Սանկտ Պետերբուրգի քաղաքաշինության և ճարտարապետության խորհուրդը թույլատրել է Գազպրոմ ընկերությանը նախօրոք գնված Լախտա պատմական թաղամասում կառուցել մինչև 500 մետր բարձրությամբ երկնաքեր, տեղեկացնում է news.mail.ru կայքը: Գազպրոմ ընկերությունը, Սանկտ Պետերբուգի պատմական կենտրոնից 10 կիլոմետր հեռավորության վրա՝ Ֆիննական ծովածոցի ափին, նախատեսում է կառուցել գործարար-հասարակական «Լախտա կենտրոն» թաղամասը՝ ընկերության կենտրոնական գրասենյակի 470 մետր բարձրությամբ աշտարակով: Հուլիսի կեսին քաղաքի հողօգտագործման և կառուցապատման խորհուրդը քաղաքաշինության և ճարտարապետության խորհրդին էր ներկայացրել մինչև 500 մետր բարձրությամբ աշտարակի նախագիծը և խորհուրդ տվել թույլատրել շինարարությունը: Ընդ որում, տվյալ տարածքում կառուցապատումը օրենքով չպետք է գերազանցի 27 մետրը: Սկզբում Գազպրոմ ընկերությունը ցանկանում էր 400 մետր բարձրությամբ աշտարակ կառուցել քաղաքի Կարմիր գվարդիականների թաղամասում գտնվող Օխտինյան հրվանդանի վրա, իսկ աշտարակը կոչվում էր «Օխտա կենտրոն»: Սակայն հասարակական բողոքների արդյունքում ընկերությունը հրաժարվեց իր նախաձեռնությունից և վաճառեց շինարարության համար նախօրոք գնված տարածքը: «Օխտա Կենտրոնը» երկար ժամանակ փնտրում էր իր գտնվելու նոր վայրը և անգամ կիսալուրջ առաջարկվեց այն կառուցել Երևանում: Սակայն, միամտություն է այսօրվա Ռուսաստանում այլ «քաղաք» պատկերացնել Գազպրոմի այս նոր՝ ամբիցիոզ նախագծի համար, որտեղ 2018 թվականից պետք է գործի «Գազպրոմ Նավթ» ընկերության կենտրոնական գրասենյակը: Ավելի ուշ ընկերությունը Ֆիննական ծովածոցի ափին գտնվող Լախտա պատմական թաղամասում գնեց 140 հազար քառակուսի մետր տարածք և պատրաստվում է մինչև 2018 թ-ը այստեղ կառուցել երկար սպասված աշտարակը, բայց արդեն «Լախտա կենտրոն» անվանմամբ: Ներկայումս ճարտարապետական ԱրԷմՋէյԷմ (RMJM) ընկերությունը զբաղված է նախկին նախագիծը նոր տարածքին համապատասխանեցնելու խնդիրներով: Գազպրոմ ընկերությունը նախատեսում է այս գործընթացն ավարտել մինչև 2012 թ-ը և անմիջապես սկսել կենտրոնի շինարարությունը:

Թայբեյ 101 երկնաքերը դարձել է աշխարհի ամենաբարձր «Կանաչ» կառույցը՝ արժանանալով LEED պլատինե վկայականի, էկոլոգիապես մաքուր շինությունների գնահատման ամենաբարձր մակարդակին: 509 մետր բարձրությամբ Թայբեյ 101 աշտարակը աշխարհի ամենաբարձր շինությունների ցուցակում գրավում է երկրորդ տեղը՝ զիջելով միայն 828 մետր բարձրությամբ Բուրջ Խալիֆաին: Վերջերս աշտարակը արդիականացվել է և համալրվել նորագույն էկոլոգիապես մաքուր տեխնոլոգիաներով: Աշտարակի արդիականացումն իրականացրել են էլեկտրոնային հսկա Սիմենս (Siemens) ընկերությունը՝ համագործակցելով ինտերիերի նախագծողներ Սթիվեն Լիչ Ասոշիեյթս (Steven Leach Associates) և Էկո Թեք Ինթերնեշնլ (Eco Tech International) ընկերությունների հետ: Մեկ այլ էլեկտրոնային աղբյուրի focustaiwan.tw-ի տվյալներով, շինության սերտիֆիկացումը 3 ռեկորդ է գրանցել՝ դառնալով աշխարհի ամենաբարձր «կանաչ» երկնաքերը (509 մետր), աշխարհի խոշորագույն «կանաչ» շինությունը (150 հազար քառակուսի մետր) և աշխարհի ամենաօգտագործվող «կանաչ» աշտարակը (90 վարձակալ): Շինության նորագույն տեխնոլոգիաները հնարավորություն են տալիս տարեկան խնայել 14.4 մլն կիլովատ ժամ էլեկտրաէներգիա, որը հավասար է 1.24 մլն ԱՄՆ դոլարի, բացի այդ օդում ածխաթթու գազի պարունակությունը հարաբերվում է 600-ը 1 մլն-ի, ինչն էլ հնարավորություն է տալիս աշտարակի վարձակալներին մշտապես մաքուր օդ շնչել: Հիշեցնենք, որ շենքի սեփականատերը՝ Թայբեյի ֆինանսական կենտրոն կորպորացիան 2009 թվականի նոյեմբերին հայտարարեց, որ մինչ 2011թվականի ամառը, Թայբեյ-101-ը կդառնա աշխարհի «ամենականաչ» ամենաբարձրահարկ շենքը LEED- ի ստանդարտներով (Leadership in Energy & Environmental Design- դա միջազգային ճանաչում ունեցող «կանաչ շինարարության» սերտիֆիկացման համակարգ է):

Օգոստոսի 2-ին Սաուդյան Արաբիայի արքայազն, միլիարդատեր Ալվալիդ իբն Թալալը (Alwaleed bin Talal) և երկրի խոշորագույն կառուցապատող Բեն Լադեն Գրուփ (Bin Laden Group – հիմնված է աշխարհի, արդեն հանգուցյալ, համար 1-ին ահաբեկչի հոր կողմից) ընկերությունը համաձայնագիր են ստորագրել՝ Կարմիր ծովի ափին գտնվող Ջեդդա քաղաքում կառուցել 1.2 մլրդ ԱՄՆ դոլար արժողությամբ աշխարհի ամենաբարձր երկնաքերը: Ինչպես տեղեկացնում է ctbuh.org կայքը, հազար մետր բարձրությամբ և 530 հազար քառակուսի մետր ընդհանուր մակերեսով Արքայական Աշտարակը (Kingdom Tower) հանդիսանում է 5.3 մլն քառակուսի մետր ընդհանուր մակերեսով Արքայական Քաղաք (Kingdom City) նախագծի գլխավոր կառույցը: Շինարարական աշխատանքներից հետո այս աշտարակը 172 մետրով կգերազանցի Էդրիան Սմիթի նախագծած (Skidmore, Owings and Merrill LLP), աշխարհի ներկայիս ամենաբարձր երկնաքերի՝ 828մ բարձրությամբ Բուրջ Խալիֆաի բարձրությունը: Արքայական Աշտարակը հանրությանը կառաջարկի բարձրակարգ բնակարաններ, հյուրանոց, գրասենյակային տարածքներ, ինչպես նաև այստեղ կտեղակայվի աշխարհի ամենաբարձր դիտահարթակը: Ծրագրի նախագիծն իրականացնում է ԱՍ+ՋիՋի (AS+GG) ճարտարապետական ընկերությունը: Նախագծման աշխատանքները ընթանում են արագ տեմպերով, իսկ շինարարական աշխատանքները շուտով կսկսվեն և արդեն հայտարարված է հիմքերի կառուցման աշխատանքների մրցույթ: Արքայական Քաղաքի շինարարական բյուջեն գնահատվում է 20 մլրդ ԱՄՆ դոլար, իսկ միայն աշտարակինը 1.2 մլրդ ԱՄՆ դոլար: Արքայական Աշտարակի բարձրությունը զարգացած վերելակային համակարգ է նախատեսում: Ըստ նախնական տվյալների՝ աշտարակը կսպասարկեն 12 շարժասանդուղք և 59 վերելակ, որից 5-ը երկխցիկանի (տեղադրված իրար վրա): Ի դեպ դիտահարթակ տանող վերելակները կաշխատեն 10 մետր/ վայրկյանում արագությամբ: Շինության մեկ այլ նախագծային առանձնահատկությունն էլ 157-րդ հարկում տեղակայված 30 մետր տրամագծով երկնային պատշգամբն է: Բացի աշտարակից ԱՍ+ՋիՋի ընկերությունը նախագծում է նաև 230 հազար քառակուսի մետր մակերեսով ափամերձ թաղամասը, որտեղ կլինեն բնակելի և առևտրային տարբեր շինություններ, առևտրի կենտրոն, գեղեցիկ բաց այգիներ և այլն:

Բարսելոնան՝ աշխարհի ամենագեղեցիկ քաղաքներից մեկը, ուր բնակվել և ստեղծագործել է աշխարհահռչակ կատալոնացի Գաուդին, համալրվեց ևս մեկ մասնագիտորեն ճանաչված ճարտարապետական գլուխգործոցով: Emporis Skyscraper Award 2010 հեղինակավոր ճարտարապետական մրցանակին արժանացել է Porta Fira (Պորտա Ֆիրա) հյուրանոցի շենքը, որը «b720 Arquitectos» և ճապոնական Toyo Ito & Associates ճարտարապետական ընկերությունների համատեղ ստեղծագործությունն է: Երկրորդ մրցանակին արժանացավ աշխարհի ամենաբարձր շենքը՝ Դուբայի Բուրջ Խալիֆան, իսկ երրորդ պատվավոր տեղը զբաղեցրեց Ֆրանսիայի հարավում՝ Մարսելում գտնվող Tour CMA CGM աշտարակը: Ժյուրին, որը բաղկացած է աշխարհի առաջատար փորձագետներից, գնահատել է բարսելոնյան երկնաքերի գեղագիտական նրբությունը և ներդաշնակությունը քաղաքային միջավայրին: Ամեն տարի այս մրցույթին մասնակցում են ավելի քան 100 մետր բարձրություն ունեցող շենքերը, իսկ մրցանակին արժանանում են ամենալավ դիզայնով և օգտագործման հարմարավետությամբ կառույցները: 26 հարկանի այս հինգ աստղանի հյուրանոցը 113 մետր բարձրություն ունի և պատված է կարմիր ուղղահայաց ալյումինե խողովակներով: Վերին հատվածում այս գլանաձև շենքը լայնանում է և զարմանալիորեն ներդաշնակվում է շրջակա քաղաքային միջավայրին: Նշենք, որ մեկ այլ մրցանակաբաշխության արդյունքներով, որն անցկացրել էր Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH), 2010 թվականի ամենալավ երկնաքերն է համարվել Լիդսի 70 մետրանոց Broadcasting Place «ժանգոտ» երկնաքերը, իսկ Դուբայի Բուրջ Խալիֆան արժանացել է մեկ այլ՝ CTBUH- 2010 Global Icon Award մրցանակի:

Այս շաբաթ ամերիկյան հայտնի PNC ֆինանսական ծառայությունների խումբը (PNC Financial Group), հայտարարել է, որ պատրաստվում է կառուցել աշխարհի «ամենականաչ» երկնաքերը: PNC Պլազա աշտարակը (Tower at PNC Plaza) կկառուցվի Պիտսբուրգի կենտրոնում, այն նույն վայրում, որտեղ ավելի քան 150 տարի գործում է ընկերություն գլխավոր գրասենյակը: Ընկերության նոր գլխավոր գրասենյակի շենքը կունենա 40 հարկ և շահագործման կհանձնվի 2015թ-ին: Ընդհանուր 75 հազար քառակուսի մետր տարածքով PNC Պլազան կլինի ընկերության ամենամեծ շինությունը Պիտսբուրգում: Աշտարակը կունենա կանաչապատ տանիք և 300 տեղով ստորգետնյա ավտոկայանատեղի: Մոտ 400 մլն դոլար արժողությամբ նախագիծը կստեղծի ավելի քան 2500 նոր աշխատատեղ: Ընկերության նախկին շենքի ապամոնտաժման աշխատանքները նախատեսվում է սկսել 2011 թ-ի վերջին, իսկ նոր աշտարակի շինարարությունը 2012 թ-ի գարնանը: PNC Group-ն ակնկալում է աշտարակը շահագործման հանձնել 2015 թ-ի ամռանը: Նախագծի հեղինակն է աշխարհի խոշորագույն ճարտարապետական Գենսլեր (Gensler) ընկերության պիտսբուրգյան գրասենյակը: Պիտսբուրգյան ՓիՋեյ Դիք (PJ Dick) ընկերությունը հանդես կգա որպես շինարարության կառավարիչ, իսկ Բուրո Հափոլդ (Buro Happold) ընկերության բրիտանական գրասենյակը՝ որպես տեխնիկական խորհրդատու: Որպես կանաչ շինարարության խորհրդատու՝ հանդես կգա Պալադինո և Ընկերություն (Paladino & Company) ընկերությունը: Շինության ճակատային հատվածը կլինի երկշերտ ապակուց, ինչը կբարձրացնի էներգիայի խնայողության արդյունավետությունը, ինչպես նաև բնական օդափոխության հնարավորություն կտա: Գերժամանակակից սարքերն ու սենսորները հնարավորություն կտան բարձրացնել ջեռուցման և սառեցման համակարգերի էֆեկտիվությունը: Աշտարակի բոլոր աշխատասենյակներում առավելագույնս կօգտագործվի արևի լույսը՝ նվազեցնելով արհեստական լուսավորության անհրաժեշտությունը օրվա ընթացքում: Շինության նախագծման հարցերով զբաղվող խումբը այժմ ուսումնասիրում է բոլոր այլընտրանքային էներգիայի աղբյուրների օգտագործման տարբերակներ, որոնք հնարավորություն կտան շենքի շահագործման ընթացքում զգալիորեն նվազեցնել ածխաթթու գազի արտանետումը շրջակա միջավայր: Աշտարակի կանաչապատ տանիքը կհավաքի անձրևաջրերը շինության այլ ջրային կարիքները հոգալու նպատակով: PNC Group-ը, ներգրավված ավանդների ծավալով ԱՄՆ-ի 6-րդ բանկը, իր առաջին «կանաչ» շինությունը շահագործման է հանձնել 2000 թ-ին: 60 հազար քառակուսի մետր տարածքով PNC -ի Ֆըրսթսայդ կենտրոնն (Firstside Center) ժամանակին առաջին LEED-լիցենզավորված շինությունն էր աշխարհում: Նշենք նաև, որ PNC Group-ը տիրապետում է աշխարհի ամենաշատ քանակությամբ «կանաչ» կառույցների, իսկ վերջերս, ընկերությունը շահագործման է հանձնել իր Վաշինգտոնյան նոր գրասենյակի «կանաչ» շենքը՝ Սպիտակ Տնից մի քանի թաղամաս հեռավորությամբ: