2014 թ-ի վերջին ասիական «Ալիլա Հոթելս Ենդ Ռեզորթս» (Alila Hotels & Resorts) հյուրանոցային ցանցը նախատեում է բացել իր առաջին հյուրանոցը Օմանում: Ջաբել Ախդար (Jabal Akhdar) լեռնային գոտում կառուցվող հյուրանոց երկրի մայրաքաղաք Մասկատից հասնելու համար զբոսաշրջիկներից կպահանջվի մոտ 2 ժամ: Նշենք, որ սուլթանության վերոնշյալ վայրը գրեթե հայտնի չէ զբոսաշրջիկներին: «Ալիլա Ջաբալ Ախդար» (Alila Jabal Akhdar) անվանումը կրող հյուրանոցում կլինեն 78 սովորական, 6 սուիթ և 2 թագավորական սուիթ համարներ: Հյուրանոցում կլինի նաև բարձունքի վրա կառուցված ռեստորան, լողավազան, սպա-կենտրոն, ֆիթնես-ակումբ և զվարճանքների ու հանգստի համար նախատեսված հսկայական տարածք: Նշենք, որ հյուրանոցը կկառուցվի ծովի մակերևույթից 2000 մետր բարձրության վրա և մինչ այդ զբոսաշրջիկներին անծանոթ սուլթանության տարածքում իր հյուրերին կառաջարկի շքեղ հանգիստ: Նշենք, որ սա «Ալիլա Հոթելս Ենդ Ռեզորթս» ցանցի առաջին հյուրանոցն է Մերձավոր Արևելքում: Հյուրանոցային ցանցը նաև նախատեսում է նմանատիպ հյուրանոցներ բացել Ինդոնեզիայում, Չինաստանում և Եվրոպայում:

Հոնկոնգում 61 մլն ԱՄՆ դոլար արժեքով անհայտ գնորդին է վաճառվել քաղաքի ամենաթանկարժեք բնակարանը: Ինչպես տեղեկացնում են տեղական ԶԼՄ-ները, այս գնումը մեկ քառակուսի մետրի տեսանկունից ամենաթանկարժեք ու ռեկորդային նոր կառուցապատումն է ասիական տարածաշրջանում և երկրորդն ամբողջ աշխարհում՝ զիջելով միայն լոնդոնյան «Հայդ Փարք» (Hyde Park) բարձրահարկին: Էլիտար բնակարանը 576 քառակուսի մետր ընդհանուր մակերեսով գտնվում է «Օփուս» (Opus) բարձրահարկի 8-րդ հարկում: 12-հարկանի բնակելի շինությունը կառուցվել է Պրիտցկերյան մրցանակաբաշխության դափնեկիր Ֆրենկ Գեհրիի նախագծով: Այն բաղկացած է 10 էլիտար բնակարանից, որոնցից յուրաքանչյուրը մեկ ամբողջական հարկ է զբաղեցնում, իսկ ներքևի երկու հարկերում տեղակայված են 2 երկհարկանի բնակարաններ՝ սեփական այգիներով: Նշենք, որ մինչ այս Հոնկոնգում վաճառված ամենաթանկ բնակարանի գինը կազմել է 56.6 մլն ԱՄՆ դոլար: Իսկ աշխարհի ամենաթանկ բնակարանը վաճառվել է 2010 թ-ի սեպտեմբերին Մոնակոյում: 1600 քառակուսի մետր մակերեսով երկհարկանի փենթհաուսի արժեքը կազմել է 306.5 մլն ԱՄՆ դոլար:

Քաթարի վարչապետ, շեյխ Համադ բին Ջասսիմ բին Ջաբեր Ալ Թանին (Hamad bin Jassim bin Jaber al-Thani) պատրաստ է 100 մլն ԱՄՆ դոլար վճարել Նյու Յորքում կառուցվող «Ուան57» (One57) բնակելի երկնաքերում փենթհաուս գնելու համար, տեղեկացնում է The New York Post պարբերականը: Քաղաքի ամենաթանկ բնակարանն իրենից ներկայացնում է երկհարկանի գերժամանակակից հազար քառակուսի մետր մակերեսով փենթհաուս, որը գտնվում է երկնաքերի 90-րդ հարկում, որից հիանալի տեսարան է բացվում դեպի Կենտրոնական զբոսայգի (Central Park) և Մանհեթթեն (Manhettan): Ինչպես գրում է պարբերականը, շեյխն այս բնակարանով սկսել է հետաքրքրվել այն բանից հետո, երբ նրան մերժել են վաճառել 5-րդ Ավենյուում (5th Avenue) գտնվող միլիոնատեր Հյուգետ Կլարկին (Huguette Clark) պատկանող 31.5 մլն ԱՄՆ դոլար արժողությամբ բնակարանը: Ի դեպ, Քաթարի քաղաքական գործիչը նպատակ ունի նույն երկնաքերում ձեռք բերել ևս 4 բնակարան: Այս բնակարաններում, ըստ նախնական տվյալների, կապրեն շեյխի 2 կանայք և 15 երեխաները: Մասնագետների հաշվարկներով, Նյու Յորքի անշարժ գույքի շուկայում միլիոնատիրոջ ընդհանուր ներդրումը կկազմի 250 մլն ԱՄՆ դոլար: Նշենք, որ Նյու Յորքի անշարժ գույքի շուկայում նախկին գնային ռեկորդը պատկանում է անհայտ գնորդին, ով մայիսին 90 մլն ԱՄՆ դոլար գումար վճարեց նույն երկնաքերում գնվող փենթհաուսի համար: Ավելի վաղ, ռուս միլիարդատեր Դմիտրի Ռիբոլովլեվը 88 մլն ԱՄՆ դոլար էր վճարել Նյու Յորքում ուսանողուհի աղջկա համար գնված բնակարանի դիմաց:

Նյու Յորքի անշարժ գույքի շուկայում նոր ռեկորդ է սահմանվել՝ Մանհեթենում դեռ անավարտ բնակարանի համար անհայտ գնորդը վճարել է 90 մլն ԱՄՆ դոլար, տեղեկացնում են ամերիկյան ԶԼՄ-ները: Գնային նոր ռեկորդը սահմանվել է 57-րդ փողոցում կառուցվող «Ուան 57» (One57) բազմաֆունկցիոնալ երկնաքերի 89-90-րդ հարկերում գտնվող փենթհաուսի համար: Ի դեպ, մյուս տարի շինարարության ավարտից հետո «Ուան 57»-ը կդառնա Նյու Յորքի ամենաբարձր բնակելի երկնաքերերից մեկը: Նշենք նաև, որ դեկտեմբերից մինչ օրս արդեն վաճառվել է երկնաքերի 92 բնակարանները: Մինչ այս վերջին գնումը, Նյու Յորքի ամենաթանկ բնակարանը համարվում էր ռուս միլիարդատեր Դմիտրի Ռիբոլովլևի կողմից Սենթրալ Փարկ վեսթ Ավենյուում (Central Park West Avenue) ձեռք բերված 88 մլն ԱՄՆ դոլար արժողությամբ բնակարանը: Վերջինս 626 քառակուսի մետր մակերեսով 10 սենյականոց փենթհաուս է՝ Նյու Յորքի Կենտրոնական զբոսայգուն նայող տեսարանով: Այժմ նա իր բնակարանով արդեն երկրորդ տեղում է, սակայն քառակուսի ֆուտի արժեքի տեսանկյունից Ռիբոլովլևը մնում է բացարձակ առաջատար: Բանն այն է, որ նա իր բնակարանի 1 քառակուսի մետրի համար վճարել է 140 հազար ԱՄՆ դոլար գումար, մինչդեռ «Ուան 57»-ում քառակուսի մետրի գինը կազմել է 88,6 հազար ԱՄՆ դոլար և առավելագույնը կարող է հասնել 100 հազարի: Ոլորտի մասնագետների խոսքերով, վերջին ամիսներին օտարերկրյա գնորդները, մասնավորապես՝ բրազիլացիները, չինացիները, ռուսները և ուկրաինացիները, բացարձակ մեծամասնություն են կազմում Նյու Յորքի և Մայամիի անշարժ գույքի շուկաներում: Սակայն ինչպես նշում է «Էքսթելլ Դեվելոփմենթ» (Extell Development) ընկերության տնօրեն Գարի Բարնեթը (Gary Barnett), նոր ռեկորդ Նյու Յորքի անշարժ գույքի շուկայում սահմանած գնորդը ոչ ռուս է, ոչ ուկրաինացի, նա անգամ նախկին Խորհրդային Միության երկրներից էլ չէ: Դա Ամերիկայում հայտնի ընտանիք է, ով պատրաստվում է բնակվել ձեռք բերված բնակարանում: 90-հարկանի «Ուան 57» երկնաքերի շինարարությունը սկսվել է 2010 թ-ին: Ըստ նախնական տվյալների՝ շինարարության ավարտից հետո 2013 թ-ին այն կունենա 306 մետր բարձրություն, կներառի 135 բնակելի տարածք և 210 հյուրանոցային համար: Նշենք նաև, որ այս գեղեցիկ երկնաքերի ճարտարապետն է Պրիցկերյան մրցանակի դափնեկիր Քրիսթիան դե Ատելիեր Փորթզամփարքը (Atelier Christian de Portzamparc), իսկ շինարարությունն իրականացնում է «Էքսթելլ Դեվելոփմենթ» (Extell Development) ընկերությունը:

Պատրաստ եք, արդյոք, 300 ԱՄՆ դոլար ծախսել մեկ գիշեր «գետնի տակ» քնելու համար: Հավանաբար, յուրաքնաչյուրն էլ կհամաձայնի վճարել այդ գումարը, երբ տեսնի Չինաստանում «գետնի տակ» կառուցվող շքեղ հյուրանոցային համալիրի նախագիծը: Վերջին 10 տարիների ընթացքում Չինաստանը համարվում է երկնաքերերի շինարարության առաջատարը: Այսօր, նա պատրաստվում է գրավել երկնաքերերի մեկ այլ ոլորտ, որոնք արդեն կկառուցվեն ոչ թե դեպի երկինք, այլ դեպի երկրի ընդերք՝ այսպես կոչված «գետնաքերեր» (groundscrapers): Ինչպես տեղեկացնում է CNN International լրատվական գործակալությունը, անցած ամիս Շանհայում՝ «Տյանմուշան» (Tianmushan) բարձունքի ստորոտում, 100 մետր խորությամբ փոսի մեջ սկսվել է էլիտար հյուրանոցի շինարարությունը: 19 հարկից բաղկացած հյուրանոցի կառուցումը ձեռնարկել է Շանհայի «Շիմաո գրուփ» (Shimao) անշարժ գույքի ընկերությունը: 2014 թ-ի վերջին կամ 2015 թ-ի սկզբին՝ շինարարության ավարտից հետո, շքեղ ստորգետնյա հյուրանոցի ամենացածր հարկը Շանհայում կառուցվող «Ջեյ Հոթել» (J Hotel) հյուրանոցի ամենաբարձր հարկից ցածր կլինի ավելի քան 700 մետր: Ի դեպ, վերոնշյալ հյուրանոցը ևս նախատեսվում է շահագործման հանձնել 2014-2015 թթ-ին, իսկ շինարարության ավարտից հետո այն կհամարվի աշխարհի ամենբարձր հյուրանոցը: «Տյանմուշան» բարձունքի ստորոտում գտնվող հսկա փոսը, որը գտնվում է կենտրոնական Շանհայից 45 կիլոմետր դեպի հարավ-արևմուտք, ունի 100 մետր խորություն, 240 մետր երկարություն և 160 մետր լայնություն: Ըստ նախնական տվյալների՝ «Շանհայի Հրաշքների Երկիր ԻնտերԿոնտինենտալ Շիմաո» (InterContinental Shimao Shanghai Wonderland) հյուրանոցը կունենա 380 սենյակ, ստորջրյա ռեստորան, և բաղկացած կլինի 19 հարկից, որից 16-ը ստորգետնյա, 3-ը վերգետնյա: Նաև նախատեսվում է հյուրանոցի կողային մասում կառուցել 60 մետրանոց «ապակե վարագույր»՝ արհեստական ջրվեժի իմիտացիայի նպատակով: Պետք է նշել, որ այս փոսը առաջացել է 1950-ական թթ-ից սկսած, քարհանքի շահագործման հետևանքով, իսկ 2000-ին ամբողջովին լքվել է: 2006-ին «Շիմաո» ընկերությունը գնել է տարածքն այնտեղ հանգստավայր և հյուրանոց կառուցելու նպատակով: Հյուրանոցի նախագիծն իրականացրել է հանրահայտ «Աթքինս» (Atkins) ճարտարապետական բյուրոն, որը հեղինակ է նաև անկրկնելի Բուրջ Ալ Արաբ հյուրանոցի: Ի դեպ, անցած տարի այս «ստորգետնյա» նախագիծը MIPIM Asia ճարտարապետական ցուցահանդեսի ժամանակ արժանացել է ոսկե մեդալի: Ոլորտի փորձագետների կարծիքով շինարարության ավարտից հետո հյուրանոցում սենյակների գները 1 գիշերվա համար կլինեն 320 ԱՄՆ դոլարից ոչ պակաս, ինչը կրկնակի թանկ է, քան մյուս հինգ-աստղանի հյուրանոցների սակագները Շանհայի այս շրջանում: Նշենք նաև, որ 428 հազար քառակուսի մետր ընդհանուր մակերեսով հանգստավայրի կառուցման համար «Շիմաո» ընկերությունը նախատեսում է ծախսել ավելի քան 555 մլն ԱՄՆ դոլար: