Ինչպես տեղեկացնում է Chinadaily ինտերնետային աղբյուրը, Պեկինում նախատեսվող ամենաբարձր աշտարակի կառուցապատողները հայտարարել են, որ նախագծի հիմարկեքի արարողությունը նախատեսված է սեպտեմբերի 19-ին: Նախագծի պատվիրատուն «ՍիԱյԹիԱյՍի Գրուփ» (CITIC Group - China International Trust and Investment Corporation)), ընկերությունն է, որը դեռ նախորդ տարվա դեկտեմբերի 21-ին քաղաքի կենտրոնական գործարար թաղամասում (Central Business District) ձեռք էր բերել 11.478 քառակուսի մետր տարածքի իրավունք՝ վճարելով 563 մլն ԱՄՆ դոլար: Ընկերությունը նախատեսում է կառուցել 510 մետր բարձրությամբ և 104 հարկանի աշտարակ, սակայն վերջնական նախագիծը դեռ հաստատված չէ և ընկերությունը սպասում է մունիցիպալ կառավարության թույլտվությանը: Նոր կառուցվող երկնաքերը կանվանվի «Չժունգո Զուն» (Zhongguo Zoon), ինչը նշանակում է Չինաստանի գավաթ: Ըստ նախնական տվյալների՝ շինարարությունը կավարտվի 5-7 տարուց, և արդյունքում երկնաքերը կունենա 350 հազար քառակուսի մետր հատակների ընդհանուր մակերես: Աշտարակը կկառուցվի քաղաքի կենտրոնական գործարար թաղամասի հյուսիսային հատվածում, որտեղ գտնվում են մի շարք հայտնի միջազգային կազմակերպությունների գրասենյակներ: Այստեղ է գտնվում նաև Պեկինի ներկայիս ամենաբարձր Չինաստանի համաշխարհային առևտրային կենտրոնի «3-րդ Աշտարակը» (Tower 3): Նշենք, որ երկնաքերի նախագծում գերակշռում են չինական ավանդական մշակույթի տարրերը, իսկ շինարարության ավարտից հետո այն քաղաքի բնակիչներին կհիշեցնի չինական հնագույն քաղաքները և լավագույնս կներկայացնի մայրաքաղաքը:

Սեպտեմբերի 6-ին Տաջիկստանի մայրաքաղաքում տեղի ունեցավ երկրի ամենաբարձր շենքի՝ 22 հարկանի «Դուշանբե Պլազա» բիզնես-կենտրոնի բացման հանդիսավոր արարողությունը, տեղեկացնում է Ինտերֆաքս լրատվական գործակալությունը: Շենքի շահագործումը նվիրված էր երկրի անկախության 20-ամյա տարեդարձին, որը կնշվի սեպտեմբերի 9-ին: Ինչպես տեղեկացրեց Դուշանբեի քաղաքապետարանի (Խուկումատայի) մամուլի խոսնակ Շավկատ Սաիդովը, շինության բարձրությունը 92 մետր է: Այն կառուցված է մայրաքաղաքի կենտրոնում՝ հանրապետության գլխավոր հրապարակից՝ Դուստիից (Բարեկամություն) 50 մետր հեռավորության վրա: 40 հազար քառակուսի մետր մակերեսով «Դուշանբե Պլազա» համալիրի կառուցման բյուջեն կազմել է 33.6 մլն ԱՄՆ դոլար: Բիզնես-կենտրոնում կլինեն 2 ռեստորան, որոնցից մեկը 19-րդ հարկում՝ հիանալի տեսարանով դեպի Դուշանբե, նորաձևության սրահներ, խորհրդակցությունների սրահներ, գրասենյակներ, ինչպես նաև հյուրանոցային համարներ: «Դուշանբե Պլազա»-յի երկու աշտարակներում կաշխատեն 12 վերելակ, իսկ երկու ստորգետնյա հարկերում կլինի ավտոկայանատեղի: Հարկ է նշել, որ մինչ օրս Տաջիկստանի ամենաբարձր շենքերը մայրաքաղաքում գտնվող երկու 16 հարկանի բնակելի շինություններն էին:

Սաուդյան Արաբիայի արքայազն Ալվալիդ իբն Թալալի (Alwaleed bin Talal) «Թագավորության Աշտարակ» (Kingdom Tower) նախագծի՝ աշխարհի ամենաբարձր երկնաքերի գլխավոր ճարտարապետն է ընտրվել Էդրիան Սմիթը (AS+GG ընկերություն - Adrian Smith + Gordon Gill Architecture): Նշենք, որ ամերիկացի ճարտարապետը բոլոր իրավունքներն ուներ դառնալու տվյալ նախագծի ճարտարապետը: Դեռևս 2008 թ-ին նա առնչվել էր այնպիսի երևույթների հետ, ինչպիսիքն են՝ քամու հորիզոնական դիվերգենցիան և բացասական ճնշումը, երբ նախագծում էր աշխարհի ներկայիս ամենաբարձր աշտարակը «Բուրջ Խալիֆան» (Burj Khalifa): Ինչպես մանրամասնել է Էդրիան Սմիթը Bloomberg լրատվական գործակալությանը տրված հարցազրույցի ժամանակ, կառույցը վեր կխոյանա տարբեր հիմքերով՝ 3 թեքված աշտարակների տեսքով, որոնք կավարտվեն տարբեր բարձրությունների վրա: Նման կառուցվածքը հնարավորություն կտա հավասարակշռել աշտարակի քաշը և դարձնել այն առավել ամուր, դիմացկուն այնպիսի քամիների նկատմամբ, որոնք ամենաբարձր հարկերում կարող են հասնել մինչև 190 կիլոմետր ժամ արագության: Երկնաքերը նախագծված է այնպես, որ 500 մետր բարձրության հատվածում կարող է տատանվել մոտ մետր մեծությամբ ուժեղ քամիների ժամանակ , որոնք լինում են միայն 50 տարին մեկ անգամ: Այդ տատանումն ավելի աննկատ կլինի եղանակային սովորական պայմաններում: Աշխարհի ամենաբարձր աշտարակի նախագծումը քամու դեմ պայքարից բացի նաև այլ խնդիրներ է պարունակում: Ինչպես նշում է գլխավոր ճարտարապետը, բավականին երկար ժամանակ պահանջվեց, որպեսզի օդաչուների և ճարտարապետների ընդհանուր քննարկումների արդյունքում ուղղաթիռային վայրէջքի հրապարակի փոխարեն նախագծվի դիտահարթակ, քանի որ ուղղաթիռային վայրեջքը այստեղ բավականին վտանգավոր էր: Գլխավոր խնդիրներից էր նաև աշտարակը ջրով ապահովելը: Ինչպես բացատրել է գլխավոր ճարտարապետը, ջուրը 163-րդ հարկ կմղվի փուլային տարբերակով, տարբեր հարկերում հավաքվելով նախապես տեղադրված կուտակային բաքերի մեջ, որպեսզի նվազեցվի խողովակների պատերին ճնշումը: Աշխարհի ամենաբարձր աշտարակը յուրաքանչյուր 20 հարկը մեկ կունենա բուժկետ, որտեղ մարդիկ կստանան բժշկական օգնություն և ջուր: Վերջիններս կծառայեն որպես անվտանգության կենտրոններ արտակարգ իրավիճակների ժամանակ: Ի դեպ, Սմիթը ցանկանում է որպես արտակարգ իրավիճակների ժամանակ այընտրանքային տարբերակ մշակել վերելակային համակարգից օգտվելը՝ հակառակ աշխարհում ընդունված այն կանոնի, որ վերելակներն արտակարգ իրավիճակների ժամանակ պետք է չաշխատեն: «Թագավորության Աշտարակի» արտաքին պատերը կլինեն ապակուց և ինչպես նշում է Սմիթը. «մենք կօգտագործենք ապակին, քանի որ այն քիչ խնամք է պահանջում և երկարակյաց է, բացի այդ այն արտացոլում է երկինքը և աշտարակին ավելի թեթև և էլեգանտ տեսք է հաղորդում»: Ըստ նախնական տվյալների՝ աշխարհի ամենաբարձր երկնաքերում էլիտար բնակարանների գները կմրցակցեն Դուբայի էլիտար բնակարանների գների հետ, և երկու ննջասենյակից բաղկացած բնակարանը կարժենա մոտ 800 հազար ԱՄՆ դոլար:

«ԻՍի Հարրիս» (EC Harris) անշարժ գույքի խորհրդատվական ընկերության կատարած ուսումնասիրությունների համաձայն՝ Շվեյցարիան համարվում է աշխարհի ամենաթանկ երկիրը շինարարություն իրականացնելու տեսանկյունից: Այստեղ որևէ կառույցի շինարարությունը 25 տոկոսով ավելի թանկ է արժենում, քան աշխարհի ցանկացած այլ երկրում: «ԻՍի Հարրիս» ընկերությունը հրապարակել է համաշխարհային շինարարական շուկաների տարեկան ուսումնասիրությունը: Ընկերության մասնագետների վկայությամբ՝ Եվրոպան մնում է աշխարհի ամենաթանկ աշխարհամասը շինարարություն իրականացնելու տեսանկյունից: Նշենք, որ առաջատար տասնյակի 8 հորիզոնականները զբաղեցրել են եվրոպական երկրներ: Ըստ ուսումնասիրության տվյալների՝ Շվեյցարիայում շինարարությունը 71 տոկոսով թանկ է, քան Մեծ Բրիտանիայում, որտեղ շինարարութուն իրականացնելու արժեքը, գագաթնակետ համարվող 2008 թ-ի համեմատ, նվազել է 20 տոկոսով: Նշենք, որ ընկերության մասնագետներն իրենց ուսումնասիրությունները կատարում են հիմք ընդունելով Մեծ Բրիտանիայի ցուցանիշը: Երկրորդ և երրորդ տեղերը համապատասխանաբար զբաղեցրել են Դանիան և Շվեդիան, իսկ Կանադան և Ավստրալիան այն միակ ոչ եվրոպական երկրներն են, որ տեղ են գտել «լավագույն» տասնյակում: Վերջիններս շատ չնչին տարբերությամբ հետևում են թողել 11-րդ և 12-րդ տեղերը զբաղեցրած Մեծ Բրիտանիային և Բահրեյնին: Ուումնասիրության համաձայն՝ աշխարհի ամենաէժան երկրները շինարարություն իրականացնելու տեսանկյունից Հնդկաստանն ու Շրի-Լանկան են, որտեղ շինարարությունը 71 տոկոսով ավելի էժան է, քան Բրիտանիայում: «ԻՍի Հարրիս» ընկերության ներկայացուցիչ Մեթյու Ռեյլին նշել է, որ եվրոպական երկրներում շինարարություն իրականացնելու բարձր գները չեն զարմացրել իրենց, քանի որ տվյալ երկրները ոչ միայն ներկրում են շինանյութի զգալի մասը, այլև այստեղ աշխատուժը բավականին թանկ է: Ընկերության մասնագետները նաև ընդգծել են շուկայի մտահոգիչ տենդենցները: Ըստ նրանց՝ եվրոպական շինարարական կազմակերպություններն արդեն այսօր պետք է մտահոգվեն, թե մի քանի տարի անց, որտեղից պիտի ձեռք բերեն անհրաժեշտ շինանյութը: Բանն այն է, որ Չինաստանի և Հնդկաստանի նման արագ զարգացող երկրների պահանջարկի աճը, ինչպես նաև համաշխարհային տնտեսության դանդաղող տեմպերը, ստիպում են համաշխարային մատակարարներին շրջվել դեպի արևելք, որի արդյունքում էլ ավելի կթանկանա շինարարության արժեքը Եվրոպական երկրներում:

Օգոստոսի 19-ին Սաուդյան Արաբիայի թագավոր Աբդուլլահ իբն Աբդել Ազիզը մասնակցել է Գրանդ Մզկիթի (Grand Mosque) ընդլայնման նախագծի հիմնարկեքի արարողությանը, հաղորդում է Arab news լրատվական գործակալությունը: Նշենք, որ ընդլայնման ծրագիրը կներառի ավելի քան 400 հազար քառակուսի մետր տարածքի ավելացում մզկիթի հյուսիս-արևելյան և հյուսիս-արևմտյան հատվածներում և նախատեսվում է, որ շինարարական աշխատանքների ավարտից հետո մզկիթում միաժամանակ կկարողանա աղոթել 2.5 մլն ուխտավոր: Համաձայն հոդվածում հրապարակված տվյալների՝ ներկայումս Գրանդ Մզկիթի ընդհանուր տարածքը կազմում է 356 հազար քառակուսի մետր, որը միաժամանակ կարողանում է տեղավորել 770 հազար հավատացյալ, իսկ ընդլայնման հետևանքով նախատեսվում է ավելացնել ևս 456 հազար քառակուսի մետր տարածք, որտեղ միաժամանակ կկարողանա աղոթել ևս 1.2 մլն ուխտավոր: Նոր 21.8 մլն ԱՄՆ դոլար արժողությամբ ընդլայնման ծրագիրը նախատեսվում է իրականացնել 3 մասերով՝ կառուցել նոր շենք, ընդլայնել և բարեկարգել մզկիթին հարող տարածքները, այդ թվում կառուցել անցուղիներ և թունելներ, ինչպես նաև տեղադրել օդափոխության համակարգեր, էլեկտրաէներգիա ապահովող սարքավորումներ և մզկիթն ապահովել խմելու ջրով: Նախատեսվում է նաև մզկիթի հարևանությամբ կառուցել մի քանի բազմահարկ հյուրանոցներ: Ընդլայնման ծրագրի շրջանակներում կկառուցվեն ճանապարհներ, որպեսզի ուխտավորները կարողանան հասնել մզկիթ: Ալ-Մասջիդ ալ-Հարամը (Al-Masjid al-Haram), որն ամբողջ աշխարհում հայտնի է նաև որպես Գրանդ Մզկիթ, համարվում է աշխարհի խոշորագույն մզկիթը: Գտնվելով Մեքքա քաղաքում՝ այն շրջապատում է մուսուլմանական աշխարհում հայտնի սուրբ Քաաբան՝ Իսլամի ամենասուրբ վայրը (սև կտորով ծածկված գրանիտե խորանարդ), դեպի որն ամբողջ մուսուլմանական աշխարհն ուղղում է իր հայացքը աղոթքի ժամանակ: