2012 թ-ին ԱՄՆ կառավարությունը ներկայացրել էր Լոնդոնի «Նայն Էլմս» (Nine Elms) շրջանում կառուցվելիք դեսպանատան նախագծի մանրամասները ներառյալ՝ արտաքին տեսքը, շրջակա միջավայրը և բնապատկերները: Շինության կառուցման մրցույթն անցկացվել էր դեռևս 2010 թ-ին, որի ժամանակ Ֆիլադելֆիայում գտնվող «Կիրան Թիմբերլեյք» (Kieran Timberlake) ճարտարապետական ընկերությունը հաղթել էր Մեծ Բրիտանիայում ԱՄՆ դեսպանատան նոր շենքը նախագծելու մրցույթում: Առաջին անգամ նախագծի մասին հայտարարելուց 4 տարի անց` նոյեմբերի 13-ին սկսվել է դեսպանատան շինարարությունը, որը նախատեսված է ավարտել 2017 թ-ին: Ըստ նախնական տվյալների` դեսպանատան շինարարության բյուջեն կազմում է 1 մլրդ ԱՄՆ դոլարը, ինչը ենթադրում է, որ շինարարության ավարտից հետո ԱՄՆ դեսպանատունը կդառնա մինչ օրս կառուցված ամենաթանկերից մեկը: Խորհանարդանման նորակառույց դեսպանատան դիմային հատվածները կլինեն թափանցիկ ապակուց: Վերջիններիս վրա կներդրվեն թափանցիկ ֆոտովոլտաիկ վահանակներ՝ արևային էներգիան կլանելու համար: Ավելի հզոր արևային վահանակներ կտեղադրվեն նաև շինության տանիքին: 3 մեկ-հարկանի կառույցներ կտեղակայվեն դեսպանատան շենքի կողային մասերում՝ հիմնական կառույցի մուտքը հսկելու համար: Բացի այդ անվտանգության նպատակներով շինության ողջ տարածքը կպարունակի այգիներ, զբոսուղիներ և հսկա լողավազան «Օլին Արքիթեքթս» (Olin Architects) ընկերության կողմից նախագծված: Այս լողավազանը կառույցի անվտանգությունը կապահովի Թեմզա գետի կողմից:

Հնդկաստանում սկսվել է աշխարհի ամենաբարձր արձանի շինարարությունը, այն բանից հետո, երբ Հնդկաստանի ազգային կուսակցության առաջնորդ, Հուջարաթ նահանգի գլխավոր նախարար Նարդերա Մոդին մասնակցել է 340 մլն ԱՄՆ դոլար արժողությամբ նախագծի հիմնարկեքի արարողությանը: Ինչպես տեղեկացնում է BBC-ն, Հնդկաստանի ազգային հերոս, երկրի սահմանադրության համահեղինակ և անկախության մարտիկ Սարդար Վալլաբհաիյի (Սարդար Պատել) արձանը կառուցվում է Հուջարաթ նահանգում, կղզու վրա: Հուշարձանի հաշվարկային բարձրությունը կկազմի 182 մետր, ինչը մոտ 2 անգամ ավել է, քան Նյու Յորքի «Ազատության արձանը», որի բարձրությունը կազմում է 93 մետր: Նշենք, որ ընդդիմադիր կուսակցության կողմից ֆինանսավորվող նախագիծը խիստ քննադատության է արժանացել՝ ուռճաչված բյուջեի պատճառով: Ներկայումս աշխարհի ամենաբարձր արձանը գտնվում է Չինաստանում: 153 մետր բարձրությամբ Վայրոչանա Բուդդայի արձանը կառուցվել է 2002 թ-ին: Երկրորդ տեղում է գտնվում Մյանմարում կառուցված 129 մետր բարձրությամբ Շակյամունի Բուդդայի արձանը, իսկ երրորդ տեղում 120 մետր բարձրությամբ Ամիտաբհա Բուդդայի արձանն է Ճապոնիայում:

Թուրքիայում հոկտեմբերի 29-ին բացվել է աշխարհի առաջին թունելը, որն իրար է միացնում 2 տարբեր մայրցամաքներ: «Մարմարայ» անվանումը ստացած թունելն իրար է միացնում Թուրքիայի խոշորագույն քաղաքի` Ստամբուլի եվրոպական և ասիական հատվածները: Ստամբուլի երկաթգծային ցանցի արդիականացման շրջանակներում իրականացվող «Մարմարայ» նախագծի շինարարությունը տևել է 9 տարի: Նմանատիպ թունելի մասին առաջին անգամ բարձրաձայնել է Օսմանյան սուլթան Աբդուլ Մեջիդը 1860-ական թթ-ին, սակայն այն ժամանակվա տեխնիկական սուղ հնարավորությունների պատճառով նախագիծը չի իրականացվել: 2004 թ-ին դեռևս Ստամբուլի քաղաքապետ Ռեջեփ Թայիփ Էրդողանը քաղաքում իրականացվող մի շարք ծախսատար նախագծերի շարքում կանաչ լույս տվեց նաև այս թունելի շինարարությանը: «Մարմարայ» նախագծի առաջին փուլը, որի բյուջեն կազմել է 4.6 մլրդ ԱՄՆ դոլար, շահագործման է հանձնվել ժամանակացույցից 4 տարի ուշ: Թունելի ընդհանուր երկարությունը կազմում է 13.6 կիլոմետր, որից 1.4 կիլոմետրը ձգվում է 60 մետր խորության վրա՝ Բոսֆոր ծոցի հատակով, իսկ մնացյալ 12.2 կիլոմետրը ձգվում է ցամաքով և իրար է միացնում մետրոպոլիտենի 3 կայարաններ: Ի դեպ, ինչպես պնդում են նախագծի հեղինակները, այս թունելը կարող է դիմակայել հզոր երկրաշարժերին, ինչը խիստ կարևոր գործոն է սեյսմիկ ակտիվ այս գոտու համար:

Իսրայելը, որը վաղուց համարվում է արևային էներգետիկայի հիմնադիրներից մեկը, կիզիչ արևի երկիր է: Հաշվի առնելով ամբողջ տարվա ընթացքում ջերմացնող արևի առավելությունները` Իսրայելը նախատեսում է Նեգևի անապատում կառուցել 121 մեգավատ հզորությամբ արևային էլեկտրակայան, որը էլեկտրաէներգիայով կապահովի մոտ 40 հազար տներ: «Աշալիմ արևային էլեկտրակայան» (Ashalim power plant) անվանումը ստացած էլեկտրակայանի շինարարությունը նախատեսվում է սկսել 2014 թ-ին և ավարտել 2016 –ին: Շինարարության ավարտից հետո այն կդառնա Իսրայելի խոշորագույն արևային էլեկտրակայանը, և երկիրը մի քանի քայլով կմոտենա իր առջև դրված նպատակին, ինչը ենթադրում է մինչև 2020 թ-ն արտադրվող ընդհանուր էներգիայի 10 տոկոսը ստանալ այլընտրանքային աղբյուրներից: «Աշալիմ արևային էլեկտրակայանը» մշակվում է «Մեգալիմ արևային էներգիա» (Megalim Solar Power) ընկերության կողմից, որը կազմավորվել է ամերիկյան արևային էներգիայի մշակմամբ զբաղվող «Բրայթսորս Էներջի» (Brightsource Energy) և ֆրանսիական էներգետիկ և տրանսպորտային «Ալստոմ» (Alstom) ընկերությունների համագործակցության արդյունքում: Ըստ նախնական տվյալների` նախագծի շինարարության ընդհանուր բյուջեն կկազմի 1.1 մլրդ ԱՄՆ դոլար: Հարկ է նշել, որ «Բրայթսորս Էներջի» ընկերությունը նմանատիպ նախագծերի իրականացման բավականին փորձ ունի: Հենց այս ընկերությունն է կալիֆորնիական Մոխավե անապատում կառուցել 377 մեգավատ հզորությամբ աշխարհի խոշորագույն արևային «Իվանպահ» ջերմաէլեկտրակայանը: Իր նախագծերում «Բրայթսորս Էներջի» ընկերությունն օգտագործում է հելիոստատներով հայելիներ (այս սարքը հայելին պտտում է այնպես, որ միշտ այն հետևի արևի ճառագայթներին), որոնք արևի ճառագայթներն ուղղում են դեպի աշտարակներ, որտեղ առաջանում է տուրբիններն աշխատեցնող գոլորշին: Այս արևային ջերմային էլեկտրակայանը համարվում է ապագայում կառուցվելիք 3 նախագծերից մեկը: Ի դեպ, երբ երեք նախագծերն էլ գործարկվեն «Աշալիմ արևային էլեկտրակայանը» իր մեծությամբ կդառնա հինգերորդն աշխարհում: 250 մեգավատ հզորությամբ էլեկտրակայանն ի վիճակի կլինի ապահովել երկրի էլեկտրաէներգիայի պահանջարկի 2.5 տոկոսը: Նշենք, որ Հայաստանում 1060 ՄՎտ դրվածքային հզորությամբ միջուկային նոր էներգաբլոկի կառուցման համար, ըստ նախնական տվյալների, կպահանջվի 5,2-7,2 մլրդ. ԱՄՆ դոլար, բուն շինաշախատանքների համար՝ 5-7 տարի։ Ստացվում է, որ արևային էներգիայի օգտագործումը լինելով անվտանգ, տնտեսապես նույնպես առավել նպատակահարմար է դառնում (250 Մվտ-1.1 մլրդ ԱՄՆ դոլար): Տվյալ դեպքում նաև չի առաջանում վառելիքի կարիք, որն իր հերթին բերում է բացառիկ էներգետիկ անկախության: Իհարկե, Հայաստանում արևային օրերը զիջում են Իսրայելին, բայց անգամ այս հանգամանքում, պետք է լուրջ մտածել այս այլընտրանքի ակնհայտ նպատակահարմարության մասին...

Լոնդոնում նախատեսվում է վերականգնել թագուհի Վիկտորիայի (գահ. 1837-1901) ժամանակաշրջանին պատկանող հիասքանչ «Բյուրեղապակյա դղյակը» (Crystal Palace): Նախագիծը համատեղ կիրականացնեն ճարտարապետական «Արուփ» (Arup) և չինական կառուցապատող ZhongRong Group ընկերությունները: Ըստ նախնական տվյալների` «Արուփ» ընկերությունը պատրաստել է վերականգնման այնպիսի նախագիծ, որը շատ մոտ է Ջոզեֆ Պակսթոնի նախագծած բնօրինակին: «Բյուրեղապակյա դղյակը» 1851 թ-ին «Հայդ Փարքում» կառուցվել է «Առաջին Համաշխարհային Ցուցահանդեսի» շրջանակներում` որպես ցուցասրահ: Ջոզեֆ Պանկթոնի գլխավորությամբ կառուցված ցուցասրահը ցուցահանդեսից հետո տեղափոխվել է մեկ այլ վայր` Հարավային Լոնդոնի Սայդենհեմ-Հիլլ արվարձան: Այնուհետև 1936 թ-ի հրդեհից հետո շինությունը այրվել է և մինչ օրս երբևէ չի վերականգնվել: Միայն վերջերս չինացի միլիարդատեր ZhongRong Group ընկերության հիմնադիր Նի Չժաոսինը հայտարարել է, որ պատրաստ է 800 մլն ԱՄՆ դոլար ներդնել պատմական շինությունը վերակառուցելու համար: Ինչպես արդեն նշել ենք, վերակառուցման նախագիծը շատ մոտ է բնօրինակին, որը ներառում էր հսկայական ստվերոտ զբոսայգի: «Արուփ» ընկերության նախագիծը ենթադրում է ոչ միայն շինության վերակառուցում, այլև այն շրջապատող 73 հեկտար ընդհանուր մակերեսով այգու վերականգնում: Զբոսայգում կլինեն ծառերով հագեցած զբոսուղիներ, իտալական ոճով կառուցված գեղեցիկ տեռասներ, սրճարան և այցելուների կենտրոն: