Հղում կատարելով Թաթարստանի փոխվարչապետ, կապի և տեխնոլոգիաների նախարար Նիկոլայ Նիկիֆորովի հայտարարությանը՝ digit.ru կայքը տեղեկացնում է՝ 2012 թ-ին Թաթարստանում նախատեսվում է սկսել ՏՏ-համայնքի (IT-Village) շինարարությունը, որտեղ պիտի ապրեն և աշխատեն տեղեկատվական տեխնոլոգիաների ոլորտի աշխատակիցները: Թաթարստանի Վերխնեուսլոնյան (Верхнеуслонский) մարզում 12 մլն քառակուսի մետր մակերեսով ՏՏ-համայնքի կառուցման վերաբերյալ որոշումն ընդունվել է 2010թ-ին: ՏՏ-համայնքի հատակագծի նախագծման նպատակով Թաթարստանը պայմանագիր է ստորագրել սինգապուրյան «ԱռԷսՓի Արքիթեքթս և Էնջինիրս» (RSP Architects&Engineers) ընկերության հետ: Մայրաքաղաք Կազանից 35 կիլոմետր հեռավորության վրա կառուցվող համայնքում պետք է ստեղծվեն ժամանակակից կյանքի համար անհրաժեշտ բոլոր պայմանները: Սինգապուրյան կազմակերպությունը համայնքը նախագծում է՝ առաջնորդվելով «Ապրի, սովորի, աշխատի և հանգստացի» նշանաբանով: Նախագիծը կիրականացվի պետական-մասնավոր համագործակցության դասական տարբերակով: Նախնական տվյալներով նախագծի իրականացման բյուջեն կկազմի 90-120 մլրդ ռուբլի: Նախարարի խոսքերով՝ նախագծի բյուջեն հիմնականում կախված կլինի այն կառուցապատող ընկերություններից, որոնք կմասնակցեն դրա իրականացմանը: Իսկ շինարարությունը նախատեսվում է ավարտել 5-7 տարվա ընթացքում: Նախատեսվում է ՏՏ-համայնքի շինարարությունը սկսել 2012 թ-ի գարնանը: Ինչպես հայտարարել է նախարարը, մինչև այս տարվա վերջ նախատեսվում է ավարտել նախագծային աշխատանքները: Ինչպես նաև մինչև տարեվերջ նախատեսվում է ստեղծել ԲԲԸ, որը կղեկավարի նախագիծը:

Երևանի 7 արձանների վրա տեղադրվել են ցուցանակներ QR կոդերով (QR-կոդը շտրիխ կոդի տեսակ է, որը պարունակում է բազմազան տեղեկություններ՝ սկսած լինքերից մինչև կոնտակտային տվյալներ): QR-կոդի ինֆորմացիան կարդալու համար անհրաժեշտ է այն լուսանկարել հեռախոսով։ Ինչպես տեղեկացնում է PanARMENIAN.Net կայքը, Երևան Քաղաքի կառավարման տեխնոլոգիաների կենտրոնի տնօրեն Արա Յաղջյանի խոսքերով մինչև սեպտեմբերի 20-ը նման ցուցանակներ տեղադրվելու են ևս 37 հուշարձանների և 20 պատմամշակութային արժեք ներկայացնող շենքերի վրա։ Ըստ նրա՝ ՀՀ անկախության 20 ամյակի օրերին Հայաստան են ժամանելու մի շարք հյուրեր, ինչը հիանալի է, քանի որ ծրագիրը նախատեսված է հենց զբոսաշրջիկների համար։ Այս պահին QR կոդով ցուցանակներ տեղադրված են Կոմիտասի, Այվազովսկու, Սարյանի, Շահումյանի, Մյասնիկյանի, Առնո Բաբաջանյանի և Սասունցի Դավթի արձանների վրա։ Այս ծրագրի շնորհիվ զբոսաշրջիկները հեշտությամբ կստանան ինֆորմացիա պատմամշակութային արժեք ներկայացնող հուշարձանների մասին։ Յուրաքանչյուր QR կոդ տեղափոխում է monuments.yerevan.am կայքի համապատասխան հուշարձանի էջ, որտեղ կան եռալեզու (հայերեն, անգլերեն, ռուսերեն) տեղեկություններ յուրաքանչյուր հուշարձանի մասին՝ սկսած ճարտարապետից, պատրաստված նյութից, հուշարձանի պատմությունից մինչև լուսանկարները: Ծրագիրը քաղաքապետարանի նախաձեռնությունն է, որն իրականացնում է Երևան քաղաքի կառավարման տեխնոլոգիաների կենտրոնը և «Սիթի օֆ դը Վորլդ» (City of the World) հիմնադրամը։ Յուրաքանչյուր QR-կոդով ցուցանակի ստեղծման համար տեխնոլոգիաների կենտրոնը ծախսում է 150 հազար դրամ։ QR-կոդը նախագծել է ճապոնական «Դենսո-Վեյվ» (Denso-Wave) ընկերությունը: Այն բաղկացած է տարբերանշաններից՝ ներառյալ այբուբեն, թվեր, հատուկ տարբերանշաններ: Մեկ QR-կոդը կարող է պարունակել 7089 թիվ կամ 4296 տառ: QR-կոդերը հաճախակի օգտագործում են հեռախոսներով կոնտակտային ինֆորմացիա, հղումներ և այլ տեղեկատվություն կարդալու համար։ Աշխարհում առաջինը Նյու-Յորքը, այնուհետև Դուբայը սկսել են օգտագործել QR կոդը շինությունների կառավարման գործում:

Ապրիլի 13-ին Երևանում` Armenia Marriott հյուրանոցի Տիգրան Մեծ սրահում տեղի ունեցավ գերմանական հայտնի OBO Bettermann ընկերության սեմինարը: OBO Bettermann-ը այս տարի նշում է իր հիմնադրման 100-ամյակը և հանդիսանում է Եվրոպայի ինֆորմացիոն և էլեկտրական ցանցային համակարգեր առաջարկող առաջատար ընկերություններից մեկը: Սեմինարը կազմակերպել էր Root ITSP ընկերությունը, որը հանդիսանում է OBO Bettermann-ի պաշտոնական ներկայացուցիչը Հայաստանում: Միջոցառմանը հրավիրված էին Հայաստանի խոշորագույն շինարարական ընկերությունների ներկայացուցիչները: Root ITSP-ի գլխավոր տնօրեն Գեղամ Սարգսյանի ողջույնի խոսքից հետո ելույթ ունեցան հատուկ հրավերով Հայաստան ժամանած OBO Bettermann ընկերության ներկայացուցիչներ Վալդեմար Մադերը և Տարմո Ռիիտը: Սեմինարի ընթացքում Ռիիտը մանրամասնորեն ներկայացրեց OBO Bettermann-ի արտադրանքը և հույս հայտնեց, որ ներկայացված ապրանքատեսակների իրացումը Հայաստանյան շուկայում կպսակվի հաջողությամբ: Հարկ ենք համարում նշել, որ ի տարբերություն եվրոպական երկրների, որտեղ OBO Bettermann-ի առաջարկած արտադրանքը և ծառայությունները շինարարության մեջ համարվում են առաջնային անհրաժեշտություն, Հայաստանում, շինարարական աշխատանքների իրականացման ներկա տեխնոլոգիաները և յուրահատկությունները, դեռևս հնարավորություններ չեն տալիս լայնորեն օգտագործել և ներդնել առաջարկվող որոշ ցանցային համակարգեր: Հաշվի առնելով OBO Bettermann-ի առաջատար դիրքը ցանցային համակարգերի համաշխարային շուկայում, բոլոր շահագրգիռ կազմակերպություններին խորհուրդ ենք տալիս ծանոթանալ այս կազմակերպության կողմից առաջարկվող համակարգերին և ապրանքատեսականուն Հայաստանի ներկայացչությունում, կամ այցելել OBO Bettermann-ի ինտերնետային կայքը:

Կանադական Իննովըթիվ Քոմփոզիթս Ինթերնեշնլ (Innovative Composites International ) ընկերությունը հաղթող է ճանաչվել, և Հայիթիում կկառուցի հազարավոր պլաստիկ տներ՝ հունվարյան կործանիչ երկրաշարժից տուժվածների համար: Ընկերության ղեկավարությունը բաղկացած է այնպիսի ընկերությունների նախկին փորձառու կառավարիչներից, ինչպիսիք են Մագնա Ինթերնեշնլը (Magna International Inc.) և Կրայսլեր Գրուպը (Chrysler Group LLC), և ինչպես նրանք են պնդում, այդ տները Հաիթիի կլիմայական պայմանների համար ամենահարմարն են, քանի որ չեն փտում, էկոլոգիապես անվնաս են, և որ ամենակարևորն է, շատ դիմացկուն են երկրաշարժերի և փոթորիկների նկատմամբ: Կանադական ICI ընկերությունը 3Դ Գլոբալ Սոլուշէնս (3D Global Solutions,US) և Բերկլիս Գեդի Գրուպ (Barclays Gedi Group,US) ընկերությունների հետ կոնսորցիում է ստեղծել տարեկան 5000 այնպիսի տների մատակարարման համար: Այս բնակարանային ծրագրի արժեքը գնահատվում է ԱՄՆ $ 4 մլրդ և կֆինանսավորվի Բիլ Քլինթոնի կողմից կառավարվող հիմնադրամի կողմից: Հայիթիում տեղի ունեցած երկրաշարժից զոհվել է շուրջ 230 հազար մարդ, և մոտ մեկ միլիոն տուն է ավերվել: Ի հավելումն բոլոր դժբախտությունների, Հայիթիում այսօր խոլերայի համաճարակից հազարավոր մարդիկ են մահանում, երկրում իշխում է անօրինականությունն ու բռնությունը, իսկ մարդիկ գրեթե ամբողջովին կորցրել են հավատը ապագայի նկատմամբ: Ահա թե ինչ է նշանակում մայրաքաղաքի ավերումը, որտեղ գրեթե ամբողջությամբ կենտրոնացված է երկրի կառավարումը ... Սեյսմիկ խոցելի քաղաքները, և առաջին հերթին փոքր պետությունների մայրաքաղաքները, պետք է նախապես պատրաստ լինեն նման աղետներին դիմակայելու՝ շինարարական աշխատանքների կատարման որակի խիստ վերահսկողությամբ և ոչ սեյսմակայուն՝ հին շենքերի անհետաձգելի վերակառուցման լայնամասշտաբ ծրագրերի իրականացման միջոցով:

Հարավաֆրիկյան հանրապետությունում բանակցություններ են ընթանում այդ երկրի կառավարության և Չինաստանի պետական սեփականություն հանդիսացող China Railway Group կազմակերպության միջև Յոհաննեսբուրգ և Դուրբան քաղաքների միջև 556 կմ երկարությամբ Հարավաֆրիկյան Հանրապետությունը բանակցություններ է վարում չինական China Railway Group կազմակերպության հետ Յոհաննեսբուրգ և Դուրբան քաղաքների միջև 556 կմ երկարությամբ արագընթաց երկաթուղու կառուցման շուրջ: 30 միլիարդ դոլար արժողությամբ այս ծրագիրը կկարողանա մեքենայի հետ համեմատած կրկնակի կրճատել մի քաղաքից մյուսը հասնելու ժամանակը: China Railway Group-ը աշխարհի երկրորդ խոշոր շինարարական կազմակերպությունն է, իսկ վարկանիշային ցուցակում այն 342-րդն է: Նշենք նաև, որ ներկայում Կալիֆորնիայի նահանգապետ Առնոլդ Շվարցենեգգերը «շրջագայում» է ճեպընթաց գնացքներ արտադրող և կառուցող հիմնական ասիական երկրներով, որպեսզի Լոս Անջելես և Սան Ֆրանցիսկո քաղաքների միջև ճեպընթաց երկաթգծի կառուցման համար կապալառու ընտրի: Վերջերս՝ օգոստոսի 31-ին Հայաստանի գերազանցիկ շրջանավարտների հետ հանդիպման ժամանակ, նախագահ Սերժ Սարգսյանը տնտեսության զարգացման խթանման համար հատկապես կարևորել է ճանապարհներում ծախսած ժամանակի կրճատումը:«Տրանսպորտային համակարգը երկրի զարկերակն է հանդիսանում, նրա արյունատար անոթները, առանց որի անհնար է ապրել ժամանակակից աշխարհում», -նշել է նախագահը: Մեր պարագայում, իհարկե, խոսքը արագընթաց երկաթգծի կառուցման մասին չէ, այլ դեռևս ավտոճանապարհների: Կարծում ենք, որ «հեռավորության կրճատման» ցանկությունն իրականացնելու համար պետությունը առաջին հերթին պետք է ուշադրություն դարձնի ճանապարհաշինարարական աշխատանքների որակին, որոնք հեռու են միջազգային չափանիշներից, ինչպես նաև ճանապարհային նշանների ցավալի վիճակին՝ սկսած հիմնական մայրուղիներում արագության անհիմն սահմանափակումներից, մինչև նախազգուշացնող նշանների ու անվտանգության արգելապատնեշների բացակայությունը բազմաթիվ վտանգավոր վայրերում, ինչը կնպաստի տրանսպորտային միջոցների արագ և անվտանգ երթևեկությանը: