Ինչպես տեղեկացնում է constructiondigital կայքը, հղում կատարելով պաշտոնական աղբյուրներին, 6.08 մլրդ ԱՄՆ դոլար արժողությամբ Աբու Դաբի միջազգային օդանավակայանի (Abu Dhabi International Airport (ADIA)) նոր տերմինալի շինարարությունը կսկսվի 2012 թ-ին: Չնայած համաշխարհային տնտեսական ճգնաժամին՝ Միացյալ Արաբական Էմիրություններում շարունակում են իրականացնել բազմաթիվ շինարարական նախագծեր: Այսպես՝ 2012 թ-ին նախատեսվում է սկսել Աբու Դաբի միջազգային օդանավակայանի՝ 650 հազար քառակուսի մետր ընդհանուր մակերեսով նոր տերմինալի շինարարությունը: Ըստ նախնական տվյալների՝ նոր տերմինալը շահագործման կհանձնվի 2017 թ-ին և կսպասարկի ավելի քան 30 մլն ուղևոր: Օդանավակայանի ղեկավարությունը շինարարությունն իրականացնելու համար ստացել է 6 դիմում- հայտ աշխարհի տարբեր երկրներից, այդ թվում՝ Գերմանիայից, Հարավային Աֆրիկայից և ԱՄՆ-ից: Շինարարության իրականացման վերջնական պայմանագիրը կստորագրվի 2012 թ-նի առաջին եռամսյակում: Ըստ նախանական տվյալների՝ նոր տեմինալի հսկա շենքը կունենա աշխարհի ամենաերկար ծածկող կամարները, որոնց բարձրությունը կհասնի 52 մետրի: Նոր տերմինալում կլինի նաև շքեղ հյուրանոց, սպա-կենտրոն, ռեստորաններ, բարեր և 20-25 հազար քառակուսի մետր մակերեսով առևտրային կենտրոններ: Այս կառույցները կգտնվեն 8.4 հազար քառակուսի մետր մակերեսով, միջերկրական և անապատային բնաշխարհով, փակ այգու շրջակայքում: Ինչպես տեղեկացնում է օդանավակայանի պաշտոնական կայքը, նախապատրաստական աշխատանքները սկսվել են դեռևս 2009 թ-ի փետրվարի, իսկ շինարարության իրականացման նպատակով մրցույթ է հայտարարվել այս տարվա հունվարին: Աբու Դաբի միջազգային օդանավակայանն իր առաջին չվերթն իրականացրել է 1982 թ-ին: Այն գտնվում է մայրաքաղաքի կենտրոնից 30 կիլոմետր հեռավորության վրա, որտեղ գտնվում է Էթիադ Էյրվեյս (Etihad Airways) ընկերության գլխավոր գրասենյակը:
Նոյեմբերի 3-ին ամենամյա 10-րդ հանդիսավոր մրցանակաբաշխության ժամանակ բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) հայտարարել է “2011 թ-ի լավագույն բարձրահարկ շենք” անվանակարգի հաղթողի անունը: Այս տարի հաղթող է ճանաչվել KFW Վեսթարկադե (KFW Westarkade) աշտարակը Ֆրանֆուրտում: KFW Վեսթարկադե աշտարակը նախագծել է Զաուերբրուխ Խաթթոն (Sauerbruch Hutton) ճարտարապետական ընկերությունը, և 2010 թ-ին, շինարարության ավարտից հետո, այն ճանաչվել է աշխարհի ամենաշատ էներգիա խնայող կառույցը: Բարձրահարկ շենքերի և քաղաքային միջավայրի միջազգային Խորհուրդի կողմից շենքը ներգրավվել է մրցույթում ոչ թե բարձրության համար, ընդամենը 56 մետր, այլ անհավանական ռեսուրսային խնայողության համար: Բանն այն է, որ տիպիկ եվրոպական գրասենյակային կառույցի համեմատությամբ այս աշտարակն օգտագործում է 2 անգամ ավելի քիչ էներգիա: Շենքը կառուցված է այնպիսի վայրում, որտեղ գերակշռում են քամիներ, և շենքի երկշերտ Ճակատային երեսապատումը հնարավորություն է տալիս օգտագործել այդ քամիները տարվա 8 ամսվա ընթացքում՝ շենքը բնական օդափոխությամբ ապահովելու նպատակով:
Այս տարի Բարսելոնայում կայացած ամենամյա աշխարհի ճարտարապետական փառատոն-մրցանակաբաշխության (World Architecture Festival-WAF), հաղթող է ճանաչվել Բարսելոնայում իսպանական «Քլաուդ 9» (Cloud 9) ընկերության կողմից նախագծված «Մեդիա ԱյՍիԹի» (Media ICT) գրասենյակային շենքը, հաղորդում է Architect Journal պարբերականը: «Մեդիա ԱյՍիԹի» գրասենյակային շենքն ունի խորանարդի տեսք՝ 44x44x38 մետր չափերով, այն բաղկացած է վերգետնյա (16 հազար քառակուսի մետր) և ստորգետնյա (7.1 հազար քառակուսի մետր) առևտրային տարածքներից: Ստորգետնյա հարկում տեղակայված է նաև 200 մեքենայի համար նախատեսված ավտոկայանատեղի: Շինության ճակատը երեսպատված է հատուկ «օդային ETFE պանելներով», որոնք պաշտպանում են իսպանական այրող արևից, իսկ ձմռանը, ընդհակառակը, հավաքում են արևային էներգիան և նվազեցնում են ջեռուցման ծախսերը: Այս տարի աշխարհի ճարտարապետական փառատոն-մրցանակաբաշխության շրջանակներում «Ապագայի լավագույն նախագիծ» է ճանաչվել Մալդիվյան կղզիներում կառուցվող «Հանիմադու Միջազգային օդանավակայանը» (Hanimaadaoo International Airport): Իսկ Ֆրենկ Գերիի կողմից նախագծված «Բիքմեն» 76-հարկանի աշտարակը հաղթել է «Տարվա լավագույն կառուցվածքային նախագիծ» անվանակարգում:
Ինչպես տեղեկացնում է Reuters լրատվական գործակալությունը, հոլանդացի ճարտարապետ Ռեմ Կոլհասի (Rem Koolhaas) ընկերության մասնագետները հայտարարել են, որ, չնայած անվերջանալի ձգձգումների, չինական հեռուստաաշտարակի գլխավոր գրասենյակի շենքը վերջապես շահագործման կհանձնվի նոր տարում: Այս հեռուստաաշտարակը մյուս երկու հանրահայտ նախագծերի՝ Նորման Ֆոսթերի (Norman Foster) նախագծած օդանավակայանի նոր տերմինալի և ֆրանսիացի ճարտարապետ Պոլ Անդրեի (Paul Andreu) ձվաձև ազգային թատրոնի հետ Պեկինի նոր կենտրոնական գործարար թաղամասում (Beijing's central business district) պետք է շահագործման հանձնվեր մինչև 2008 թ-ի Օլիմպիական խաղերը: Սակայն Օլիմպիական խաղերը տեղի ունեցան, իսկ ազգային հեռուստաաշտարակի շենքն այդպես էլ շահագործման չհանձնվեց: Մեկ այլ ինտերնետային աղբյուրի՝ e-archtect-ի տվյալներով, 600 հազար քառակուսի մետր ընդհանուր մակերեսով նախագծի շինարարությունը սկսվեց 2004 թ-ին Պեկինի գործարար թաղամասում՝ նախկին մոտոցիկլետների գործարանի փոխարեն: 2007 թ-ին ավարտվեց 2 թեքված աշտարակների շինարարությունը, 2008 թ-ի մարտին ավարտվեցին կառույցի պողպատե կոնստրուկցիաների մոնտաժման աշխատանքները, իսկ հեռուստաաշտարակի բացումը նախատեսված էր 2009 թ-ին: Սակայն, ճարտարապետի հավաստմամբ, նույն տարում հեռուստաշատարակի հարևանությամբ գտնվող հյուրանոցում բռնկված հրդեհից տուժեց նաև հեռուստաաշտարակի շենքը՝ այդպիսով հետաձգելով բացման ժամկետը: 600 մլն եվրո ընդհանուր արժողությամբ նախագիծը բաղկացած է երկու շենքից: 230 մետր բարձրությամբ և 405 հազար քառակուսի մետր ընդհանուր մակերեսով Չինաստանի կենտրոնական հեռուստատեսության գլխավոր գրասենյակի (China Central Television Headquarters, CCTH) շենքում կիրականացվի նորությունների կառավարում, ռադիոհեռարձակում և հեռուստածրագրերի պատրաստում: Երկրորդ շենքում, 116 հազար քառակուսի մետր ընդհանուր մակերեսով Հեռուստատեսության մշակութային կենտրոնում (Television Cultural Center, TVCC) կլինի հյուրանոց, այցելուների կենտրոն, հսկա հասարակական թատրոն և ցուցասրահներ:
Ինչպես տեղեկացնում է Arabian Business պարբերականը, մինչև 2017 թ-ը Քաթարն առաջիկա 5-6 տարվա ընթացքում, 2022 թ-ի ֆուտբոլի աշխարհի առաջնությանը նախապատրաստվելու շրջանակներում, մտադիր է մոտ 150 մլրդ ԱՄՆ դոլար հատկացնել երկրի ենթակառուցվածքների զարգացմանը: Քաթարի տնտեսության և ֆինանսների նախարար Յուսեֆ Հուսեյն Քամալի (Yousef Hussein Kamal) խոսքերով նույն ժամանակահատվածում նավթագազային ոլորտում ներդրումները ևս կավելանան 40 մլրդ ԱՄՆ դոլարով: Ինչպես հայտարարվել էր ավելի վաղ, Քաթարի կառավարությունը մինչև 2016 թ-ը իր բյուջեի 40 տոկոսը հատկացրել է ենթակառուցվածքների զարգացմանը, այդ թվում՝ 11 մլրդ ԱՄՆ դոլար միջազգային օդանավակայանի կառուցմանը, 5.5 մլրդ ԱՄՆ դոլար նավահանգստի և 1 մլրդ ԱՄՆ դոլար մայրաքաղաք Դոհայում ճանապարհային միջանցք կառուցելու համար: Կառավարությունը նախատեսում է նաև մոտ 20 մլրդ ԱՄՆ դոլար հատկացնել ճանապարհաշինությանն այն դեպքում, երբ ֆուտբոլի աշխարհի առաջնության համար կառուցվող մարզադաշտի բյուջեն ընդամենը 4 մլրդ ԱՄՆ դոլար է: Գերմանացի ֆինանսական խորհրդատու Նիկոլա Ռիտտերի (Nicola Ritter) տվյալներով, 48 մլրդ ԱՄՆ դոլար կտրամադրվի օդորակվող մարզադաշտերի կառուցմանը, 77 մլրդ ԱՄՆ դոլար կծախսվի ֆուտբոլիստների և երկրպագուների համար կացության պայմանների ստեղծմանը, իսկ 45 մլրդ ԱՄՆ դոլար էլ կտրամադրվի Լուսաիլ քաղաքի (Lusail City) զարգացման համար: Բացի այդ Քաթարի կառավարությունը 50 մլրդ ԱՄՆ դոլար է տրամադրել ճանապարհային ենթակառուցվածքների արդիականացմանը, այդ թվում նոր երկաթգծի և մետրոպոլիտենի կառուցմանը:
