Ինչպես տեղեկացնում է PanARMENIAN.net կայքը, Գառնու միջնադարյան կամուրջը կվերականգնվի ԱՄՆ դեսպանների մշակութային արժեքների պահպանության հիմնադրամի աջակցությամբ: Վերականգնողական աշխատանքները կսկսվեն 2012 թ-ին, իսկ մինչ այդ կհայտարարվի մրցույթ շինաշխատանքներն իրականացնելու նպատակով: Ըստ ՀՀ մշակույթի նախարարի տեղակալ Արև Սամուելյանի, դժվար է ստույգ ասել՝ ինչքան կտևեն ամրակայման աշխատանքները, սակայն, ըստ նախնական հաշվարկների, 1-1.5 տարին բավական կլինի: Միջնադարյան կամուրջի ամրակայման աշխատանքների նպատակով հիմնադրամը ՀՀ մշակույթի նախարարությանն է հատկացրել 110 հազար ԱՄՆ դոլար: Գառնու միջնադարյան կամուրջը կառուցված է Ազատ գետի վրա: Հայաստանի միջնադարյան ճարտարապետության ինժեներական նշանակություն ունեցող այս կամուրջը կառուցվել է 11-րդ դարում: ՀՀ պետական բյուջեի միջոցների հաշվին մշակույթի նախարարության պատվերով արդեն իսկ կազմվել է հուշարձանի վերականգնման, ամրակայման նախագծանախահաշվային փաթեթը և 2010 թ-ին կատարվել են ամրակայման ու վերականգնման որոշակի աշխատանքներ: Կամուրջը կիսաշրջանաձև միաթռիչք թաղով կառույց է, որի աջափնյա խելը հենված է 4-5 մետր բարձրություն ունեցող բնական ժայռին: Խելերը կառուցված են կրաշաղախով կապակցված ճեղքված բազալտե, իսկ թաղը և ճակատային որմնակամարները կարմիր և սև հարթատաշ տուֆե շարվածքով: Երթևեկելի հատվածն աջ ափից թեքությամբ իջնում է ձախ ափ: ԱՄՆ դեսպանների մշակութային արժեքների պահպանության հիմնադրամը ստեղծման գաղափարը հաստատվել է ԱՄՆ կոնգրեսի կողմից 2000թ-ի աշնանը և այդ ժամանակվանից ի վեր հիմնադրամի ներքո իրականացվել են մշակութային արժեքների պահպանության 640 ծրագրեր աշխարհի 100 երկրներում, որոնց իրականացմանն ուղղվել է շուրջ 26 միլիոն ԱՄՆ դոլար:
News.am կայքը, հղում կատարելով ՀՀ կառավարությանն առընթեր պետական գույքի կառավարման վարչության նորընտիր ղեկավար Արման Սահակյանի հայտարարությանը, գրում է, որ «Դվին» և «Սևան» հյուրանոցների ձգձգված վերանորոգման աշխատանքները կավարտվեն: Մամուլի ասուլիսի ժամանակ պրն. Սահակյանը հայտարարել է, որ 2014 թ-ին, գուցե և ավելի շուտ կավարտվի «Դվին» հյուրանոցի շինարարությունը: Բանն այն է, որ հյուրանոցի այժմյան սեփականատեր՝ «Կովկասյան կոմունիկացիոն խումբ» ընկերությունը, նոր պարտավորություններ է ստանձնել, ըստ որի՝ պայմանագրով սահմանված պարտավորությունները չկատարելու դեպքում, վերջինս Հայաստանի կառավարությանը պարտավոր է վճարել տույժեր չիրականացված ներդրումների 10 տոկոսի չափով: Նշենք, որ 2003 թ-ին հյուրանոցը 3 մլն ԱՄՆ դոլարով գնել էր «Կովկասյան կոմունիկացիոն խումբ» ընկերությունը: Գնորդը խոստացել էր 5 տարում նախկին հյուրանոցի շենքը վերակառուցել և վերածել 5 աստղանի հյուրանոցի՝ ներդնելով 30 մլն ԱՄՆ դոլար: Սակայն ընկերությունը մինչ օրս ոչ մի էական ներդրում չի իրականացրել և շենքը նույն վիճակում է: Ի դեպ, կառավարությունն իրեն իրավունք է վերապահել «Դվին» հյուրանոցը դատական կարգով բռնագանձել, եթե մինչև 2014 թ-ն այն պատրաստ չլինի: Նույն ասուլիսի ժամանակ պրն. Սահակյանը հույս է հայտնել, որ «Սևան» հյուրանոցի շինարարությունը ևս կավարտվի: 1996 թ-ին կիսաքանդ հյուրանոցը վաճառվել էր բրիտանահայ գործարար Վաչե Մանուկյանի «Կարուսել իշթեբլիշմենթ» ընկերությանը: Գնորդը պարտավորվել էր 5 տարվա ընթացքում ավարտել հյուրանոցի շինարարությունը, սակայն այս հյուրանոցն էլ դեռևս մնում է նույն կիսաքանդ վիճակում: Ըստ պրն. Սահակյանի՝ այս տարվա սեպտեմբերին Վաչե Մանուկյանը այցելել է Հայաստան, հանդիպում է ունեցել ՀՀ քաղաքապետ Կարեն Կարապետյանի հետ, որի ժամանակ քննարկվել է հյուրանոցի ապագա ճակատագիրը: Բանն այն է, որ սեփականատերը ցանկանում է կառուցել ոչ թե հյուրանոց, այլ մշակութային կամ գործարար-կենտրոն, որի վերջնական նախագիծը դեռ համաձայնեցված չէ քաղաքային իշխանությունների հետ:
Հայտնի ճարտարապետ Ռաֆայել Իսրայելյանի տունը Երևանում այլևս գոյություն չունի: Բառացիորեն մեկ օրում տունը, որտեղ բնակվել է «Սարդարապատի ճակատամարտ» հուշահամալիրի, «Հաղթանակի» հուշարձանի հեղինակը, հողին է հավասարեցվել, տեղեկացնում է Panarmenian.net կայքը: Իսրայելյանի տունը գտնվում է Սարյանի փողոցում և կառուցվել է հենց իր իսկ նախագծով 1954թ-ին: Նույնիսկ որոշ զարդաքանդակներ արված են նրա ձեռքով: Հոկտեմբերի 8-ին տան պատերը դեռևս կանգուն էին, սակայն հոկտեմբերի 10-ին Սարյան փողոցում` նույն տեղում, որտեղ դեռևս մի քանի օր առաջ կանգուն էին տան պատերը, միայն շինարարական աղբի սարեր են խոյանում: ճարտարապետ Արսեն Կարապետյանը Panarmenian.net-ի թղթակցի հետ զրույցում հայտարարել էր. «Կարելի է մատների վրա հաշվել այն շենքերը, որոնք պահպանում են մեր քաղաքի հիշողությունը»: Ըստ նրա՝ Իսրայելյանն այն մարդն էր, որն արժանի է, որ նրա տունը պահպանվի: «Նրա ավանդը հայկական ճարտարապետության մեջ այնքան մեծ է, որ հերթական հյուրանոցը կառուցելու փոխարեն ավելի ճիշտ կլիներ այն վերածել տուն-թանգարանի»,- ասել է նա : Ըստ նրա՝ Երևանը վերածվում է հիշողություն չունեցող մի քաղաքի: Սակայն ավելացնենք, որ կաոույցը օրինական ձեռք է բերվել Իսրայելյանի ժառանգներից և գնման նպատակը բոլորին վաղուց հայտնի է եղել: Նախագիծը վաղուց պատրաստ էր և վերջերս քաղաքապետարանը, գտնելով նպատակահարմար, թույլ է տվել շինարարության իրականացումը (լրաց՝ www.construction.am): Ռաֆայել Իսրայելյանի նախագծերով կառուցվել է շուրջ 150 շենք: Նա ստեղծել է հուշակոթողների նոր տեսակ` ոչ մեծ հուշարձան-կոթողներ` ի հիշատակ Հայրենական Մեծ պատերազմի հերոսներին: Նրա հեղինակած ճարտարապետական կոթողներից են հռչակավոր Չարենցի կամարը, Սարդարապատի հուշահամալիրը, Երևանի գինու գործարանի, Նկարիչների միության շենքերը: Իր շինությունների նախագծերի մի մասը ճարտարապետը կազմել է այս տանը: Ճարտարապետի մահից հետո տան երկրորդ հարկում ցուցադրվում էին նրա հեղինակած նախագծերի գծագրերը:
Սեպտեմբերի 15-ին մայրաքաղաքի Մալաթիա-Սեբաստիա վարչական շրջանում տեղի ունեցավ ժամանակակից չափանիշներին համապատասխան կառուցված հեծանվահրապարակի բացման արարողությունը, հաղորդում է «Արմենպրես» լրատվական գործակալությունը: Նոր հեծանվահրապարակի շինարարությունը սկսվել էր 2010 թվականի հունիսին՝ Երևանի քաղաքապետարանի և «Ռենկո ԱրմԷստեյտ» ՍՊԸ-ի միջեւ կնքված պայմանագրի համաձայն: Հայաստանի Հանրապետությունում հեծանվասպորտի զարգացման նպատակով, իտալական ընկերության կողմից կառուցված հեծանվահրապարակը հագեցած է ժամանակակից սարքավորանքով, անվտանգության համակարգով, ունի մարզասրահներ, բժշկական և դոպինգի ստուգման սենյակ, մարզիչների համար նախատեսված գրասենյակ, բացօթյա 250 մեքենայի համար նախատեսված կայանատեղի և այլ հարմարություններ: Հեծանվահարապարակը ունի 250 մետր երկարությամբ վազքուղի և 3200 հանդիսատեսի համար նախատեսված դահլիճ: Վազքուղին կառուցվել և ծածկվել է բարձրորակ փայտով, ինչը մարզիկներին թույլ կտա գրանցել արագության լավ արդյունքներ:
Հայաստանի Հանրապետության անկախության 20-ամյա տարեդարձին նվիրված տոնակատարությունների շրջանակներում սեպտեմբերի 16-ին կբացվի «Զվարթնոց» օդանավակայանի նոր տերմինալի շենքը, հաղորդում են օդանավակայանի մամլո ծառայությունից: Պետք է նշել, որ վերջինս իր սարքավորումներով առաջատարը կդառնա տարածաշրջանում: Օդանավակայանի նոր տերմինալը վերջին 20 տարիների ընթացքում հանրապետությունում շահագործման հանձնված խոշորագույն ոչ արտադրական կառույցն է: Նոր օդանավակայանի ընդհանուր բյուջեն կազմել է 224 մլն ԱՄՆ դոլար: 34 հազար քառակուսի մետր ընդհանուր մակերեսով շինությունն ամբողջովին կփոխարինի նախկին համալիրին: Հաշվառման սրահը կունենա 46 հաշվառման սեղան, բարձրակարգ ուղևորների սպասարկման և դիվանագիտական սրահներ, ավտոկայանատեղի 600 ավտոմեքենայի համար: Նորակառույց տերմինալն ապահովված է ժամանակակից և բարձրորակ օդափոխության համակարգով և կենտրոնացված ջրամատակարարմամբ: Նշենք, որ տերմինալն իր գործառույթները կշարունակի իրականացնել անգամ 9-բալանոց երկրաշարժից հետո: «Զվարթնոց» միջազգային օդանավակայանի բարեկարգման աշխատանքներն սկսվել են 2002 թ-ին, իսկ նոր տերմինալի շինարարությունը 2008 թ-ին:
