Ռուս գործարար Դմիտրի Ռիբոլովլեվը Նյու Յորքի կենտրոնում 88 մլն ԱՄՆ դոլարով գնել է քաղաքի ամենաթանկ բնակարանը, տեղեկացնում է New York Observer պարբերականը: Պարբերականը նշում է, որ Մանհեթենի անշարժ գույքի պատմության մեջ սա ամենաթանկ գործարքն է: Ռիբոլովլեվի գնած բնակարանը 10 սենյականոց փենթհաուս է՝ Նյու Յորքի Կենտրոնական զբոսայգուն (Central Park) նայող տեսարանով: Բնակարանի ընդհանուր մակերեսը կազմում է 626 քառակուսի մետր, բացի այդ այն շրջապատված է 190 քառակուսի մետր մակերեսով բացօթյա պատշգամբով: Որոշ տվյալներով, այս շքեղ բնակարանը գործարարը գնել է իր աղջկա՝ Եկատերինայի համար, ով այժմ սովորում է Նյու Յորքում: New York Observer պարբերականի տվյալներով, Ուրալկալիյ (Uralkali) ընկերության նախկին հիմնական սեփականատեր Ռիբոլովլեվը, իր 9.5 մլրդ ԱՄՆ դոլար ընդհանուր ունեցվածքով, աշխարհի ամենահարուստ մարդկանց ցուցակում զբաղեցնում է 93-րդ հորիզոնականը: Երբ նա տեղափոխվի Նյու Յորք ապրելու, կհամարվի քաղաքի հինգերորդ ամենահարուստ բնակիչը՝ զիջելով արտադրող Դեյվիդ Կոխին (David Koch), քաղաքապետ Մայքլ Բլումբերգին (Micheal Bloomberg), գործարար Ջոն Փաուլսոնին (John Paulson) և ֆինանսիստ Ռոնալդ Փերելմանին (Ronald Perelman): Նշենք, որ Նյու Յորքում Ռիբոլովլեվի հարևանն է մեկ այլ ռուս մեծահարուստ: Քաղաքի Կենտրոնական զբոսայգու մյուս կողմում էլ 48 մլն ԱՄՆ դոլարով Հոթել Պլազա (Hotel Plaza) համալիրում բնակարան է գնել երգահան Իգոր Կրուտոյը: Թերթը նաև գրում է, որ դեռևս 2008 թ-ին ամենահարուստ «պարարտացնող» ռուս գործարարը ձեռք էր բերել Ֆլորիդայում գտնվող Դոնալդ Թրամփի առանձնատունը 95 մլն ԱՄՆ դոլարով: Նայել բոլոր նկարները այստեղ:

Գերմանական Պորշե Դիզայն Գրուփ (Porsche Design Group) և տեղական Դեզեր Փրոփերթիս (Dezer Properties) ընկերությունները որոշել են Մայամիում կառուցել Պորշե Աշտարակը (Porsche Tower), տեղեկացնում է Trulia կայքը: 560 մլն ԱՄՆ դոլար արժողությամբ, 57 հարկանի աշտարակը կկառուցվի «Արևային կղզիների» (Sunny Isles Beach) ափին: Իսկ Մոսկովյան Սոթբիս Ինթերնեշնլ Ռիելթի (Sotheby’s International Realty) ընկերության տվյալներով՝ դեկտեմբերին ընկերություններն արդեն ստացել են քաղաքային մարմինների թույլտվությունը շինարարության համար: Ըստ կայքի, սա առաջին նախագիծն է աշխարհում, որ հնարավորություն կտա բնակիչներին սեփական ավտոմեքենայով հասնել բարձրահարկում տեղակայված իրենց բնակարան (չնայած մենք նախկինում գրել ենք գոյություն ունեցող նմանատիպ շենքի մասին): Սեփական բնակելի շենքի տարածքում ավտոկայանատեղիի որոնումն այլևս խնդիր չի լինի նրանց համար, ովքեր կկարողանան բնակարան ձեռք բերել այս երկնաքերում: Բնակիչները պարզապես սեփական ավտոմեքենաներով կմտնեն ապակեպատ վերելակ, կանջատեն շարժիչը և, վայելելով օվկիանոսի գեղեցիկ տեսարանը կհասնեն իրենց բնակարան, որ հարկում էլ, որ այն լինի: Արդյունքում հյուրասենյակն ու ավտոտնակը տեղակայված կլինեն միմյանց հարևանությամբ և իրարից անջատված ընդամենը ապակե պատով: Ըստ նախնական տվյալների՝ շենքը կկառուցվի Քոլինզ Ավենիույում (Collins Avenue) 9 հազար մակերեսով հողատարածքի վրա: Աշտարակում կլինեն 132 բնակարան, 284 ավտոկայանատեղի, որոնց կսպասարկեն 3 վերելակները: Համաձայն նախնական տեղեկությունների՝ բնակարանների մակերեսը կլինի 350-880 քառակուսի մետր, իսկ միջին գինը կկազմի 9 մլն ԱՄՆ դոլար:

Ինչպես տեղեկացնում է conastructiondigital կայքը, տեխնոլոգիական հսկա Facebook-ը հայտարարել է, որ պատրաստվում է իր գլխավոր գրասենյակը Պալո-Ալտոյից (Palo Alto) տեղափոխել Մենլո Պարկ (Menlo Park), Կալիֆորնիա: Ըստ նախնական տվյալների՝ նոր գրասենյակի շինարարությունը կարժենա 366 մլն ԱՄՆ դոլար: Բրիոն և Ասոշիեյթս (Brion & Associates) ընկերության հրապարակած վերլուծությունների համաձայն՝ Facebook-ի նոր գրասենյակի շինարարության նախնական բյուջեն կազմում է 250 մլն ԱՄՆ դոլար, սակայն 3-4 տարի տևող շինարարական աշխատանքների արդյունքում այն կարող է ավելանալ ևս 116 մլն ԱՄՆ դոլարով: Ենթադրվում է նաև, որ նոր գրասենյակը այս ժամանակահատվածում կստեղծի 2.5 հազար հավելյալ աշխատատեղ: Նոր գրասենյակի շինարարության պահանջարկն առաջացել է այն պատճառով, որ ընկերությունը պատրաստվում է հանդես գալ նոր առաջնային հանրային առաջարկով (IPO), որը կհասցնի նրա շահույթը 10 մլրդ ԱՄՆ դոլարից ավելի, իսկ կազմակերպության շուկայական արժեքը կանցնի 100 մլրդ ԱՄՆ դոլարը: Նշենք, որ Facebook-ի նոր գրասենյակում կաշխատեն 9.5 հազար ծառայող և, ըստ նախնական տվյալների, ընկերությունը տարեկան 30 մլն ԱՄՆ դոլար գումար կծախսի տարածաշրջանում բնակարանային և այլ ծառայությունների համար: Ի դեպ, ընկերությունը նաև նախատեսում է ընդլայնել իր գրասենյակները Նյու Յորքում և այլ քաղաքներում:

Վաղը, Դեկտեմբերի 9-ին Նյու Յորքի Գրանդ Սենթրալ (Grand Central) կայարանում տեղի կունենա Էփլ (Apple) ընկերության խոշորագույն խանութ-սրահի բացման հանդիսավոր արարողությունը, տեղեկացնում է The Huffingtom Post-ը: Նշենք, որ 2136 քառակուսի մետր ընդհանուր մակերեսով խանութ-սրահի շինարարությունը սկսվել է այս տարվա օգոստոսին: Apple ընկերության այս վաճառասրահը, որը թվով հինգերորդն է Նյու Յորքում, այժմ համարվում է ընկերության խոշորագույն խանութ-սրահը՝ հետևում թողնելով Լոնդոնյան հսկային: Լոնդոնյան Apple-ը գտնվում է Քոնվենթ Գարդենում (Convent Garden), որի ընդհանուր մակերեսը կազմում է 2320 քառակուսի մետր, սակայն միայն 1520 քառակուսի մետր տարածքն է բաց հանրության առաջ: Apple ընկերությունը, պայմանագիր կնքելով Նյու Յորքի մետրոպոլիտենի ղեկավարության հետ, նշված տարածքի օգտագործման իրավունքը գնեց նախկին վարձակալ Չառլի Փալմերի Մեթրոզուր ռեստորանից (Charlie Palmer's Metrazur restaurant)` վերջինիս վճարելով մոտ 5 մլն ԱՄՆ դոլար: Մետրոպոլիտենի ղեկավարությունը և Apple-ը պայմանագիր են կնքել 10 տարի ժամկետով, ընդ որում, ընկերությունը պարտավորվել է տարեկան վճարել 800 հազար ԱՄՆ դոլար վարձավճար: Ի դեպ, 10 տարի անց, ըստ նախնական պայմանավորվածության, վարձավճարը կարող է հասնել 1.1 մլն ԱՄՆ դոլարի: Գրանդ Սենթրալ տերմինալը բացվել է 1871 թ-ին: Այն համարվում է աշխարհի խոշորագույն երկաթգծային կայարաններից մեկը՝ 44 տարբեր հարթակներով, որոնք տեղակայված են 2 առանձին ստորգետնյա մակարդակների վրա: Ամեն օր կայարան այցելում են ավելի քան 750 000 մարդ և ըստ կանխատեսումների, Apple-ի այստեղ հայտնվելուց հետո այս ցուցանիշը ավելի կբարձրանա:

ԱՄՆ-ում 34 տարի առաջ տեղի ունեցած «Թրի Մայլ Այլենդ» ԱԷԿ-ի (Three Mile Island) խոշոր վթարից հետո առաջին անգամ որոշել են վերսկսել ատոմային նոր էներգաբլոկերի շինարարությունը, տեղեկացնում է constructiondigital կայքը: Չնայած ատոմային էներգիայի ապահովության առումով միջազգային հանրության մտահոգությանը` ԱՄՆ-ում 3 տասնամյակ անց, այնուամենայնիվ, կսկսվի նոր էներգաբլոկների շինարարություն: Թրի Մայլ Այլենդի վթարի ժամանակ շարքից դուրս էր եկել Փենսիլվանիա նահանգի Դոֆին շրջանում (Dauphin County) գտնվող 2-րդ էներգաբլոկը: Արդյունքում ավելի քան 40 հազար գալոն ռադիոակտիվ նյութ էր արտանետվել Սաքսուեհաննա (Susquehanna) գետ: Վթարի հետևանքների վերացման աշխատանքներն արժեցան ավելի քան 1 մլրդ ԱՄՆ դոլար: Հսկա վթարից հետո այսօր միայն որոշել են կառուցել նոր ատոմակայաններ: Ըստ նախնական տվյալների՝ ԱՄՆ կառավարությունը նախատեսում է 4 նոր կայան կառուցել՝ երկուսը Ջորջիա (Georgia), երկուսը Հարավային Կարոլինա (South Carolina) նահանգներում: Նոր կայանները կաշխատեն Տոշիբա (Toshiba Corporation) ընկերության տուրբինային սարքավորումներով: 2016 թ-ին այս նոր կայանների շինարարության ավարտից հետո, ԱՄՆ-ում ատոմակայանների թիվը կհասնի 108-ի: Պետք է նշել, որ 26 նախագիծ էլ դեռևս գտնվում է ԱՄՆ ատոմային էներգիայի կարգավորման խորհրդի (USA Nuclear Regulatory Commission) քննարկման փուլում: «Թրի Մայլ Այլենդ» ատոմակայանի վթարը, որը համարվում է ատոմային էներգետիկայի պատմության մեջ խոշորագույններից մեկը, տեղի է ունեցել 1979 թ-ի մարտի 28-ին Սաքսուեհաննա գետի վրա տեղակայված ատոմակայանում: Նշենք՝ մինչև Չերնոբիլյան վթարը, որը տեղի ունեցավ 7 տարի անց, «Թրի Մայլ Այլենդը» համարվում էր աշխարհի խոշորագույն վթարը այս ոլորտում, և մինչ օրս էլ համարվում է ԱՄՆ-ի ամենածանր ատոմային վթարը: