Ինչպես հայտնի է, արդեն երկար տարիներ ողջ աշխարհում մեծ տարածում է գտել պարամետրիկ նախագծումը, որն իրենից ներկայացնում է ալգորիթմական ճարտարապետություն: Այս ոճը, որ թվային դարաշրջանի ծնունդ է, ունի իր և՛ դրական, և՛ բացասական կողմերը։ Սակայն, մի շարք առավելությունների շնորհիվ, այն տարեցտարի ավելի ու ավելի է գրավում քաղաքային միջավայրերը։ Այս առումով Հայաստանը բացառություն չէ, և շուտով այս ճարտարապետական ոճը իր ուրույն տեղը կգտնի մեր մայրաքաղաքում։ Խոսքը Կոմիտասի պողոտայի և բուլվարի հատման հանգույցի վերնամասում նախատեսվող բազմաֆունկցիոնալ կենտրոնի նախագծի մասին է։ Այն նախատեսվում է իրականացնել Երևան քաղաքի հյուսիսային առանցքի վերջնահատվածում։ Նախագիծը գլխավորապես միտված է շեշտել և ակտիվացնել վերը նշված հանգույցը: Ի՞նչ փուլում է գտնվում նախագիծը և ինչպիսի՞ ծավալատարածական լուծումներով է այն իրականացվելու. այս և այլ հարցերի շուրջ զրուցեցինք «Իթակէ 999» ՍՊԸ ճարտարապետական արվեստանոցի տնօրեն, նախագծի գլխավոր ճարտարապետ, ճարտարապետության թեկնածու, միջազգային մրցանակների դափնեկիր` Տելեմակ Անանյանի հետ։ - Պարոն Անանյան, հայտնի է, որ նախագիծը ստեղծված է Գիտահետազոտական ինստիտուտի (ԳՀԱ) շենքերի հարևանությամբ։ Խնդրում եմ մանրամասնեք, թե նշված հանգույցի ո՞ր հատվածում է այն կառուցվելու: - Նախագիծը իրականացվելու է ներկայիս «Արաբկիր» հանրախանութի տեղում։ - Ինչո՞վ է պայմանավորված կառույցի նման կոնստրուկտիվ սխեմայի ընտրությունը։ - 20-րդ դարը տիպիզացիայի, ունիֆիկացիայի և ստանդարտիզացիայի դար էր, որն ինդուստրիալիզացիայի արդյունք էր, իսկ 21-րդ դարը պարամետրիկ ճարտարապետության դար է, ինչը պայմանավորված է ժամանակակից թվային և ռոբոտացված արդյունաբերական համակարգերի զարգացմամբ։ Պարամետրիկ մոդելավորումը թույլ է տալիս աշխատել կրկնակի կորության լարված մակերևույթների հետ, որոնք ոչ միայն աչք շոյող, նորարար, գեղեցիկ, տպավորիչ ու հիշվող են, այլև ունեն բարձր կրողունակություն, սեյսմակայունություն և թույլ են տալիս ստանալ շատ խիզախ թռիչքներով ամենատարբեր կերպարներ։ Մեծաթռիչք թաղանթը թույլ է տալիս մեկ վեղարի տակ վերցնել հսկա մակերեսներ, հեշտացնում է հատակագծային, տեխնոլոգիական, նավիգացիոն և այլ խնդիրների լուծումները։ Մեկ ծածկի տակ համախմբելով բազմաֆունկցիոնալ կենտրոնի բոլոր տիպի սպասարկման շենքերը, հնարավոր է դառնում ապահովել ժամանակակից միջազգային ստանդարտներին համապատասխան միջավայր, հարմար ժամանցի, սննդի, ցուցահանդեսների, առևտրի, երիտասարդների և երեխաների զարգացման ու զվարճանքի համար։ Նախագծի գմբեթը նախատեսվում է իրականացնել ժամանակակից պարամետրիկ ճարտարապետության հայտնի շինարարական տեխնոլոգիայով։ Ծածկը նախատեսվում է իրականացնել կրկնակի կորության թաղանթ-ցանցային մակերևույթով, որի ենթահամակարգում մետաղական տարածական թաղանթ-ցանցի կարկասն է, և արտաքին ապակյա երեսապատմամբ։ Համակարգը նախատեսվում է իրականացնել թեթև գլանված ալյումինե կոմպոզիտային բարդ տարածական պրոֆիլներից։ - Ո՞րքան տարածք է զբաղեցնելու ապագա կառույցը։ - Կառույցի ընդհանուր մակերեսը կազմում է 4975 քմ։ - Պարոն Անանյան, իսկ ինչն՞ է հիմք հանդիսացել կառույցի ճարտարապետական ծավալատարածային նման «կերպարի» համար։ - Վերլուծելով քաղաքաշինական միջավայրը, մեր հեղինակային խումբը նպատակահարմար է գտել հնարավորինս հակադրվել գոյություն ունեցող քառանկյուն – պրիզմայաձև, ուղղանկյուն – վերտիկալ և հորիզոնական գերիշխող ծավալներին, կիրառելով առավել սահուն, սֆերիկ, կրկնակի կորության մակերևույթներով ստեղծված ծավալատարածական հորինվածք։ Վերոհիշյալ ծավալի ստեղծման համար ժամանակակից պարամետրիկ մոդելավորման սկզբունքների կիրառումը թույլ տվեց ստեղծել արդիական և արտահայտիչ մեկ խոշոր «վրձնահարվածով» կազմակերպված թե՛ ներքին, թե՛ արտաքին միջավայր՝ ոճային հայ ավանդական Վիշապի կերպարով, որն իշխում է հյուսիսային ճառագայթի վերջնամասում։ - Ինչպիսի՞ հատակագծային լուծումներ են կիրառված նախագծում։ - Կառույցն ունի բաց հատակագիծ։ Երկրորդ լույսերի առկայությամբ նպատակ է դրվում ստորին, նկուղային և կիսանկուղային հարկերն ապահովել բնական լուսավորությամբ։ Համալիրն ունի մեկ գլխավոր մուտք Կոմիտասի պողոտայի կողմից +4.65 նիշից և ևս երկու լրացուցիչ մուտքեր այգու վերին մասի 0.00 նիշից։ Ինչպես նաև նախատեսված է առանձին մուտք աշխատակիցների համար և ավտոկայանատեղի։ - Իսկ ինչ՞ նիշի վրա է գտնվում ստորգետնյա հատվածը։ - Կառույցի նկուղային հատվածը գտնվում է -8.20 նիշի վրա։ - Ո՞ր փուլում է այժմ գտնվում նախագիծը։ - Այժմ նախագիծը գտնվում է «Աշխատանքային փաստաթղթեր» փուլում։ - Հայտնի՞ է արդյոք, թե որ շինարարական ընկերությունն է իրականացնելու շինարարությունը։ - Իրականացնելու է ոչ թե մեկ, այլ մի քանի ընկերություն. երկաթբետոնե սյուն հեծանային համակարգը կիրականացնի հայկական ընկերությունը, իսկ պարամետրիկ ծածկի համար կհրավիրվեն համապատասխան փորձ ունեցող արտերկրյա գործընկերներ։ Կազմակերպությունները ընտրվելու են բաց մասնավոր մրցույթ -տենդերի արդյունքում։ - Որքա՞ն գումար է նախատեսված ծրագրի իրականացման համար և ե՞րբ է նախատեսվում սկսել և ավարտել շինարարությունը։ - Շինարարկան աշխատանքները նախատեսում ենք սկսել 2021թ-ի գարնանը, ավարտը 2022թ-ի աշնանը։ Նախնական բյուջեն կազմում է 10 մլն ԱՄՆ դոլար։ Սա ամբողջ ծրագրի բյուջեն է, ներառյալ այգու վերակառուցումը, շատրվանները, ստորգետնյա ավտոկայանատեղին և 2-րդ մասնաշենքը։ Տվյալ պահին ներկայացված է միայն առաջին մասնաշենքը, բայց շուտով հանրությանը կներկայացնենք նաև գերժամանակակից այգին՝ համալրված բաց ամֆիթատրոնով, շատրվաններով և այլն։ Իմանալ ավելին

Գնային ԻՋԵՑՈՒՄ "Գեպոտանիք" ՍՊԸ խանութ-սրահում : Շուկայական ամենամատչելի գինը մետաղական ծալքաթիթեղների համար: Մենք առաջարկում ենք լավագույն համադրությունը ՝ մատչելի գին, որակյալ արտադրանք և գունային մեծ տեսականի: Սեղմ ժամկետներում մեր մասնագետները կկատարեն նույնիսկ ամենաքմահաճ հաճախորդի պահանջները: Պատվերների և/կամ այլ ինֆորմացիայի համար այցելեք մեր արտադրամաս՝ Խաղաղ Դոնի 1/7, կամ զանգահարեք ՝ հեռ. 012 407 103, 093 407 103, 099 407 103:

Կառուցել- քանդել, քանդել –կառուցել և նորից քանդել, կամ էլ ինչպես կասեին ԿՎՆ-ի ԵրՄԻ –ի տղանները «Что мы делаем? Правильно, балуемся»։ Այս տարբերակով են սկսել առաջնորդվել ճարտարապետությունում: Ոչ՛ սա կատակ չէ այլ փաստ: Տասնվեց տարի անց պարզվեց, որ Երիտասարդական պալատը զուր են քանդել։ Այլ կերպ ասած ժողովուրդը ավելի ճիշտ էր, երբ բողոքում էր ճարտարապետական այդ արժեքի քանդման դեմ քան մասնագետները։ Եվ այսպես վերջերս զարգացման և ներդրումային ծրագրերի ֆեյսբուքյան էջում հրապարակել էին Երիտասարդական պալատի՝ «Կուկուռուզնիկ»-ի վերակառուցման ծրագիրը, որը հանդիսանում էր Երևանի քաղաքապետ Հայկ Մարությանի նախընտրական խոստումը։ Շենքի վերակառուցման եռաչափ մոդելը վերջերս ներկայացրել է «A3 Architects» ճարտարապետական արհեստանոցը։ Ըստ ներկայացվածի՝ կառույցն արտաքին տեսքով ամբողջությամբ նախկինի կրկնօրինակն է։ Հիշեցնենք, որ Երևան քաղաքի խորհրդանիշ համարվող Երիտասարդական պալատը վաճառվեց 2004թ.-ին, այնուհետև 2 տարի անց քանդվեց հյուրանոց կառուցելու նպատակով, չնայաց այն հանգամանքին, որ իրականացվեցին մի շարք մրցույթներ, ծրագիրն այդպես էլ կյանքի չկոչվեց և տարածքը մինչ օրս ծառայում է որպես ավտոկայանատեղի։ Շենքի համահեղինակ Հրաչ Պողոսյանը իր հարցազրույցներից մեկում ասել է. «Հյուրանոցի սենյակները շատ մեծ չէին, փոքր լոգասենյակներ ունեին։ Հետագայում Երիտասարդական պալատի գնորդը, որպես շենքի քանդման հիմնական պատճառաբանություն բերում էր այն, թե հյուրանոցի սենյակները շատ փոքր են, առաստաղը ցածր, մինչդեռ ինքն ուզում է բարձրակագ հյուրանոց կառուցել։ 2004թ.-ին երբ երիտասարդական պալատը վաճառվեց, սեփականատիրոջ հետ աշխատանքի ընթացքում ես բազմաթիվ տարբերակներ առաջարկեցի, որոնք թույլ կտային պահպանել շենքը, վերականգնել այն, այլ ոչ թե հիմնովին քանդել։ Մասնավորապես առաջարկեցի շենքի ստորին հատվածում կառուցել բարձրակարգ հյուրանոցային համարներ, իսկ շենքի այլ հատվածներում պահպանել էժան սենյակները»։ Եվ այսպես վաստակաշատ ճարտարապետի և կառույցի համահեղինակի այս հետաքրքիր առաջարկը ցավոք անտեսվել է։ Այսօր, երբ նպատակ կա երիտասարդական պալատը վեր բարձրացնել քաղաքի սրտում, ճիշտ կլինի, որ այս ծրագրի իրականացման ընթացքում, նախագծման և շինարարական աշխատանքներում, ներգրավվի կառույցի համահեղինակ ճարտարապետ Հրաչ Պողոսյանը։ Նշենք, որ այս շենքը միակը չէ որ արժանացել է նման ճակատագրի։ Հիշեցնենք, որ այդ նույն քաղաքականությամբ 2015թ.-ին քանդեցին Աֆրիկյանների տունը և բազում այլ շենքեր, որոնց կրկնօրինակները այժմ կառուցվում են «Հին Երևան» նախագծի շրջանակում։ Սակայն ցավալին այն է, որ նման մոտեցումը շարունակական է։ Միակ հուսադրող հանգամանքը միգուցե նա է, որ նոր կառույցները կհամապասխանեն սեյսմիկ անվտանգության նոր չափանիշներին: Եվ այսպիսով նորը կառուցելու այս քաղաքականությունը որքանո՞վ է արդարացված։ Մի կողմից քաղաքը զրկում են իր պատմական դեմքից, մյուս կողմից՝ մեծ հոգեբանական հարված հասցնում բազմավաստակ ճարտարապետներին։ Եվ նման օրինակները բազմաթիվ են։ Մեր կարծիքով, ժամանակն է հասկանալ, որ վերակառուցված ոչ մի հուշարձան իր նախկին համբավը չի կարող ունենալ։ Հիշեցնենք, որ Երիտասարդական պալատի շինարարությունը մեկնարկել է 1967թ-ին։ Այս ճարտարապետական հուշարձանի ճարտարապետներն են՝ Արթուր Թարխանյանը, Սպարտակ Խաչիկյանը, Մարտին Զաքարյանը և Հրաչյա Պողոսյանը։ 1979 թվականին տեղի է ունեցել Երիտասարդական պալատի պաշտոնական բացումը։ Հիշեցնենք նաև, որ արվեստի հետաքրքիր գործերը զարդարում էին շենքի ինտերիերը: Բարում տեղադրված էր քանդակագործ Մկրտիչ Մազմանյանի «Ադամ և Եվա» ոսկեզօծ քանդակը, սպասասրահում՝ Թոմ Գևորգյանի «Գարուն» քանդակը: Պալատը զարդարում էին Արﬕնե Կալենցի՝ Հայաստանը պատկերող որմնանկարները, Նելի Ասատրյանի գոբելեն աշխատանքը, Մարտին Զաքարյանի վիտրաժները, Զորիկ Ստեփանյանի պատրաստած Հայաստանի փայտե քարտեզը։

Օղակաձև զբոսայգում՝ Գրիգոր Լուսավորիչ եկեղեցու հարևանությամբ կկառուցվի սքեյթ - պարկ։ Այլ կերպ ասած, տարածքը նոր շունչ կստանա։ Այս ծրագրի իրականացման նպատակով վերջերս քաղաքապետ Հայկ Մարությանը պայմանագիր է կնքել նվիրատուի՝ Ուկրաինայի հայերի միության նախագահ Վիլեն Շատվորյանի հետ։ «Երբ մեր երկրից մեզ ձայն են տալիս, մենք փորձում ենք անպատճառ մի բանով օգտակար լինել։ Մեր Հայաստանի հետ կապը մեզ ուժ և եռանդ է տալիս, այդ պատճառով փորձում ենք միշտ պահել և պահպանել այդ կապը, և այստեղ ձևը կարևոր չէ»,- իր խոսքում նշել է Ուկրաինայի հայերի միության նախագահ Վիլեն Շատվորյանը։ Ըստ ծրագրի օղակաձև զբոսայգու 6-րդ հատվածում 5044 քմ հանրային տարածքում մոտակա ամիսներին կսկսվի սքեյթ-պարկի շինարարությունը։ Ըստ քաղաքապետարանի տրամադրած տեղեկության, աշխատանքները կիրականացվեն երկու փուլով։ Առաջին փուլում մինչև հունիսի 30-ը ըստ նախագծի խաղահրապարակի հարավային հատվածի ռելյեֆային լանջը կվերածվի ամֆիթատրոնի, որն ուղղված կլինի դեպի խաղահրապարակ։ Տարածքում ըստ նախագծի նախատեսվում է կառուցել սքեյթի վարձակալման կետ, բուժկետ, կբարեկարգվեն նաև կառուցապատումից ազատ կանաչ տարածքները։ Տարածքը համալրված կլինի արևային պանելներով աշխատող ոճային հովհարներով։ Բացի այդ, կիրականացվի ընդհանուր պարագծային լուսավորություն լեդ համակարգի օգտագործմամբ։ Ինչ վերաբերվում է ծրագրի երկրորդ փուլին, ապա մինչև օգոստոսի 30-ը կբարեկարգվի տարածքի արևելյան հատվածի առկա կանաչ գոտին՝ յուրօրինակ լանդշաֆտային և բուսական դիզայնով և դիտահարթակներով։ Այգում լուծված է լինելու նաև հասարակական սահնագույցի խնդիրը, որի կառուցման համար առանձին նախագիծ է արվելու։ Սքեյթ-պարկը մեր համաքաղաքացիներին կհյուրընկալի այս տարի, քանի որ նախատեսված է նախագիծը ամբողջությամբ ավարտել 2020-ի օգոստոսին։ «Եկանք մի հիանալի որոշման, որ դա պետք է լինի նախագիծ, որն առաջին հերթին կուրախացնի մեր երիտասարդներին։ Այսպիսով ծնվեց այդ միտքը, որ մեր մայրաքաղաքում պետք է կառուցվի շատ վաղուց սպասված և այդքան պահանջված սքեյթ- պարկ։ Սա ոչ միայն սպորտաձև է, այլ նաև մշակույթ։ Սա ժամանցի վայր է, որտեղ երիտասարդությունը միասին և′ սպորտով կզբաղվի և′ ժամանակ անց կկացնի՝ շփում կլինի։ Ինչը կարևոր է քաղաքի համար։ Եվ սա սկիզբն է այս մշակույթի և այս տիպի օջախների»- իր խոսքում նշել է Երևանի քաղաքապետը։

Նոր կորոնավինուսային վարակով պայմանավորված կարճատև դադարից հետո վերսկսվել են Հայաստանի Հանրապետությունը Վրաստանի հետ կապող Մ6 միջպետական ճանապարհի երկրորդ հատվածի՝ Թումանյան-Բագրատաշեն մաքսային անցակետի՝ (51,74կմ) շինարարական աշխատանքները: Թե ի՛նչ ընթացքում են դրանք, ծանոթանանք ստորև: Ոչ միայն հարմար, այլև արդեն անվտանգ ճանապարհ Մ6, Վանաձոր-Ալավերդի-Վրաստանի սահման միջպետական ճանապարհն սկսվում է Վանաձոր քաղաքից, անցնում է ՀՀ Լոռու և Տավուշի մարզերի 33 համայնքներով ու հասնում Բագրատաշենի սահմանակետ: Այս 90 կմ ընդհանուր երկարությամբ միջպետական ճանապարհի վերակառուցման աշխատանքների առաջին փուլը ավարտվել է 2018թ․ դեկտեմբերի 24-ին։ Այն ընդգրկել է Վանաձոր-Թումանյան (38,45կմ) հատվածը: Այժմ հիմնանորոգվում է Թումանյան-Բագրատաշենի մաքսային անցակետ հատվածը՝ Ասիական զարգացման բանկի (44.04 մլն եվրո) և ՀՀ կառավարության (10․14 մլն եվրո) համաֆինանսավորմամբ: Կապալառու կազմակերպություններն են «Հորիզոն-95», «ԱԱԲ Պրոեկտ» և «Սուարդի»: Տեխնիկական հսկողությունն իրականացնում է «Սաֆեժ ՍԱՍ և Հիլլ Ինտերնեյշընըլ» համատեղ ձեռնարկությունը: Հողերի օտարման և տարաբնակեցման գործընթացը հիմնականում ավարտվել է: Միայն, ինչպես տեղեկացնում են «Ճանապարհային դեպարտամենտ» ՊՈԱԿ-ից, որոշ հատվածներում կատարված նախագծային փոփոխությունների հետևանքով լրացուցիչ օտարումներ իրականացնելու անհրաժեշտություն է առաջացել։ Մ6 ճանապարհը հիմնանորոգվում է ասֆալտբետոնե ծածկով։ Հիմնանորոգումը նոր կորոնավիրուսային վարակով պայմանավորված կարճատև դադարից հետո ամբողջ ծավալով ընթացքի մեջ է։ Իրականացվում են կոյուղագծերի և ջրագծերի տեղադրում‚ մայթերի և ջրահեռացման վաքերի կառուցման‚ հողային‚ ասֆալտապատման նախապատրաստական‚ հենապատի կառուցման‚ ժայռապայթեցման, ճանապարհի լայնացման, և բազմաթիվ այլ աշխատանքներ։ Որոշ հատվածներում կատարվում է ասֆալտապատում: Միջպետական նշանակության ու 3 տասնյակից ավելի համայնքների սպասարկող ճանապարհը մինչ այս գտնվում էր չափազանց անբարեկարգ վիճակում, ինչը մեծ անհարմարություններ էր ստեղծում վարորդների և ուղևորների համար: Դրանից հատկապես բողոքում էին Հայաստանից Վրաստան ուղևորվող օտարերկրացի զբոսաշրջիկները: Իսկ գարնանը՝ ձնհալից ու անձրևներից հետո, անհարմարությանն ավելանում էր նաև քարաթափումների, փլուզումների վտանգը: «Ճանապարհային դեպարտամենտ» ՊՈԱԿ-ի տեղեկացմամբ հիմնանորոգման աշխատանքներում հաշվի է առնվել նաև այդ վտանգը: Քարաթափումները կանխելու նպատակով ճանապարհի հիմնանորոգման ընթացքում կիրառվում են տարբեր մեթոդներ՝ մասնավորապես‚ հողային պաստառի շեպերի վրա ամրացվում են պաշտպանիչ հատուկ ցանցեր‚ կատարվում է ժայռային հանույթ‚ քարաթափումներից ու սողանքներից խուսափելու համար կառուցվում են հենապատեր և այլն։ «Սանահին» կայարան-Հաղպատ հատվածում առկա է մեծածավալ՝ շուրջ 70 մ բարձրությամբ‚ ժայռային զանգվածի հորատապայթեցման խնդիր։ Քննարկվում է այդ տեղամասում գալերեա կառուցելու տարբերակը, որը թույլ կտա իրականացնել փոքրածավալ ժայռային հանույթ և ճանապարհը պաշտպանել քարաթափումներից։ Մ6 միջպետական ճանապարհի Հաղպատ-Բագրատաշենի սահմանային անցակետ տարածքի հիմնանորոգումն իրականացնող կապալառուի՝ իտալական «Սուարդի» կազմակերպության առաջարկով Քարկոփ-Վրաստանի հետ սահմանային անցակետ հատվածում կիրառվում է ապակեթելքավոր ցանցը‚ որը նվազագույնի կհասցնի ճանապարհի պատվածքին առկա ճաքերի՝ դեպի վերին շերտեր տարածման հավանականությունը: Ծրագրի շրջանակում Թումանյան-Բագրատաշեն մաքսային անցակետ հատվածում կհիմնանորոգվի 8 կամուրջ Մ6‚ Վանաձոր-Ալավերդի-Վրաստանի սահման միջպետական ավտոճանապարհի վերականգնման և բարելավման ծրագրի շրջանակներում Թումանյան-Բագրատաշեն մաքսային անցակետ հատվածում վերանորոգվելու և հիմնանորոգվելու է ընդհանուր առմամբ 8 կամուրջ, այդ թվում՝ Ալավերդի քաղաքի երկու կամուրջները: Ալավերդի քաղաքի երկու կամուրջների հիմնանորոգումը դեռ չի մեկնարկել‚ մյուս կամուրջների վերանորոգման աշխատանքներն ընթացքի մեջ են։ Ալավերդու 2 կամուրջները ծառայում են ինչպես քաղաքի, այնպես էլ միջպետական ճանապարհի երթևեկությանը: Կամուրջներից մեկը կառուցվել է 1961թ.-ին, մյուսը՝ 1989 թ.-ին: 2-րդ կամրջի կառուցման անհրաժեշտությունն Ալավերդիում առաջացել է հին կամրջի վթարային վիճակի պատճառով, երբ Ալավերդու ավտոձեռնարկության ավտոբուսների և բեռնատարների վարորդները 1989թ. հունիսին գործադուլ էին արել և իշխանությունից պահանջել ապահովել իրենց երթևեկության անվտանգությունը: Արդյունքում որոշվել է կառուցել երկրորդ կամուրջը։ Չնայած վտանգավորությանը՝ հին կամրջի շահագործումն այս տարիների ընթացքում շարունակվել է: Այս տարի վերջապես Ալավերդու կամուրջները կհիմնանորոգվեն, ու վարորդներն այն առաջվա պես ահուդողով չեն անցնի: Մ6 միջպետական ավտոճանապարհի հիմնանորոգման ավարտը նախատեսվում է 2020թ․ նոյեմբերին։ Ի դեպ, «Ճանապարհային դեպարտամենտ» ՊՈԱԿ-ից տեղեկացրին, որ նոր տեսակի կորոնավիրուսային հիվանդության հետևանքով սահմանված արտակարգ դրությամբ պարտադրված դադարը զգալի ազդեցություն չի ունեցել ճանապարհի հիմնանորոգման տեմպերի վրա: Իսկ շինարարության ընթացքում կապալառուների կողմից պահպանվում են նոր տեսակի կորոնավիրուսային հիվանդության տարածումը կանխելու համար սահմանված միջոցառումները՝ աշխատակիցների ջերմաչափում‚ օգտագործվող սարքավորումների ու մեխանիզմների ախտահանում համապատասխան նյութերով և այլն։