«Պենտոմինիում» (The Pentominium) նախագծի գլխավոր կապալառու «Տրիդենթ Միջազգային Հոլդինգը» (Trident International Holding) հայտարարել է 516 մետր բարձրությամբ աշտարակի շինարարական աշխատանքների հնարավոր վերսկսման մասին: Ի դեպ, շինարարության ավարտից հետո այս աշտարակը կդառնա աշխարհի ամենաբարձր բնակելի երկնաքերը` հետևում թողնելով նախկին տիտղոսակրին` Դուբայի «Փրինցես Թաուերին» (Princess Tower): Ինչպես պնդում է «Դուբայի հողային հարցերով դեպարտամենտը» (Dubai Land Department), ընկերությունը ակտիվորեն աշխատում է, որպեսզի հնարավոր լինի վերականգնել շինարարությունը ընթացիկ տարվա երրորդ եռամսյակում: 2009 թ-ին «Արաբական շինարարական ընկերությունը» (Arabian Construction Company) 400 մլն ԱՄՆ դոլար արժողությամբ պայմանագիր ստորագրեց աշտարակի շինարարության համար: Նույն տարվա հուլիսի 26-ին երկնաքերի շինարարությունը սկսվեց: Ըստ նախնական տվյալների` «Դուբայ Մարինա» (Dubai Marina) թաղամասում կառուցվող աշտարակի շինարարությունը պետք է ավարտվեր 2013 թ-ին, սակայն համաշխարհային ֆինանսական ճգնաժամից հետո, 2011 թ-ին, ընկերությունը դադարեցրեց շինարարությունը` կառուցելով միայն 30 հարկ: Շինարարության ավարտից հետո «Պենտոմինիում» աշտարակը կդառնա Դուբայում բարձրությամբ երկրորդը` զիջելով միայն 828 մետր բարձրությամբ աշխարհի համար 1 «Բուրջ Խալիֆային»: Աշտարակը պետք է ունենա 122 հարկ, որտեղ կտեղակայվեն 172 շքեղ փենթհաուսներ նախագծված Իտալացի դիզայներ Սալվատորե Ֆերրագամոյի կողմից: Ի դեպ, Դուբայը արդեն համարվում է աշխարհի 4 ամենաբարձր բնակելի երկնաքերերի տունը: Մասնավորապես, Դուբայում է գտնվում աշխարհի ներկայիս ամենաբարձր բնակելի աշտարակը` 414 մետր բարձրությամբ «Փրինցեսս Թաուերը», 395 մետր բարձրությամբ «23 Մարինան» (23 Marina), 381 մետր բարձրությամբ «Էլիտ Ռեզիդենսը» (Elite Residence) և 337 մետր բարձրությամբ «Դը Թորչ» (The Torch) աշտարակը: «Էմփորիս» (Emporis) կայքի կատարած հետազոտության համաձայն` այսօր Դուբայում կարելի է հաշվել 1882 երկնաքեր, որից 869-ի շինարարությունն ավարտված է, 625 –ը գտնվում է նախագծման փուլում, 341-ը կառուցվում է, 46 –ը մնում են անկառույց, իսկ 1-ն էլ ապամոնտաժվել է:

Ճապոնիայի Օսակա քաղաքում շահագործման է հանձնվել երկրի ամենաբարձր աշտարակը: 300 մետր բարձրությամբ երկնաքերի շինարարությունը տևել է 4 տարի: Նախագծի գլխավոր կառուցապատող «Կինտեցու Քորփորեյշնը» (Kintetsu Corporation) ավելի քան 1.3 մլրդ ԱՄՆ դոլար է ներդրել երկնաքերի շինարարության մեջ: «Աբենո Հարուկաս» (Abeno Harukas) անվանումը ստացած երկնաքերն իր նախկին տիտղոսակրին առաջ է անցել ընդամենը 4 մետրով: Մինչ օրս Ճապոնիայի ամենբարձր երկնաքերը համարվում էր 296 մետր բարձրությամբ «Լենդմարք Թաուերը» (Landmark Tower) Յոկոհամա քաղաքում: 60 հարկանի նորակառույց աշտարակում տեղակայված են բազմաթիվ նշանակության տարածքներ, «Մարրիոթ Ինթերնեշնլ» հյուրանոցը, հսկայական խաղասրահ, ինչպես նաև «Հարուկաս 300» (Harukas 300) դիտահարթակը, որը գտնվում է աշտարակի 58-60-րդ հարկերում 288 մետր բարձրության վրա: ի դեպ, երկրի ամենաբարձր դիտահարթակը տեղակայված է 450 մետր բարձրության վրա «Երկնային ծառ» (Sky Tree) աշխարհի ամենաբարձր հեռուստաաշտարակում:

Չինաստանը շարունակում է համաշխարհային հանրությանը զարմացնել ճարտարապետական իր յուրօրինակ փորձերով: «Ոսկե փքաբլիթ» հիշեցնող 138 մետր բարձրությամբ «Գուանչժոյի շրջանակ» անվանումը կրող գրասենյակային երկնաքերի շինարարությունը ավարտվել է այս ամիս: Քաղաքի Մարգարտե (Չժուցյան) գետի ափին կառուցված երկնաքերում տեղակայվել են Hongda Xingye Group քիմիական ընկերությունը և Guangdong Plastic Exchange համաշխարհային ապրանքային բորսան, որտեղ իրականացվում է պլաստմասայի առևտուր: Նախագծի հեղինակների առջև լուրջ խնդիր էր դրված` կառուցել ոչ թե ավանդական երկնաքեր, այլ այնպիսի գրասենյակային համալիր, որը կբնորոշեր չինացիներին: Արդյունքում նախագծի ճարտարապետները ստեղծեցին այնպիսի համալիր, որը ներկայացնում է չինական մեծահոգությունը խորհրդանշող «Նեֆրիտե բի-սկավառակը»: Վերջինս խորհրդանշում է հանրության մեջ անհատի բարձր դիրքը, նրա բարոյական անթերիությունը և կապը նախնիների հետ: Բացի այդ «Նեֆրիտե բի-սկավառակը» եղել է դեռևս 2000 տարի առաջ տվյալ շրջանում թագավորած դինաստիայի խորհրդանիշը: Նշենք նաև, որ սա կառույցի արտաքին տեսքի միակ բացատրությունը չէ: Բանն այն է, որ երկնաքերն արտացոլվելով Մարգարտե գետի ջրերի մեջ ստեղծում է անվերջության նշանի, ինչպես նաև 8 թվանշանի պատկեր, որը Չինաստանում համարվում է երջանիկ թիվ: Պատահական չէ, որ 2008 թ-ին Պեկինում կայացած Օլիմպիական խաղերի ժամանակ մեդալների վրա փորագրված էր փոքրիկ «Նեֆրիտե բի-դիսկ», իսկ բացման արարողությունն անմիջական կապ ուներ 8 թվի հետ, մասնավորապես` Պեկինի Օլիմպիական խաղերի բացման արարողությունը սկսվեց 08.08.2008 թ-ի ժամը 8:08-ին: Գուանչժոու քաղաքում կառուցված յուրօրինակ գրասենյակային համալիրի նախագիծը հաղթել է 2009 թ-ի միջազգային ճարտարապետական մրցույթում Միլանում գտնվող «ԷյԷմ Փրոջեքթ» ճարտարապետական բյուրոն՝ ղեկավար իտալացի Ջոզեֆ դի Պասկուալեյի գլխավորությամբ: 138 մետր բարձրությամբ աշտարակի ընդհանուր մակերեսը կազմում է 85 հազար քառակուսի մետր: «Ոսկե փքաբլիթը» Գուանչժոույի և Չինաստանի մյուս երկնաքերերից տարբերվում է ոչ թե նախագծով, այլ արտաքին տեսքով: Չէ որ այն իրենից ներկայացնում է մեջտեղում 50 մետր տրամագծով անցքով հսկա շրջանակ:

«Ջեդդա տնտեսական ընկերության» (Jeddah Economic Company) նորանշանակ գործադիր տնօրեն Մոնիբ Համմոուդը (Mounib Hammoud) հայտարարել է, որ «Արքայական Աշտարակի» (Kingdom Tower) հիմնային աշխատանքներն արդեն ավարտված են: Ինչպես նշում է Arab News լրատվական գործակալությունը, սա նշանակում է, որ շուտով կսկսվեն շինարարական աշխատանքներն արդեն հողի մակերևույթի վրա և դրանից բարձր: Նշենք, որ անցած տարվա հոկտեմբերին շինարարական Bauer ընկերությունը հայտարարել էր, որ Սաուդյան Արաբիայի մայրաքաղաք Ջեդդայում կառուցվելիք աշխարհի ամենաբարձր աշտարակի հիմքային աշխատանքները սկսելու վերաբերյալ պայմանագիրն արդեն ստորագրված է: Իսկ «Արքայական Աշտարակի» մասին առաջին անգամ հայտարարվել է 2011 թ-ի օգոստոսի 2-ին, երբ Սաուդյան Արաբիայի արքայազն, միլիարդատեր Ալվալիդ իբն Թալալը (Alwaleed bin Talal) և երկրի խոշորագույն կառուցապատող Բեն Լադեն Գրուփ (Bin Laden Group – հիմնված է աշխարհի, արդեն հանգուցյալ, համար 1-ին ահաբեկչի հոր կողմից) ընկերությունը համաձայնագիր ստորագրեցին՝ Կարմիր ծովի ափին գտնվող Ջեդդա քաղաքում կառուցել 1.2 մլրդ ԱՄՆ դոլար արժողությամբ աշխարհի ամենաբարձր երկնաքերը: Այս տարվա հուլիսի 20-ին Չինաստանի Չանշա (Changsha) նահանգում սկսվեց աշխարհի ամենաբարձր երկնաքերի շինարարությունը: «Բրոուդ Սըսթեյնեբլ Բիլդինգ» (Broad Sustainable Building) ընկերությունը նախատեսել էր 7 ամսում կառուցել 838 մետր բարձրությամբ երկնաքեր՝ օգտագործելով «հավաքովի» կառուցվածքներ: Սակայն մի քանի օր անց շինարարական աշխատանքները դադարեցվեցին փաստաթղթային խնդիրների պատճառով:

Նյու Յորքի Մանհեթենում տեղի է ունեցել 2001 թ-ի սեպտեմբերի 11-ին «Համաշխարհային առևտրային կենտրոնի» «Երկվորյակ աշտարակների» փլուզման տեղում կառուցված առաջին երկնաքերի բացման հանդիսավոր արարողությունը, որը տևել է 2 օր: 72 հարկանի «Համաշխարհային առևտրային կենտրոն 4»-ի բարձրությունը կազմում է 298 մետր, իսկ ընդհանուր մակերեսը` 214 հազար քառակուսի մետր: «Պրիցկերյան մրցանակի» դափնեկիր Ֆումիհիկո Մակիի նախագծած երկնաքերի շինարարությունը սկսվել է դեռևս 2008 թ-ին: Նախագծի գլխավոր կառուցապատող «Սիլվերսթոուն Փրոփըրթիս» ընկերությունը մոտ 1.67 մլրդ ԱՄՆ դոլար է ներդրել ծրագրի իրականացման ընթացքում: Այսօր երկնաքերի 40 տոկոսը դեռևս ազատ է, իսկ 60 տոկոսը վարձակալվել է 2 պետական ընկերությունների կողմից: 7 երկնաքերերից բաղկացած «Համաշխարհային առևտրային կենտրոնի» մակերեսը կազմում է 6.5 հեկտար: Ահաբեկչության ժամանակ «Երկվորյակ աշտարակները» և «Համաշխարհային առևտրային կենտրոն 7»-ը ամբողջությամբ ավերվել էին, իսկ մնացած երկնաքերերն էլ վնասվել, այնպես որ վերջիններիս ապամոնտաժման անհրաժեշտությունն էլ առաջացավ: Այսօր «Համաշխարհային առևտրային կենտրոնի» վերականգնման նախագիծը, որը նաև ստացել է «Գրաունդ Զերո» անվանումը, բաղկացած է 6 երկնաքերերից, թանգարանից, հուշահամալիրից, որը բացվել է 2011 թ-ի սեպտեմբերի 11-ին, և ճանապարհային հանգույցից: Հարկ է նշել, որ «Համաշխարհային առևտրային կենտրոն 7»-ի շինարարությունն ավարտվել է դեռևս 2006 թ-ին, սակայն այն գտնվում է վերոնշյալ տարածքից դուրս: Վերականգնված կենտրոնի գլխավոր երկնաքերը լինելու է 541 հարկանի «Համաշխարհային առևտրային կենտրոն 1»-ը: Այս երկնաքերի հիմնական շինարարությունն արդեն ավարտված է, իսկ հանդիսավոր բացման արարողությունը նախատեսված է 2014 թ-ին: Նշենք նաև, որ համալիրի բոլոր շինությունները նախատեսվում է շահագործման հանձնել մինչև 2020 թ-ը: