Իսպանիայի կառավարությունը հավանության է արժանացրել պետական անշարժ գույքի մասնավորեցման լայնամասշտաբ նախագիծը, որը նախատեսում է անշարժ գույքի մեկ քառորդ մասի վաճառքն առաջիկա 7 տարիների ընթացքում: Նախագիծն ընդհանուր առմամբ ենթադրում է 15 հազար պետական տարբեր նշանակության անշարժ գույքի վաճառք՝ սկսած գրասենյակային տարածքներից ընդհուպ մինչև գյուղատնտեսական նշանակության հողեր: Առաջինը վաճառքի կհանվի Մադրիդում տեղակայված պետական «ԱրԹիՎիԻ» (RTVE) հեռուստաընկերության գլխավոր գրասենյակը և Սևիլիայում տեղակայված լքված զինվորական զորամասերը: Ծրագրում նաև կներառվի 10 արժեքավոր շենքեր, մասնավորապես՝ Մադրիդի կենտրոնական Պասեո դե լա Կաստելլանա (Paseo de la Castellana) փողոցի վրա տեղակայված առանձնատունը և Անդալուսիայում տեղակայված անշարժ գույքը, որը ներառում է 14 հեկտար մակերեսով բնական արգելանոցը: 2012 թ-ին կառավարությունը խորհուրդ է ստեղծել, որը պետք է զբաղվի պետական ակտիվների կառավարմամբ և հնարավոր վաճառքով: Վերոնշյալ անշարժ գույքի վաճառքը պետք է օգնի Իսպանիային իրականացնել Եվրոմիության կողմից ներկայացված պահանջը, որը ենթադրում է 2012 թ-ի ՀՆԱ-ի 7.1 տոկոս բյուջեյի պակասուրդը մինչև 2016 թ-ը հասցնել 3 տոկոսի: Ինչքան է արդյոք կառավարությունը նախատեսում վաստակել մասնավորեցման գործընթացից, չի հաղորդվում: Սակայն իսպանական ղեկավարության կողմից ներկայացվում է նախորդ տարվա բյուջեն, որ լքված անշարժ գույքի վաճառքի հետևանքով համալրվել է 90 մլն եվրոյով և ևս 37.5 մլն եվրո կառավարությունը տնտեսել է վարձակալական պայմանագրերի վերակնքումից: Մի քանի ամիս առաջ Հունաստանի սեփականաշնորհման պետական գործակալությունը (HRADF) ևս վաճառքի էր հանել 28 պետական հաստատություն : Ընդհանուր ցուցակում ներառված էին մշակույթի, արդարադատության, առողջապահության, կրթության և ներքին գործերի նախարարություններին պատկանող շենքեր, ինչպես նաև ոստիկանության և հարկային մարմինների տարածաշրջանային կենտրոններ:

Անցած տարվա վերջին երկրում ստեղծված ծանր տնտեսական ճգնաժամը մեղմելու և հաղթահարելու նպատակով Իսպանիան որոշեց բնակության իրավունք տրամադրել այն օտարերկրյա քաղաքացիներին, ովքեր երկրում ձեռք կբերեն 160 հազար եվրո և ավելի արժողությամբ անշարժ գույք: Այսօր նույն կերպ է վարվում նաև Հունաստանը: Երկրի անշարժ գույքի շուկայի ճգնաժամը մեղմելու համար երկրի կառավարությունը որոշել է այս տարվա մայիսից 5 տարի տևողությամբ բնակության իրավունք տրամադրել ոչ Եվրոմիության երկրները ներկայացնող այն օտարերկրյա քաղաքացիներին, ովքեր կգնեն 250 հազար եվրո և ավելի արժողությամբ կոմերցիոն և բնակելի անշարժ գույք: Նշենք, որ այս նախաձեռնությունը հիմնականում ուղղված է Ռուսաստանի, Արաբական երկրների և Չինաստանի ներդրողներին: Ի դեպ, բնակության իրավունքը կարելի է երկարաձգել ինչպես սեփականատիրոջ, այնպես էլ ընտանիքի մյուս անդամների համար: Բյուջեի պակասուրդը լրացնելու և եկամուտներն ավելացնելու նպատակով Հունաստանում հսկայական սեփականաշնորհման գործընթացներ են իրականացվում: Մասնավորապես, այս տարվա մարտին Հունաստանի սեփականաշնորհման պետական գործակալությունը (HRADF) վաճառքի է հանել 28 պետական հաստատություն: Ընդհանուր ցուցակում ներառված են մշակույթի, արդարադատության, առողջապահության, կրթության և ներքին գործերի նախարարություններին պատկանող շենքեր, ինչպես նաև ոստիկանության և հարկային մարմինների տարածաշրջանային կենտրոններ: Անցած տարվա վերջին Հունաստանի անշարժ գույքի սեփականաշնորհման գործակալությունը սահմանել էր երկրի լավագույն անշարժ գույքի օբյեկտներից մեկի՝ ծովափնյա Հելենիկոն շրջանում գտնվող Աթենքի նախկին օդանավակայանի տարածքի վաճառքի պայմանները: Ավելի վաղ երկրի անշարժ գույքի սեփականաշնորհման գործակալությունն առաջարկել էր վարձով հանձնել երկրի 40 անմարդաբնակ կղզիները, որպեսզի փոքր-ինչ նվազեցնեն պետական պարտքը: Իսկ անցած տարվա սկզբին Հունաստանը որոշել էր վարձով հանձնել իր պատմական հուշարձանները, այդ թվում՝ «Ակրոպոլիսը» (Acropolis) և «Ապոլոնի տաճարը» Դելֆի (temple of Delphi) քաղաքում:

Թուրքիայի անշարժ գույքի շուկայում հարկերի բարձրացումը և հարկահավաքման նոր համակարգի բարդությունը կարող է վախեցնել արտասահմանյան գնորդներին, գրում է Hurrietdailynews պարբերականը: Ավելացված արժեքի հարկի ավելացմանը վերաբերող նոր օրենքը, որը հիմնականում կարտացոլվի մեծ քաղաքներում 150 քառակուսի մետր մակերեսից փոքր էլիտար տների առուվաճառքում, ուժի մեջ կմտնի 2013 թ-ի վերջից: Մասնագետների հիմնական մտավախությունն այն է, որ նոր օրենքը կարող է վախեցնել արտասահմանյան գնորդներին, քանի որ արդյունքում անշարժ գույքի գներն էականորեն կաճեն: Նոր օրենքի համաձայն՝ այն բնակարանները, որոնք ունեն 150 քառակուսի մետր մակերեսից քիչ տարածք և վաճառվում են քառակուսի մետրը 280-560 ԱՄՆ դոլարով, կհարկվեն 8 տոկոս ԱԱՀ-ով, իսկ այն բնակարանները, որոնց քառակուսի մետրը վաճառվում է 560 ԱՄՆ դոլարից ավել գնով կհարկվեն 18 տոկոսով: Թուրքիայի անշարժ գույքի շուկայի նկատմամբ օտարերկրյա ներդրողների հետաքրքրությունն առաջացավ այն ժամանակ, երբ անցած տարի ընդունվեց նոր օրենք , որն ավելի ազատականացրեց շուկան և արտասահմանցիներին թույլատրեց անշարժ գույք ձեռք բերել Թուրքիայում: Ինչպես նշում է պարբերականը, անցած տարվա մայիսից մինչև դեկտեմբերը ներառյալ օտարերկրացիները ձեռք են բերել ընդհանուր 1.1 մլրդ ԱՄՆ դոլար արժողությամբ անշարժ գույք, ինչը 4 անգամ ավել է, քան ամբողջ 2011 թ-ի ընթացքում կատարված գործարքների ընդհանուր գումարը: Թուրքիայի միայն 10 խոշորագույն քաղաքներում 8 ամսվա ընթացքում 112.3 հազար օտարերկրացի գնել է 90 հազար միավոր անշարժ գույք, որոնցից 1/3-ից ավելին Անթալիայում: Բայց այսօր մտավախություն կա, որ հարկերի բարձրացումը կնվազեցնի Թուրքիայի մրցակցային հնարավորությունները մյուս երկրների համեմատությամբ: Բացի գների բարձրացումից, օտարերկրացիներին կարող է վախեցնել նաև օրենքի բարդ ձևակերպումները: Հարկահավաքման նոր համակարգով հարկի մեծությունը որոշվում է հաշվի առնելով 6 բաղադրիչներ՝ բնակարանի քառակուսի մետրը, քառակուսի մետրի արժեքը, բնակարանի էլիտարության մակարդակը, գտնվելու շրջանը, քաղաքը, ինչպես նաև լիցենզիայի տրման ամսաթիվը: Միաժամանակ նշենք, որ Հայաստանի Հանրապետության օրենսդրությունը այս տեսակետից ավելի պարզ է, բայց ոչ գրավիչ. Նմանատիպ գործարքները հարկվում են ԱԱՀ-ի ավելի բարձր և միակ՝ 20% դրույքաչափով:

«Տաշիր գրուփի» ընդհանուր եկամուտը 2012 թ-ին կկազմի 2.9 մլրդ ԱՄՆ դոլար, ընկերության կողմից հրավիրված մամուլի ասուլիսի ժամանակ հայտարարել է «Տաշիր գրուփի» փոխնախագահ Վիտալի Եֆիմկինը: Նախորդ տարվա ավարտին հրավիրված ասուլիսի ժամանակ Եֆիմկինը հայտարարել էր, որ 2011թ-ին ընկերությունը նախատեսում է իր եկամուտը 2010 թ-ի համեմատությամբ ավելացնել մոտ 1 մլրդ ԱՄՆ դոլլարով և հասցնել 2.8 մլրդ ԱՄՆ դոլլարի, սակայն, համաձայն ճշտված տվյալների, 2011 թ-ին ընկերության եկամուտը կազմել է 2.6 մլրդ ԱՄՆ դոլար: 2012 թ-ին ընկերությունը շահագործման է հանձնել 840 հազար քառակուսի մետր մակերեսով անշարժ գույք, որից 370 հազար քառակուսի մետրն առևտրային և 415 հազար քառակուսի մետրը բնակելի: Ընկերության կողմից շահագործման հանձնված հյուրանոցային անշարժ գույքը կազմել է 20 հազար քառակուսի մետր, իսկ գրասենյակայինը՝ 35 հազար: Նշենք, որ 2012 թ-ին «Տաշիր գրուփը» շահագործման է հանձնել 11 անշարժ գույք, որոնցից 7-ը «Ռիո» անվանմամբ: Մամուլի ասուլիսի ժամանակ ընկերության փոխնախագահը նաև հայտարարել է, որ 2013 թ-ին «Տաշիր գրուփը» նախատեսում է բացել «Սինեմա սթար» անվանմամբ 13 կինոթատրոն և մոտակա 3-4 տարում մոտ 1.5 մլրդ ռուբլի ներդնել 50 ավտոլիցքավորման կայանների կառուցման մեջ: Միաժամանակ հիշեցնենք, որ 2012թ–ի հոկտեմբերի 20-ին կայացավ «Dalma Garden Mall» առևտրա-ժամանցային կենտրոնի բացումը Երևանում, որի կառուցապատողն էր Dalma Invest-ը ՝ «Տաշիր գրուփի» կողմից հիմնված ընկերությունը: Ավելի վաղ նաև հայտարարվել էր, որ 2012 թ-ին «Տաշիր գրուփը» ցանկանում է մոտ 50 մլն ԱՄՆ դոլար ներդնել Սոչիի ուղևորական նավահանգստի վերակառուցման ծրագրում:

«Գազպրոմ» ընկերությունը և «Հարավային Հոսք կոնսորցիումը» (South Sream) սկսել են «Հարավային հոսք» գազատարի շինարարությունը: Գազատարի խողովակաշարի խորհրդանշանակ զոդումը կայացել է Անապայի շրջանում: «Հարավային հոսք» գազատարի ծովային հատվածը, որը ռուսական սահմանում կսկսի «Ռուսսկայա» (Русская) կոմպրեսորային կայանից և կհասնի մինչև Բուլղարիայի ծովափնյա շրջաններ, կանցնի Սև ծովի հատակով: Սևծովյան հատվածի ընդհանուր երկարությունը կկազմի 900 կիլոմետր, առավելագույն խորությունը՝ 2 կիլոմետր, իսկ գազատարի հզորությունը՝ 63 մլրդ խորանարդ մետր: Ըստ նախնական տվյալների՝ նախագծի ընդհանուր բյուջեն կկազմի 15.5 մլրդ եվրո, որից 10 մլրդ եվրոն կծախսվի ծովային հատվածի շինարարության համար: Սև ծովից դուրս գալուց հետո նոր գազատարի երթուղին կանցնի Բուլղարիայի, Սերբիայի, Հունգարիայի, Սլովենիայի սահմաններով և կավարտվի Իտալիայի հյուսիսում: Գազատարի ծովային հատվածի շինարարության նպատակով հատուկ ստեղծվել է «Հարավային Հոսք Տրանսպորտ» (South Stream Transport B.V.) ընկերությունը: Վերջինս նախատեսում է 2013 թ-ին «Հարավային Հոսք» գազատարի ծովային հատվածի տեղադրման նպատակով մի շարք տենդերներ անցկացնել, իսկ խողովակաշարի ստորջրյա հատվածների տեղադրումը նախատեսված է արդեն 2014 թ-ին: Ռուսական գազի առաջին արտահանումը դեպի Եվրոպա այս գազատարով նախատեսված է արդեն 2015 թ-ի վերջին: Նախագիծը ենթադրում է գազատարի 4 ճյուղերի կառուցում: Դրանցից առաջինը շահագործման կհանձնվի 2015 թ-ին, և 1 տարի ընդմիջումով արդեն կշահագործվեն մյուս երկուսը, քիչ ավելի ուշ նրանց կմիանա նաև վերջինը: Բոլոր 4 ճյուղերի շինարարության ավարտը նախատեսվում է 2017 թ-ին, իսկ նախագիծն իր ամբողջ հզորությամբ, որը կկազմի 63 մլրդ խորանարդ մետր, կաշխատի արդեն 2019 թ-ից: Նշենք, որ «Հարավային Հոսք» գազատարի շինարարության մեկնարկից հետո, Թուրքիայի էներգետիկայի և բնական պաշարների նախարար Թաներ Յիլդիզը (Taner Yildiz) հայտարարել է, որ Թուրքիան մտադիր չէ մասնակցել «Հարավային հոսք» գազատարի շինարարության նախագծում, քանի որ ավելի շատ հետաքրքրված է «Նաբուքքո Վեսթ» (Nabucco-West) և «Տրանսանատոլիական» գազատարի նախագծերով: Միևնույն ժամանակ նա ավելացրել է, որ Թուրքիան հետաքրքրված է ռուսական գազի ներկրմամբ, սակայն դեռևս հայտնի չեն ներկրման երթուղիները: