Ֆլորիդա նահանգի Մայամի շրջանի անշարժ գույքի շուկայում նոր ռեկորդ է սահմանվել: Ինչպես տեղեկացնում է The Wall Street Journal պարբերականը, 47 մլն ԱՄՆ դոլար գումարով առանձնատունը ձեռք է բերել ազգությամբ ռուս անհայտ գնորդը: Վերջինիս ինքնությունը բացահայտել չի հաջողվել, քանի որ առուվաճառքն իրականացվել է ԱՄՆ-ում գրանցված մի ընկերության միջոցով: Ի դեպ, Forbes ամսագիրը նույնպես վկայում է, որ Մայամիի անշարժ գույքի շուկայում սա մինչ օրս գրանցված ամենաթանկ գործարքն է: Նոր առանձնատունը գտնվում է Բիսքեյն ծովածոցում (Biscayne Bay) տեղակայված հսկվող կղզու վրա: Աստեղ ապրում են շատ նշանավոր մարդիկ, ներառյալ Խուլիո Իգլեսիասը: 2790 քառակուսի մետր մակերեսով առանձնատանը կա 10 ննջասենյակ, 14 լոգասենյակ, մի քանի հյուրասենյակ, բար, ձայնագրման ստուդիա, մարզադահլիճ, գրադարան, մերսման սենյակ, 3-D կինոդահլիճ, արվեստի գործերի պահպանման սենյակ, լողավազան և գինիների մառան, որտեղ կարելի է հասնել միայն մատնահետքերը ստուգելուց հետո: Կզղում տեղակայված է նաև գոլֆի ակումբ: Նշենք, որ հատուկ այս առանձնատան համար Բահամյան կղզիներից մի քանի տոննա վարդագույն ավազ է բերվել: Այս հրաշալի առանձնատան շինարարությունը սկսվել է 2008 թ-ին: Շինարարությամբ զբաղվել են կառուցապատողներ Շլոմի Ալեքսանդրը (Shlomi Alexander) և Ֆելիքս Կոհենը (Felix Cohen): Տունը վաճառքի է հանվել 2011 թ-ին 60 մլն ԱՄՆ դոլարով, իսկ անցած տարվա ընթացքում վերջինիս առաջարկվող գինը իջել է մինչև 52 մլն ԱՄՆ դոլար:

Մերձավոր Արևելքի խոշորագույն կառուցապատողներից մեկը՝ «Դամաք Փրոփերթիս» (Damac Properties) ընկերությունը, նախորդ շաբաթ հայտարարել է Դուբայում կառուցվելիք նոր խոշորագույն նախագծի մասին, որն առաջինն է քաղաքում 2008 թ-ի ճգնաժամից հետո, տեղեկացնում է Arabianbusiness ինտերնետային պարբերականը: Ըստ նախնական տվյալների՝ նոր աշտարակը կունենա 195 մետր բարձրություն, 53 հարկ և վերջինիս պատուհաններից կերևան քաղաքի գեղեցիկ շատրվանները և աշխարհի ամենաբարձր աշտարակը՝ «Բուրջ Խալիֆան»: Շինարարության գլխավոր կապալառու «ԷյԷնՍի Քոնթրաքթինգ» (ANC Contracting) ընկերությունն արդեն սկսել է ծրագրի նախապատրաստական աշխատանքները, որոնք պետք է ավարտվեն 2015 թ-ի առաջին եռամսյակում: Նոր շենքում նախատեսված են մեկ, երկու, երեք, չորս սենյականոց բնակարաններ և փենթհաուսներ: Ինչպես նաև աշտարակում կլինի սպա-կենտրոն, մարզասրահ և լողավազան: «Դամաք Փրոփերթիս» ընկերության փոխտնօրեն Նայլ Մակլաֆլինի (Niall McLoughlin) խոսքերով, Դուբայի անշարժ գույքի շուկայում վերածնունդ է նկատվում, քաղաքը կանգնած է անշարժ գույքի շուկայի ընդլայնման նոր դարաշրջանի առաջ, ուստի նման պայմաններում ընկերության առաջարկած նոր նախագիծն անփոխարինելի է և ուղղված է բնակչության հատկապես վերնախավին: Նշենք, որ մինչ օրս «Դամաք Փրոփերթիս» ընկերությունը Միացյալ Արաբական Էմիրություններում կառուցել է 37 շենք, որոնք ունեն 7817 բնակարան 1.3 մլն քառակուսի մետր ընդհանուր մակերեսով:

Դուբայը, փորձելով Մերձավոր Արևելքում պահպանել իր դիրքերը որպես զբոսաշրջության և տրանսպորտային առաջատար կենտրոն, վերջերս հանրությանն է ներկայացրել մի շարք ցնցող շինարարական նախագծեր, որոնք, ինչպես գրում է Wall Street Journal հրատարակչությունը, կարող են անշարժ գույքի շուկայում ճգնաժամի երկրորդ փուլի պատճառ դառնալ: Անցած ամիս Դուբայի կառավարիչ շեյխ Մուհամեդ Բին Ռաշիդ Ալ-Մակթումը (Sheikh Mohammad Bin Rashid Al Maktoum) հայտարարել է «Մուհամեդ Բին Ռաշիդ Քաղաք» (Mohammad Bin Rashid City) նախագծի իրականացման մասին, որն, ըստ նախնական հաշվարկների, կարժենա 10 մլրդ ԱՄՆ դոլար: Նոր քաղաքում նախատեսված է 100 հյուրանոց, աշխարհի խոշորագույն առևտրային համալիրը, հսկայական զբոսայգի, պատկերասրահներ և ցուցասրահներ: Անմիջապես դրանից հետո, հայտարարվեց նոր նախագծի մասին, որն իրենից ներկայացնում է 5 թեմատիկ այգիներից կազմված զվարճանքների համալիր 2.7 մլրդ ԱՄՆ դոլար արժողությամբ: Բացի այդ Դուբայը նաև հայտ է ներկայացրել «Համաշխարհային ցուցահանդես 2020»-ի (World Expo in 2020) անցկացման համար, որը նոր ցուցասրահների կառուցում է ենթադրում: Ինչպես նշում է պարբերականը, չնայած առևտրային, զբոսաշրջության և տրանսպորտի ոլորտներում գրանցված աճին, Դուբայի կառավարությունն այսօր դեռևս պետք է վճարի նախորդ շինարարական բումի արդյունքում հավաքված 100 մլրդ ԱՄՆ դոլար պարտքը: Սակայն քաղաքի կառավարության վերոնշյալ քայլերը նոր հարցեր են առաջացնում, կարող են արդյոք այս նոր նախագծերը ոտքի հանել անշարժ գույքի շուկան, թե առաջարկի նոր ավելցուկի կբերեն առանց այն էլ փխրուն ոլորտում: Մերձավոր Արևելքում «Դելիոթ» (Deloitte) ընկերության կորպորատիվ ֆինանսների բաժնի տնօրեն Ռիզվան Շահի (Rizwan Shah) խոսքերով, անշարժ գույքի շուկայում նոր հայտարարված բումի ընթացքում կառավարություն այլ կերպ կվարվի: Նախագծերի ֆինանսավորման համար կընտրվեն բոլորովին այլ աղբյուրներ, իսկ շինարարական տենդերները կհայտարարվեն միջազգային շուկայում, ինչն էլ կնվազեցնի վարկատուների ախորժակը և կներգրավի փորձառու ներդրողների: Բանն այն է, որ 2004-2007 թթ-ների ընթացքում գրացված բումից հետո 2008 թ-ի ճգնաժամը բերեց անշարժ գույքի գների 60 տոկոս անկնման, ինչի արդյունքում շատ բանկեր կանգնեցին սնանկացման խնդրի առաջ: Իսկ 2009 թ-ին, երբ երկրի խոշորագույն կառուցապատող «Նակհիլ» (Nakheel) ընկերությունը չկարողացավ վճարել 4.1 մլրդ ԱՄՆ դոլար պարտքը, Դուբայի կառավարությունը ստիպված եղավ 10 մլրդ ԱՄՆ դոլար արժողությամբ վարկի համար դիմել իր նավթով հարուստ հարևան Աբու-Դաբիին: Բնականաբար այս բոլոր իրադարձություններից հետո, շատերն անհանգստանում են, որ անշարժ գույքի շուկայում նոր բում վառելով, Դուբայը կրկնում է անցյալի սխալները: Իսկ վերջերս կայացած ֆինանսական խորհրդակցության ժամանակ, երկրի ամենահարուստ հիմնադրամներից մեկի, Էմիրություններում ներդրումային կազմակերպության (Emirates Investment Authority) ֆինանսական տնօրեն Փիթեր Ժոլդովսկիի (Peter Jodlowski) խոսքերով, այսօր բոլորը կրկնում են, որ շատ բան են սովորել անցյալի սխալներից, սակայն շարունակում են անել այն, ինչ 3-4 տարի առաջ: Նա համոզված է, որ հաջորդ 5 տարիների ընթացքում, քաղաքի իշխանությունները կշարունակեն իրենց տալ այն նույն հարցը, ինչ 2008 թ-ին՝ «ինչպես այս ամենը կատարվեց»:

Հունաստանի անշարժ գույքի սեփականաշնորհման գործակալությունը (HRADF) սահմանել է երկրի լավագույն անշարժ գույքի օբյեկտներից մեկի՝ ծովափնյա Հելենիկոն շրջանում գտնվող Աթենքի նախկին օդանավակայանի տարածքի վաճառքի պայմանները, տեղեկացնում է ռուսական РИА Новости տեղակատվական գործակալությունը: Վաճառքի է հանվել ընկերության 100 տոկոս բաժնետոմսերը, որոնք ներառում են Աթենքի հարավային շրջանում գտնվող 6.2 մլն քառակուսի մետր մակերեսով տարածք: Նախկին օդանավակայանն իր տարածքով ավելի քան 3 անգամ գերազանցում է Մոնակոյի թագավորության, 2 անգամ լոնդոնյան Հայդ-Փարքի (Hyde Park) և նյու յորքյան Կենտրոնական զբոսայգու (Central Park) տարածքը: Վաճառվող տարածքում կա 500 շինություն, այդ թվում 1938-2001 թթ-ին գործող օդանավակայանի շենքը, 2004 թ-ի Օլիմպիադայի մարզական համալիրները, հունական զորքերի նախկին զորանոցները, ինչպես նաև մարզական կենտրոն և 300 զբոսանավի համար նախատեսված նավահանգիստ: Սեփականությունը վաճառվում է այն պայմանով, որ Հունաստանի կառավարությունը կստանա ապագա ներդրողի եկամուտների 30 տոկոսը: Իսկ նախկին օդանավակայանի համար սահմանված արժեքը չի հայտարարվում: Բյուջեի պակասուրդը լրացնելու և եկամուտներն ավելացնելու նպատակով Հունաստանում հսկայական սեփականաշնորհման գործընթացներ են իրականացվում: Դեռևս 2 ամիս առաջ երկրի անշարժ գույքի սեփականաշնորհման գործակալությունն առաջարկել էր վարձով հանձնել երկրի 40 անմարդաբնակ կղզիները, որպեսզի փոքր-ինչ նվազեցնեն պետական պարտքը: Իսկ տարվա սկզբին Հունաստանը որոշել էր վարձով հանձնել իր պատմական հուշարձանները, այդ թվում՝ «Ակրոպոլիսը» (Acropolis) և «Ապոլոնի տաճարը» Դելֆի (temple of Delphi) քաղաքում:

Իսպանիայի կառավարությունն անշարժ գույքի ձեռք բերման օրենքում նախատեսում է փոփոխություններ կատարել՝ նպատակ ունենալով դրանով իսկ փոքր-ինչ թեթևացնել երկրում տիրող ծանր ֆինանսական ճգնաժամը: Ինչպես հայտարարել է երկրի Առևտրային հարցերով Խորհրդի նախագահ Հայմե Գարսիա-Լեգասը, Իսպանիան կարող է բնակության իրավունք տրամադրել այն օտարազգիներին, ովքեր ձեռք կբերեն 160 հազար եվրո և ավելի արժողությամբ բնակարաններ: Նման քայլը պայմանավորված է 2008 թ-ին անշարժ գույքի շուկայում մոլեգնած ճգնաժամով, որի պատճառով երկրում մոտ 700 հազար բնակարան մնացել են չվաճառված: Ըստ Գարսիա-Լեգասի՝ կառավարության նման քայլն ուղղված է հիմնականում ռուսաստանցի և չինացի գնորդներին, քանի որ հիմնականում նրանք են հետաքրքրված իսպանական անշարժ գույքով: Բացի այդ նա նաև բացատրել է անշարժ գույքի ձեռք բերման համար ընտրված գնային բավականին բարձր շեմը: Բանն այն է, որ Իսպանիան չի ցանկանում իր երկրում բնակության իրավունք տրամադրել համեմատաբար աղքատ և ցածր եկամուտներով անձանց, ովքեր փնտրում են մատչելի անշարժ գույք: Այսօր երկրի տնտեսությունը շարունակում է մնալ ճգնաժամային ծանր դրության մեջ, իսկ բնակչության 25 տոկոսը գործազուրկ է դարձել: Արդյունքում բնակչության գերակշռող մասը չի կարողացել վճարել հիփոթեքային վարկերով ձեռք բերված բնակարանների ամսեվճարները և դրանք առգրավվել են բանկերի կողմից: Օրենքում հնարավոր փոփոխությամբ կառավարությունը ցանկանում է փոքր-ինչ շտկել ստեղծված իրավիճակը: