Ամեն տարի միլիարդավոր պլաստիկե շշեր նետվում են աղբանոց և հինգից մեկն է միայն վերամշակվում: Սակայն Մասաչուսեթսի տեխնոլոգիական ինստիտուտի (MIT) մի խումբ ուսանողներ մշակել են նոր մեթոդ, որը հնարավորություն կտա պլաստիկե շշերի թափոններն օգտագործել բետոնի մշակման մեջ: Ինչպես տեղեկացնում է ինստիտուտի պաշտոնական կայքը (MIT News), նոր մեթոդի օգտագործումը հնարավորություն կտա դարձնել բետոնը առավել ամուր, ինչը նշանակում է որ մոտ ապագայում հնարավոր է շինարարության ընթացքում օգտագործեն այս նորագույն մեթոդով ստացված բետոնը: «Թափոնների կառավարում» (Waste Management journal) գիտական ամսագրում տպագրված ուսումնասիրությունը ներկայացնում է, որ նոր մեթոդով ստացված բետոնը 20 տոկոսով ամուր է ավանդական մեթոդով պատրաստված բետոնից: Այս նորագույն բետոնի ստացման եղանակը հետևյալն է. Սկզբում պլաստիկե շշերի թափոնները ենթարկվում են անվտանգ գամմա ճառագայթման, այնուհետև թափոնները մանրացվում են և ստացված փոշին խառնվում է բետոնի շաղախին: Արդարացիության համար նշենք, որ բետոնի ամրությունն այս մեթոդի միակ առավելությունը չէ: Ինչպես նշում է ինստիտուտի պաշտոնական կայքը, բետոնն այսօր աշխարհում համարվում է առավելագույն օգտագործվող շինանյութերից մեկը, իսկ ցեմենտի արտադրությանը բաժին է ընկնում տարեկան մթնոլորտ արտանետվող ածխաթթու գազի 4.5 տոկոսը: Նորագույն մեթոդը կկրճատի ոչ միայն վնասակար նյութերի արտանետումը մթնոլորտ, այլ նաև պլաստիկե շշերի թափոնների ծավալները:

Այսօր գիտնականների և հետազոտողների կարծիքով գրեթե անխուսափելի է դարձել ծովերի և օվկիանոսների մակարդակի բարձրացումը: Ճարտարապետները ևս եկել են նույն համոզմունքին և սկսել են նոր կոնցեպտներ մշակել: Ինչպես տեղեկացնում է inhabitat.com կայքը, իտալացի ճարտարապետ Լուկա Կուրչին հանրությանն է ներկայացրել իր նոր աշտարակի դիզայնը: «Ուղղահայաց քաղաք» աշտարակը, որը նախատեսվում է կառուցել օվկիանոսի հատակին, ինքնաբավարարվելու է սեփական ռեսուրսներով: Ըստ նախնական տվյալների՝ 750 մետր բարձրությամբ, 180 հարկանի աշտարակի ճակատային հատվածը երեսապատված է լինելու ֆոտովոլտաիկ ապակուց, որի շնորհիվ աշտարակն արտադրելու է բավարար քանակի էներգիա սեփական կարիքների համար: Աշտարակի ընդհանուր մակերեսը կկազմի է 17650 քառակուսի մետր, որտեղ կտեղակայվեն բնակարաններ, գրասենյակային, առևտրային և զվարճանքի տարածքներ: Ստորջրյա հարկերում կլինեն ավտոկայանատեղի, մարզասրահ, հանգստի սենյակ և այլն: Նախագծի հիմնական նպատակներից մեկը մարդուն բնության հետ կապելն է: Այդ իսկ պատճառով աշտարակում ամեն ինչ նախագծված է պարզ և բնությանը մոտ: Աշտարակի դիմային հատվածի վրա տեղակայված բազմաթիվ բացվածքների շնորհիվ մաքուր օդը և բնական լույսը մշտապես ներթափանցելու են ներս: Բացի այդ աշտարակում մոտ 20000 քառակուսի մետր տարածքում կտնկվեն բույսեր և ծառերը: Նախատեսվում է նաև յուրօրինակ այգի ստեղծել աշտարակի տանիքին:

Դուբայում գտնվող «Մուհամեդ իբն Ռաշիդ ալ Մակթումի անվան» արևային էլեկտրակայանը (Mohammed bin Rashid Al Maktoum Solar Park) ավելացնում է իր հզորությունը ևս 700 մեգավատով: Օրերս ստորագրվել է ծրագրի ընդլայնման նոր համաձայնագիր: Վերջինս նախատեսում է հավելյալ կոնստրուկցիաների ավելացում, որոնք հնարավորություն կտան 2030 թվականին գեներացնել մինչև 5000 մեգավատ էներգիա: Նոր նախագծի ավարտից հետո արևային այգու մակերեսը կկազմի 215 քառակուսի կիլոմետր, իսկ մթնոլորտ արտանետվող ածխաթթու գազի քանակը տարեկան կնվազի 6,5 մլն տոննայով: Այգու մեջտեղում կտեղակայվի 260 մետր բարձրությամբ աշխարհի ամենաբարձր արևային աշտարակը: Նշենք, որ նախագծի իրականացման մրցույթը շահել է Սաուդյան Արաբիայի ACWA Power և չինական Shanghai Electric ընկերություններից կազմված կոնսորցիումը: Արևային այգին շահագործման է հանձնվել 2013 թվականին 13 մեգավատ հզորությամբ: Այս տարվա սկզբին շահագործման է հանձվել կայանի երկրորդ հերթը 200 մեգավատ հզորությամբ: 2020 թվականին շահագործման կհանձնվի նախագծի երրորդ փուլը 800 մեգավատ հզորությամբ, որից հետո կսկսվի չորրորդ փուլի շինարարությունը: Արևային էլեկտրակայանների այս տեսակը գործում է ջերմային էլեկտրակայանների սկզբունքով, բայց այն տարբերությամբ, որ տուրբինները պտտող գոլորշին առաջանում է արևի ջերմային էներգիայի արդյունքում: Արևի ճառագայթները հայելիների օգնությամբ ուղղվում են դեպի արևային աշտարակը, որն իր հերթին գոլորշի է գեներացնում տուրբինների համար:

Կամչատկայի Պետրոպավլովսկում կառուցվում է գործող հրաբխի տեսքով հյուրանոցային համալիր, տեղեկացնում է Ռուսաստանի Հեռավոր Արևելքի զարգացման նախարարությունը: Որպես նախագծի գլխավոր կառուցապատող հանդես է գալիս «Նոր Տուն» (Новый Дом) ընկերությունը: Ըստ նախնական տվյալների՝ հյուրանոցային համալիրի բյուջեն կկազմի 22 մլն ԱՄՆ դոլար: Հյուրանոցային համալիրը բաղկացած է լինելու տարբեր բարձրություններ ունեցող մի քանի շինություններից: Ըստ կառուցապատողի՝ կառույցների հիմքային մասերը վերին մասերից տեսողական առանձնացված կլինեն, իսկ նմանատիպ մոտեցումը նախագծողներին հնարավորություն կտա ավելի անվտանգ շինություն նախագծել, որը կկարողանա դիմակայել 9 բալ հզորությամբ երկրաշարժի: Հյուրանոցային համալիրի ընդհանուր մակերեսը կկազմի 218 հազար քառակուսի մետր: Հյուրանոցը բաղկացած կլինի 150 համարներից, 25 մետր երկարությամբ լողավազանից, սպա-կենտրոնից, կորեական բաղնիքից, 600 հանդիսատեսի համար նախատեսված համերգասրահից, բարից և գրասենյակային տարածքներից: Հյուրանոցից ոչ շատ հեռու նախատեսվում է գեղեցիկ զբոսայգի կառուցել: Ինչպես տեղեկացնում է Արևելքի զարգացման նախարարությունը, այս պահին շինարարական աշխատանքներն իրակացվում են հյուրանոցային հիմնական աշտարակում, որը նախատեսվում է շահագործման հանձնել 2019 թվականին: Կառուցապատող ընկերությունը դեռ չի որոշել հյուրանոցային համալիրի անվանումը և որոշել է այդ առաքելությունը թողնել տեղի բնակչությանը:

Հայաստանում նախատեսվում է կառուցել առաջին արդյունաբերական մաշստաբի արևային ֆոտովոլտային կայանը: Ըստ նախնական տվյալների՝ «Մասրիկ 1» կայանի կառուցման համար պահանջվող ներդրումը կկազմի մոտ US$ 50 մլն: Կայանի նախատեսվող հզորությունը 55 մեգավատ է, և ըստ հաշվարկների՝ «Մասրիկ 1» տեղանքում՝ Գեղարքունիքի մարզի Մասրիկ համայնքում, 1 քառակուսի մետր արևային պանելից տարեկան հնարավոր է ստանալ մինչև 1800 ԿՎտ/ժամ էներգիա: Դեռևս այս տարվա հունվարին ավելի քան 40 օտարերկրյա ընկերություններ ժամանել էին Հայաստան մասնակցելու Արևային էներգետիկայի ներդրումային ժողովին և ծանոթանալու արևային էներգիայի զարգացման ներդրումային ծրագրերին: Կայանի կառուցման միջազգային մրցույթի առաջին փուլը ավարտվել է օրեր առաջ և երկրորդ փուլ են անցել 10 ընկերություններ և կոնսորցիումներ: Ծրագրի երկրորդ փուլը նախատեսվում է անցկացնել ընթացիկ տարվա սեպտեմբերին: Այս փուլում նիդեռլանդական, ամերիկական, կորեական, գերմանական և այլ արտասահմանյան ընկերություններ կմրցեն գնային առաջադրանքի համար: Բնականաբար նախապատվությունը կտրվի այն ընկերությանը, որը կներկայացնի ամենամրցունակ գնային առաջարկը: Մրցութային գործընթացը կավարտվի հաջորդ տարվա սկզբին և կմեկնարկի կայանի կառուցումը։ Ակնկալվում է, որ 2018-ին կսկսվի 55 մեգավատ հզորությամբ առաջին արևային համակարգային կայանի շինարարությունը։