«ԲիԱյՋի» (BIG) ճարտարապետական ընկերությունն ամերիկյան Արիզոնա նահանգի մայրաքաղաք Ֆինիքսում (Phoenix) նախագծել է նոր աշտարակ-դիտահարթակ: Չնայած այն փաստին, որ Ֆինիքսը համարվում է Ամերիկայի նահանգային խոշորագույն մայրաքաղաքը, անգամ առաջ անցնելով դաշնային մայրաքաղաք Վաշինգտոնից, այն այնքան էլ հայտնի չէ ամբողջ աշխարհում: Այդ իսկ պատճառով նախագծի հեղինակները ցանկանում են նոր աշտարակի օգնությամբ, որը հավանաբար կդառնա քաղաքի ճարտարապետական խորհրդանիշը, քաղաքը վերածել զբոսաշրջության կենտրոնի: Եվ, հավանաբար, դա նրանց մոտ կստացվի: Անկասկած, «Փին» (Pin - գնդասեղ) անվանումը ստացած նոր աշտարակը տարբերակող ուղենիշ կդառնա քաղաքի համար: «Փին» աշտարակի նախագիծն իրականացրել են անշարժ գույքով զբաղվող «Նովավեսթ» (Novawest) ընկերությունը և դանիական «ԲիԱյՋի» ճարտարապետական բյուրոն: Դիտահարթակ աշտարակի բարձրությունը կկազմի 128 մետր: Այն կունենա հսկա գնդասեղի տեսք՝ բաղկացած կլինի բետոնե ոտքից և դրան ամրացված գնդից: Ի դեպ, գունդը բաղկացած կլինի հիմքին ոլորաձև փաթաթված հարթակներից: Շնորհիվ իր բացառիկ դիզայնի աշտարակը կերևա նաև տիեզերքից, իսկ այցելուները կկարողանան հիանալ 360 աստիճան երևացող անկրկնելի տեսարաններով: Աշտարակի մուտքի մոտ կլինի հանրային գոտի, ջրային և առևտրային կենտրոններ: Այցելուները դիտահարթակ՝ աշտարակի ամենաբարձր կետ կհասնեն վերելակով, այնուհետև կսկսեն զբոսնել ազատ քայլուղով և հիանալ անկրկնելի տեսարանով: Ոլորաձև փաթաթված տարածության մեջ կտեղակայվի բար, սրճարան, էլիտար ռեստորան, գիշերային ակումբ, երեկույթների համար նախատեսված տարածք, պատշգամբ, սրահ՝ նախատեսված տարբեր միջոցառումների համար, պատկերասրահներ գեղարվեստական և մշակութային հատուկ ցուցահանդեսների համար: Հեղինակների խոսքերով նախագծի էկոլոգիական կայունությունն առաջին տեղում է, ուստի աշտարակում կտեղակայվեն էներգախնայող և արևային էներգիայի օգտագործման տեխնոլոգիաներ: Աշտարակը գիշերները կլուսավորվի լուսադիոդային լամպերով:
Բրազիլացի ճարտարապետ Օսկար Նիմեյերը (Oscar Niemeyer), ով համարվում է 20-րդ դարի բազմաթիվ հայտնի ճարտարապետական գլուխգործոցների հեղինակ, մահացել է իր 105-ամյա տարեդարձից մի քանի օր առաջ: Նշենք, որ անցած տարի դեկտեմբերի 15-ին Ռիո դե Ժանեյրոյի Կոպակաբանա (Copacabana) ծովափին նայող իր արվեստանոցում աշխարհահռչակ ճարտարապետ Օսկար Նիմեյերը նշեց իր ծննդյան 104-րդ տարեդարձը: Ճարտարապետը 1960-ական թթ-ներից համաշխարհային ճանաչում է ձեռք բերել որպես Բրազիլիայի կառավարական կառույցների նախագծերի հեղինակ: Իր երկարամյա աշխատանքային ուղու ընթացքում տաղանդավոր ճարտարապետը ստացել է բազմաթիվ մրցանակներ, ներառյալ 1988 թ-ին ստացած «Պրիցկերյան Մրցանակը», որը ճարտարապետության մեջ համարժեք է «Նոբելյան» մրցանակին: Նիմեյերի աշխարհահռչակ աշխատանքների շարքում պետք առանձնացնել ՄԱԿ-ի գլխավոր գրասենյակի շենքը Նյու Յորքում, որը նա նախագծել է հայտնի ճարտարապետ Լե Կարբյուզեյի (Le Corbusier) հետ: Բրազիլական ռազմական իշխանությունների կողմից արտաքսված տարիների՝ որպես կոմունիստական կուսակցության հետևորդ, նախագծել է վերջինիս գլխավոր գրասենյակի շենքը Փարիզում: Նիմեյերը շարունակում էր աշխատել մինչև այս տարվա սկիզբը: Նշենք, որ անցած տարի սեփական նախագծով Ավիլեսում (քաղաք Իսպանիայի հյուսիսում) տեղի ունեցավ Նիմեյերի մշակութային կենտրոնի (Centro Niemeyer) բացման արարողությունը: Իր ճարտարապետական ոճի շնորհիվ Օսկար Նիմեյերը հանդես էր գալիս ընդդեմ «ուղղափառ ֆունկցիոնալիզմի»: Բրազիլացի ծովափնյա կնոջ մարմնի ջատագով ճարտարապետն իր նախագծերում անպայման օգտագործում էր վերջինիս կառուցվածքը: Երկաթ-բետոնի և պողպատի համակցությամբ նա ստեղծում էր հարթ զառիվայրեր, որոնք բարձրանում էին դեպի վեր լայն զբոսուղիներով, նախագծում էր թռչող ափսեների և ծաղկամանների նմանվող կառույցներ: Այնուամենայնիվ ոչ բոլորն էին ընդունում ճարտարապետական նրա ոճը: Շատերը պնդում էին, որ լինելով կոմունիստ, նա մարդասիրությամբ չէր փայլում և շինություններ նախագծելիս հիմնականում կենտրոնանում էր վերջինիս ճարտարապետական ձևի, այլ ոչ թե օգտագործողների հարմարավետության վրա: Օսկար Նիմեյերն իր կյանքի ընթացքում նախագծել է ավելի քան 600 կառույց, որոնց մեջ մտնում են թանգարաններ, հուշահամալիրներ, դպրոցներ, եկեղեցիներ, ինչպես Բրազիլիայում, այնպես էլ նրա սահմաններից դուրս:
Դուբայում սկսվել է աշխարհի ամենաբարձր հյուրանոցի, որի շենքը օգտագործվելու է բացառապես որպես հյուրանոց, շինարարության երկրորդ փուլը: Այն բանից հետո, երբ Արաբական Միացյալ Էմիրությունների փոխնախագահ, Դուբայի կառավարիչ շեյխ Մուհամեդ Բին Ռաշիդ Ալ-Մակթումը (Sheikh Mohammad Bin Rashid Al Maktoum) այցելել է արդեն պատրաստի շինություն, որի բացման հանդիսավոր արարողությունը տեղի է ունեցել այս ամսվա սկզբին, կարգադրել է հյուրանոցը կառուցող «Էմիրեյթս Գրուփ» (Emirates Group) ընկերությանն անհապաղ սկսել «JW Մարիոթ Մարքուիս» (JW Marriott Marquis) հյուրանոցի երկվորյակ աշտարակի շինարարությունը: Շինարարության ավարտից հետո, որը նախատեսված է 2014 թ-ի վերջին կամ 2015 թ-ի սկզբին, աշխարհի ամենաբարձր հյուրանոցը կունենա 1600 սենյակ և 19 ռեստորան, իսկ հյուրանոցային համարների քանակով կդառնա խոշորագույնը Դուբայում: Շինության բարձրությունը կկազմի 355 մետր, ինչն ընդամենը 26 մետրով կզիջի Նյու Յորքի «Էմփայեր Սթեյթ Բիլդինգ»-ին (Empire State Building):
Ճարտարապետ Նորման Ֆոսթերը (Norman Foster) հանրությանն է ներկայացրել Նյու Յորքի «Կենտրոնական կայարանի» (Grand Central Terminal) վերակառուցման նախագիծը, որը ենթադրում է ընդլայնել կայարանի հանրային տարածքները և մուտքերը, նրանց կողքին ստեղծել լայն զբոսուղիներ, իսկ Վանդերբիլթ Ավենյու (Vanderbilt Avenue) փողոցն ընդհանուր առմամբ ազատել երթևեկությունից: Նյու Յորքի հանրահայտ «Կենտրոնական կայարանը», որը գտնվում է Փարք Ավենյու (Park Avenue) և 42-րդ փողոցների խաչմերուկում 2013 թ-ի փետրվարին կտոնի իր կառուցման 100-ամյա տարեդարձը: Ինչպես նշվում է «Ֆոսթեր+Փարթներս» (Foster+Partners) ճարտարապետական բյուրոյի կայքում, այդ կապակցությամբ Նյու Յորքի Քաղաքային արվեստի խորհուրդը (Municipal Art Society of New York) առաջարկել էր ճարտարապետներին կայարանի վերակառուցման և շրջակա միջավայրի բարելավման նախագիծ մշակել: Ընկերության տարածած հաղորդագրության մեջ նշվում է, որ Նյու Յորքի Քաղաքային Արվեստի Խորհուրդի կոչը կարևոր նախաձեռնություն է, որը կօգնի ձևավորել քաղաքի ապագա տեսքը: Հասարակական կյանքի որակը ուղղակի ազդեցություն ունի քաղաքացիներ ամենօրյա կյանքի վրա: «Կենտրոնական կայարանը» համարվում էր Նյու Յորքի գլխավոր տեսարժան վայրերից մեկը, սակայն հետզհետե կայարանը դարձավ սեփական հանրաճանաչության զոհը: Այսօր կայարանի շենքը, որը նախատեսված է սպասարկելու 75 հազար ուղևորի, ծանրաբեռնված օրերին սպասարկում է ավելի քան 1 մլն ուղևորի: Ինչպես նշվում է ընկերության հաղորդագրության մեջ, կայարանի գերծանրաբեռնվածության պատճառով գոյություն ունեցող հանգույցներն ու ճանապարհները չեն բավարարում այսօրվա պահանջներին: Բացի այդ մոտակա փողոցները հագեցած են տրանսպորտային միջոցներով, իսկ քայլուղիները բավարար չեն հետիոտների համար: Ֆոսթերի ճարտարապետական բյուրոն առաջարկում է կայարանի ներսում ստեղծել լայնարձակ նախասրահ նոր մուտքերով, իսկ արտաքին փողոցները բաժանել տրանսպորտային փողոցների և քայլուղիների: Բացի այդ առաջարկվում է Վանդերբիլթ Ավենյուն ամբողջովին դարձնել քայլելու համար, այնտեղ տնկել ծառեր, տեղադրել արձանիկներ և փողոցային սրճարաններ բացել: Բացի այդ ենթադրվում է մեծացնել 42-րդ փողոցում գտնվող կայարանի մուտքը, իսկ Լեքսինհթոն Ավենյու (Lexington Avenue) փողոցի արևելյան հատվածում ծառեր տնկել և լայն զբոսուղիներ կառուցել: Ավելի հագեցած մակարդակներում նախատեսվում է ընդլայնել հանրային տարածքները, որպեսզի հնարավոր լինի ավելացնել ուղևորահոսքերը: Նյու Յորքի «Կենտրոնական կայարանը» քաղաքի ամենահայտնի և հնագույն կայարանն է, որը կառուցվել է 1871 թ-ին: Կայարանը գտնվում է Մանհեթթենի կենտրոնում, 42-րդ և Փարք Ավենյու փողոցների խաչմերուկում, իսկ նրա հարևանությամբ գտնվում են մետրոյի 3 կայարաններ:
Հոկտեմբերին հանրությանը ներկայացվեց մերձմոսկովյան Բարվիխա շրջանում կառուցված նոր առանձնատուն, որը Նաոմի Քեմբելի համար կառուցել է ռուս գործարար Վլադիսլավ Դորոնինը: Շինության դիզայնի հեղինակը բրիտանական հայտնի ճարտարապետ Զահա Հադիդն է: Ֆուտուրիստական շինությունը հիշեցնում է տիեզերանավ, որի մի մասը ստորգետնյա է, իսկ մյուսը՝ գետնից 20 մետր վեր է բարձրանում: «Քափիթալ Հիլլ Ռեզիդենս» (Capital Hill Residence) առանձնատան ընդհանուր մակերեսը 8687 քառակուսի մետր է` ներառյալ երկու աշտարակները, որոնք հիշեցնում են ընձուղտի վիզ: Այդտեղ տեղակայված են սենյակներ, որոնք հիշեցնում են աստղադիտարան: Առանձնատան ստորգետնյա հատվածում տեղակայված են ֆիննական բաղնիքը, համամը (թուրքական բաղնիքը) և ռուսական բաղնիքը: Այստեղ է լինելու նաև ֆիթնեսի հսկայական սրահ և հյուրասենյակ: Տան առաջին հարկում կլինի հյուրասրահ, փակ լողավազան, ճաշասրահ և խոհանոց: Առանձնատանը նախատեսված է նաև մանկական երկու սենյակ: Տան դիզայնն արված է մոդեռն ոճով` միաձուլելով բնական նյութերը, սպիտակ գույնը և երկրաչափական դետալները: Բաց տարածքները, զոնային բացակայությունը, հատակից միչև առաստաղ պատուհանները, դինամիկ և լողացող ձևերը՝ այս բոլորը ճարտարապետ Զահա Հադիդի ոճի արդյունքներն են: Ըստ տարածված լուրերի՝ Վլադիսլավ Դորոնինը, ում հետ Նաոմին հանդիպում է 2008 թ-ից, պատրաստ է մատուցել թանկարժեք նվերը, երբ բրիտանացի մոդելը նրա օրինական կինը դառնա: Գործարարից Քեմբելն արդեն ստացել է նվեր՝ Բրազիլիայի Սան Պաուլոյից ոչ հեռու գտնվող 18.5 մլն դոլար արժողությամբ պենտհաուս: Իսկ 2011 թ-ին իր ծննդյան օրվա առիթով Քեմբելը գործարարից նվեր ստացավ առանձնատուն Թուրքիայում:
