալի կառույցն անվտանգ չէ արտաքին միջավայրի համար: Բացի այդ եղանակային պայմաններն ու օդի աղտոտվածությունն էլ իրենց հերթին են դրոշմ թողել կառույցի վրա, ինչի արդյունքում հյուսիսային կողմից «Մեծ կամարն» արդեն իսկ փակվել է այցելուների համար: Ի հավելումն այս ամենի` շինության հարավային հատվածում տեղակայված գրասենյակների աշխատակիցները բողոքում են վատ աշխատանքային պայմաններից, հատկապես, որ բնական լուսավորությունը գրասենյակներում գրեթե բացակայում է: Ըստ վերջնական եզրակացության` հիմնական վերականգնողական աշխատանքները կիրականացվեն հարավային հատվածում և կտևեն 2 տարի:

Ֆրանսիայի հարավում 40 մլն եվրո արժողությամբ վաճառքի է հանվել աշխարհահռչակ Կոկո Շանելի «Լա Պաուզա» (La Pausa) առանձնատունը: 1325 քառակուսի մետր ընդհանուր մակերեսով տունը գտնվում է «Լա Տորակա» (La Toracca) բարձրավանդակի միջնադարյան Ռոկեբրյուն-Կապ-Մարտեն (Roquebrune Cap Martin) գյուղում ոչ հեռու Իտալիայի և Մոնակոյի հետ Ֆրանսիայի սահմանից: Առանձնատունը Շանելի համար նախագծել և կառուցել է ճարտարապետ Ռոբերտ Շտրայցը (Robert Streitz): Այն շրջապատված է զեյթունի այգիներով, իսկ պատուհաններից հիասքանչ տեսարան է բացվում դեպի Միջերկրական ծովը: Հավանաբար վերոնշյալ ռոմանտիկ բնապատկերը, նարգիզի և դաշտային ծաղիկների բույրը և ծովի զեփյուռն էլ ոգեշնչել են հանրահայտ մոդելավորողին ստեղծել «Շանել N 9 – Լա Պաուզա» բույրը: Պատմական առանձնատունը հյուրընկալել է իր տիրուհու այնպիսի հանրահայտ ընկերներին, ովքեր են Իգոր Ստրավինսկին, Պաբլո Պիկասսոն, Սալվադոր Դալին, Լուչիանո Վիսկոնտին: 50-ական թվականներին «Լա Պաուզան» ձեռք է բերել իր ժամանակի հանրահայտ գրական գործիչ Էմերի Ռեվեսը (Emery Reves), ով առանձնատունը դարձրել է սոցիալական միջոցառումների հիմնական հավաքատեղին: Այդ տարիներին «Լա Պաուզան» այցելում էին Գրետա Գարբոն, Մոնակոյի արքայազն Ռենե 3-րդը և արքայադուստր Գրեյսը, իսկ Ուիսթոն Չերչիլը որոշ ժամանակ ապրել է այստեղ և աշխատել իր քաղաքական գրառումների վրա: Լայնարձակ 4-հարկանի առանձնատունը «պատմությամբ է շնչում»՝ հնագույն գրադարան, հսկայական ճաշասենյակ, բուխարի, 7 ննջասենյակ, 4 հյուրասրահ, 6 լողասենյակ, ձեղնահարկի խոհանոց, մառաններ ու ծառայողական սենյակներ: Առանձնատան տարածքի ընդհանուր մակերեսը կազմում է 2.6 հեկտար, հողատարածքում տեղակայված է փոքրիկ տնակ 2 ննջարանով հյուրերի համար, ավտոտնակ, թեննիսի կորտ: Իսկ ահա այգին «Լա Պաուզայի» այցեքարտն է, որն անցյալում պատկանել է Մոնակոյի արքայական ընտանիքին: