Նոյեմբերի 22-ին Վրաստանի Քութայիս քաղաքում սկսվել է նոր օդանավակայանի շինարարությունը: Օդանավակայանը, որը նախագծել է ՅուԲիՍթուդիո (UBStudio) ընկերությունը, իր մեջ ներառելու է ուղևորական տերմինալ, 55 մետր բարձրությամբ աշտարակ, գրանցման սենյակ, մաքսային և անձնագրային հսկողության սենյակներ, սպասասրահներ, բար, սրճարան և այլն: Ըստ նախնական տվյալների՝ նոր օդանավակայանի շինարարությունը կավարտվի հաջորդ տարվա սեպտեմբերին: Ինչպես տեղեկացնում է Inhabitat կայքը, արտաքինից նոր օդանավակայանի շենքը նախագծված է որպես 4 անկյուն ունեցող տաղավար՝ գունավոր, անփայլ ներդիրներով: Օդանավակայանի տանիքն այնպիսի թեքություն ունի, որը շենքը պաշտպանում է արևի ճառագայթներից: Հեղինակները մտադիր են ներդնել նաև օգտագործված ջրերի հետագա օգտագործման համակարգը և հիբրիդային ռեսուրսախնայող օդափոխությունը: Ինչպես նաև կօգտագործվի բետոնի ակտիվացում (concrete core activation) մեխանիզմը, այսինքն՝ բետոնե պատերի և հատակի մեջ կտեղադրվեն խողովակներ, որոնց միջով կհոսի տաք, կամ սառը ջուրը, կառույցը համապատասխանաբար հովացնելու կամ տաքացնելու նպատակով: Իսկ աղետի ժամանակ, ջուրը կմատակարարվի Քութայիսի տարածքում գտնվող բնական աղբյուրից: Նշենք, որ դեռևս այս տարվա նոյեմբերին Հայաստան կատարած պաշտոնական այցի ժամանակ, Վրաստանի էկոնոմիկայի և կայուն զարգացման նախարար Վերա Կոբալիան հայտարարել էր, որ իրենք անպայման կօգտագործեն հայ ճարտարագետների և շինարարների փորձը Քութայիսի օդանավակայանը կառուցելիս:
Հոկտեմբերի 28-30-ը Աջարիայի Ինքնավար Հանրապետության մայրաքաղաք Բաթումում տեղի կունենա «Մեր տունը» հոբելյանական 10-րդ ամենամյա շինարարական ցուցահանդեսը «Batumi Building & Design International Fair» միջազգային միջոցառման շրջանակներում: «Էքսպոմեդիա» ցուցահանդեսների նախագծման կենտրոնը տեղեկացնում է, որ միջոցառման մասնակիցներն են` Վրաստանը, Թուրքիան և Իրանը: Առաջին անգամ «Buiding & Design International Fair»- ին կմասնակցի Հայաստանը` ձեռք բերելով հնարավորություն ներկայացնելու իր առաջատար ընկերությունների արտադրանքը արտերկրում: Ցուցահանդեսի նպատակն է համախմբել հայկական և արտասահմանյան կազմակերպություններին, որոնք զբաղված են շինարարության, վերանորոգման, նախագծման և դիզայնի ոլորտներում բարձրակարգ արտադրանք և ծառայություններ մատուցելով, ստեղծել արտադրող-սպառող նոր փոխշահավետ կապեր և նպաստել նոր գործարար կապերի հաստատմանը, շուկայի ընդլայնմանը, ոլորտում արդի և նորագույն տեխնոլոգիաների, լուծումների, առաջարկների ներկայացմանը: Ցուցահանդեսի թեմատիկ բաժիններն են` շինարարական, նախագծման, վերանորոգման աշխատանքներ, կահույք, դռներ և պատուհաններ, ներքին և արտաքին հարդարման արտադրանք, տեխնոլոգիաներ, տարածքների կանաչապատում, ձևավորում և մաքրում, տան, բնակարանի ներքին և արտաքին ձևավորում ու մաքրում և այլն։
Ախալքալաքում երկաթուղային կայարանի շինարարությունը, Բաքու-Թբիլիսի-Կարս երկաթգծի կառուցման շրջանակներում, սկսվելու է երկու շաբաթից: Այդ մասին օգոստոսի 11-ին վրացական մասի երկաթգծի կառուցման շինհրապարակ այցելելու ժամանակ հայտարարել է Վրաստանի ենթակառուցվածքների և տարածաշրջանային զարգացման նախարար Ռամազ Նիկոլաիշվիլին, հաղորդում է apsny.ge կայքը: Նիկոլաիշվիլին հայտարարել է, որ Բաքու-Թբիլիսի-Կարս երկաթուղին ռազմավարական նշանակություն ունի: Նախարարը հիշեցրել է, որ այս երկաթուղային նախագիծը հաղթող է ճանաչվել Նյու-Յորքում անցկացված մրցույթում ներկայացված 100 նախագծերի շարքում: Միաժամանակ նշենք, որ նախագիծը բավականին դժգոհությունների առիթ է հանդիսացել, քանի որ այն շրջանցում է Հայաստանը: Ինչպես տեղեկացնում է կայքը, Վրաստանի տարածքում կառուցվելու է 29 կմ երկարությամբ նոր ճանապարհ, Թուրքիայի սահմանին` վուլկանացման կետ, վերականգնվելու է հին ճանապարհը եւ բացի այդ, Ախալքալաքում կայարան է կառուցվելու: Նախագծի ընդհանուր արժեքը 600 մլն ԱՄՆ դոլար է: Բաքու-Թբիլիսի-Կարս երկաթգծի շինարարության համար Ադրբեջանը Վրաստանին սկզբում տրամադրել է 200 մլն ԱՄՆ դոլար, այնուհետև 575 մլն ԱՄՆ դոլար վարկ: երկաթգծի տարողունակությունը տարեկան կկազմի 17 մլն տոննա: Նախատեսվում է, որ երկաթգիծը շահագործման կհանձնվի հաջորդ տարվա վերջին:
Բաթումիում տեղադրված արձանները խորհրդանշում են Ալիի և Նինոյի սիրո պատմությունը , Այս արձանների ամենահատկանշական առանձնահատկությունն այնն է, որ մետաղե կինն ու տղամարդը, գտնվելով մշտական շարժման մեջ յուրաքանչյուտ 10 րոպեն մեկ հանդիպում են: Այս ստեղծագործության հեղինակը հայտնի վրացի արվեստագետ Թամարա Կվերիտաձեն է: Մասնագիտությամբ ճարտարապետ Թամարան, Թբիլիսիում 1990-ականներին դրամ վաստակելու համար տիկնիկներ էր պատրաստում: Հետագայում նա տեղափոխվում է ԱՄՆ, որտեղ և հայտնի է դառնում իր ստեղծագործություններով, մի քանի ցուցասրահների կողմից առաջարկներ ստանալուց հետո: “Տղամարդը և Կինը” երկար ճանապարհ են անցել. ստեղծագործության փոքր տարբերակը վաճառվել էր Իտալիայում, հետագայում այն ցուցարդվել է Լունդոնի ցուցահանդեսներից մեկում, իսկ այսօր արձանի յոթ մետրանոց տարբերակը կանգնած է Բաթումիի ծովափում: Ամենադժվարը Սիրո արձանների մեծ տարբերակով ստեղծելն էր, և շուրջ տասն ամիս Գերմանիայի “Art Engineer” կազմակերպությունը աշխատել է նախագծի իրականացման վրա: յոթ տոննա քաշ ունեցող այս կառույցը հատուկ նախագծվել է և հաշվարկվել դիմակայելու բոլոր հնարավոր կլիմայական ազդեցություններին: Տղամարդու և Կնոջ արձանները սկսվում են շարժվել ամեն օր երեկոյան ժամը 7-ից, ղեկավարվում են համակարգչի օգնությամբ և հնարավորություն ունեն տարբեր գույների լուսավորության ընտրության, իսկ ծովը այս շարժվող կոմպոզիցիայի համար հիանալի լրացում է հանդիսանում:
Վրաստանի նախագահ Միխայիլ Սահակաշվիլին Բաթումիում այբուբենին նվիրված աշտարակի կառուցման հիմք դրեց: 130 մետրանոց աշտարակը զարդարված կլինի վրացական այբուբենի 33 տառերով՝ յուրաքանչյուրը 7 մետր բարձրությամբ: Աշտարակի վերին մասում տեղադրվելու է պտտվող ապակե գնդաձև կառույց, որը 60 րոպեում մեկ ամբողջական պտույտ է կատարելու: Այդ կառույցի ներսում կլինի ռեստորան և դիտահարթակով, որտեղից այցելուները կարող են վայելել քաղաքի և ծովի տեսարանները: Աշտարակը կհամալրվի նաև հեռուստատեսային ստուդիայով և չորս վերելակներով: «Վրացական այբուբենը մեր ԴՆԹ է, մեր գենետիկական կոդը: Այսօր մենք մեկնարկում ենք Բաթումիի Էյֆելյան աշտարակի կառուցումը և մենք պետք է այն հինգ ամսից ավարտին հասցնենք»,- հայտնեց Սահակաշվիլին լրագրողներին: Աշտարակի նախագծողը իսպանացի ճարտարապետ Ալբերտո Դոմինգո Կաբոն է, իսկ շինարարական աշխատանքներն իրականացնելու է վրացական «Magi Style» կազմակերպությունը: Մոտակա օրերին Բաթումիում սկսվելու է նաև դեպի Ֆերիա լեռ տանող ճոպանուղու կառուցումը: Այժմ բանակցություններ են վարվում ավստրո-շվեյցարական "Doppelmayr Garaventa Group" ընկերության հետ, որն այս ոլորտում համաշխարհային առաջատարն է հանդիսանում: Հիշեցնենք, որ այս ընկերությունն իրականացրել է նաև դեպի Տաթևի վանք տանող աշխարհի ամենաերկար ռեվերսային ճոպանուղու շինարարությունը:
