«Սավիլլս» (Savills) ընկերության կողմից պատրաստված «Աշխարհի քաղաքների ուսումնասիրություն» (World Cities Review) հաշվետվության համաձայն՝ 2012 թ-ի առաջին կիսամյակում Մոսկվան աշխարհի խոշորագույն 10 քաղաքների ցուցակում երկրորդ տեղն է զբաղեցրել անշարժ գույքի արժեքի աճի ցուցանիշով: Այս տարի այդ ցուցանիշով անվիճելի առաջատարը Հոնկոնգն է: Մասնագետների հաշվարկներով՝ տարվա առաջին կիսամյակի ընթացքում այս քաղաքում անշարժ գույքի գնի աճը կազմել է 7.4 տոկոս: Աճը բացատրվում է քաղաքում բնակարանների առուվաճառքի շուկայի կարգավորմամբ, տեղաբնակների կողմից պահանջարկի ավելացմամբ, ինչպես նաև հիփոթեքային վարկավորման պայմանների պարզեցմամբ: Հոնկոնգին հետևում են Մոսկվան և Սիդնեյը համապատասխանաբր 5.5 և 3.7 տոկոս գների ավելացմամբ: Ինչպես նշվում է ուսումնասիրության մեջ, այս տարի անշարժ գույքի շուկայում գործողությունների ակտիվությունը հիմնականում կախված է եղել տեղական պահանջարկի աճով և ամենամեծ աճ գրանցվել է այն քաղաքներում, որտեղ տեղական պահանջարկը եղել է խիստ բարձր: Միևնույն ժամանակ Լոնդոնի և Նյու Յորքի նման քաղաքները շարունակում են մնալ արտաքին ներդրումների ուշադրության կենտրոնում՝ գրանցելով գների կայուն աճ 2.8 և 1.7 տոկոս համապատասխանաբար: Հակառակ վերոնշյալին՝ ամենամեծ գնանկումը գրանցվել է Փարիզում՝ կազմելով 3.4 տոկոս: Նման իրավիճակը վերլուծաբանները բացատրում են եվրոգոտու ճգնաժամով, ինչպես նաև Ֆրանսիայի նորընտիր նախագահ Ֆրանսուա Օլլանդի կողմից առաջարկված «Շքեղության հարկի» վերաբերյալ նոր օրինագծով: Բացի այդ, ըստ մասնագետների, Փարիզում հետագա գնանկումն անխուսափելի է: Իսկ ահա Լոնդոնը, նրանց կարծիքով, հաղթող դիրքերում կլինի՝ միջազգային ներդրումների հաշվին: 2012 թ-ի առաջին կիսամյակում գների աճի բացասական դինամիկա գրանցվել է նաև Շանհայում (2.6 տոկոս) և Մումբայում (1.7 տոկոս), որոնք արդյունքում տուժել են ներդրողների փոփոխական տրամադրության արդյունքում:

Վերջերս Հունաստանի վարկային վարկանիշի իջեցումը ստիպել է երկրի կառավարությանը կտրուկ քայլերի գնալ: Ինչպես տեղեկացնում է Bloomberg լրատվական գործակալությունը, երկրի անշարժ գույքի սեփականաշնորհման գործակալությունը (HRADF) առաջարկում է վարձով հանձնել 40 անմարդաբնակ կղզիներ, որպեսզի որոշ չափով թեթևացնի պետական պարտքի բեռը: Հունաստանի անշարժ գույքի սեփականաշնորհման գործակալության գործադիր տնօրեն Անդրեաս Տապրանցիսը (Andreas Taprantzis) հայտարարել է, որ անմարդաբնակ կղզիները վարձով կհանձնվեն 50 տարի ժամկետով: Ավելի վաղ գործակալությունն ուսումնասիրել էր գոյություն ունեցող 6 հազար կղզիներից 562 և դրանցից էլ ընտրել 40-ը: Վարձով հանձնվող կղզիների մակերեսը կազմում է 500 հազար - 3 մլն քառակուսի մետր: Պրն. Տապրանցիսը նաև հայտարարել է, որ առաջարկվող կղզիներն ունեն լավ տարածք, զարգացած ենթակառուցվածքներ, գտնվում են ցամաքից ոչ շատ հեռու, բայց միևնույն ժամանակ դրանք այն տարածքներն են, որոնք ոչ մի կերպ չեն ազդում երկրի ազգային անվտանգության վրա: Նշենք, որ երկրի գործող օրենսդրությունը թույլ չի տալիս ոչ վաճառել, ոչ էլ վարձով հանձնել այդ կղզիները: Սակայն ստեղծված ֆինանսական բարդ դրությունը ստիպել է կառավարությանը անտեսել օրենսդրությունը: Նշենք, որ Հունաստանի անշարժ գույքի սեփականաշնորհման գործակալությունը մինչև 2020 թ-ը պետք է 50 մլրդ եվրոյի չափ եկամուտ ունենա, որպեսզի կարողանա ստանալ 240 մլրդ եվրոյի չափով վարկ: Անցած տարվա սկզբին Հունաստանի կառավարությունը հայտարարել էր իր նպատակների մասին, վարձով հանձնել իր պատմական հուշարձանները, այդ թվում՝ «Ակրոպոլիսը» (Acropolis) և «Ապոլոնի տաճարը» Դելֆի (temple of Delphi) քաղաքում: Ի դեպ, Հունաստանը միակ եվրոպական երկիրը չէ, որը, կանգնած լինելով ծանր տնտեսական ճգնաժամի առաջ, ստիպված է վարձով հանձնել կամ վաճառել պատմական անշարժ գույք: Մի քանի ամիս առաջ Իտալիայի կառավարությունը ևս նման որոշում է կայացրել և վաճառքի է հանել երկրի մի շարք պատմական ամրոցներ և պալատներ:

Հոնկոնգում 61 մլն ԱՄՆ դոլար արժեքով անհայտ գնորդին է վաճառվել քաղաքի ամենաթանկարժեք բնակարանը: Ինչպես տեղեկացնում են տեղական ԶԼՄ-ները, այս գնումը մեկ քառակուսի մետրի տեսանկունից ամենաթանկարժեք ու ռեկորդային նոր կառուցապատումն է ասիական տարածաշրջանում և երկրորդն ամբողջ աշխարհում՝ զիջելով միայն լոնդոնյան «Հայդ Փարք» (Hyde Park) բարձրահարկին: Էլիտար բնակարանը 576 քառակուսի մետր ընդհանուր մակերեսով գտնվում է «Օփուս» (Opus) բարձրահարկի 8-րդ հարկում: 12-հարկանի բնակելի շինությունը կառուցվել է Պրիտցկերյան մրցանակաբաշխության դափնեկիր Ֆրենկ Գեհրիի նախագծով: Այն բաղկացած է 10 էլիտար բնակարանից, որոնցից յուրաքանչյուրը մեկ ամբողջական հարկ է զբաղեցնում, իսկ ներքևի երկու հարկերում տեղակայված են 2 երկհարկանի բնակարաններ՝ սեփական այգիներով: Նշենք, որ մինչ այս Հոնկոնգում վաճառված ամենաթանկ բնակարանի գինը կազմել է 56.6 մլն ԱՄՆ դոլար: Իսկ աշխարհի ամենաթանկ բնակարանը վաճառվել է 2010 թ-ի սեպտեմբերին Մոնակոյում: 1600 քառակուսի մետր մակերեսով երկհարկանի փենթհաուսի արժեքը կազմել է 306.5 մլն ԱՄՆ դոլար:

Իտալիայում տիրող ծանր տնտեսական դրությունը ստիպել է կառավարությանը վաճառքի հանել երկրի մի շարք պատմական ամրոցներ և պալատներ: Այսպիսով երկիրը ցանկանում է աշխատել 42 մլրդ եվրո գումար, որը կծախսվի երկրի համեմատաբար աղքատ շրջանների պարտքերի մարման նպատակով: Ընդհանուր առմամբ վաճառվում է 350 շինություն, որոնց թվում են՝ Վենետիկի «Մեծ Ջրանցքի» վրա կառուցված «Դիեդո Պալացցոն» (Diedo Palace), որը սկզբում պատկանում էր Օրսինի (Orsini) հայտնի ընտանիքին, իսկ անյուհետև սկսվեց օգտագործվել որպես բանտ: Իրենց գնորդներին են սպասում նաև Բոլոնիայի զինվորական զորանոցները, որոնք նախկինում պատկանում էին Իտալիայի Պաշտպանության նախարարությանը: Նշենք, որ Իտալիայի կառավարությունը նախատեսում է վաճառքի առաջին փուլից հետո վաստակել մոտ 1.5 մլրդ եվրո, իսկ ընդհանուր առմամբ շուկա վաճառքի է հանվել 42 մլրդ եվրո արժողությամբ շինություններ: Ի դեպ, միայն «Դիեդո Պալացցո» ամրոցի վաճառքից գոյացած գումարը կկազմի 19 մլն եվրո: Վենետիկը բացի հանրահայտ ամրոցից վաճառքի է հանել ևս 17 անշարժ գույք: Միլանում վաճառվող անշարժ գույքի քանակը հասնում է 100-ի: Վերջիններիս շարքում է «Բոլիս Գուալդո Պալացցոն» (Palazzo Bolis Gualdo), որը գնահատվում է մոտ 31 մլն. եվրո: Նշենք, որ Իտալիան միակ եվրոպական երկիրը չէ, որ ցանկանում է վաստակել պատմական հուշարձաններով: Այս տարվա սկզբին Հունաստանը ևս նմանատիպ քայլի էր դիմել՝ իր պատմական հուշարձանները վարձակալությամբ հանձնելու մասին հայտարարությամբ:

Ֆլորիդա նահանգի Պալմ-Բիչ քաղաքում գտնվող առանձնատունը, որտեղ ապրել և մահացել է մաֆիայի պարագլուխ Ալ-Կապոնեն, վաճառքի է հանվել 9.95 մլն ԱՄՆ դոլարով: Մինչ օրս առանձնատունը բազմաթիվ սեփականատերեր է ունեցել, բայց վերջին սեփականատերը՝ Փիթեր Կորսելը, ավելի քան 1 տարի է ծախսել առանձնատունն իր նախնական տեսքին բերելու համար: Այսօր Ֆլորիդայում գտնվող առանձնատունն ունի այն տեսքը, երբ այնտեղ ապրել է հայտնի մաֆիոզը: Կորսելի ջանքերով վերանորոգվել է պատշգամբը, դարպասների մոտ գտնվող պահակատունը, բրոնզե արձանիկները, ծովափը, որտեղ Կապոնեն ձուկ է բռնել, նրա սեփական լոգասենյակը, որը նախագծված էր «Ար-դեկո» ոճով՝ սև-ոսկեգույն գույներով: Ատլանտյան օվկիանոսի ափին գտնվող առանձնատունը Կապոնեն գնել էր 1928 թ-ին 40 հազար ԱՄՆ դոլարով, այն ժամանակ, երբ գտնվում էր իր հանցագործ կարիերայի գագաթնակետին: Այստեղ է նա սպասել «Ալկատրաս» բանտ տեղափոխմանը, երբ մեղադրվում էր հարկերից խուսափելու մեջ: Հենց այս առանձնատանն էլ մահացել է նա 1947 թ-ին՝ սիրող հարազատներով շրջապատված: