Դեկտեմբերի 15-ին Ռիո դե Ժանեյրոյի Կոպակաբանա (Copacabana) ծովափին նայող իր արվեստանոցում աշխարհահռչակ ճարտարապետ Օսկար Նիմեյերը նշեց իր ծննդյան 104-րդ տարեդարձը, գրում է Yahoo News-ը: Այս ճարտարապետը, բրազիլացի կնոջ մարմնի գեղեցկությամբ ներշնչված իր զգայուն կորերի ստեղծագործություններով, հեղափոխություն մտցրեց ժամանակակից ճարտարապետության պատմության մեջ: Իր 70 տարվա գործունեության արդյունքում ճարտարապետն ամբողջ աշխարհում նախագծել է ավելի քան 600 շինություն: Նիմեյերը եղել է Լե Կորբյուզեի (Le Corbusier) աշակերտը և 1943 թ-ին նախագծել է իր առաջին շենքը՝ Ռիո դե Ժանեյրոյի կրթության և առողջապահության նախարարությունը (Ministry of Education and Public Health): Նա նաև այնպիսի հռչակավոր շինությունների հեղինակ է, ինչպիսիք են՝ Բրազիլիայի ազգային կոնգրեսի շենքը (National Congress of Brazil), Բրազիլիայի Տաճարը (Cathedral of Brasilia), Նիտերոյի ժամանակակից արվեստի թանգարանը (Niteroi Contemporary Art museum): Վերջերս նա նաև նախագծել է Մեյն (Maine) նահանգում գտնվող Շուգարլոֆ Մաունթին (Sugarloaf Mountain) թանգարանը: 1988 թ-ին Օսկար Նիմեյերը արժանացել է Պրիտցկերի հեղինակավոր մրցանակի (Pritzker Prize)՝ իր նախագծած առաջին շինության համար: Ի դեպ սա ճարտարապետության բնագավառի համար նախատեսված մրցանակ է, որը համարժեք է Նոբելյան մրցանակին: Անցած տարի օգոստոսին լրագրողների հետ հանդիպման ժամանակ Նիմեյերը հայտարարել է, որ դեռ որոշ բաներ կան, որ ինքը կցանկանար անել իր կյանքի ընթացքում, օրինակ՝ մի գեղեցիկ նախագիծ նվիրել Կոպակաբանային: Իսկ այն հարցին, թե ինչ է նրա համար կյանքը, աշխարհահռչակ ճարտարապետը պատասխանել է՝ եթե իմ սիրած կինը կողքիս է, թող լինի՝ ինչ լինում է:

Գերմանական Պորշե Դիզայն Գրուփ (Porsche Design Group) և տեղական Դեզեր Փրոփերթիս (Dezer Properties) ընկերությունները որոշել են Մայամիում կառուցել Պորշե Աշտարակը (Porsche Tower), տեղեկացնում է Trulia կայքը: 560 մլն ԱՄՆ դոլար արժողությամբ, 57 հարկանի աշտարակը կկառուցվի «Արևային կղզիների» (Sunny Isles Beach) ափին: Իսկ Մոսկովյան Սոթբիս Ինթերնեշնլ Ռիելթի (Sotheby’s International Realty) ընկերության տվյալներով՝ դեկտեմբերին ընկերություններն արդեն ստացել են քաղաքային մարմինների թույլտվությունը շինարարության համար: Ըստ կայքի, սա առաջին նախագիծն է աշխարհում, որ հնարավորություն կտա բնակիչներին սեփական ավտոմեքենայով հասնել բարձրահարկում տեղակայված իրենց բնակարան (չնայած մենք նախկինում գրել ենք գոյություն ունեցող նմանատիպ շենքի մասին): Սեփական բնակելի շենքի տարածքում ավտոկայանատեղիի որոնումն այլևս խնդիր չի լինի նրանց համար, ովքեր կկարողանան բնակարան ձեռք բերել այս երկնաքերում: Բնակիչները պարզապես սեփական ավտոմեքենաներով կմտնեն ապակեպատ վերելակ, կանջատեն շարժիչը և, վայելելով օվկիանոսի գեղեցիկ տեսարանը կհասնեն իրենց բնակարան, որ հարկում էլ, որ այն լինի: Արդյունքում հյուրասենյակն ու ավտոտնակը տեղակայված կլինեն միմյանց հարևանությամբ և իրարից անջատված ընդամենը ապակե պատով: Ըստ նախնական տվյալների՝ շենքը կկառուցվի Քոլինզ Ավենիույում (Collins Avenue) 9 հազար մակերեսով հողատարածքի վրա: Աշտարակում կլինեն 132 բնակարան, 284 ավտոկայանատեղի, որոնց կսպասարկեն 3 վերելակները: Համաձայն նախնական տեղեկությունների՝ բնակարանների մակերեսը կլինի 350-880 քառակուսի մետր, իսկ միջին գինը կկազմի 9 մլն ԱՄՆ դոլար:

Քուվեյթում սկսվում է Պարսից ծոցի ամենափառահեղ նախագծերից մեկի՝ Մետաքսե քաղաքի (Madinat Al Hareer) շինարարությունը, տեղեկացնում է constructiondigital կայքը: Քանի որ Քուվեյթն իր աշխարհագրական սահմաններով համարվում է աշխարհի ամենափոքր երկրներից մեկը, և նրա տարածքի գրեթե մեծ մասը ծածկված է Արաբական անապատով, ապա, առաջին հայացքից, այս երկիրն այնքան էլ հարմար չէ տարածաշրջանի ամենաթանկ և արմատական նախագիծն իրականացնելու համար: Սակայն, չնայած իր սահմաններին, այս երկիրը համարվում է աշխարհի հինգերորդ ամենահարուստ երկիրը 1 շնչին բաժին ընկնող ՀՆԱ-ով՝ հսկայական նավթային պաշարներով և արագ զարգացող տնտեսությամբ: Աշխարհի ամենահարուստ երկրներից մեկի պետական պաշտոնյաները որոշել են անապատում կառուցել 250 հազար քառակուսի մետր ընդհանուր մակերեսով ժամանակակից օազիս: Նախատեսվում է շինարարությունն ավարտել 2023 թ-ին: Նախագիծի իրականացմանը 132 մլրդ ԱՄՆ դոլար նախնական ներդրումով կմասնակցի պետությունը, իսկ մնացած միջոցները կներգրավվեն մասնավոր հատվածից: Առաջիկա տասնամյակում նախատեսվում է մի շարք նախագծեր իրականացնել Մետաքսե քաղաքում՝ այդ թվում կամուրջ, երկնաքեր, ազատ տնտեuական գոտի, նավահանգիստ, սպորտային և ժամանցային «քաղաքներ»: 23 կիլոմետր երկարությամբ Ջաբեր Ալ Ահմեդ (Jaber Al Ahmad) կամուրջն իրար կմիացնի Մետաքսե քաղաքը և մայրաքաղաք Էլ Քուվեյթը(Kuwait City)` կրճատելով երկու քաղաքների միջև երթևեկության ժամանակահատվածը 30 րոպեից 17-ի: Մետաքսե քաղաքում նախատեսվում է նաև կառուցել 1001 մետր բարձրությամբ Mubarak al-Kabir Tower երկնաքերը: 2016 թ-ին, երկնաքերի շինարարության ավարտից հետո այն կդառնա աշխարհի ամենաբարձր շենքը: Քաղաքը տնտեսապես ակտիվացնելու և ուժեղացնելու նպատակով միջազգային օդանավակայանի հարևանությամբ կլինի նաև առևտրի ազատ գոտի՝ Մետաքսե ճանապարհ (The Silk Road), որտեղ կներկայացվեն առանց մաքսային արժեքի ապրանքներ, իսկ գործարարությունը ազատված կլինի բոլոր տեսակի հարկերից: Նախատեսվում է նաև Քուվեյթի ամենամեծ Բուբիյան (Bubiyan) կղզում կառուցել նավահանգիստ, որը կընդունի Իրանից, Իրաքից և մերձարևելյան այլ երկրներից եկող նավերը: Մետաքսե քաղաքում կկառուցվեն նաև փոքրիկ սպորտային և ժամանցային «քաղաքները»: Առաջինում կլինեն օլիմպիական մարզադահլիճներ, հանգստի և մարզումների սրահներ, իսկ երկրորդում հիմնականում կկառուցվեն ցուցասրահներ, որտեղ աշխարհի տարբեր երկրներից մասնագետները կցուցադրեն տեխնոլոգիաների, դիզայնի և էներգետիկայի ոլորտներում իրենց նորարարությունները:

Ոչ, ձեր աչքերը չեն խաբում, ջուրը, իրոք, բաժանվել է 2 մասի: Այս անհավանական ջրասույզ կամուրջը գտնվում է Նիդեռլանդներում և հնարավորություն է տալիս այցելուներին հասնել 17-րդ դարում կառուցված պատմական ամրոցին: Ինչպես տեղեկացնում է Inhabitat կայքը, Մովսեսի կամուրջը (Moses Bridge), որն իր անվանումը ստացել է Մովսես մարգարեի պատվին, նախագծել են RO&AD ճարտարապետական բյուրոյի մասնագետները: Կամուրջը կառուցված է հատուկ Ակոյա (Accoya) փայտից և բառի լայն իմաստով բաժանում է ջրափոսը 2 մասի: 17-րդ դարում Նիդեռլանդների Վեստ Բրեբենթ վոթեր լայն (West Brabant Water Line) տարածաշրջանում կառուցվել են մի շարք ամրոցներ, շրջապատված ջրային խրամատներով, ֆրանսիացիների և իսպանացիների հարձակումներից պաշտպանվելու նպատակով: Այդ ժամանակ է կառուցվել նաև Ֆորթ Դե Ռուվեր (Fort De Roovere) ամրոցը, որն այսօր հուշարձանի է վերածվել: Այն շրջապատված է այնպիսի ջրափոսով, որը բավականին խորն է ոտքով անցնելու համար և ծանծաղ նավակով նավարկելու համար: Մովսեսի կամուրջը հեռվից չի երևում, և միայն ամրոցին մոտենալուց հետո այցելուների աչքի առաջ հայտնվում է ջրասույզ կամուրջը: Աշխարհում առաջին ջրասույզ կամուրջը կառուցված է էկոլոգիապես մաքուր Accoya փայտից, որն հանդիսանում է Accsys Technologies ընկերության հայտնագործությունը: Այն մշակված է ոչ թունավոր նյութով, որը պաշտպանում է փայտը սնկային քայքայումներից՝ դարձնելով այն ամենաերկարակյաց փայտանյութն աշխարհում: Հոլանդական ճարտարապետների միությունը Մովսեսի կամուրջը ճանաչել է 2011 թ. լավագույն կառույցը: Բացի դրանից, նախագծի հեղինակներն ընդգրկվել են Dutch Design Awards 2011 մրցույթի եզրափակիչ փուլում. ժյուրին այս մտահղացումը հանճարեղ է համարել:

43 հարկանի Էյժա Սքուեր Թաուեր 1 (Asia Square Tower 1) նորագույն կանաչ երկնաքերը կառուցվել է 3 տարում Սինգապուրի Կենտրոնական գործարար թաղամասում (Central Business District), տեղեկացնում է Asiaone կայքը: Վերջին տարիներին Սինգապուրն աչքի է ընկնում իրականացված մի շարք կանաչ նախագծերով, քանի որ երկրում շինությունների նախագծման հիմնական փուլերից մեկը դրանց բնապահպանական բարձր մակարդակի ապահովումն է: Տարածաշրջանի ամենականաչ նախագծի բացման հանդիսավոր արարողությունը տեղի է ունեցել նոյեմբերի 11-ին: Շինությունը համարվում է տարածաշրջանի առաջին նախագիծը, որն իրականացնում է թափոնների վերամշակում: Բանն այն է, որ այն համալրված է բիոդիզելային սարքավորումներով, որոնք իրականացնում են սննդի թափոնների յուղերի վերամշակում: Երկնաքերում տեղադրված են նաև այնպիսի համակարգեր, որոնք օգտագործում են օդորակիչների արտադրած ջուրը ոռոգման նպատակներով: Այս աշտարակը նախագծվել է «աշխատել, խաղալ, ապրել, աճել» սկզբունքով, հետևաբար կան դրա համար բոլոր հարմարությունները: Էյժա Սքուեր Թաուեր 1 աշտարակում կան գրասենյակային տարածքներ, հյուրանոցային համալիր, ռեստորան, մարզադահլիճ և խանութներ: Մինչ օրս աշտարակի 60 տոկոսն արդեն վարձակալված է: Շինության գլխավոր վարձակալը համարվում է Սիթիբանկը (Citibank) իր 9 հարկերով, երկրորդ տեղում է Google ընկերությունը՝ 3.5 հարկով, իսկ Փյուր ֆիթնես (Pure Fitness) ընկերությունը վարձակալել է 1 հարկ: Ըստ նախնական տվյալների՝ Վեսթին Հոթել (Westin Hotel) հյուրանոցային համալիրը կլինի նախագծի 2-րդ աշտարակում, որը նախատեսվում է շահագործման հանձնել 2013 թ-ին: