Ինչպես բոլորիս արդեն հայտնի է, կանաչ տանիքները առաջարկում են մի շարք էկոլոգիական առավելություններ, մասնավորապես` վերջիններս ապահովում են հավելյալ մեկուսացում, նվազեցնում են անձրևաջրերի կորուստը, ինչպես նաև կրճատում էլեկտրաէներգիայի օգտագործումը: Այնուամենայնիվ, նոր ուսումնասիրություններն ապացուցում են, որ կլիմայի փոփոխության դեմ պայքարում և գլոբալ տաքացման պարագայում սպիտակ տանիքները առավել արդյունավետ են: «Էներգետիկա և Շինություններ» ամսագրում տպագրված ուսումնասիրությունները ներկայացնում են 3 տեսակի տանիքների` սև, սպիտակ և կանաչ, համեմատական վերլուծություն, որի արդյունքում պարզվում է, որ կլիմայի փոփոխության դեմ պայքարի տեսանկյունից սպիտակ տանիքները խնայող և 3 անգամ արդյունավետ են: «Լորենս Բերկլիի ազգային լաբորատորիայի» (Lawrence Berkeley National Laboratory) ուսումնասիրությունները ներկայացնում են 3 տեսակ տանիքների ծախսերի և եկամուտների համեմատական վերլուծությունը: Արդյունքները ցույց են տալիս, որ սպիտակ տանիքները գերազանցում են տանիքների մյուս տեսակներին: Մասնավորապես` սև գույնով ներկված տանիքները կլանում են արևի ճառագայթները, դրանով իսկ նպաստելով քաղաքային ջերմային էֆեկտի ստեղծմանը, իսկ սպիտակ գույնով ներկված տանիքները արևի ճառագայթները ետ են մղում մթնոլորտ: Մեկ այլ ուսումնասիրության մեջ Ստենդֆորդյան համալսարանի վերլուծաբանները ներկայացնում են սպիտակ տանիքների մյուս լավ կողմերը: Բացի այն, որ սպիտակ տանիքները բարեհաջող են ազդում մթնոլորտի ստորին շերտերի վրա, վերջիններս նաև մեղմում են ջերմաստիճանի տարբերությունը երկրին մոտակա շերտերում, ինչն էլ բերում է ամպամածության պակասի և արևային օրերի շատացման: Այնուամենայնիվ նշենք, որ եթե սպիտակ տանիքներն արդյունավետ են գլոբալ տաքացման տեսանկյունից, ապա բուսականությամբ ծածկված տանիքները, բացի ջերմաստիճանի կարգավորումից, հնարավորություն են տալիս տեղադրել անձրևաջրերի հավաքման և օգտագործման համակարգեր: Նշենք, որ դեռևս 2012 թ-ին Նյու Յորքի երկու առաջատար համալսարանների ուսումնասիրությունները ցույց տվեցին, թե ինչքան արդյունավետ կարող են լինել սպիակ և կանաչ տանիքները:

Արիզոնա նահանգում` Յումա և Ֆենիքս քաղաքաների միջնամասում, 9.7 մլն քառակուսի մետր ամայի մակերեսի վրա կառուցվել է աշխարհի խոշորագույն արևային էլեկտրակայանը, որը կազմված է բացառապես արևային վահանակներից: Aqua Caliente անվանումը ստացած էլեկտրակայանն իր ամբողջ հզորությամբ աշխատելու պարագայում կարող է արտադրել 290 մեգավատ էլեկտրաէներգիա, ինչը բավարար է 260 հազար տնտեսությունների կարիքները հոգալու համար: Արևային էլեկտրակայանի սեփականատերերն են «ԷնԱրՋի Էներջի» (NRG Energy) և «ՄիդԱմերիքան Սոլար» (MidAmerican Solar) ընկերությունները, իսկ որպես նախագծի գլխավոր կապալառու հանդես է եկել «Ֆըրսթ Սոլար» (First Solar) ընկերությունը իր գերբարակ արևային վահանակներով: Նշենք, որ էլեկտրակայանի արտադրած էներգիան տնօրինելու է «Փըսիֆիք Գազ և Իլեքթրիք Քո» (Pacific Gas and Electric Co) ընկերությունը Սան-Ֆրանցիսկոյից: Նախագծի ընդհանուր բյուջեն կազմել է 1.8 մլրդ ԱՄՆ դոլար, որից 967 մլն ԱՄՆ դոլարը տրամադրվել է պետության կողմից որպես դաշնային վարկ: Նախագծի շինարարությունը սկսվել է 2010 թ-ին և իրականացվել է 2 փուլով: Առաջին փուլի շինարարությունը սկսվել է 2010 թ-ի վերջին և ավարտվել 2012 թ-ի սկզբին, որի ընթացքում տեղադրվել են 100 մեգավատ հզորությամբ վահանակներ: Ի դեպ, առաջին արևային վահանակը տեղադրվել է 2011 թ-ի հունիսին: Երկրորդ փուլի շինարարությունն ավարտվել է 2014 թ-ի ապրիլին, որի ընթացքում տեղադրվել են մնացած վահանակները ընդհանուր 190 մեգավատ հզորությամբ: Նոր էլեկտրակայանում տեղադրված են մոտ 5 մլն ֆոտոէլեկտրական գերբարակ արևային վահանակներ: Ի դեպ, այս էլեկտրակայանը հնարավորություն կտա կրճատել մթնոլորտ արտանետվող ածխաթթու գազի ծավալները տարեկան 324 հազար տոննայով: Նշենք, որ «ԷնԱրՋի Էներջի» ընկերությունը 3 նահանգներում ունի 9 էլեկտրակայան, որոնք աշխատում են վերականգնվող ռեսուրսներով: Այս ընկերությանն է պատկանում նաև աշխարհի խոշորագույն արևային «Իվանպահ» (Ivanpah Solar Electric Generating System) ջերմաէլեկտրակայանը:

«Քլեյնդիենսթ Գրուփ» (Kleindienst Group) ընկերությունը Դուբայի ափամերձ շրջանում վերսկսել է աշխարհի քարտեզի տեսքով կառուցվող արհեստական կղզիների շինարարությունը: The World նախագծի մաս կազմող «Եվրոպայի Սիրտ» (Heart of Europe) անվանումը կրող նախագիծը ներառում է 6 արհեստական կղզիների կառուցապատում, որոնց շինարարության ավարտը նախատեսված է 2016 թ-ին: Ներկայումս ընկերությունը զբաղված է կառուցապատվող կղզիներ մոտ 600 տոննա շինանյութի և անհրաժեշտ սարքավորումների տեղափոխմամբ: Համաձայն ընկերության տարածած տեղեկատվության` շինարարական աշխատանքերի առաջին քայլը ենթադրում է բոլոր 6 կղզիների նախապատրաստում կառուցապատմանը: «Եվրոպայի Սիրտ» նախագծի շրջանակներում կկառուցապատվեն 6 կղզիներ, որոնք են` Մոնակոն, Շվեդիան, Շվեյցարիան, Ավստրիան, Սանկտ-Պետերբուրգը և Գերմանիան: Յուրաքանչյուր կղզու կառուցապատումը կիրականացվի տվյալ եվրոպական երկրին բնորոշ ճարտարապետությամբ: Շինարարության ավարտից հետո կղզիները կդիմավորեն զբոսաշրջիկներին իրենց երկրին բնորոշ հմայքով: Մասնավորապես` Մոնակոն կկարողանա պարծենալ ֆրանսիական Ռիվիերային բնորոշ վայելչությամբ և շքեղությամբ, ժամանակակից առանձնատներով և շքեղ զբոսանավերով, իսկ ահա Շվեդիան կառանձնանա կենտրոնական շուկայով, որտեղ ներկայացված կլինի Ստոկհոլմի «Saluhall» շուկայի ավանդույթներն ու առանձնահատկությունները: Ըստ նախնական տվյալների` առաջինը կսկսվի Գերմանիա կղզու շինարարությունը: Արհեստական կղզիներում ընկերությունը կկառուցի շքեղ հյուրանոցներ, առանձնատներ, ռեստորաններ, այգիներ, ծովափնյա ակումբ, ինչպես նաև մատուռ հարսանեկան արարողությունների համար: Մշտական տաք ծովում գտնվող կղզիներում կառուցապատողները խոստանում են տեղումների առկայություն ինչպես անձրևի, այնպես էլ ձյան տեսքով: «Նակհիլլ Գրուփ» (Nakheel Group) ընկերությունն առաջին անգամ «Աշխարհ» (The World) արհեստական կղզիախմբի մասին հայտարարել է 2003 թ-ին: Նախագիծը բաղկացած է բազմաթիվ մեծ և փոքր արհեստական կղզիներից, որոնք կառուցված են այնպես, որ երկնքից նայելիս գծագրվում են աշխարհամասերն ու աշխարհի քարտեզն է ստեղծվում: Կղզիախմբի երկարությունը կազմում է 9 կիլոմետր, լայնությունը 7 կիլոմետր, իսկ ափից հեռավորությունը 4.5 կիլոմետր: 2008 թ-ին ավարտվել է 870 հազար քառակուսի մետր ընդհանուր մակերեսով 300 արհեստական կղզիների կառուցումը: Սակայն համաշխարհային ֆինանսական ճգնաժամի հետևանքով նախագծի երկրորդ փուլը, որը նախատեսում էր կղզիների կառուցապատումը, սառեցվեց: Նախագծին կրկին շունչ հաղորդեց 2013 թ-ի մայիսին «Նակհիլլ Գրուփ» ընկերության դուստր «Աշխարհ» (The World) ընկերության և նախագծի գլխավոր կառուցապատող «Քլեյնդիենսթ Գրուփ» ընկերության միջև կնքված համաձայնագիրը: Վերջինիս համաձայն` «Քլեյնդիենսթ Գրուփ» ընկերությունը պարտավորվում է վճարել 185 մլն ԱՄՆ դոլար պարտքը և հետո միայն շարունակել «Եվրոպայի Սիրտ» նախագծի իրականացումը:

Վենեսուելան որոշել է նոր ծրագիր գործարկել, որը լքված տրանսպորտային միջոցների վերաձուլման արդյունքում կարտադրի շինարարական կոնստրուկցիաներ, տեղեկացնում է Reuters գործակալությունը: Նմանատիպ որոշումը պայմանավորված է երկրում պողպատաձուլման արտադրության կտրուկ նվազմամբ: Բանն այն է, որ 2012-2013 թթ-ին պողպատի արտադրությունում գրանցվել է ամենացածր ցուցանիշը վերջին 16 տարվա կտրվածքով: Մասնավորապես, ընթացիկ տարվա մարտ ամսին վերջին 18 տարվա ընթացքում արտադրվել է նվազագույն քանակությամբ ամրան: Ի դեպ, կառավարությունից տեղեկացրել են, որ արդեն վերաձուլման է ուղարկվել 10485 ավտոմեքենա, 9651 մոտոցիկլ և 539 հեծանիվ: Արդյունքում վերաձուլված պողպատը կնպատակաուղղվի բնակարանաշինական ծրագրերի իրականացմանը: Վերջիններիս շարքում առաջնային տեղ է գրավում բնակչության անապահով խավերի համար բնակարանների կառուցման ծրագիրը, որի շրջանակներում 2012 թ-ին կառուցվել է 250 հազար տուն: Ի դեպ, անցած տարի այդ ցուցանիշը իջել է մինչև 150 հազարի: Վենեսուելական պողպատաձուլական հսկան՝ Sidor-ը կարող է արտադրել տարեկան մինչև 5 միլիոն տոննա պողպատյա կառուցվածքներ, սակայն 6 տարի առաջ իրականացված կազմակերպության ազգայնացումից հետո, տարեց տարի արտադրանքի քանակը նվազում է:

Ադրբեջանական «Ավեստա» (Avesta) ընկերությունը հայտարարել է, որ 30 միլիոն քառակուսի մետր (3000 հեկտար) ընդհանուր մակերեսով «Կասպյան Կղզիներ» (Caspian Islands) նախագծի առաջին փուլը կավարտվի մայիսի 28-ին, հրապարակել է «Ազերթագ» (Azertag) լրատվական գործակալությունը: Նախագծի առաջին փուլը բաղկացած է մի քանի ծովափներից, ռեստորաններից, կամուրջներից, մոտավորապես 4 կիլոմետր երկարությամբ ճանապարհներից, ինչպես նաև երկու 50 հազար քառակուսի մետր մակերեսով զբոսայգիներից: Նախագիծը կիրականացվի 3 փուլով, որի ընդհանուր բյուջեն կկազմի 100 մլրդ ԱՄՆ դոլար: Ընդհանուր առմամբ, «Կասպյան Կղզիներ» նախագիծը կազմված կլինի 50 արհեստական կղզիներից, որոնք կպարունակեն 19 բարձրահարկ թաղամասեր 150 դպրոցներով և բազմաթիվ այլ հիմնարկություններով, ինչպես նաև այստեղ կկառուցվի 20 կիլոմետր երկարությամբ զբոսուղի և 20 կամուրջ: Քաղաքը նախատեսված է 1 միլիոն բնակչի համար: «Կասպյան Կղզիներ» նախագծի երկրորդ փուլը նախատեսում է 1050 մետր բարձրությամբ «Ադրբեջան Աշտարակի» (Azerbaijan Tower) կառուցումը, որի նախնական բյուջեն գնահատվում է 2 մլրդ ԱՄՆ դոլար: Եթե հայտարարություններն իրականություն դառնան, ապա շինարարության ավարտից հետո 2025 թ-ին այս աշտարակը հավակնում է դառնալ ամենաբարձրն աշխարհում և իր հետևում թողնել Սաուդյան Արաբիայում կառուցվող «Արքայական Աշտարակին» (Kingdom Tower): Վերջինս նախատեսվում է շահագործման հանձնել 2019 թ-ին: «Ավեստա» կոնցեռնի սեփականատերն է միլիարդատեր Իբրահիմ Իբրահիմովը: Նա ծնվել է 1955 թվ. մայիսի 28-ին Նախիջևանում: Հանդիսանում է նախագահական ընտանիքի մտերիմը և անվանում է Իլհամ Ալիևին «Բոսերի Բոս» (NYT): Իբրահիմովը երազում է բնակվել իր ստեղծած «Ադրբեջան Աշտարակի» պենտհաուսում՝ «աշխարհի գագաթին»: Սակայն արևմտյան ֆինանսական և անշարժ գույքի վերլուծաբանները կասկածանքով են նայում այս նախագծի իրականացմանը: Հիմնական պատճառը, նրանց կարծիքով, դա Իլհամ Ալիևի ստեղծած պետական համակարգն է, որը զուրկ է քաղաքական մրցունակությունից և տնտեսական ռեֆորմներից, որոնք և կարող են բերել երկրի երկարատև զարգացմանը և հիմք ծառայել նմանատիպ մեգա-նախագծերի կայուն իրականացմանը (NYT):