«Քինգդոմ Թաուեր» (Kingdom Tower - անգլ.թարգմ. «Թագավորության Աշտարակ») նախագիծը կենդանության նշաններ է ցուցաբերում, չնայած այն փաստին, որ շինարարական աշխատանքների սկիզբը դեռ ազդարարված չէ: Շինարարական Bauer ընկերությունը հայտարարել է, որ Սաուդյան Արաբիայի մայրաքաղաք Ջեդդայում կառուցվելիք աշխարհի ամենաբարձր աշտարակի հիմքային աշխատանքները սկսելու վերաբերյալ պայմանագիրն արդեն ստորագրված է: Ինչպես նշվում է ընկերության տարածած հաղորդագրության մեջ, երկնաքերի հիմքային աշխատանքները նախատեսվում է սկսել մինչև այս տարվա դեկտեմբերի վերջ: 32 մլն ԱՄՆ դոլար արժողության հիմքային աշխատանքերը կտևեն մոտ 10 ամիս: Ըստ ընկերության մասնագետների՝ շինության ամրության նպատակով նախատեսվում է մոտ 110 մետր խորության վրա հորատման եղանակով տեղադրել 1.5-1.8 մետր տրամագծով հիմնասյուներ (ցիցեր): Նշենք, որ Bauer ընկերությունը իրականացրել է նաև աշխարհի ներկայիս ամենաբարձր աշտարակի «Բուրջ Խալիֆայի» հիմքային աշխատանքները: «Քինգդոմ Թաուերի» շինարարության մասին հայտնի դարձավ անցած տարվա օգոստոսին, երբ Սաուդյան Արաբիայի արքայազն, միլիարդատեր Ալվալիդ իբն Թալալը (Alwaleed bin Talal) և երկրի խոշորագույն կառուցապատող Բեն Լադեն Գրուփ (Bin Laden Group – հիմնված է աշխարհի, արդեն հանգուցյալ, համար 1-ին ահաբեկչի հոր կողմից) ընկերությունը համաձայնագիր ստորագրեցին՝ Կարմիր ծովի ափին գտնվող Ջեդդա մայրաքաղաքում կառուցել 1.2 մլրդ ԱՄՆ դոլար արժողությամբ աշխարհի ամենաբարձր երկնաքերը: Բացի այդ այս տարվա սկզբին ադրբեջանական ԶԼՄ-ները հայտարարություն տարածեցին, որ իրենց երկիրն է դառնալու աշխարհի ամենաբարձր երկնաքերի հայրենիքը: Համաձայն այդ տեղեկատվության՝ Ադրբեջանում իրականացվող «Կասպյան կղզի» (Caspian Island) նախագծի շրջանակներում նախատեսվում է կառուցել 1050 մետր բարձրությամբ երկնաքեր: Բայց ամենասենսացիոն հայտարարությունը կրկին Չինաստանինն է: Արդեն այս տարվա օգոստոսին չինական «Բրոուդ Գրուփ» (Broad Group) ընկերությունը հայտարարեց, որ Չինաստանի Հունան նահանգի Չանշա քաղաքում նախատեսում է ընդամենը 7 ամսում կառուցել 220 հարկանի և 838 մետր բարձրությամբ աշխարհի ամենաբարձր երկնաքերը: Ըստ նախնական տվյալների՝ շինարարությունն արդեն կսկսվի այս տարվա նոյեմբերին:
Վրաստանում պաշտոնապես սկսվել է երկրի նախագահ Միխաիլ Սահակաշվիլիի երազանք «Լազիկա քաղաք» ծրագրի իրականացումը: Ինչպես տեղեկացնում է վրացական Georgiatoday ինտերնետային պարբերականը, սեպտեմբերի 27-ին Վրաստանի նախագահ Սահակաշվիլին հանդիսավոր կերպով բացեց «Լազիկա» քաղաքի առաջին շենքը՝ դրանով իսկ պաշտոնապես ազդարարելով ծրագրի սկիզբը: Նախատեսվում է, որ նորաբաց շենքը կդառնա ապագա քաղաքի ադմինիստրատիվ և նավահանգստային վարչական կենտրոնը: Բացման արարողության ժամանակ, նախագահը ներկայացրել է ծրագրի իրականացման անհրաժեշտությունը տարածաշրջանի տնտեսական զարգացման հարցում: Ինչպես նաև նշել, որ այս ծրագիրը բացառիկ հնարավորություն է արտասահմանյան ներդրումները Վրաստան ներգրավելու տեսանկյունից: Նախագահի խոսքերով շինարարության ավարտից հետո «Լազիկան» կդառնա Սև ծովի խոշորագույն վրացական նավահանգիստներից մեկը: Սպասվում է, որ «Լազիկայի» նավահանգիստը կկարողանա իր առաջին բեռնատարներն ընդունել արդեն 2014 թ-ի աշնանը: Սև ծովի ափին, Անակլիյա զբոսաշրջային քաղաքի մոտակայքում, նոր քաղաք և նավահանգիստ կառուցելու մտադրության մասին Վրաստանի նախագահը հայտարարել էր անցած տարի: Նրա հավաստիացմամբ, արդեն 10 տարի հետո նոր քաղաքը կդառնա Վրաստանի խոշորագույն տնտեսական կենտրոնը, և մեծությամբ երկրորդ քաղաքը, Թբիլիսիից հետո: Երբ ներկայացվեց «Լազիկա» նախագիծը, բազմաթիվ քննադատություններ հնչեցին: Ընդդիմադիրները մասնավորապես անդրադառնում էին ծրագրի բնապահպանական խնդիրներիին: Բանն այն է, որ այն վայրը, որտեղ նախատեսվում է կառուցել վրացիների ապագայի քաղաքը, գտնվում է «Կոլխետի ազգային զբոսայգու» հարևանությամբ, և շինարարական աշխատանքները կարող են հսկայական վնաս հասցնել այգու կենդանական և բուսական աշխարհին: Ինչպես վերջերս տեղեկացրեց վրացական «Կոմերսանտ» ինտերնետային պարբերականը, եթե «Վրացական երազանք» ընդդիմադիր դաշինքն իշխանության գա, ապա չի պատրաստվում իրականացնել վերոնշյալ նախագիծը: Կուսակցությունը գտնում է, որ նախագիծը հսկայական վնաս կհասցնի տեղի բնապահպանությանը, բացի այդ ներկայում այս նախագիծը չունի ներդրողներ, իսկ պետական բյուջեյից այն հնարավոր չէ ֆինանսավորել: Հ.Գ. 2012 թ-ի հոկտեմբերի 1-ին Վրաստանի խորհրդարանական ընտրություններում 55.08 տոկոս ձայներով հաղթել է Բիդզինա Իվանիշվիլիի գլխավորած «Վրացական երազանք» դաշինքը:
Սամվել Կարապետյանին պատկանող «Տաշիր Գրուփ» ընկերությունը կարող է 50 մլն ԱՄՆ դոլար ներդնել Սոչիի ուղևորական նավահանգստում առևտրային կենտրոնների և ցուցասրահների շինարարության նախագծում, տեղեկացնում է «Կոմերսանտ» ինտերնետային ռեսուրսը: Ինչպես տեղեկացրել է պարբերականին Սոչիի գործարարներից մեկը, «Տաշիր Գրուփը» նախատեսում է կառուցել առևտրային կենտրոն, որտեղ կտեղակայվեն էլիտար բրենդային խանութ-սրահներ: Իսկ ընկերության ներկայացուցիչ Մարինա Գազեն հաստատել է այն տեղեկատվությունը, որ ոչ վաղ անցյալում ընկերությունը դարձել է նավահանգստի վերականգնողական ծրագրի համաներդրողներից մեկը: Նրա խոսքերով` ընկերության կողմից տնօրինվող շինհրապարակը, որը վերցրել են երկարաժամկետ վարձակալությամբ, կկազմի մոտ 2.3 հեկտար տարածություն: Նավահանգստի վերականգնողական ծրագրի շրջանակներում «Տաշիր Գրուփը» նախատեսում է կառուցել մոտ 25 հազար քառակուսի մետր մակերեսով տարբեր նշանակության անշարժ գույք: Ինչպես մանրամասնել է Գազեն` խանութ-սրահները կկազմեն 7.5 հազար քառակուսի մետր, բազմաֆունկցիոնալ կենտրոնը` առևտրային տարածքներով և նավահանգստային անձնակազմի համար նախատեսված գրասենյակներով կկազմի 6.7 հազար քառակուսի մետր, իսկ ցուցասրահներն էլ կկազմեն 11.5 հազար քառակուսի մետր: Հարկ է նշել, որ «Տաշիր Գրուփը» չի մանրամասնում ներդրումների չափը, սակայն ինչպես ներկայացնում է պարբերականը` փորձագետների և համապատասխան մասնագետների կարծիքով ընկերությունը կծախսի մոտ 50 մլն ԱՄՆ դոլար: Բացի այդ, ոչ պաշտոնական տվյալներով, այս նախագիծը կֆինանսավորվի Մոսկվայում արդեն իսկ պատրաստի անշարժ գույքի վաճառքից գոյացած գումարներով: Սոչիի ուղևորական նավահանգիստը պատկանում է «Սոմկոմֆլոտ» ընկերությանը: Վերջինս նավահանգստի վերակառուցման համար ստեղծել է «Սոչի Գրանդ Մարինա» ԲԲԸ-ն, որի գլխավոր տնօրենն անհրաժեշտ ներդրումները գնահատել է 18 մլրդ ռուբլի: Սամվել Կարապետյանի գլխավորած «Տաշիր Գրուփ» ընկերությունը ստեղծվել է 1999 թ-ին: 2004 թ-ին ընկերությունն արդեն գրավեց մոսկովյան անշարժ գույքի շուկան: «Տաշիր Գրուփը» զբաղվում է բնակելի, ադմինիստրատիվ, արտադրական, առևտրա-ժամանցային, հյուրանոցների, ճանապարհների, գազատարների և այլ անշարժ գույքի նախագծմամբ և կառուցմամբ:
Նոր Զելանդիայի Քրայսթչերչ (Christchurch) քաղաքը կդառնա 2012 թ-ի ամենայուրօրինակ կառույցներից մեկի տունը. այստեղ նախատեսվում է «ստվարաթղթե տաճար» (Cardboard Cathedral) կառուցել: Տաճարի պաշտոնական կայքի տվյալներով, շինարարությունը կսկսվի մյուս շաբաթ: 4.1 մլն ԱՄՆ դոլար արժողությամբ «ստվարաթղթե տաճարը» կունենա 25 մետր բարձրություն և կփոխարինի Քրայսթչերչ քաղաքի հայտնի տաճարին, որն անվերադարձ քանդվել էր անցած տարվա ավերիչ երկրաշարժից: Յուօրինակ տաճարը, որը նախատեսվում է առաջիկա 20 տարիների համար, կկառուցվի ստվարաթղթե խողովակներից, փայտե գերաններից և կառուցողական պողպատից: Տաճարի գլխավոր ճարտարապետը Շիգերու Բանն է (Shigeru Ban), ով բազմաթիվ ժամանակավոր կառույցներ է նախագծել Ճապոնիայում, Թուրքիայում, Իտալիայում և Հաիթիում: Գլխավոր ճարտարապետի խոսքերով, ստվարաթուղթն իդեալական շինանյութ է տաճարի կառուցման համար: Ըստ նրա՝ շինության ամրությունն ամենևին էլ կախված չէ օգտագործվող շինանյութի ամրությունից: Անգամ բետոնե կառույցները կարող են փլուզվել ուժգին երկրաշարժի ժամանակ, այն դեպքում, երբ ստվարաթղթե կառույցը այս պարագայում չի քանդվի: Բացի այդ ստվարաթուղթը բավականին մատչելի Է: Որպես կանոն՝ բնական աղետներից հետո երկրում թանկանում է ավանդական շինանյութը, և քանի որ ստվարաթուղթը չի հանդիսանում ավանդական շինանյութ և լայն կիրառում չունի, վերջինիս գինն անփոփոխ է մնում: Պետք է նշել, որ նախկին եկեղեցու ավերակները դեռևս մնում են իրենց տեղում և մյուս ամիս երկրի Գերագույն դատարանը կորոշի նրանց ճակատագիրը: Իսկ նոր կառուցվող տաճարը վերածննդի ուղենիշ կդառնա երկրաշարժից ավերված քաղաքի համար:
Ռուսական «Իտերա» (Итера) ընկերությունների խումբն ավարտել է Մինսկի կենտրոնում կառուցվող «Առագաստ» (Парус) բարձրահարկ բնակելի երկնաքերի մոնոլիտ կառուցվածքի շինարարությունը: Ինչպես տեղեկացնում է հոլդինգի մամուլի ծառայությունը, բարձրահարկը, որը ավարտվելուց հետո կդառնա երկրի ամենաբարձր երկնաքերը, նախատեսվում է շահագործման հանձնել 2013 թ-ին: Էլիտար «Առագաստ» բնակելի շենքը կառուցվում է Թիմիրյազեվա, Կալվարիյսկի և Մաքսիմ Թանկի փողոցների խաչմերուկում՝ «Ֆրունզենսկայա» մետրոյի կայարանի հարևանությամբ: Այս պահին շինության բարձրությունը կազմում է Բելոռուսիայի համար ռեկորդային 118.1 մետր: Ի դեպ, ավելի վաղ հայտարարվել էր, որ 204 բնակարանից բաղկացած երկնաքերի վերջնական բարձրությունը գագաթի պարույրով կկազմի 133 մետր: Ինչպես տեղեկացնում է կառուցապատող ընկերությունը, «Առագաստ» բնակելի համալիրը կազմելու է կառուցվելիք բազմաֆունկցիոնալ բիզնես-համալիրի մի մասը: Համալիրի առաջին 4 հարկերում կլինեն ադմինիստրատիվ և առևտրա-կենցաղային նշանակության տարածքներ: Վերևի 4 հարկերում կտեղակայվեն 4 երկհարկանի փենթհաուսներ: Բնակելի համալիրում նախատեսված են նաև գրասենյակներ, մարզական կենտրոն և ստորգետնյա ավտոկայանատեղի: Նշենք, որ բնակարանների մակերեսը կկազմի 61-179 քառակուսի մետր, իսկ առաստաղի բարձրությունը 3 մետր: «Իտերա» հոլդինգի մեջ ներառված են տասնյակ ընկերություններ ԱՊՀ, Բալթյան, արևմտաեվրոպական, ասիական երկրներից և ԱՄՆ-ից: Ընկերության գործունեության հիմնական ուղղությունը գազային բիզնեսն է: Վերջինիս ստրատեգիական ուղղություններից են նաև կառուցապատումը, գազաքիմիան, էներգետիկաի ոլորտը:
