Անցած շաբաթ Կալիֆորնիայի Բլայթ քաղաքի մոտ, Մոխավե անապատի տարածքում, նահանգապետ Ջերի Բրաունի և ԱՄՆ-ի ներքին գործերի նախարար Քեն Սալազարի ներկայությամբ (այս դեպարտամենտը հիմնականում զբաղվում է բնական ռեսուրսների կառավարմամբ) սկսվեց աշխարհի խոշորագույն պարաբոլիկ տիպի արևային էլեկտրակայանի շինարարությունը, տեղեկացնում է constructiondigital.com կայքը: Շինարարության ավարտից հետո շահագործման կհանձնվեն 4 արևային էլեկտրակայան, որոնք միասին կկարողանան գեներացնել 1000 մեգավատ էլեկտրաէներգիա: Էներգիայի այսպիսի քանակն ի վիճակի է բավարարել մոտ 800 հազար ամերիկյան միջին տների պահանջարկը: Էլեկտրակայանը կզբաղեցնի մոտ 28,5 քռ. կիլոմետր տարածք: Էլեկտրակայանի շինարարության հիմնաքարի տեղադրման հանդիսավոր արարողության ժամանակ նահանգապետ Բրաունը հայտարարել է, որ այս արևային էլեկտրակայանի շինարարությունը կարևորագույն քայլ է Կալիֆորնիայի ապագա «կանաչ» տնտեսության ձևավորման գործում: Նա նաև ավելացրել է. «մենք պատրաստվում ենք դառնալ առաջատարն աշխարհում արևային էներգիայի արտադրման ոլորտում»: Շինարարության նախապատրաստական աշխատանքները սկսվել են դեռևս 2010 թ-ին, և նախատեսվում է, որ առաջին 2 էլեկտրակայանները կսկսեն աշխատել և կմիացվեն Կալիֆորնիայի էլեկտրացանցին արդեն 2014 թ-ին: Ապրիլին Բլայթ արևային նախագիծը 2.1 մլրդ ԱՄՆ դոլարի փոխառության երաշխիք է ստացել ԱՄՆ-ի Դաշնային ֆինանսավորման բանկից (US Federal Financing Bank), սակայն նախատեսվում է, որ ընդհանուր բյուջեն կհասնի 2.8 մլրդ ԱՄՆ դոլարի: Էլեկտրակայանի շինարարությունը կիրականացնեն աշխարհի արևային էներգիայի ոլորտի 2 առաջատար ընկերություններ՝ Սոլար Թրասթ օֆ Ամերիքան (Solar Trust of America) և Սոլար Միլլենիում Գրուփը (Solar Millennium Group): Ի դեպ Սոլար Միլլենիում Գրուփ ընկերությունը կառուցել է Եվրոպայի առաջին գործող պարաբոլիկ տիպի արևային էլեկտրակայանը: Այս տիպի էլեկտրակայանները տարբերվում են պանելային տիպի արևային կայաններից նրանով, որ այստեղ օգտագործվում է արևի ջերմությունը յուղի 400 աստիճան և ավելի տաքացման համար, որը հետագայում օգտագործվում է գոլորշի ստանալու և տուրբինների աշխատանքը ապահովելու համար, ինչպես սովորական էլեկտրակայաններում: Նշենք նաև, որ պարաբոլային տիպի արևային էլեկտրակայանները արևային էներգիայի օգտագործման միակ ձևն են այսօր, որը հնարավորություն է տալիս արտադրել էլեկտրաէներգիա արևտրային նպատակներով օգտագործելու համար:
Վինսի (Vinci) շինարարական ընկերությունը և Ֆրանսիայի երկաթուղային ենթակառուցվածքների գլխավոր մարմինը (Reseau Ferre France) 50 տարի ժամկետով բազմամիլիարդ գումարի արտոնյալ պայմանագիր են ստորագրել: Ինչպես տեղեկացնում է constructiondigital կայքը, պայմանագիրը ներառում է վերջին տասնամյակի աշխարհի խոշորագույն երկաթուղային նախագծերից մեկի իրականացումը: Նշենք, որ այս պայմանագիրը Ֆրանսիայի երկաթգծային շինարարության պատմության մեջ ամենամեծ պետական-մասնավոր համագործակցությունն է: Նոր Հարավ-Եվրոատլանտյան գերարագ երկաթուղին (SEA HSR) կունենա մոտ 300 կիլոմետր երկարություն և իրար կմիացնի Տուր և Բորդո քաղաքները: Ներկայումս այդ ճանապարհի տևողությունը 3 ժամից քիչ ավելի է, իսկ երկաթգծի շինարարության ավարտից հետո այն կդառնա մոտ 2 ժամ: Ըստ Ֆրանսիայի երկաթուղային ենթակառուցվածքների գլխավոր մարմնի գործադիր տնօրեն Յուբեր դյու Մենիլի՝ ընդամենը 2 ժամ տևողությամբ ճանապարհը հնարավորություն կտա երկրի ավիափոխադրումների մի մասն իրականացնել տվյալ երկաթուղով, ինչպես նաև տարեկան 4 մլն ուղևոր ավել սպասարկել: Նոր Հարավ-Եվրոատլանտյան գերարագ երկաթգծի շինարարությունը նախատեսվում է սկսել հաջորդ տարվա սկզբին և ավարտել 5 տարվա ընթացքում: Շինարարության ընթացքում երկրում կբացվի 1300 շինարարական և 150 սպասարկման աշխատատեղ: Վինսի ընկերությունը 1899 թ-ին ստեղծել են ճարտարագետներ Ալեքսանդր Գիրոսը և Լուի Լուչիերին: Հետզհետե զարգանալով՝ ընկերությունն այժմ համարվում է աշխարհի շինարարական ոլորտում խոշորագույն ընկերություններից մեկը: Ընկերությունն ունի մոտ 180 հազար հոգուց բաղկացած աշխատակազմ աշխարհի ավելի քան 100 երկրներում: Մինչ օրս ընկերությունն իրականացրել է այնպիսի նախագծեր, ինչպիսիքն են՝ Գերիփի Ամբարտակը (Gariep Dam) 1971 թ-ին, Թուր Մոնպառնասը (Tour Montparnasse) 1972 թ-ին, Լուվրի նոր նախասրահը 1989 թ-ին, Չենել Թունելը (Channel Tunnel) 1994 թ-ին, Սթեյդ դե Ֆրանսը (Stade de France) 1998 թ-ին և Ռիո-Անտիրիոյի (Rio-Antirio) կամուրջը 2004 թ-ին: 2010 թվականին Վինսի ընկերությունը ըստ կատարված աշխատանքների ծավալների առաջնայնությունը զիջեց Չինական երկու շինարարական (տրանսպորտային) կազմակերպություններին:
Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) ամեն տարի անցկացնում է աշխարհի «Լավագույն բարձրահարկ շենք» մրցույթը: Նախապես ընտրվում են 4 աշխարհագրական տարածաշրջաններից լավագույնները, իսկ հետագայում նրանցից ամենալավը արժանանում է տարվա լավագույնի տիտղոսին: Այս տարվա աշխարհի «լավագույն բարձրահարկ շինություն» անվանակարգի հաղթողի անունը կհայտարարվի հոկտեմբերի 27-ին Չիկագոյում կայանալիք հանդիսավոր արարողության ժամանակ, իսկ այժմ հայտնի են դարձել տարածաշրջանային 4 հաղթողները, որոնք էլ հավակնում են տարվա «լավագույն բարձրահարկ շենք» տիտղոսին: Այս մասին հաղորդում է խորհրդի պաշտոնական կայք ctbuh.org-ը: Ինչպես ներկայացված է խորհրդի պաշտոնական կայքում, տարվա «լավագույն բարձրահարկ շինություն» տիտղոսի հավակնորդներն են, իրենց տարածաշրջաններում արդեն լավագույնը ճանաչված Նյու Յորք բայ Գեհրի (New-York by Gehry) երկնաքերը Հյուսիսային և Հարավային Ամերիկա տարածաշրջանից, Ինդեքս (The Index) աշտարակը Մերձավոր Արևելք և Աֆրիկա տարածաշրջանից, Ասիա և Ավստրալիա տարածաշրջանից Գուանչժոուի Միջազգային ֆինանսական կենտրոնը (Guangzhou International Finance Center) և Եվրոպայից KFW Վեսթարկադե (KFW Westarkade) աշտարակը: Նյու Յորք բայ Գեհրի երկնաքերի պատվիրատուն Ֆորեսթ Սիթի Ռաթներ (Forest City Ratner) ընկերությունն է, որը կառույցի շինարարությունն ավարտել է 2011 թ-ի ապրիլին: 76 հարկանի բնակելի աշտարակի ճարտարապետն է Ֆրենկ Գեհրին Նյու Յորքյան Գեհրի Արքիթեքթս (Gehry Architects New York) ընկերությունից: 102 հազար քառակուսի մետր ընդհանուր մակերեսով աշտարակի բարձրությունը 265 մետր է, իսկ նախագիծն իրականություն դարձնելու համար պատվիրատուն ծախսել է ավելի քան 174 մլն ԱՄՆ դոլար: Գուանչժոու քաղաքում է գտնվում Ասիա և Ավստրալիա տարածաշրջանի հաղթող Գուանչժոուի Միջազգային ֆինասական կենտրոնը: 103 հարկանի, 440 մետր բարձրությամբ երկնաքերը աշխարհի ամենաբարձր աշտարակների ցուցակում զբաղեցնում է 9-րդ հորիզոնականը: Նախագծի գլխավոր պատվիրատուն Յու Քսյու Գրուփն է (Yue Xiu Group), իսկ գլխավոր ճարտարապետը Քրիս Ուիլկինսոնի Ուիլկինսոն Եյր Արքիթեքս (Wilkinson Eyre Architects) ընկերությունը: 2010 թ-ին շահագործման հանձնված՝ 250 հազար քառակուսի մետր ընդհանուր մակերեսով շինության ընդհանուր բյուջեն կազմել է 410 մլն ԱՄՆ դոլար: Շինարարության գլխավոր կապալառուի դերը ստանձնել են 2 ընկերություններ՝ Չինաստանի պետական ճարտարագիտա-շինարարական կորպորացիա ՍՊԸ (China State Construction Engineering Corporation LTD) և Գուանժուի քաղաքաշինական գրուփ ՍՊԸ (Guanzhou Municipal Construction Group CO LTD) ընկերությունները: Եվրոպական տարածաշրջանի հաղթողի տիտղոսը ստանձնել է 2010թ-ին շահագործման հանձնված KFW Վեսթարկադե աշտարակը Ֆրանֆուրտում: 14 հարկանի աշտարակի գլխավոր պատվիրատուն է KFW Բանքենգրուփփե (KFW Bankengruppe) ընկերությունը: 56 մետր բարձրությամբ աշտարակի նախագիծն իրականացրել է Զաուերբրուխ Խաթթոն (Sauerbruch Hutton) ճարտարապետական ընկերությունը: Մերձավոր Արևելք և Աֆրիկա տարածաշրջանի հաղթող, 326 մետր բարձրությամբ Ինդեքս երկնաքերը շահագործման է հանձնվել 2011 թ-ի մարտին Դուբայում: 80 հարկանի աշտարակի գլխավոր կապալառուի դերը ստանձնել է Բրուքֆիլդ Մուլթիփլեքս (Brookfield Multiplex) ընկերությունը, իսկ ճարտարապետական նախագիծն իրականացրել է Ֆոսթեր+Գործընկերներ (Foster+Partners) ընկերությունը: 170 քառակուսի մետր ընդհանուր մակերեսով շինության պատվիրատուն է Յունիոն Փրոփերթիս (Union Properties) ընկերությունը: Այս հղումով դուք կարող եք կարդալ նախորդ տարվա «Լավագույն բարձրահարկ շենք 2010» մրցույթի արդյունքների մասին:
Ինչպես տեղեկացնում է Daily Mail-ը, Մեծ Բրիտանիայի ամենամեծ առանձնատունը, որը գտնվում է Լոնդոնի արվարձանում վաճառքի է հանվել 122 մլն ԱՄՆ դոլարով: Ափդաուն Քորթ (Updown Court) առանձնատունն ունի 103 սենյակ, 5 լողավազան, 2 փենթհաուս և ուղղաթիռային հարթակ: Բացի այդ կա 50 տեղանոց կինոդահլիճ, բոուլինգի խաղասրահ, սպորտդահլիճ, թենիսի կորտեր, «անվտանգության սենյակ» («panic room»), արհեստական լճակ և 3000 շշի համար նախատեսված գինու մառան: Առանձնատունն ունի 234 հազար քառակուսի մետր հողատարածք: 24 ննջասենյակից և 23 լոգասենյակից բաղկացած ամառանոցը կառուցված է հազվագյուտ քարերից՝ մասնավորապես իտալական մարմարից: Ափդաուն Քորթի խոհրդավոր սեփականատերն է որմնադրի զավակ՝ իսկ այժմ հաջողակ կառուցապատող Լեսլի Ալեն-Վերքոն (Leslie Alen Vercoe): Ռայմեր Ինվեսթմենթս (Rhymer Investments) ընկերության հիմնադիր Ալեն-Վերքոն տունը գնել է 2002 թ-ին 32.8 մլն ԱՄՆ դոլարով և մինչ օրս վերանորոգման աշխատանքների վրա ծախսել է 49 մլն ԱՄՆ դոլար: Ափդաուն Քորթը կառուցվել է 1924 թվականին: 1970-ականներին այն ժամանակավոր տնօրինել է եգիպտական արքայազն Սամի Գայեդը (Sami Gayed): 1987-ին կառույցը լուրջ վնասվել է հրդեհից, որից հետո այն ձեռք են բերել երկու կառուցապատողներ, որոնց սնանկացումից հետո Ափդաուն Քորթի սեփականատեր դարձավ պարոն Ալեն-Վերքոն: Ափդաուն Քորթի հարևանությամբ են ապրում այնպիսի նշանավոր դեմքեր, ինչպիսիք են սըր Էլտոն Ջոնը և Քուին (Queen) խմբի կիթառահար Բրայան Մեյը:
Այս շաբաթ Կոպենհագենի նորաստեղծ Օրեսթադ թաղամասում (Orestad) բացվել է ոչ միայն Դանիայի, այլև ամբողջ Սկանդինավիայի խոշորագույն հյուրանոցներից մեկը: Բելլա Սքայ (Bella Sky) հյուրանոցը խորհրդանշում է ոչ միայն թաղամասի արդիականությունը, այլև մայրաքաղաքի աստիճանաբար աճող միջազգային դերը: Գտնվելով Բելլա Սենթրի (Bella Center), օդանավակայանի և Կոպենհագենի պատմական կենտրոնի շրջակայքում, կառույցի տեղը բավականին բարենպաստ է միջազգային միջոցառումների անցկացման համար: Հյուրանոցի պատվիրատուն Բելլա Սենթր (Bella Center) ընկերությունն է, իսկ նախագծողը դանիական 3XH Ճարտարապետական բյուրոն: Շինարարության ինժեներական կողմն ապահովել է Ռեմբոլ (Rembol) խորհրդատվական և ինժեներական ընկերությունը: Ինչպես բացատրում է նախագծի գլխավոր պատասխանատու Կարե Դահլը (Kaare K.B. Dahl), «նախագծի հիմնական խնդիրներից էր շինության «երկրաչափությունը» հասկանալը և դրա իրականացնելը: Անխոս առանց Tekla դիզայն-ծրագրի, նախագծի իրականացումն անհնար կլիներ»: Ռեմբոլ (Rembol) ընկերության մասնագետները բոլոր հաշվարկները և գծագրերն իրականացրել հաշվարկային ROBOT և դիզայներական TEKLA ծրագրերի համատեղմամբ: Երկու ծրագրերի համատեղումը հնարավորություն տվեց պարզել նաև այնպիսի հարցեր ինչպիսիքն են՝ հիմքերի հետագա դեֆորմացումը շինության ավարտից հետո, ինչքան կարող է թեքվել շինությունը հետագայում և այլն: Մասնագետները նախագծել և կառուցել են երկու աշտարակ, որոնք մոտ 15 աստիճանով թեքված են ուղղահայացից: Ի դեպ Բելլա Սքայ (Bella Sky) հյուրանոցի թեքությունը չորս անգամ գերազացում է հայտնի Պիզայի աշտարակի թեքությունը: Հյուրանոցի աշտարակների բարձրությունը 76.5 մետր է, իսկ ընդհանուր տարածքը 44.173 հազար քառակուսի մետր: Հյուրանոցում կա 814 սենյակ, 32 խորհրդակցական դահլիճ, 3 ռեստորան, հյուրասրահ, սքայ-բար, առողջարանական կենտրոն՝ 850 քառակուսի մետր մակերեսով: 3XH Ճարտարապետական բյուրոյի հիմնադիր և տնօրեն Կիմ Հերֆորդ Նիլսենի (Kim Herforth Nielsen) խոսքերով, աշխարհի գրեթե բոլոր միջազգային հյուրանոցները կառուցված են գործնական ոճով: Նրանք որոշել են շեղվել այս համընդհանուր կանոնից և նախագծել այնպիսի շինություն, որն իր ոճով կլինի ոչ թե գործնական, այլ կընդգծի սկանդինավյան օջախների ջերմությունը, լույսը և կապը բնության հետ:
