Չինաստանի Հունան (Hunan) նահանգում ընդամենը 15 օրում, 170մ² հողատարածքի վրա կառուցվել է 30-հարկանի հյուրանոց տեղեկացնում է Constructiondigital կայքը: Չինական «Բրոուդ Գրուփ» (Broad Group) ընկերության կառուցած շենքում տեղադրված են էներգախնայող տեխնոլոգիաներ, և այն ընդունակ է դիմակայել 9 բալ ուժգնությամբ երկրաշարժի: Վերոնշյալ ընկերությունը նման կարճ ժամանակահատվածում կարողացել է կառուցել 30-հարկանի շենքը միմիայն «հավաքովի նախագծի» (Smart prefab design) շնորհիվ: Ի դեպ, նախագծման այս տեսակը հնարավորություն է տալիս շինության տարբեր հատվածները կառուցել շինհրապարակից դուրս՝ գործարանային պայմաններում, իսկ վերջնական շենքը հավաքել արդեն նախատեսված վայրում: Ինչպես անցած տարի գրել է մեր կայքը ,«Բրոուդ Գրուփ» ընկերությունն ամբողջ աշխարհում հայտնի դարձավ, երբ Չինաստանում ընդամենը 6 օրում կառուցեց 15-հարկանի «Տապան Հյուրանոցը» (The Ark Hotel): Ընկերության վերջին նախագիծն էլ կրկին Չինաստանում, Չանգշա (Changsha) քաղաքում կառուցված աշտարակն է, որի 90 տոկոսը նախօրոք կառուցվել է գործարաններում, և հետո միայն շինհրապարակում հավաքվել է շենքը: Ընկերությունն ապագայում նախատեսում է կառուցել 30–հարկանի նմանատիպ ևս 150 բնակելի շենքեր, հյուրանոցներ և գրասենյակներ: Ընթերցողի համար ավելի պարզ լինելու համար եկեք պարզաբանենք՝ ինչ է «հավաքովի նախագիծը» (prefab design) կամ «հավաքովի շենքը» (prefabricated building): Սա շինության կամ նախագծի այնպիսի տեսակ է, որը բաղկացած է գործարաններում նախօրոք կառուցված և շինհրապարակում հավաքված տարբեր մասերից: Այսօր շատ ճարտարապետներ իրենց նախագծերում օգտագործում են դիզայնի այս տարբերակը: Այս նախագծերում հնարավոր է օգտագործել «կանաչ» տեխնոլոգիաներ, կառուցապատողները կարող են ավելացնել նոր սենյակ կամ նույնիսկ արևային մարտկոցներ տեղադրել տանիքին: Պատմության մեջ հայտնի առաջին «հավաքովի տունը»՝ «Մենինգի հավաքովի քոթեջը» (Manning Portable Cottage) հանրությանը հայտնի է դարձել 1837 թ-ին հարավային Ավստրալիայում և գոյություն ունի մինչ օրս: Տան հատվածները կառուցել է լոնդոնցի հյուսն Մենինգը, իսկ ավելի ուշ բրիտանացի ներգաղթյալները Ավստրալիայում կառուվել են տնակը:

Ամենաթանկ երկնաքերի` «Յոնգսան Աշտարակի» (Yongsan Landmark Tower) շինարարությունը: 500 մետր բարձրությամբ, 100 հարկանի աշտարակի շինարարությունը նախատեսվում է ավարտել 2016 թ-ի վերջին: Սեուլի Յոնգսան (Yongsan) գործարար թաղամասում կառուցվող աշտարակը չի գերազանցի Դուբայի «Բուրջ Խալիֆի» (Burj Khalifa) երկնաքերի (828 մետր բարձրություն, 162 Ինչպես տեղեկացնում է English.chosen.com կայքը, այս շաբաթ Սեուլում սկսվել է աշխարհի հարկ) և Ջամսիլի «Լոտտե Սուպեր Աշտարակի» (Lotte Super Tower) (555 մետր, 123 հարկ) բարձրությունը, սակայն այն կլինի աշխարհի ամենաթանկ երկնաքերը մեկ քառակուսի մետր տարածքի արժեքով: Ըստ նախնական տվյալների՝ աշտարակի մեկ քառակուսի մետր մակերեսի շինարարությունը կարժենա մոտ 3150 ԱՄՆ դոլար, շենքի արժեքը՝ 1,2 մլրդ. ԱՄՆ դոլար, իսկ ամբողջ նախագծի բյուջեն ՝ ներառյալ հողի գինը կարող է հասնել 3,4 մլրդ. ԱՄՆ դոլարի: Պետք է նշել, որ սա ավելի թանկ է, քան ներկայիս աշխարհի ամենաբարձր աշտարակի շինարարությունը, որտեղ մեկ քառակուսի մետրի շինարարությունն արժեցել է մոտ 3000 ԱՄՆ դոլար և 40 տոկոսով ավելի թանկ, քան արժեցել է «Սամսունգ Գրուփ» ընկերության գլխավոր գրասենյակի շենքի մեկ քառակուսի մետրի շինարարությունը: «Յոնգսան Աշտարակը» նախագծել է հանրահայտ ճարտարապետ Ռենցո Պիանոի (Renzo Piano) գրասենյակը, որը նաև Փարիզի «Պոմպիդու» կենտրոնի (Pompidou Center) և Լոնդոնի «Թաուեր» կամրջի (Bridge Tower) հեղինակն է: Որպես նախագծի գլխավոր կապալառու հանդես է գալիս «Սամսունգ Գրուփ» (Samsung Group) ընկերությունը, որը նաև կառուցել է «Բուրջ Խալիֆի» և «Թայբեյ 101» աշտարակները: Համաձայն նախնական տվյալների՝ երկնաքերում կտեղադրվեն աշխարհի ամենաարագ վերելակները, որոնք կշարժվեն 800 մետր րոպեում արագությամբ, ինչը 6 անգամ ավելի արագ է, քան Կորեայի մյուս բարձրահարկերում աշխատող վերելակների արագությունը (120մ/ր): Շինարարության համար կօգտագործվի հատուկ հավելանյութերով պատրաստված գերխիտ բարձրորակ բետոն, որի ամրությունը մի քանի անգամ գերազանցում է սովորական բետոնների ամրությունը:

Վարշավայում առաջիկա տարիներին կկառուցվեն մի քանի նոր երկնաքերեր, որոնցից մեկը հավանաբար կդառնա Եվրոպայի ամենաբարձր աշտարակը, տեղեկացնում է The Warsaw Voice-ը: Դեռևս 2009 թ-ին Լեհաստանի ամենահարուստ մարդու՝ Յան Կուլչիկի (Jan Kulczyk) «Կուլչիկ Հոլդինգ» (Kulczyk Holding) ընկերությունը մտադիր էր կառուցել 282 մետր բարձրությամբ «Կուլչիկ Աշտարակը» (The Kulczyk Tower) «Զավիշի» (Zawiszy) հրապարակի մոտ: Բայց նախագիծը սառեցվեց, քանի որ խնդիրներ առաջացան օդային անվտանգության կանոնների պահպանման հետ: Այնուամենայիվ, այսօր օրենքները փոխվել են, և այլևս ոչ մի խոչընդոտ չկա շինարարությունը սկսելու համար: Ենթադրվում է, որ «Կուլչիկ Աշտարակը» կունենա 282.4 մետր բարձրությունը, որը 52 մետրով ավելին է, քան «Վարշավայի մշակույթի և գիտության պալատի» (Warsaw’s Palace of Culture and Science) շենքի բարձրությունը և 24 մետրով բարձր, քան Եվրոպայի ներկայիս ամենաբարձր երկնաքերը՝ «Կոմերրզբանկի» աշտարակը (Commerzbank Tower) Գերմանիայի Ֆրանկֆուրտ քաղաքում: Այն տարածքը, որտեղ պիտի կառուցվի «Կուլչիկ Աշտարակը» նախատեսվում է հետագայում անվանել «Վարշավյան Մանհեթթեն» (Warsaw Manhattan): Կառուցապատողներից շատերը այսօր ձգտում են այնտեղ բարձրահարկեր կառուցել: «Գելամքո Պոլանդ» (Ghelamco Poland) ընկերությունն այստեղ արդեն կառուցում է «Վարշավյան Գալար» (Warsaw Spire) նախագիծը, որը բաղկացած է մեկ 220 մետր բարձրությամբ և երկու 55 մետր բարձրությամբ աշտարակներից: Մի քանի տարի առաջ Վարշավայի Տովարովա փողոցում, որտեղ գտնվում է «Յուպիտեր» առևտրային կենտրոնը, իսպանական «Տորկա» (Torca) ընկերությունը տարածք էր գնել: Տեղական իշխանություններն արդեն թույլտվություն են տվել ընկերությանն այդ տարածքում կառուցել 170 և 130 մետր բարձրությամբ երկու աշտարակ: «Մարիոթ» հյուրանոցի և Վարշավայի երկաթգծի կենտրոնական կայարանի շրջակայքում ևս կկառուցվեն մի քանի աշտարակներ: Այստեղ նախատեսվում է կառուցել Զահա Հադիդի կողմից նախագծված 260 մետր բարձրությամբ «Շուշաններ» (Lilium) երկնաքերը, և նույն երկնաքերի արտաքին տեսքին համահունչ ևս երկու աշտարակ՝ 218 մետր բարձրությամբ: Վարշավայի սրտում՝ Տվարդա փողոցի վրա, «Հայնս» (Hines) ընկերությունը կկառուցի 160 մետր բարձրությամբ «Տվարդա» աշտարակը (The Twarda Tower), իսկ մեկ այլ լեհական ընկերություն 150 մետր բարձրությամբ «Դիփսըրվիս» (Dipservice) երկնաքերը: Նախորդ տասնամյակի սկզբում ամբողջ աշխարհի կառուցապատողները սկսեցին կառուցել բարձրահարկ շինություններ՝ շքեղ բնակարաններով: Նման գլոբալ նորաձևությունը մուտք գործեց նաև Լեհաստան: Մի քանի նման նախագծեր սկսվեցին, որոշներն էլ մնացին միայն գծագրերի տեսքով: Սկսված նախագծերից էլ որոշները հետագայում սառեցվեցին համաշխարհային տնտեսական ճգնաժամի պատճառով:

Ինչպես տեղեկացնում է Chinadaily ինտերնետային աղբյուրը, Պեկինում նախատեսվող ամենաբարձր աշտարակի կառուցապատողները հայտարարել են, որ նախագծի հիմարկեքի արարողությունը նախատեսված է սեպտեմբերի 19-ին: Նախագծի պատվիրատուն «ՍիԱյԹիԱյՍի Գրուփ» (CITIC Group - China International Trust and Investment Corporation)), ընկերությունն է, որը դեռ նախորդ տարվա դեկտեմբերի 21-ին քաղաքի կենտրոնական գործարար թաղամասում (Central Business District) ձեռք էր բերել 11.478 քառակուսի մետր տարածքի իրավունք՝ վճարելով 563 մլն ԱՄՆ դոլար: Ընկերությունը նախատեսում է կառուցել 510 մետր բարձրությամբ և 104 հարկանի աշտարակ, սակայն վերջնական նախագիծը դեռ հաստատված չէ և ընկերությունը սպասում է մունիցիպալ կառավարության թույլտվությանը: Նոր կառուցվող երկնաքերը կանվանվի «Չժունգո Զուն» (Zhongguo Zoon), ինչը նշանակում է Չինաստանի գավաթ: Ըստ նախնական տվյալների՝ շինարարությունը կավարտվի 5-7 տարուց, և արդյունքում երկնաքերը կունենա 350 հազար քառակուսի մետր հատակների ընդհանուր մակերես: Աշտարակը կկառուցվի քաղաքի կենտրոնական գործարար թաղամասի հյուսիսային հատվածում, որտեղ գտնվում են մի շարք հայտնի միջազգային կազմակերպությունների գրասենյակներ: Այստեղ է գտնվում նաև Պեկինի ներկայիս ամենաբարձր Չինաստանի համաշխարհային առևտրային կենտրոնի «3-րդ Աշտարակը» (Tower 3): Նշենք, որ երկնաքերի նախագծում գերակշռում են չինական ավանդական մշակույթի տարրերը, իսկ շինարարության ավարտից հետո այն քաղաքի բնակիչներին կհիշեցնի չինական հնագույն քաղաքները և լավագույնս կներկայացնի մայրաքաղաքը:

Սաուդյան Արաբիայի արքայազն Ալվալիդ իբն Թալալի (Alwaleed bin Talal) «Թագավորության Աշտարակ» (Kingdom Tower) նախագծի՝ աշխարհի ամենաբարձր երկնաքերի գլխավոր ճարտարապետն է ընտրվել Էդրիան Սմիթը (AS+GG ընկերություն - Adrian Smith + Gordon Gill Architecture): Նշենք, որ ամերիկացի ճարտարապետը բոլոր իրավունքներն ուներ դառնալու տվյալ նախագծի ճարտարապետը: Դեռևս 2008 թ-ին նա առնչվել էր այնպիսի երևույթների հետ, ինչպիսիքն են՝ քամու հորիզոնական դիվերգենցիան և բացասական ճնշումը, երբ նախագծում էր աշխարհի ներկայիս ամենաբարձր աշտարակը «Բուրջ Խալիֆան» (Burj Khalifa): Ինչպես մանրամասնել է Էդրիան Սմիթը Bloomberg լրատվական գործակալությանը տրված հարցազրույցի ժամանակ, կառույցը վեր կխոյանա տարբեր հիմքերով՝ 3 թեքված աշտարակների տեսքով, որոնք կավարտվեն տարբեր բարձրությունների վրա: Նման կառուցվածքը հնարավորություն կտա հավասարակշռել աշտարակի քաշը և դարձնել այն առավել ամուր, դիմացկուն այնպիսի քամիների նկատմամբ, որոնք ամենաբարձր հարկերում կարող են հասնել մինչև 190 կիլոմետր ժամ արագության: Երկնաքերը նախագծված է այնպես, որ 500 մետր բարձրության հատվածում կարող է տատանվել մոտ մետր մեծությամբ ուժեղ քամիների ժամանակ , որոնք լինում են միայն 50 տարին մեկ անգամ: Այդ տատանումն ավելի աննկատ կլինի եղանակային սովորական պայմաններում: Աշխարհի ամենաբարձր աշտարակի նախագծումը քամու դեմ պայքարից բացի նաև այլ խնդիրներ է պարունակում: Ինչպես նշում է գլխավոր ճարտարապետը, բավականին երկար ժամանակ պահանջվեց, որպեսզի օդաչուների և ճարտարապետների ընդհանուր քննարկումների արդյունքում ուղղաթիռային վայրէջքի հրապարակի փոխարեն նախագծվի դիտահարթակ, քանի որ ուղղաթիռային վայրեջքը այստեղ բավականին վտանգավոր էր: Գլխավոր խնդիրներից էր նաև աշտարակը ջրով ապահովելը: Ինչպես բացատրել է գլխավոր ճարտարապետը, ջուրը 163-րդ հարկ կմղվի փուլային տարբերակով, տարբեր հարկերում հավաքվելով նախապես տեղադրված կուտակային բաքերի մեջ, որպեսզի նվազեցվի խողովակների պատերին ճնշումը: Աշխարհի ամենաբարձր աշտարակը յուրաքանչյուր 20 հարկը մեկ կունենա բուժկետ, որտեղ մարդիկ կստանան բժշկական օգնություն և ջուր: Վերջիններս կծառայեն որպես անվտանգության կենտրոններ արտակարգ իրավիճակների ժամանակ: Ի դեպ, Սմիթը ցանկանում է որպես արտակարգ իրավիճակների ժամանակ այընտրանքային տարբերակ մշակել վերելակային համակարգից օգտվելը՝ հակառակ աշխարհում ընդունված այն կանոնի, որ վերելակներն արտակարգ իրավիճակների ժամանակ պետք է չաշխատեն: «Թագավորության Աշտարակի» արտաքին պատերը կլինեն ապակուց և ինչպես նշում է Սմիթը. «մենք կօգտագործենք ապակին, քանի որ այն քիչ խնամք է պահանջում և երկարակյաց է, բացի այդ այն արտացոլում է երկինքը և աշտարակին ավելի թեթև և էլեգանտ տեսք է հաղորդում»: Ըստ նախնական տվյալների՝ աշխարհի ամենաբարձր երկնաքերում էլիտար բնակարանների գները կմրցակցեն Դուբայի էլիտար բնակարանների գների հետ, և երկու ննջասենյակից բաղկացած բնակարանը կարժենա մոտ 800 հազար ԱՄՆ դոլար: