Անցած տարվա սկզբին «ՋիԴիԷս Արքիթեքթս» (GDS Architects) ճարտարապետական ընկերության պաշտոնական կայքը հայտարարել էր, որ պատրաստվում է նախագծել աշխարհի առաջին անտեսանելի աշտարակը: Ի դեպ, «ՋիԴիԷս Արքիթեքթս» ընկերության այս նախագիծը լավագույն աշտարակի մրցույթում հաղթել էր դեռևս 2008 թ-ին, և միայն 5 տարի անց ընկերությունը հնարավորություն է ստանում այն կյանքի կոչել: Այսօր արդեն նրանք ունեն շինարարությունը սկսելու Հարավային Կորեայի մայրաքաղաք Սեուլի իշխանությունների թույլատվությունը: 450 մետր բարձրությամբ «Անվերջության աշտարակը» (Infinity Tower) լինելու է անտեսանելի: Ինչպես պնդում են նախագծի հեղինակները, օպտիկական պատրանքների և լուսավորության շնորհիվ, այս աշտարակը հայտնվելու և անհայտանալու է երկնքում: Նոր յուրօրինակ աշտարակը կառուցվելու է Ինչհոն միջազգային օդանավակայանի (Incheon International Airport) հարևանությամբ Յոնսան միջազգային գործարար շրջանի (Yongsan International Business District) սրտում: Կառուցապատող ընկերության համոզմամբ՝ «Անվերջության աշտարակը» դառնալու է շրջանի խորհրդանիշը և գլխավոր տեսարժան վայրը հյուրերի ու զբոսաշրջիկների համար: Հիմնականում դիտահարթակ աշտարակն ունենալու է ժամանցային բնույթ՝ այստեղ տեղակայվելու են դիտահարթակներ, հարսանյաց սրահներ, թատրոններ, ռեստորաններ, ջրային կենտրոններ, բնապատկերներով զարդարված այգիներ և այլն:

Կանադական Վանկուվեր քաղաքում հաստատվել է նոր երկնաքերի կառուցման նախագիծ, որը պետք է դառնա Կանադայի «ամենականաչ» երկնաքերերից մեկը: «Իքսչեյնջ» (Exchange) անվանումը կրող երկնաքերը նախագծել է ճարտարապետ Հարրի Գուգերը (Harry Gugger), ով ավելի վաղ աշխատել է Herzog & de Meuron ճարտարապետական ընկերությունում և մասնակցել է այնպիսի հանրահայտ կառույցների նախագծման, ինչպիսին են «Թռչունի Բույն» (Bird's Nest) մարզադաշտը Պեկինում և «Թեյթ Մոդերն» (Tate Modern) ժամանակակից արվեստների պատկերասրահը Լոնդոնում: Ի դեպ, այս յուրօրինակ 31-հարկանի երկնաքերը կառուցվելու է դեռևս 1929 թ-ին կառուցված 11 հարկանի շենքի տանիքին: Ամբողջ նախագիծը հավակնում է «կանաչ» շինությունների գնահատման ամենաբարձր պարգևին՝ LEED Պլատինե հավաստագրմանը: Նորակառույց երկնաքերի մի մասը կառուցվելու է արդեն գոյություն ունեցող շենքի տանիքին, իսկ մյուսը՝ անմիջապես վերջինիս հարևանությամբ: Հին շենքը նախատեսվում է ամբողջությամբ վերանորոգել և հագեցնել էներգախնայող տեխնոլոգիաներով: Շենքի ճակատներին նախատեսվում է տեղադրել կարգավորվող շերտավարագույրներ, որոնք պետք է պաշտպանեն արևի ուղիղ ճառագայթների ներթափանցումից՝ միևնույն ժամանակ նվազեցնելով օդորակիչների օգտագործման անհրաժեշտությունը: Երկնաքերում կտեղադրվեն նաև բարձր էֆեկտիվություն ունեցող ջեռուցման և հովացման համակարգեր: Տանիքին տեղադրված արևային վահանակները կապահովեն շենքը տաք ջրով, իսկ նորագույն ջրամատակարարման համակարգը կհավաքի օգտագործած ջուրը և կզտի այն կրկնակի օգտագործման նպատակով: Ընդհանուր առմամբ այս «կանաչ» տեխնոլոգիաները կնվազեցնեն էներգիայի օգտագործումը մոտ 50 տոկոսով: Ըստ նախնական տվյալների՝ 200 մլն ԱՄՆ դոլար բյուջեյով այս երկնաքերի շինարարությունը նախատեսվում է սկսել այս տարվա Հոկտեմբերին և ավարտել 2017 թ-ին:

Օգոստոսի 3-ին Չինաստանում ավարտվել է երկրի ամենաբարձր «Շանհայյան Աշտարակի» (Shanghai Tower) կանգնեցման աշխատանքները: Այսօր «Գենսլեր» (Gensler) ճարտարապետական բյուրոյի նախագծած 632 մետր բարձրությամբ աշտարակը դարձել է աշխարհում բարձրությամբ երկրորդ աշտարակը՝ զիջելով միայն «Բուրջ Խալիֆային», որի բարձրությունը կազմում է 828 մետր: Շինության խելացի մշակված դիմային հատվածը հնարավորություն է տալիս ուժեղ թայֆունների ժամանակ 24 տոկոսով նվազեցնել քամու ուժի ազդեցությունը շինության վրա, իսկ շինության վերին հարկերի երկնային այգիները նմանվում են երկրին բնորոշ բաց բակերի: «Գենսլեր» ճարտարապետական բյուրոյի ճարտարագետները և նախագծող խումբը սպիտված են եղել մի քանի յուրօրինակ շինարարական բաղադրիչներ մշակել Շանհայի Պուդոն (Pudong) գործարար թաղամասում կառուցված 121 հարկանի երկնաքերի համար: Բանն այն է, որ շինհրապարակի կավե հողն ի վիճակի չէր լինի դիմանալ նման մեծածավալ շինության ճնշմանը, ուստի շինարարները ստիպված են եղել լցոնել 831 երկաթ-բետոնե մոնոլիտ հիմնասյուներից (ցցերից) բաղկացած համակարգը: Բացի այդ Չինաստանը համարվում է ուժեղագույն թայֆունների հայրենիք, որոնք կարող են ապակայունացնել նման բարձրության աշտարակը: Ուստի երկնաքերի նախագծման ընթացքում կարևորագույն պայման էր շինության վրա քամու ազդեցության նվազեցումը: Այդ իսկ պատճառով կառույցի դիմային հատվածի համար նախագծողները ընտրեցին ալիքավոր ձևավորում, որը թույլ տվեց 24 տոկոսով նվազեցնել քամու ազդեցությունը: Ի դեպ նման մոտեցումը հնարավորություն տվեց 58 մլն ԱՄՆ դոլարով կրճատել շինարարական ծախսերը: Նշենք, որ երկնաքերը բաժանված է 9 հորիզոնական գոտիների, ինչը հնարավորություն է տալիս ջեռուցման, հովացման և ջրամատակարարման համակարգերը ավելի ճիշտ բաշխել, քան ավանդական երկնաքերերում: Երկնաքերում տեղակայված կլինեն դիտահարթակներ, մշակութային, առևտրային և գրասենյակային տարածքներ: «Շանհայյան Աշտարակի» բացման հանդիսավոր արարողությունը նախատեսված է 2014 թվականին:

Հուլիսի 20-ին Չինաստանի Չանշա (Changsha) նահանգում սկսվել է աշխարհի ամենաբարձր երկնաքերի շինարարությունը: «Բրոուդ Սըսթեյնեբլ Բիլդինգ» (Broad Sustainable Building) ընկերությունը նախատեսում է 7 ամսում կառուցել 838 մետր բարձրությամբ երկնաքեր՝ օգտագործելով «հավաքովի» կառուցվածքներ: «Բրոուդ Սըսթեյնեբլ Բիլդինգ» ընկերության հիմնադիր Զեն Յուն (Zhang Yue) հայտարարել է, որ 846 մլն ԱՄՆ դոլար արժողությամբ երկնաքերը, որի հատակների մակերեսը կկազմի 1 քառակուսի կիլոմետր, պատրաստ կլինի 2014 թ-ի ապրիլին: Ներկայիս աշխարհի ամենաբարձր «Բուրջ Խալիֆա» աշտարակից 10 մետր բարձր «Երկնային քաղաք» (Sky City) աշտարակում կտեղակայվի հյուրանոց՝ ընդունակ հյուրընկալելու 1000 հյուրի, 31.4 հազար բնակիչների համար բնկարաններ, հիվանդանոց, դպրոցներ, խանութներ, ռեստորաններ, գրասենյակներ՝ ջանալով ստեղծել մեկ ընդհանուր քաղաք մեկ շենքում: Ընկերության ղեկավարության տվյալներով շինության 90 տոկոսը բաղկագած կլինի «հավաքովի» կառուցվածքներից: 20 հազար աշխատողներ 4 ամսվա ընթացքում գործարաններում կպատրաստեն շենքի հավաքովի կառուցվածքները, իսկ 30 հազար աշխատող էլ 3 ամսվա ընթացքում շինհրապարակում կմոնտաժեն արդեն պատրաստի կոնստրուկցիաները: Այս զարմանալի նախագծի մասին առաջին անգամ հանրությանը հայտնել է The Morning Whistle պարբերականը 2012 թ-ին: Այն ժամանակ ոչ ոք չէր հավատում տարածված տեղեկատվությանը: Նախագիծն անհավանական էր թվում, քանի որ ներկայիս ամենաբարձր շինաթյունը՝ «Բուրջ Խալիֆան» կառուցելու համար անհրաժեշտ է եղել 6 տարի: Ցնցող նորությունից ընդամենը 2 ամիս անց հարցազրույցը «Բրոուդ Սըսթեյնըբլ Բիլդինգ» ընկերության տնօրենի հետ ավելի բարձրացրեց այս խելահեղ նախագծի իրականություն դառնալու հավանականությունը: Հարցազրույցի ժամանակ Զեն Յուն հայտարարեց, որ 220 հարկանի աշխարհի ամենաբարձր շինությունը, որն ինքն անվանել է «Երկնային քաղաք» անկասկած կառուցվելու է: Ավելին՝ նա հանրությանը ներկայացրեց ևս մի ամբիցիոզ նախագիծ, որի մանրամասները դեռևս հայտնի չեն: Զեն Յուն ցուցադրեց իր նոր նախագծի գծագրերը և հայտարարեց, որ ինքը 100 տոկոսով կառուցելու է 2 կիլոմետր բարձրությամբ նոր շինությունը՝ շինարարության ոլորտում սահմանելով աննախադեպ ռեկորդ: Իսկ ահա այս տարվա մայիսին Treehugger պարբերականը ի դեմս Լլոյդ Ալթերի հայտարարեց, որ նոր աշտարակի կառուցապատող «Բրոուդ Սըսթեյնեբլ Բիլդինգ» ընկերությունը նախագծի շինարարությունը կսկսի արդեն այս տարվա հունիսին: Շինարարությունը վերջապես սկսված է: Այսօր այս նախագծի իրականություն դառնալու հավանականությունը բավականին մեծ է, եթե հաշվի առնենք, որ վերոնշյալ ընկերությունն արդեն հաջողությամբ իրականացրել է նմանատիպ, սակայն փոքր ծավալների 2 նախագիծ: Վերջերս վերոնշյալ ընկերությունը, Չինաստանի նույն Հունան (Hunan) նահանգում ընդամենը 15 օրում, 170 քառակուսի մետր հողատարածքի վրա կառուցվել է 30-հարկանի հյուրանոց : Չինական «Բրոուդ Գրուփ» (Broad Group) ընկերության կառուցած շենքում տեղադրված են էներգախնայող տեխնոլոգիաներ, և այն ընդունակ է դիմակայել 9 մագնիտուդ ուժգնությամբ երկրաշարժի (): Նույն ընկերությունը 2010 թ-ին 6 օրում կառուցել է «Տապան Հյուրանոց» (Ark Hotel) 15 հարկանի շենքը: Շինարարության ավարտից հետո «Երկնային քաղաքը» կհամալրի շինարարության ոլորտում Չինաստանի գրանցած ռեկորդների շարքը: Այսօր Չինաստանում է գտնվում աշխարհի խոշորագույն շենքը, աշխարհի ամենաերկար արագընթաց երկաթուղին, աշխարհի ամենաբարձր և ամենաերկար «թունելից-թունել» կամուրջը, շուտով կկառուցվի նաև աշախարհի ամենաերկար ստորջրյա թունելը:

Սաուդյան միլիարդատեր Ալ Վալիդ բին Թալալը հայտարարել է, որ պատրաստվում է կառուցել 1.6 կիլոմետր բարձրությամբ երկնաքեր աշխարհի խոշորագույն քաղաքներից մեկում: Մասնավորապես նա առանձնացրել է ՝ Մոսկվան, Շանհայը, Լոնդոնը կամ Նյու Յորքը՝ քաղաքներ, որ հավակնում են դառնալ այս երկնաքերի հայրենիքը: Բացի այդ նա Դուբայի հայտնի կառուցապատող Emaar Properties ընկերության նախագահ Մուհամեդ Ալաբարին (Mohammed Alabbar) առաջարկել է միանալ իրականացնելու այս նախագիծը: Ալ Վալիդը չի մանրամասնել՝ ինչպես է ֆինանսավորվելու նախագիծը, և երբ է սկսվելու ու ավարտվելու երկնաքերի շինարարությունը, բայց նա հայտնել է, որ հետաքրքրված երկրները պետք է առաջարկեն շահագրգռող պայմաններ, հարկային արտոնություններ և պետական աջակցություն: Համաձայն փորձագետների՝ աշխարհի ամենաբարձր երկնաքերի նախագծողները հանդիպելու են մի շարք դժվար լուծելի խնդիրների, մասնավորապես՝ բարձր հարկեր խմելու ջրի մատակարարմանը: Եթե ենթադրվող երկնաքերը կառուցվի, ապա այն իր հետևում կթողնի աշխարհի ներկայիս ամենաբարձր շինությունը՝ 828 մետր բարձրությամբ «Բուրջ Խալիֆան», ինչպես նաև Ջիդդայում կառուցվող 1 կիլոմետր բարձրությամբ «Արքայական աշտարակին»: «Արքայական աշտարակի» հողային աշխատանքները սկսվել են ընթացիկ տարում, իսկ շինարարությունը նախատեսվում է ավարտել 2017 թ-ին: 1.2 մլն ԱՄՆ դոլար բյուջեով նախագիծը կներառի հյուրանոցներ, առևտրային և բնակելի տարածքներ: