ԱՄՆ-ում վաճառքի է հանվել երկրի նախկին նախագահ Ռիչարդ Նիքսոնի առանձնատունը, որը նախագահի սեփականությունն է եղել շուրջ 11 տարի՝ 1969-1980 թվականներին: «Լա Կազա Փասիֆիքա» (La Casa Pacifica) առանձնատունը գտնվում է Կալիֆորնիայի Սան-Կլեմենտե քաղաքի ափամերձ գոտում: Նախագահի հաճախակի այցելությունների պատճառով այս առանձնատունը ստացել է նաև իր երկրորդ անվանումը «Արևմտյան Սպիտակ Տուն» (Western White House): Այստեղ նա անց էր կացնում ընտանեկան հանգիստը, ռազմավարական բանակցությունները, ինչպես նաև հյուրընկալում ամերիկյան և արտասահմանյան քաղաքական գործիչներին: 1974 թ-ի Ուոթերգեյթյան սկանդալից և իր հրաժարականից հետո Նիքսոնը տեղափոխվեց այս առանձնատուն իր կյանքի հուշագրերը գրի առնելու համար: Անշարժ գույքի հողի ընդհանուր մակերեսը կազմում է 22,3 հազար քառակուսի մետր, որտեղ տեղակայված են հիմնական առանձնատունը, հյուրերի համար նախատեսված տնակները, ծառայողական տները՝ 1400 քառակուսի մետր ընդհանուր մակերեսով, ինչպես նաև 140 մետր երկարությամբ մասնավոր ծովափը: Առանձնատունը կառուցվել է 1920 թվականին իսպանական ոճով՝ սպիտակ դիմային հատվածով, կարմիր կղմինդրե տանիքով և կենտրոնական բակով: Առանձնատան հսկա կամարակապ պատուհանները նայում են անմիջապես օվկիանոսին, իսկ ճաշասենյակի առջև բացվում է իսկական անգլիական այգին; Ռիչարդ Նիքսոնի հրամանով կառուցված բացօթյա սանդուղքն էլ հնարավորություն է տալիս բարձրանալ բուխարիով աշխատասենյակ: Հանրահայտ նախագահի կալվածքի նախնական գինը սահմանվել է 75 մլն ԱՄՆ դոլար: Ինչպես գրում է The Wall Street Journal պարբերականը՝ հղում կատարելով «Սոթբի միջզագային անշարժ գույքի գործակալության» (Sotheby’s International Realty) գործակալ Ռոբ Գիեմին (Rob Giem), առանձնատան նման բարձր գինն արդարացված է ոչ միայն նախկին սեփականատիրոջ հեղինակությամբ, այլև Լոս-Անջելոսի արևմուտքում գտնվող այս յուրօրինակ առանձնատան ընդարձակությամբ: Ի դեպ, այս շրջանում 2500 քառակուսի մետր մակերեսով հողատարածքը գնահատվում է 5-10 մլն ԱՄՆ դոլար: «Արևմտյան Սպիտակ Տունը» վաճառվում է ներկայիս սեփականատեր, արդեն թոշակի անցած դեղագործական հզոր ցանցի սեփականատեր 83-ամյա Գեվին Հերբերտի (Gavin Herbert) կողմից: Նա առանձնատունը գնել է Ռիչարդ Նիքսոնից 1980 թվականին և արդեն 35 տարի վայելում է այս յուրօրինակ անշարժ գույքը: Այս տարիների ընթացքում պրն. Հերբերտը կալվածքը բաժանել է տարբեր մասերի և կառուցել 14 առանձնատուն: Բացի այդ նա լողավազանի շրջակայքում տաղավար է կառուցել և այն զարդարել առանձնատուն այցելած բարձրաստիճան հյուրերի նկարներով: Վերջերս նա նաև վերանորոգել է հիմնական առանձնատան հիմքը, ինչպես նաև գլխավոր ննջասենյակում լոգարան և պահարաններ ավելացրել:

Իտալական Տոսկանա նահանգում վաճառվում է 12-րդ դարի դղյակ ներառող անշարժ գույք, որի ընդհանուր մակերեսը կազմում է 14.3 հազար քառակուսի մետր: Դղյակն ունի 115 ննջասենյակ և 100 լոգարան: Ինչպես գրում է The Telegraph պարբերականը, այս մասնավոր առանձնատունը ներկայիս վաճառվող ամենաընդարձակ անշարժ գույքն է համաշխարհային շուկայում: Ըստ նախնական տվյալների՝ այն գնահատվում է 30,0 մլն ԱՄՆ դոլար: Դղյակը գտնվում է Սիենա քաղաքից արևելք 630 հեկտար ձիթենիների այգում, շրջապատված ավելի քան 1500 ծառերով: Սակայն ինչպես մանրամասնում է պարբերականը, անշարժ գույքի գտնվելու ստույգ վայրը և սեփականատիրոջ անունը գաղտնի է պահվում: Դղյակը կառուցված է միջնադարյան ոճով՝ շրջապատված ամուր պատերով և պուրակներով: Չնայած այն փաստին, որ դղյակի հիմնական մասը վերակառուցվել է 18-րդ դարում, միևնույն է բազմաթիվ ճարտարապետական մանրուքներ վկայում են, որ դղյակը միջնադարին է պատկանում: Մասնավորապես, բուխարի ներառող սենյակում պահպանվել է միջնադարյան կահույքը, նկարազարդ փայտյա առաստաղը և շախմատաձև յուրօրինակ մարմարյա հատակը: Ինչպես ներկայացնում է առանձնատան վաճառքով զբաղվող «Սոթբի» միջազգային անշարժ գույքի գործակալության (Sotheby’s International) գործակալ Ջոն Ջոնքը, - «առանձնատունը բացառիկ գեղեցկություն ունի, և այնտեղ միշտ խաղաղ է և հանգիստ: Այն կառուցվել է անմիջապես Վերածննդից առաջ, ճարտարապետ և նկարիչ Ջիոտտո դի Բոնդոնեի (Giotto di Bondone) գործունեությունից քիչ առաջ, երբ Սիենան և Ֆլորենցիան պատերազմում էին: 15-րդ դարից առանձնատունը պատկանել է Պիկկոլոմինի (Piccolomini) ընտանիքին: Ընդամենը 30 տարի առաջ է ներկայիս սեփականատերը ձեռք բերել այն: Նմանատիպ հսկայական անշարժ գույքի համար գինը չափազանց մատչելի է: Սակայն այն արտացոլում է Եվրոպական անշարժ գույքի շուկայի ներկայիս տենդենցները»: Աշխարհի ներկայիս ամենամեծ առանձնատներից մեկը (ոչ վաճառվող) գտնվում է հնդկական Մումբայ քաղաքում: 27 հարկանի «Անտիլիա» (Antilia) բարձրահարկը ունի 37 հազար քառակուսի մետր ընդհանուր մակերես: Մասնավոր երկնաքերն ունի 6 հարկանի ավտոտնակ, 9 վերելակ, հանդիսությունների սրահ, լողավազան, բար, յոգայի ստուդիա և բազմաթիվ բնակելի սենյակներ: Երկնաքերը նախագծվել է 1 ընտանիքի բնակության համար և պատկանում է նավթաքիմիական հոլդինգի սեփականատեր Մուկեշ Ամբանիին (Mukesh Ambani): Առանձնատան գինը մոտավորապես գնահատվում է 2 մլրդ. ԱՄՆ դոլար: Ըստ Therichest պարբերականի տվյալների՝ աշխարհի ամենամեծ մասնավոր առանձնատունը պատկանում է Բրունեյի սուլթան Իստանա Նուրուլ Իմանին (Istana Nurul Iman): Դղյակն ունի 1788 սենյակ, 257 լոգարան, 5 լողավազան, ավտոկայանատեղի նախատեսված 110 ավտոմեքենայի համար, 200 ձիերի համար նախատեսված ախոռ, հանդիսությունների սրահ և 1500 հավատացյալի համար նախատեսված մզկիթ: Առանձնատան վերջին գնահատված գումարը կազմել է 2.08 մլրդ ԱՄՆ դոլար:

1800 թվականին Ֆրանսիայի կայսեր Նապոլեոն Բոնապարտի նստավայր հանդիսացած 74 սենյականոց առանձնատունը վաճառքի է հանվել ընդամենը 5,78 մլն ԱՄՆ դոլարով, տեղեկացնում է բրիտանական Daily Mail պարբերականը: Առանձնատան վաճառքով զբաղվում է «Բյուչեմփ Իսթեյթս» (Beauchamp Estates) անշարժ գույքի գործակալությունը, որն ինչպես պնդում է պարբերականը, զուգահեռ միևնույն գնով վաճառում է ընդամենը 3 սենյականոց բնակարան լոնդոնյան Բելգրավիա շրջանում: Իտալական Պյեմոնթում գտնվող «Լա Վոգլինա» (La Voglina) առանձնատունը կառուցվել է 18-րդ դարում՝ բարոկկո ոճի հայտնի ներկայացուցիչ, ճարտարապետ Ֆիլիպպո Յուվարայի կողմից: Պատմական կալվածքը և վերջինիս հարող հողատարածքի ընդհանուր մակերեսը կազմում է 240 հազար քառակուսի մետր, որտեղ տեղակայված են 13 ննջասենյակ, 9 լոգարան, 2 ճաշասրահ, 2 խոհանոց, 10 ընդունարան, հյուրերի տնակ և փոքրիկ մասնավոր մատուռ՝ նախատեսված 30 այցելուի համար: Պատմական առանձնատունը շրջապատված է այգիներով, ինչպես նաև տարածքում գտնվում են խաղողի այգիներ, որոնց վերամշակման պարագայում հնարավոր կլինի տարեկան ստանալ մոտ 100 հազար շիշ գինի: 215 տարի առաջ 1800-ական թվականներին Ֆրանսիայի կայսրը Մարենգոյի ճակատամարտի ընթացքում այս առանձնատունն օգտագործել է որպես գլխավոր գրասենյակ:

Եթե ձեզնից որևէ մեկը ցանկանում է առավոտյան արթնանալ՝ շրջապատված ստորջրյա աշխարհով և բազմաթիվ ձկներով, ապա Դուբայի «Աշխարհ» (The World) արհեստական կղզիներում առաջարկվող ընթացիկ նախագիծը լավագույն տարբերակ է ձեզ համար: Փետրվարի 5-ին «Քլեյնդիենսթ Գրուփ» (Kleindienst Group) ընկերությունը պաշտոնապես հանրությանը և պոտենցիալ գնորդներին է ներկայացրել ստորջրյա առանձնատների յուրօրինակ նախագիծ, որոնք գտնվում են Դուբայի ափամերձ գոտուց 4 կիլոմետր հեռավորության վրա տեղակայված «Աշխարհ» արհեստական կղզիներում: Ընկերության կողմից ներկայացված պաշտոնական առաջարկից անմիջապես հետո 5 յուրօրինակ առանձնատներ գտել են իրենց սեփականատերերին: Ինչպես տեղեկացնում են տեղական պարբերականները, գնորդներից 2-ը Եվրոպայից են, իսկ մյուս 3-ը Հնդկաստանից և Պարսից ծովածոցին հարող երկրներից: Այսօր ընկերությունը յուրօրինակ առանձնատները կառուցում է «Եվրոպայի Սիրտ» (Heart of Europe) նախագծի մաս կազմող Մոնակո կղզում: Յուրաքնաչյուր առանձնատան գինը կազմում է մոտ 1,36 մլն ԱՄՆ դոլար: Եռահարկ առանձնատների վերգետնյա 2 հարկը գտնվում է ջրի վրա, իսկ ներքևի հարկը 4 մետր խորությամբ ընկղմված է ստորջրյա յուրօրինակ աշխարհում: Առանձնատների մակերեսը կազմում է 156 քառակուսի մետր և նախատեսվում է, որ վերջիններս իրենց սեփականատերերին կարող են հյուրընկալել արդեն 2017 թ-ին: Ըստ նախնական տվյալների՝ «Եվրոպայի Սիրտ» արհեստական կղզիները կառուցապատող ընկերությունը նախատեսում է կառուցել 42 ստորջրյա առանձնատուն, որոնցից 20-ն արդեն ներկայացվել են հանրությանը, իսկ մյուս 22-ն ընկերությունը տեղափոխել է նախագծի հաջորդ փուլ: «Աշխարհ» արհեստական կղզիները, որոնց լայնությունը կազմում է 9 կիլոմետր, երկարությունը 7 կիլոմետր, իսկ ընդհանուր մակերեսը 931 հեկտար, գտնվում են Դուբայի ափամերձ շրջանից 4 կիլոմետր հեռավորության վրա: Առանձին կղզիների մակերեսը տատանվում է 14-ից 42 հազար քառակուսի մետր մակերեսի սահմաններում: Վերոնշյալ նախագծի մաս է կազմում «Եվրոպայի Սիրտ» նախագիծը, որը բաղկացած է 6 կղզիներից՝ Գերմանիա, Ավստրիա, Շվեյցարիա, Մոնակո, Շվեդիա և Սանկտ Պետերբուրգ:

Ինչպես տեղեկացնում է The Telegraph բրիտանական պարբերականը, «Տրանսպորտը Լոնդոնի Համար» (Transport for London (TfL)) ընկերությունը որոշել է վերակառուցել լոնդոնյան ավելի քան 50 նախկին տրանսպորտային կայարան: Ըստ տարածված տեղեկատվության՝ մետրոյի և ավտոբուսային որոշ կայարաններ, ինչպես նաև դրանց հարակից տարածքները կվերափոխվեն զբոսաշրջային տեսարժան վայրերի, բնակարանների, գրասենյակային և առևտրային տարածքների: Ըստ ընկերության կատարած հաշվարկների՝ նորագույն նախագծի իրականացումից հետո, որն, ի դեպ, կտևի մոտ 10 տարի, ընկերությունը կարող է ակնկալել ավելի քան 5,1 մլրդ ԱՄՆ դոլար եկամուտ: Նմանատիպ որոշում ընկերությունը կայացրել է տրանսպորտային ենթակառուցվածքների արդիականացման և անընդհատ աճող բնակչության պահանջմունքները բավարարելու նպատակով: Ինչպես մանրամասնել է «Տրանսպորտը Լոնդոնի Համար» կոմերցիոն զարգացման բաժնի տնօրեն Գրեմ Քրեյգը, բրիտանական մայրաքաղաքի բնակչությունը այնպես է աճում, որ արդեն 2030 թվականին մայրաքաղաքի բնակչությունը կհասնի 10 մլն-ի այսօրվա 8,4 մլն-ի փոխարեն: Այնպես որ Լոնդոնին անհրաժեշտ են նոր բնակարաններ և գրասենյակներ: «Տրանսպորտը Լոնդոնի Համար» ընկերությունը փետրվարի 2-ին արդեն հայտարարել է նախագծի իրականացման առաջին մրցույթը: