Չինական Շենչժեն քաղաքի Նանշան շրջանում 19 հարկանի էլիտար բնակելի շենքի տանիքին կառուցվել է անօրինական տաճարանման կառույց, տեղեկացնում է China Daily պարբերականը: Ինչպես նշում է պարբերականը, տաճարի նմանվող շինությունը մի քանի տարի առաջ կառուցել է շենքի վերնահարկի բնակիչներից մեկը: Հարևանների խոսքերով, նա պարբերաբար այնտեղ անց է կացրել չինական ավանդական ծիսակատարություններ և խարույկներ է վառել: Անօրինական կառույցի վերաբերյալ բողոքներ ստացած իշխանական մարմինները մի քանի անգամ ստուգումների համար այցելել են տաճարի սեփականատիրոջը, սակայն վերջինս հրաժարվել է ընդունել նրանց: Դեպի տանիք էլ նրանց մուտքը փակել է հաստ մետաղյա դուռը և մատնահետքերով կոդավորված կողպեքը: Բացի այդ տանիքի մուտքին տեղադրված է տեսախցիկներ, իսկ բակից լսվում է շների հաչոց: Շինության կառավարիչ ընկերությունը հրաժարվել է որևէ տեղեկություն տրամադրել խորհրդավոր բնակչի մասին՝ հղում կատարելով մարդու իրավունքերից անհատի անձնական կյանքի անձեռնամխելիության դրույթին: Ընդ որում, ինչպես նշել է իշխանության ներկայացուցիչը, կառույցի անօրինականության մեջ համոզվելու համար ամենևին էլ անհրաժեշտ չէ այն ուսումնասիրել տեղում: Ինչպես նշել է նա հետաքննությունը կշարունակվի և անհրաժեշտության դեպքում դուռը կկոտրվի: Նշենք, որ ավելի վաղ նմանատիպ անօրինական կառույց էր հայտնաբերվել նաև Պեկինում : Հիվանդանոցների ցանցի տնօրեն Չժան Լինը 6 տարվա ընթացքում 26 հարկանի բնակելի շենքի տանիքին գտնվող փենթհաուսը վերածել էր բույսերով պատված արհեստական լեռան: ԶԼՄ-ների ահազանգից հետո իշխանության ներկայացուցիչները հրամայել են քանդել այն:
Պեկինի արվարձաններում գտնվող 26-հարկանի բնակելի բարձրահարկի վերնահարկում չինական բժշկական ընկերություններից մեկի նախագահ պրոֆեսոր Չժան Լին (Zhang Lin) անօրինականորեն կառուցել է յուրօրինակ դղյակ` «Լեռնային Փենթհաուս»: Յուրօրինակ տան շինարարությունը սկսվել է 2007 թ-ին և Լին 6 տարի է ծախսել այն ավարտելու համար: Սկզբում նա տանիքին պարզապես տեղադրել է բնապատկերի հատվածներ՝ սիզամարգեր, արահետներ և ծաղկաթումբեր: Այնուհետև նա որոշել է իր նախագծին մասշտաբայնություն հաղորդել և կառուցել իր երազանքների տունը: Գործարարը 26-րդ հարկ է բարձրացրել մի քանի տոննա հող, կոպիճ, պլաստիկ և այլ շինանյութեր իր առանձնատան շուրջը ստեղծելով ժայռային բնապատկեր ծառերով և թփերով: Չինացի պրոֆեսորի կողմից սկսված լայնածավալ շինարարական աշխատանքների ժամանակ շենքի բնակիչները բազմաթիվ անգամ դիմել են տեղի իշխանություններին: Նրանց խոսքերով արդեն մի քանի տարի իրենց անգամ գիշերները հանգիստ չի տալիս շինարարական աղմուկը, բացի այդ երկնաքերի տանիքի նոր կառույցը վնասել է կոմունալ հարմարությունները և վտանգում է շենքի կայունությանը: Մի քանի բնակիչներ ստիպված են եղել լքել իրենց բնակարաններն անվերջանալի աղմուկի պատճառով, իսկ որոշ բնակարաններում վնասվել են խողովակներն ու պատերը: Նշենք, որ չինական քաղաքաշինական օրենքների համաձայն՝ շինության կառուցվածքում և նախագծում որևէ փոփոխություն կատարելու համար պետք է ունենալ համապատասխան թույլտվություն: Հետևաբար, Պեկինի Հայդյան (Haidian) շրջանի իշխանությունները պահանջել են գործարարից օգոստոսի 12-ից սկսած 15 օրյա ժամկետում ապամոնտաժել անօրինակաn շինությունը: Եթե պրն. Չժանը չներկայացնի իր քայլերի օրինականությունն ապացուցող թույլտվություն կամ էլ չապամոնտաժի անօրինական կառույցը, ապա կառավարության թույլտվությամբ այդ գործողությունները կիրականացնեն տեղական իշխանությունները: Ամենազարմանալին այս պատմության մեջ այն է, որ տեղային իշխանությունները վեց տարի շարունակ, չնայած բազմաթիվ բողոքների, «չեն նկատել» բարձրահարկի տանիքին իրականացվող լայնածավալ շինարարական աշխատանքները:
Օգոստոսի 3-ին Չինաստանում ավարտվել է երկրի ամենաբարձր «Շանհայյան Աշտարակի» (Shanghai Tower) կանգնեցման աշխատանքները: Այսօր «Գենսլեր» (Gensler) ճարտարապետական բյուրոյի նախագծած 632 մետր բարձրությամբ աշտարակը դարձել է աշխարհում բարձրությամբ երկրորդ աշտարակը՝ զիջելով միայն «Բուրջ Խալիֆային», որի բարձրությունը կազմում է 828 մետր: Շինության խելացի մշակված դիմային հատվածը հնարավորություն է տալիս ուժեղ թայֆունների ժամանակ 24 տոկոսով նվազեցնել քամու ուժի ազդեցությունը շինության վրա, իսկ շինության վերին հարկերի երկնային այգիները նմանվում են երկրին բնորոշ բաց բակերի: «Գենսլեր» ճարտարապետական բյուրոյի ճարտարագետները և նախագծող խումբը սպիտված են եղել մի քանի յուրօրինակ շինարարական բաղադրիչներ մշակել Շանհայի Պուդոն (Pudong) գործարար թաղամասում կառուցված 121 հարկանի երկնաքերի համար: Բանն այն է, որ շինհրապարակի կավե հողն ի վիճակի չէր լինի դիմանալ նման մեծածավալ շինության ճնշմանը, ուստի շինարարները ստիպված են եղել լցոնել 831 երկաթ-բետոնե մոնոլիտ հիմնասյուներից (ցցերից) բաղկացած համակարգը: Բացի այդ Չինաստանը համարվում է ուժեղագույն թայֆունների հայրենիք, որոնք կարող են ապակայունացնել նման բարձրության աշտարակը: Ուստի երկնաքերի նախագծման ընթացքում կարևորագույն պայման էր շինության վրա քամու ազդեցության նվազեցումը: Այդ իսկ պատճառով կառույցի դիմային հատվածի համար նախագծողները ընտրեցին ալիքավոր ձևավորում, որը թույլ տվեց 24 տոկոսով նվազեցնել քամու ազդեցությունը: Ի դեպ նման մոտեցումը հնարավորություն տվեց 58 մլն ԱՄՆ դոլարով կրճատել շինարարական ծախսերը: Նշենք, որ երկնաքերը բաժանված է 9 հորիզոնական գոտիների, ինչը հնարավորություն է տալիս ջեռուցման, հովացման և ջրամատակարարման համակարգերը ավելի ճիշտ բաշխել, քան ավանդական երկնաքերերում: Երկնաքերում տեղակայված կլինեն դիտահարթակներ, մշակութային, առևտրային և գրասենյակային տարածքներ: «Շանհայյան Աշտարակի» բացման հանդիսավոր արարողությունը նախատեսված է 2014 թվականին:
Չինաստանում Թայհու (Taihu) լճի վրա, որը գտնվում է Նանկին (Nanjing) և Շանհայ (Shanghai) քաղաքների միջև, իր դռներն է բացում նոր յուրօրինակ օվալաձև «Շերաթոն Հուզոու Հոթ Սփրինգ Ռեզորթ» (Sheraton Huzhou Hot Spring Resort) անվանումը կրող հյուրանոցը: «Սթարվուդ» (Starwood) ցանցի միջազգային ընդլայնման ծրագրի շրջանակներում «ԷմԷյԴի Արքիթեքթս» (MAD Architects) ընկերությունը նախագծել է այս յուրօրինակ շինությունը: 1.5 մլրդ ԱՄՆ դոլար արժողությամբ շինության բարձրությունը կազմում է 100 մետր, իսկ լայնությունը 116: Իրականում 27 հարկանի շինությունը նման է շրջանի, սակայն ստորին 2 հարկերը ընկղմված են ջրի մեջ: Արդյունքում տեսանելի հատվածում այն նմանվում է պայտի, սակայն իրականում շենքը շրջանաձև է: Շենքը ամբողջությամբ և ստորին հարկերը պատված են լուսադիոդային լույսերով, այնպես որ գիշերային ժամերին հյուրանոցը փայլում է բազմերանգ լույսերով, իսկ ստորին հարկերի լույսերը յուրօրինակ գունավորում են հաղորդում լճին: Հյուրանոցի ընդհանուր մակերեսը կազմում է 2200 քառակուսի մետր: Այստեղ տեղակայված են 321 հյուրանոցային համարներ, որոնցից 44 լյուքս են, և 39 ապարտամենտներ՝ սեփական պատշգամբներով: Բոլոր համարներում կան մարմարյա լողասենյակներ «տրոպիկական» ցնցուղներով, որոնցից հիասքանչ տեսարան է բացվում դեպի լիճը:
Հուլիսի 20-ին Չինաստանի Չանշա (Changsha) նահանգում սկսվել է աշխարհի ամենաբարձր երկնաքերի շինարարությունը: «Բրոուդ Սըսթեյնեբլ Բիլդինգ» (Broad Sustainable Building) ընկերությունը նախատեսում է 7 ամսում կառուցել 838 մետր բարձրությամբ երկնաքեր՝ օգտագործելով «հավաքովի» կառուցվածքներ: «Բրոուդ Սըսթեյնեբլ Բիլդինգ» ընկերության հիմնադիր Զեն Յուն (Zhang Yue) հայտարարել է, որ 846 մլն ԱՄՆ դոլար արժողությամբ երկնաքերը, որի հատակների մակերեսը կկազմի 1 քառակուսի կիլոմետր, պատրաստ կլինի 2014 թ-ի ապրիլին: Ներկայիս աշխարհի ամենաբարձր «Բուրջ Խալիֆա» աշտարակից 10 մետր բարձր «Երկնային քաղաք» (Sky City) աշտարակում կտեղակայվի հյուրանոց՝ ընդունակ հյուրընկալելու 1000 հյուրի, 31.4 հազար բնակիչների համար բնկարաններ, հիվանդանոց, դպրոցներ, խանութներ, ռեստորաններ, գրասենյակներ՝ ջանալով ստեղծել մեկ ընդհանուր քաղաք մեկ շենքում: Ընկերության ղեկավարության տվյալներով շինության 90 տոկոսը բաղկագած կլինի «հավաքովի» կառուցվածքներից: 20 հազար աշխատողներ 4 ամսվա ընթացքում գործարաններում կպատրաստեն շենքի հավաքովի կառուցվածքները, իսկ 30 հազար աշխատող էլ 3 ամսվա ընթացքում շինհրապարակում կմոնտաժեն արդեն պատրաստի կոնստրուկցիաները: Այս զարմանալի նախագծի մասին առաջին անգամ հանրությանը հայտնել է The Morning Whistle պարբերականը 2012 թ-ին: Այն ժամանակ ոչ ոք չէր հավատում տարածված տեղեկատվությանը: Նախագիծն անհավանական էր թվում, քանի որ ներկայիս ամենաբարձր շինաթյունը՝ «Բուրջ Խալիֆան» կառուցելու համար անհրաժեշտ է եղել 6 տարի: Ցնցող նորությունից ընդամենը 2 ամիս անց հարցազրույցը «Բրոուդ Սըսթեյնըբլ Բիլդինգ» ընկերության տնօրենի հետ ավելի բարձրացրեց այս խելահեղ նախագծի իրականություն դառնալու հավանականությունը: Հարցազրույցի ժամանակ Զեն Յուն հայտարարեց, որ 220 հարկանի աշխարհի ամենաբարձր շինությունը, որն ինքն անվանել է «Երկնային քաղաք» անկասկած կառուցվելու է: Ավելին՝ նա հանրությանը ներկայացրեց ևս մի ամբիցիոզ նախագիծ, որի մանրամասները դեռևս հայտնի չեն: Զեն Յուն ցուցադրեց իր նոր նախագծի գծագրերը և հայտարարեց, որ ինքը 100 տոկոսով կառուցելու է 2 կիլոմետր բարձրությամբ նոր շինությունը՝ շինարարության ոլորտում սահմանելով աննախադեպ ռեկորդ: Իսկ ահա այս տարվա մայիսին Treehugger պարբերականը ի դեմս Լլոյդ Ալթերի հայտարարեց, որ նոր աշտարակի կառուցապատող «Բրոուդ Սըսթեյնեբլ Բիլդինգ» ընկերությունը նախագծի շինարարությունը կսկսի արդեն այս տարվա հունիսին: Շինարարությունը վերջապես սկսված է: Այսօր այս նախագծի իրականություն դառնալու հավանականությունը բավականին մեծ է, եթե հաշվի առնենք, որ վերոնշյալ ընկերությունն արդեն հաջողությամբ իրականացրել է նմանատիպ, սակայն փոքր ծավալների 2 նախագիծ: Վերջերս վերոնշյալ ընկերությունը, Չինաստանի նույն Հունան (Hunan) նահանգում ընդամենը 15 օրում, 170 քառակուսի մետր հողատարածքի վրա կառուցվել է 30-հարկանի հյուրանոց : Չինական «Բրոուդ Գրուփ» (Broad Group) ընկերության կառուցած շենքում տեղադրված են էներգախնայող տեխնոլոգիաներ, և այն ընդունակ է դիմակայել 9 մագնիտուդ ուժգնությամբ երկրաշարժի (): Նույն ընկերությունը 2010 թ-ին 6 օրում կառուցել է «Տապան Հյուրանոց» (Ark Hotel) 15 հարկանի շենքը: Շինարարության ավարտից հետո «Երկնային քաղաքը» կհամալրի շինարարության ոլորտում Չինաստանի գրանցած ռեկորդների շարքը: Այսօր Չինաստանում է գտնվում աշխարհի խոշորագույն շենքը, աշխարհի ամենաերկար արագընթաց երկաթուղին, աշխարհի ամենաբարձր և ամենաերկար «թունելից-թունել» կամուրջը, շուտով կկառուցվի նաև աշախարհի ամենաերկար ստորջրյա թունելը:
