6 տարի տևած նախագծման, նախապատրաստական և շինարարական աշխատանքներից հետո Լոնդոնի «Օլիմպիական Այգին» ընդունել է իր ոչ-սպորտային այցելուներին: 11 մլրդ ԱՄՆ դոլար ընդհանուր շինարարական բյուջեյով այգում են տեղակայված Օլիմպիական հիմնական կառույցները, այդ թվում՝ Օլիմպիական մարզադաշտը, Զահա Հադիդի նախագծած ջրային մարզաձևերի հրապարակը, և «Վիլկինսոն Էյր Արքիթեքթս» (Wilkinson Eyre Architects) ճարտարապետական ստուդիայի հեղինակած ժամանակավոր բասկետբոլային մարզահրապարակը: Բացի այդ «Օլիմպիական Այգում» է վեր խոյանում ճարտարապետ Անիշ Կապուրի նախագծած ԱրսելորՄիտտալ Օրբիթ դիտահարթակ-աշտարակը: «Օլիմպիական Այգու» բացման պաշտոնական արարողությունը կկայանա այսօր՝ դրանով իսկ ազդարարելով Լոնդոն 2012 ամառային Օլիմպիական խաղերի սկիզբը: «Օլիմպիական Այգու» շինարարության համար 2006 թ-ին ավելի քան 200 տներ քանդվեցին, որպեսզի այգու շինարարության համար տարածք ազատվի: Սակայն նշենք, որ ապամոնտաժված տների շինանյութի մոտ 98 տոկոսն օգտագործվել է Օլիմպիական կառույցների շինարարության ժամանակ: Քանի որ «Օլիմպիական Այգին» կառուցվում էր նախկին արտադրական հողերի վրա, ապա կազմակերպիչները ստիպված են եղել փորել և հանել ավելի քան 1.4 մլն խորանարդ մետր կեղտոտված հող: Բացի այդ 5 հսկա լվացող մեքենաներ երկար ժամանակ աշխատել են շինհրապարակում, որպեսզի լվանան հողը յուղային, խեժային և ծանր մետաղների մնացորդներից: Ամառային Օլիմպիական խաղերի փակումից հետո «Օլիմպիական Այգին» կվերափոխվի: 2013 թ-ին Արևելյան Լոնդոնում 500 հազար քառակուսի մետր մակերեսով այգի կբացվի, որը կունենա «Թագուհի Եղիսաբեթի անվան Օլիմպիական Այգի» անվանումը: ԱրսելորՄիտտալ Օրբիթ դիտահարթակ-աշտարակը նախկինի պես վեր կխոյանա այգում, իսկ Օլիպիական մարզադաշտն էլ կվերակառուցվի, կփոքրացվի և կունենա 25 հազար նստատեղ:

Ապրիլի 16-ին, նախատեսվածից 3 շաբաթ ուշացումով, ավարտվել է «Եվրոտեսիլ-2012» 57-րդ միջազգային երգի մրցույթի համար կառուցվող «Բաքու Քրիսթալ Հոլ» (Baku Crystal Hall) համալիրի շինարարությունը: 25 հազար հանդիսատեսի (աղբ. Ալիևի ֆոնդ) համար նախատեսված համալիրի շինարարությունը սկսվել էր անցած տարվա աշնանը, գերմանական Alpine Bau Deutschland AG-ի կողմից, համաձայն օգոստոսի 2-ին կնքված պայմանագրի: Կառույցի գլխավոր նախագծող է հանդիսացել գերմանական «ՋիԷմՓի Արքիթեքթս» (GMP Architects) ընկերությունը, որը նաև հանդիսանում է այս կառույցի Չինական նմանակի՝ «Ունիվերսիադայի Մարզական Կենտրոնի» (Universiade Sports Center) հեղինակը: Նախագծային աշխատանքներում նաև ներգրավվել է շվեյցարական Nussen ընկերությունը: Այս հսկայական կառույցի արագ իրականացումը հնարավոր է դարձել գործարանային պայմաններում նախապես կառուցված, հավաքովի կոնստրուկցիաների լայն օգտագործմամբ, և իհարկե, Չինաստանում նախկինում ձեռք բերված փորձով: Երկու կառույցների դիզայնի տարբերությունները չնչին են՝ ավելացված է տանիքը և փոխված է ճակատի երեսպատման նյութը: Որոշ աղբյուրների տեղեկությամբ, համալիրի շինարարության արժեքը կազմել է 105 մլն ԱՄՆ դոլար, և նույնքան էլ ծախսվել է համալիր տանող ճանապարհի կառուցման և բարեկարգման համար: Նշենք, որ համալիրը գտնվում է 2010 թվականի Գինեսի գրքի ռեկորդակիր, 162 մ բարձրությամբ, Բաքվի գլխավոր դրոշակաձողի անմիջապես դիմացը: Ադրբեջանական լրատվամիջոցների հաղորդմամբ, կառույցի իրականացմանը մեծ աջակցություն է ցուցաբերել «ազգի» և միաժամանակ գործող նախագահի հայր՝ «ադրբեջանական ազգի համազգային առաջնորդ» Հեյդար Ալիևի ֆոնդը: Ալիևի ֆոնդի նախագան է երկրի առաջին տիկին Մեհրիբան Ալիևան, իսկ փոխնախագահը՝ դուստրը՝ Լեյլա Ալիևան: Այս ֆոնդի ֆինանսավորման աղբյուրները չեն հրապարակվում, ինչ էլ իսկ ադրբեջանական ընդիմադիրների մշտական քննադատության է արժանանում: Դեպի համալիր տանող ճանապարհի իրականացման ընթացքում, ինչպես հաղորդում է Human Rights Watch կազմակերպությունը, բազմաթիվ բնակիչների իրավունքներ են գետնահարվել, որոնք ուժով վերաբնակեցվել են իրենց բնակարաններից: Հետաքրքիր է նաև այն, որ զուգահեռ այս համալիրի շինարարությանը, կառավարությունը համենայն դեպս, ընձեռնել էր նաև Թոֆիք Բահրամովի մարզադաշտի վերանորոգման աշխատանքները՝ 90 մլն ԱՄՆ դոլար արժողությամբ:

Չիկագոյի քաղաքային իշխանությունները քննարկման են ներկայացրել վերգետնյա հանրային այգու կառուցման նախագիծ, տեղեկացնում է Chicago Tribune պարբերականը: Ըստ տարածած հաղորդագրության` այգին կկառուցվի քաղաքի երկաթգծի «Բլումինգդեյլ Թրեյլ» (Bloomingdale Trail) ճյուղի վերակառուցման արդյունքում: Ինչպես տեղեկացնում է մեկ այլ ինտերնետային պարբերական The Inhabitat-ը, այս՝ գետնից բարձր երկաթգիծը, շահագործումից դուրս է եկել դեռևս 1990-ական թվականներին, և այդ օրվանից բազմաթիվ կարծիքներ են հնչել այն վերակառուցելու վերաբերյալ: Հակառակ անվանման «Բլումինգդեյլ Թրեյլ» երկաթգիծն այսօր նման չէ ծաղկող հովտի, բայց ամեն ինչ կփոխվի, եթե վերոնշյալ նախագիծը կյանքի կոչվի: «Օդային» այգու նախագիծն իրականացրել են «ԱՐՈՒՓ» (ARUP), «Ռոս Բարնի Արքիթեքթս» (Ross Barney Architects) և «Միշել վան Վալքենբերգ Ասոշիեյթս» (Michael van Valkenburg Associates) ճարտարապետական ընկերությունների մասնագետները: Նախագծի սկզբնական փուլը նախատեսում է 4.3 կիլոմետր երկարությամբ ճանապարհահատվածի վերակառուցում: Նախագծի իրականացումից հետո, փողոցից 4.6 մետր բարձրության վրա այգու այցելուները կկարողանան գտնել հեծանվային ուղիներ, զբոսնելու արահետներ, նստարաններ և խաղահրապարակներ, ինչպես նաև ցուցահանդեսային հրապարակներ բաց երկնքի տակ: Այգու առաջին ճյուղի վրա կկառուցվեն 8 մուտքեր, որոնք հարմարեցված կլինեն ինչպես ոտքով քայլելու, այնպես էլ հեծանիվով անցնելու համար: Նախագծի շինարարության առաջին փուլը, ըստ նախնական հաշվարկների, կկազմի 46 մլն ԱՄՆ դոլար, ընդ որում ողջ գումարն արդեն գտնված է: Գումարի 37 մլն ԱՄՆ դոլարը հավաքվել է քաղաքային հիմնադրամներից, իսկ մնացած 7 մլն-ը կտրամադրեն 3 մասնավոր ընկերություններ: Քննարկվող ամբողջական նախագիծը գնահատվում է 80 մլն ԱՄՆ դոլար: Նախագծի հեղինակները հույս ունեն, որ շինարարությունը կսկսվի արդեն 2013 թ-ին, և, եթե ամեն ինչ ըստ որոշվածի ընթանա, ապա հանրային այգու առաջին հատվածը հանրության առջև կբացվի արդեն 2014-ին: Նշենք, որ այս ծրագրի իրականացման համար ներշնչանքի աղբյուր է դարձել Նյու Յորքում հաջողությամբ իրականացված «Հայ Լայն» (High Line) վերգետնյա հանրային այգին: Ծաղիկներից, ծառերից, թփերից, դիտահրապարակներից և զբոսնելու արահետներից բաղկացած այս այգին կառուցվել է վաղուց լքված վերգետնյա երկաթգծի վերակառուցման արդյունքում: Նախագծի իրականացման գաղափարն առաջացել է 2006 թ-ին և անթերի իրականացվել 2009-ին: Այգին այնքան գրավիչ է ստացվել, որ 2010 թ-ին որոշում է ընդունվել այն կրկնակի երկարեցնել: 2011 թ-ին արդեն այս նախագիծը կյանքի է կոչվել և կա մշակված տարբերակ: Այգու շինարարության 3-րդ փուլը կգրավի քաղաքի «Հադսոն Ռեյլ Յարդս» (Hudson Rail Yards) հատվածը: Նախագիծն իրականացրել են «Ջեյմս Քորներ Ֆիլդ Օփերեյշնս» (James Corner Field Operations) կանաչապատման և «Դիլլեր Սքոֆիդիո և Ռենֆրո» (Diller Scofidio + Renfro) ճարտարապետական ընկերությունները: Ի դեպ այս 2 ընկերությունների համագործակցության արդյունքում էլ կառուցվել են ծրագրի առաջին 2 փուլերը: Ըստ նախնական տվյալների՝ այս նախագծի բյուջեն կկազմի 90 մլն ԱՄՆ դոլար, ընդ որում, ողջ գումարը նվիրատվությունների արդյունքում է հավաքվել: «Հայ Լայն» այգու 3-րդ, վերջնական փուլի ավարտը նախատեսված է 2014 թ-ին:

Ֆրանսիայում նախատեսվում է Նապոլեոն Բոնապարտի պատվին, նրա մահից մոտ 200 տարի անց, թեմատիկ այգի կառուցել, տեղեկացնում է The Telegraph պարբերականը: Աշխարհահռչակ «Դիսնեյլենդին» մրցակից այս այգին կկրի «Նապոլեոնլենդ» անվանումը: 280 մլն ԱՄՆ դոլար բյուջեյով նախագծի իրականացման գաղափարը պատկանում է Ֆրանսիայի նախկին նախարար և պատմության սիրահար Իվ Ժեգոյին (Yves Jégo): Ըստ նախնական տվյալների՝ զվարճանքների այգին կկառուցվի Փարիզից ոչ հեռու՝ Մոնտերո (Montereau) փոքր քաղաքում, որտեղ 1814 թ-ին Նապոլեոնի բանակը հաղթանակ կրեց ռուս-ավստրիական զորքերի հետ մարտում: Ժեգոն հուսով է, որ այգու շինարարությունը կսկսվի 2014 թ-ին, և այն պատրաստ կլինի արդեն 2017-ին: Այգում կլինի հյուրանոց, թանգարան, խանութներ, ռեստորաններ և խորհրդակցությունների կենտրոն: Այգում «կվերականգնվի» 1815 թ-ի Վաթերլոյի ճակատամարտը, որտեղ Վելինգթոնի դուքսը վերջ դրեց Նապոլեոնի կառավարմանը: Եվ իհարկե, աչքից չի վրիպի Աուստերլիցի ճակատամարտը, որտեղ Նապոլեոնը ջախջախեց ռուս-ավստրիական զորքերին: Այցելուները կարող են նաև դիտել ջրային շոու, որը կներկայացնի 1805թ-ի Թրաֆալգարի ճակատամարտը, երբ ծովակալ Հորացիո Նելսոնը ջախջախեց ֆրանս-իսպանական նավատորմը: Աշխարհահռչակ ֆրանսիացի առաջնորդը մինչ օրս չունի ազգային և պատմական թանգարան Ֆրանսիայում և Ժեգոն վստահ է, որ այս նախագիծը ոչ միայն վառ կպահի նրա անունը, այլև կնպաստի տեղեկան տնտեսությանը: Ըստ նրա՝ առաջին տարում այգին կհյուրընկալի ավելի քան 1.5 մլն այցելուի:

Օգոստոսի 1-ից Երևանի կրկեսում կսկսվեն հիմնանորոգման աշխատանքներ: Այս մասին հուլիսի 24-ին մամուլի ասուլիսի ժամանակ լրագրողներին հայտնել է կրկեսի տնօրեն Հովհաննես Գասպարյանը: Ըստ պրն. Գասպարյանի՝ կրկեսի հիմնանորոգման համար անհրաժեշտ կլինի 10 մլն ԱՄՆ դոլարից ավելի գումար: Հիմնանորոգման աշխատանքների ընթացքում նախատեսվում է ամբողջությամբ վերանորոգել կրկեսի շենքը, տեղադրել ժամանակակից օդափոխության համակարգ, կլուծվի նաև ջեռուցման խնդիրը, որը թերևս ամենակարևորն է, իսկ կենդանիները ‹‹կբնակվեն›› ոչ թե կրկեսում, այլ կրկեսին կից հատուկ իրենց համար նախատեսված վայրում: Բացի շինության վերանորոգման աշխատանքերից, կթարմացվի նաև կրկեսի տեխնիկական բազան, նորագույն տեխնոլոգիաներով կհամալրվի բեմը, կավելանան հնչյունային և ձայնային հնարավորությունները: Կրկեսի վերջին ներկայացումը կկայանա հուլիսի 31-ին, իսկ վերանորոգումից հետո կրկեսը հանդիսատեսի առաջ իր դռները կբացի 2013 թ-ին: Դեռևս այս տարվա ապրիլին, երբ լրացավ նոր քաղաքապետի պաշտոնավարման 100 օրը, լրագրողներին տրված հարցազրույցի ժամանակ Կարեն Կարապետյանը հայտարարեց, որ «Տաշիր Գրուփ» ընկերության տնօրեն Սամվել Կարապետյանի հետ համաձայնագիր է ստորագրվել 8 մլն ԱՄՆ դոլար հատկացնել Երևանի կրկեսի վերածննդին: Կրկեսի ղեկավարության հրավիրած մամուլի ասուլիսի ժամանակ այս փաստը հաստատվեց, սակայն կրկեսի գեղարվեստական ղեկավար Սոս Պետրոսյանը հայտարարեց, որ «Տաշիր Գրուփը» 6 մլն ԱՄՆ դոլար է հատկացրել կրկեսի վերանորոգմանը: Երևանի կրկեսը հիմնադրվել է 1962 թ-ին և սա առաջին վերանորոգումն է, որ պիտի իրականացվի շենքում: Ի դեպ, կրկեսի ադմինիստրացիան դեռ չի տեղեկացրել թե ով է լինելու շինարարության գլխավոր կապալառուն: