Նորվեգիայի կառավարությունը հայտարարել է ծովային նավերի համար նախատեսված թունելի կառուցման նախագծի մասին: Իր տեսակի մեջ աշխարհում առաջին և միակ թունելը, որը ստացել է «Ստադլանդյան ծովային թունել» (Stad Ship Tunnel) անվանումը, կկառուցվի Ստադլանդյան թերակղզու վրա գտնվող ժայռի միջով: Նոր թունելն իրար կմիացնի 2 ֆյորդեր և հնարավորություն կտա նավերին շրջանցել նորվեգական ծովափնյա տվյալ հատվածի վտանգավոր ուղին: Այս հատվածում ուղին վտանգավոր է ուժեղ քամիների և ջրի հոսքի պատճառով, և շատ հաճախ նավերը ստիպված են լինում երկար ժամանակ սպասել առավել բարենպաստ եղանակային պայմանների: Տեղական ընկերություններից մեկի տվյալներով՝ ծովային վտանգավոր հատվածում 1945 թվականից ի վեր գրանցվել է 46 դժբախտ պատահար, որոնց հետևանքով զոհվել է 33 մարդ: Ըստ նախնական տվյալների՝ 260 մլն ԱՄՆ դոլար գնահատվող «Ստադլանդյան ծովային թունելը» կունենա 36 մետր լայնություն, 45 մետր բարձրություն, 12 մետր խորություն և 1.7 կիլոմետր երկարություն: Այս թունելով կարող են անցնել ինչպես բեռնատար, այնպես էլ մարդատար նավերը, որոնք կունենան մինչև 16 հազար տոննա ջրատարողություն: Ինչպես տեղեկացնում են տարբեր լրատվամիջոցներ, նոր թունելի շինարարության սկիզբը նախատեսված է 2018 թվականին, իսկ ավարտը 4 տարի անց՝ 2022թ-ին:

Հունվարի 30-ին, Դուբայում կայացած «Զարգացող օդանավակայանների 2-րդ ամենամյա համաժողով-ցուցահանդես 2013»-ի ընթացքում հրապարակվեցին ավելի քան 20 նոմինացիաներում քվեարկությունների արդյունքները: Ինչպես տեղեկացնում է օդանավակայանի պաշտոնական կայքը, նոմինացիաները տարբեր էին. «Աշխարհի լավագույն օդանավակայան», «Միջին Արևելքի լավագույն օդանավակայան», «Եվրոպայի լավագույն օդանավակայան», և այլն: Ըստ «ԱՊՀ, Ռուսաստանի, եւ Բալթյան երկրների լավագույն օդանավակայան» նոմինացիայի քվեարկության արդյունքների՝ Երևանի «Զվարթնոց» միջազգային օդանավակայանը լավագույնն է ճանաչվել ԱՊՀ տարածքում: Նշենք, որ տիտղոսակիր «Զվարթնոց» օդանավակայանի նոր տերմինալի շենքի բացման հանդիսավոր արարողությունը տեղի է ունեցել սեպտեմբերի 16-ին Հայաստանի Հանրապետության անկախության 20-ամյա տարեդարձին նվիրված տոնակատարությունների շրջանակներում: «Զվարթնոց» միջազգային օդանավակայանը Դուբայում գործող Arabian Reach կազմակերպության կողմից առաջադրվել է նաև «Զարգացող շուկաների օդանավակայաններ մրցանակաբշխությանը» ("EMAA” ("Emerging Markets Airports Award”)): Զվարթնոցից բացի ԱՊՀ-ից ընտրվել էին ևս չորս` Մոսկվայի «Դոմոդեդովո» և «Շերեմետևո», Սանկտ Պետերբուրգի «Պուլկովո» և Բիշքեկի «Մանաս» օդանավակայանները: Քվեարկությունը տևել է ավելի քան մեկ ամիս: Մրցանակաբաշխության հանդիսավոր արարողության ժամանակ, մրցանակը ստացել է «Արմենիա միջազգային օդանավակայաններ» ՓԲԸ գլխավոր մենեջեր Մարսելո Վենդեն:

Անցած տարվա վերջին Չինաստանում առաջին անգամ փորձարկվել է աշխարհի ամենաերկար արագընթաց երկաթուղին: Նոր արագընթաց երկաթուղու երկարությունը, որն իրար է միացնում մայրաքաղաք Պեկինը հյուսիսում ու Գուանչժոու (Guangzhou) ֆինանսական կենտրոնը հարավում, կազմում է 2298 կիլոմետր: Ըստ տարածված հաղորդագրության՝ նոր երկաթուղով ամեն օր մոտ 150 զույգ գնացքներ կընթանան ավելի քան 300 կիլոմետր ժամ արագությամբ՝ արդյունքում երկու քաղաքների միջև երթևեկության տևողությունը կրճատելով 12 ժամով՝ 22-ից մինչև 10 ժամ: Երթևեկության ընթացքում մի շարք կանգառներ են նախատեսված, որոնք ներառում են Շիցզյաչժուն (Shijiazhuang), Ուհան (Wuhan) և Չանշա (Changsha) նահանգային մայրաքաղաքները: Չնայած այն հանգամանքին, որ Չինաստանը հսկայական ռեսուրսներ է ներդրել արագընթաց երկաթուղու կառուցման մեջ, այնուամենայնիվ վերջին ամիսներին մի շարք շինարարական խնդիրներ են առաջացել: Մարտյան հեղեղային անձրևներից հետո արագընթաց երկաթգծի որոշ հատվածը փլուզվեց, 2011 թ-ին գնացքներից մեկի վթարի հետևանքով 40 մարդ զոհվեց, իսկ այդ դեպքից մի քանի ամիս առաջ ձերբակալվեցին երկաթուղային գծերի նախարարը և նախարարության գլխավոր ինժեները, ովքեր կասկածվում էին կաշառակերության մեջ: Պեկին-Գուանչժոու արագընթաց երկաթգծի բացումից հետո Չինաստանն արդեն ունի շահագործվող 9.3 հազար կիլոմետր արագընթաց երկաթգիծ: Նորաբաց գիծը հանդիսանում է նախատեսված հյուսիս-հարավ ուղղության 4 գծերից մեկը, որոնք պետք է կառուցվեն ապագայում: Երկաթգծային ենթակառուցվածքների զարգացման 12-րդ հնգամյակի պլանով 2015 թ-ին Չինաստանում շահագործման կհանձնվի 120 հազար կիլոմետր երկաթգիծ, որից 18 հազար կիլոմետրը արագընթաց (300 կմ/ժամ), իսկ 40 հազարը էքսպրեսս երկաթգիծ (160 կմ/ժամ):

Հունաստանի անշարժ գույքի սեփականաշնորհման գործակալությունը (HRADF) սահմանել է երկրի լավագույն անշարժ գույքի օբյեկտներից մեկի՝ ծովափնյա Հելենիկոն շրջանում գտնվող Աթենքի նախկին օդանավակայանի տարածքի վաճառքի պայմանները, տեղեկացնում է ռուսական РИА Новости տեղակատվական գործակալությունը: Վաճառքի է հանվել ընկերության 100 տոկոս բաժնետոմսերը, որոնք ներառում են Աթենքի հարավային շրջանում գտնվող 6.2 մլն քառակուսի մետր մակերեսով տարածք: Նախկին օդանավակայանն իր տարածքով ավելի քան 3 անգամ գերազանցում է Մոնակոյի թագավորության, 2 անգամ լոնդոնյան Հայդ-Փարքի (Hyde Park) և նյու յորքյան Կենտրոնական զբոսայգու (Central Park) տարածքը: Վաճառվող տարածքում կա 500 շինություն, այդ թվում 1938-2001 թթ-ին գործող օդանավակայանի շենքը, 2004 թ-ի Օլիմպիադայի մարզական համալիրները, հունական զորքերի նախկին զորանոցները, ինչպես նաև մարզական կենտրոն և 300 զբոսանավի համար նախատեսված նավահանգիստ: Սեփականությունը վաճառվում է այն պայմանով, որ Հունաստանի կառավարությունը կստանա ապագա ներդրողի եկամուտների 30 տոկոսը: Իսկ նախկին օդանավակայանի համար սահմանված արժեքը չի հայտարարվում: Բյուջեի պակասուրդը լրացնելու և եկամուտներն ավելացնելու նպատակով Հունաստանում հսկայական սեփականաշնորհման գործընթացներ են իրականացվում: Դեռևս 2 ամիս առաջ երկրի անշարժ գույքի սեփականաշնորհման գործակալությունն առաջարկել էր վարձով հանձնել երկրի 40 անմարդաբնակ կղզիները, որպեսզի փոքր-ինչ նվազեցնեն պետական պարտքը: Իսկ տարվա սկզբին Հունաստանը որոշել էր վարձով հանձնել իր պատմական հուշարձանները, այդ թվում՝ «Ակրոպոլիսը» (Acropolis) և «Ապոլոնի տաճարը» Դելֆի (temple of Delphi) քաղաքում:

Հայաստանի «Զվարթնոց» օդանավակայանն ու Երևանի մետրոպոլիտենն իրար կապող երկաթգիծ կառուցելու ծրագիրը կիրագործվի մոտ ապագայում, տեղեկացնում են հայկական ԶԼՄ-երը՝ հղում կատարելով «Հարավկովկասյան երկաթուղիներ» ՓԲԸ գլխավոր տնօրեն Վիկտոր Ռեբեցի հայտարարությանը: Մայիսի 4-ին երկաթուղային գծի կառուցման մտադրության եռակողմ հուշագիր է ստորագրվել ՀՀ տրանսպորտի և կապի նախարար Մանուկ Վարդանյանի, «Հարավկովկասյան երկաթուղիներ» ընկերության գլխավոր տնօրեն Վիկտոր Ռեբեցի և «Արմենիա միջազգային օդանավակայաններ» ընկերության գլխավոր մենեջեր Մարսելո Վենդեի միջև: Նոր երկաթգիծը կկառուցվի «Զվարթնոց» օդանավակայանի և մետրոյի «Չարբախ» կայարանի միջև: Երկաթուղու երկարությունը կկազմի 7.8 կիլոմետր, որից 5.35 կիլոմետրը նոր կառուցվող հատվածն է: Ծրագրով նախատեսվում է նաև 810 մետր երկարությամբ թունելի կառուցում: Ծրագրի շինարարությունը կտևի 1 տարի: Նշենք, որ ՀՀ կառավարությունը 2011 թ. նոյեմբերին հավանություն էր տվել «Զվարթնոց» միջազգային օդանավակայանի» հարակից տարածքում միջազգային լոգիստիկ կենտրոնի և տրանսպորտային ենթակառուցվածքների ծրագրին, որի շրջանակներում էլ կառուցվում է վերոնշյալ երկաթգիծը: Նախագծի իրականացումը հնարավորություն կտա «Զվարթնոց» միջազգային օդանավակայանի ուղևորատար տերմինալը երկաթուղային գծով միացնելու մետրոպոլիտենի «Չարբախ» կայարանին, իսկ բեռնային տերմինալը՝ երկաթուղու «Կարմիր բլուր» կայարանին: