Հոկտեմբերի 28-30-ը Աջարիայի Ինքնավար Հանրապետության մայրաքաղաք Բաթումում տեղի կունենա «Մեր տունը» հոբելյանական 10-րդ ամենամյա շինարարական ցուցահանդեսը «Batumi Building & Design International Fair» միջազգային միջոցառման շրջանակներում: «Էքսպոմեդիա» ցուցահանդեսների նախագծման կենտրոնը տեղեկացնում է, որ միջոցառման մասնակիցներն են` Վրաստանը, Թուրքիան և Իրանը: Առաջին անգամ «Buiding & Design International Fair»- ին կմասնակցի Հայաստանը` ձեռք բերելով հնարավորություն ներկայացնելու իր առաջատար ընկերությունների արտադրանքը արտերկրում: Ցուցահանդեսի նպատակն է համախմբել հայկական և արտասահմանյան կազմակերպություններին, որոնք զբաղված են շինարարության, վերանորոգման, նախագծման և դիզայնի ոլորտներում բարձրակարգ արտադրանք և ծառայություններ մատուցելով, ստեղծել արտադրող-սպառող նոր փոխշահավետ կապեր և նպաստել նոր գործարար կապերի հաստատմանը, շուկայի ընդլայնմանը, ոլորտում արդի և նորագույն տեխնոլոգիաների, լուծումների, առաջարկների ներկայացմանը: Ցուցահանդեսի թեմատիկ բաժիններն են` շինարարական, նախագծման, վերանորոգման աշխատանքներ, կահույք, դռներ և պատուհաններ, ներքին և արտաքին հարդարման արտադրանք, տեխնոլոգիաներ, տարածքների կանաչապատում, ձևավորում և մաքրում, տան, բնակարանի ներքին և արտաքին ձևավորում ու մաքրում և այլն։

Ամենաթանկ երկնաքերի` «Յոնգսան Աշտարակի» (Yongsan Landmark Tower) շինարարությունը: 500 մետր բարձրությամբ, 100 հարկանի աշտարակի շինարարությունը նախատեսվում է ավարտել 2016 թ-ի վերջին: Սեուլի Յոնգսան (Yongsan) գործարար թաղամասում կառուցվող աշտարակը չի գերազանցի Դուբայի «Բուրջ Խալիֆի» (Burj Khalifa) երկնաքերի (828 մետր բարձրություն, 162 Ինչպես տեղեկացնում է English.chosen.com կայքը, այս շաբաթ Սեուլում սկսվել է աշխարհի հարկ) և Ջամսիլի «Լոտտե Սուպեր Աշտարակի» (Lotte Super Tower) (555 մետր, 123 հարկ) բարձրությունը, սակայն այն կլինի աշխարհի ամենաթանկ երկնաքերը մեկ քառակուսի մետր տարածքի արժեքով: Ըստ նախնական տվյալների՝ աշտարակի մեկ քառակուսի մետր մակերեսի շինարարությունը կարժենա մոտ 3150 ԱՄՆ դոլար, շենքի արժեքը՝ 1,2 մլրդ. ԱՄՆ դոլար, իսկ ամբողջ նախագծի բյուջեն ՝ ներառյալ հողի գինը կարող է հասնել 3,4 մլրդ. ԱՄՆ դոլարի: Պետք է նշել, որ սա ավելի թանկ է, քան ներկայիս աշխարհի ամենաբարձր աշտարակի շինարարությունը, որտեղ մեկ քառակուսի մետրի շինարարությունն արժեցել է մոտ 3000 ԱՄՆ դոլար և 40 տոկոսով ավելի թանկ, քան արժեցել է «Սամսունգ Գրուփ» ընկերության գլխավոր գրասենյակի շենքի մեկ քառակուսի մետրի շինարարությունը: «Յոնգսան Աշտարակը» նախագծել է հանրահայտ ճարտարապետ Ռենցո Պիանոի (Renzo Piano) գրասենյակը, որը նաև Փարիզի «Պոմպիդու» կենտրոնի (Pompidou Center) և Լոնդոնի «Թաուեր» կամրջի (Bridge Tower) հեղինակն է: Որպես նախագծի գլխավոր կապալառու հանդես է գալիս «Սամսունգ Գրուփ» (Samsung Group) ընկերությունը, որը նաև կառուցել է «Բուրջ Խալիֆի» և «Թայբեյ 101» աշտարակները: Համաձայն նախնական տվյալների՝ երկնաքերում կտեղադրվեն աշխարհի ամենաարագ վերելակները, որոնք կշարժվեն 800 մետր րոպեում արագությամբ, ինչը 6 անգամ ավելի արագ է, քան Կորեայի մյուս բարձրահարկերում աշխատող վերելակների արագությունը (120մ/ր): Շինարարության համար կօգտագործվի հատուկ հավելանյութերով պատրաստված գերխիտ բարձրորակ բետոն, որի ամրությունը մի քանի անգամ գերազանցում է սովորական բետոնների ամրությունը:

Հայտնի ճարտարապետ Ռաֆայել Իսրայելյանի տունը Երևանում այլևս գոյություն չունի: Բառացիորեն մեկ օրում տունը, որտեղ բնակվել է «Սարդարապատի ճակատամարտ» հուշահամալիրի, «Հաղթանակի» հուշարձանի հեղինակը, հողին է հավասարեցվել, տեղեկացնում է Panarmenian.net կայքը: Իսրայելյանի տունը գտնվում է Սարյանի փողոցում և կառուցվել է հենց իր իսկ նախագծով 1954թ-ին: Նույնիսկ որոշ զարդաքանդակներ արված են նրա ձեռքով: Հոկտեմբերի 8-ին տան պատերը դեռևս կանգուն էին, սակայն հոկտեմբերի 10-ին Սարյան փողոցում` նույն տեղում, որտեղ դեռևս մի քանի օր առաջ կանգուն էին տան պատերը, միայն շինարարական աղբի սարեր են խոյանում: ճարտարապետ Արսեն Կարապետյանը Panarmenian.net-ի թղթակցի հետ զրույցում հայտարարել էր. «Կարելի է մատների վրա հաշվել այն շենքերը, որոնք պահպանում են մեր քաղաքի հիշողությունը»: Ըստ նրա՝ Իսրայելյանն այն մարդն էր, որն արժանի է, որ նրա տունը պահպանվի: «Նրա ավանդը հայկական ճարտարապետության մեջ այնքան մեծ է, որ հերթական հյուրանոցը կառուցելու փոխարեն ավելի ճիշտ կլիներ այն վերածել տուն-թանգարանի»,- ասել է նա : Ըստ նրա՝ Երևանը վերածվում է հիշողություն չունեցող մի քաղաքի: Սակայն ավելացնենք, որ կաոույցը օրինական ձեռք է բերվել Իսրայելյանի ժառանգներից և գնման նպատակը բոլորին վաղուց հայտնի է եղել: Նախագիծը վաղուց պատրաստ էր և վերջերս քաղաքապետարանը, գտնելով նպատակահարմար, թույլ է տվել շինարարության իրականացումը (լրաց՝ www.construction.am): Ռաֆայել Իսրայելյանի նախագծերով կառուցվել է շուրջ 150 շենք: Նա ստեղծել է հուշակոթողների նոր տեսակ` ոչ մեծ հուշարձան-կոթողներ` ի հիշատակ Հայրենական Մեծ պատերազմի հերոսներին: Նրա հեղինակած ճարտարապետական կոթողներից են հռչակավոր Չարենցի կամարը, Սարդարապատի հուշահամալիրը, Երևանի գինու գործարանի, Նկարիչների միության շենքերը: Իր շինությունների նախագծերի մի մասը ճարտարապետը կազմել է այս տանը: Ճարտարապետի մահից հետո տան երկրորդ հարկում ցուցադրվում էին նրա հեղինակած նախագծերի գծագրերը:

Ինչպես տեղեկացնում է Բրիտանական Ճարտարապետների Թագավորական Ինստիտուտի (Royal Institute of British Architects) պաշտոնական կայքը, երկրորդ տարին անընդմեջ Մեծ Բրիտանիայի ամենահեղինակավոր ճարտարապետական՝ «Ստիրլինգյան» մրցանակին (RIBA Stirling Prize 2011) արժանացել է ճարտարապետ Զահա Հադիդի բյուրոյի կողմից նախագծված «Էվելին Գրեյսի Ակադեմիան» (Evelyn Grace Academy), որը ճանաչվել է լավագույնը և արժանացել 31 հազար ԱՄՆ դոլար մրցանակի: Նշենք, որ 1 տարի առաջ Զահա Հադիդի մեկ այլ ստեղծագործություն՝ 21-րդ դարի ժամանակակից արվեստի Հռոմի MAXXI թանգարանը (MAXXI Museum of 21st Century Art) ևս արժանացել էր այս մրցանակին՝ ճանաչվելով 2010 տարվա լավագույն շինություն: Մրցանակաբաշխության հանդիսավոր արարողությունը տեղի է ունեցել հոկտեմբերի 1-ին Ռոտերեմ (Rotherham) քաղաքի «Մագնա» գիտական կենտրոնում (Magna Science Adventure Centre): Պետք է նշել, որ այս կառույցը Զահա Հադիդի ճարտարապետական բյուրոյի կողմից նախագծված առաջին դպրոցն է: Բյուրոյի նախագծերից Մեծ Բրիտանիայում հայտնի են «Մեգիի Կենտրոնը» (Maggie's Centre) Շոտլանդիայում, «Ռիվերսայդ» թանգարանը (Riverside) Գլազգոյում և «Ջրային մարզաձևերի համալիրը» (Aquatics Centre) Լոնդոնում: 58 մլն ԱՄն դոլար բյուջե ունեցող նախագիծը շահագործման է հանձնվել 2010 թ-ին: 10.745 ընդհանուր մակերեսով ակադեմիայի շենքում միավորված են 4 դպրոց: Ճարտարապետներին հաջողվել է համալիրն այնպես նախագծել, որ 4 դպրոցները միաժամանակ կարողանան հանդես գալ ինչպես մեկ ամբողջություն, այնպես էլ որպես առաձին ինքնուրույն կառույցներ: Նշենք, որ արդեն 16-րդ տարին անընդմեջ տարվա լավագույն ճարտարապետական նախագծի համար հեղինակները ստանում են «Ստիրլինգյան» մրցանակը: Ինչպես արդեն նշեցինք, նախորդ տարի ևս հաղթող էր ճանաչվել Զահա Հադիդը՝ Հռոմի «Մաքսի» թանգարանով: Մինչ օրս նա ևս 3 անգամ ներկայացված է եղել մրցույթում՝ «BMW-ի կենտրոնական շենքը» Լայպցիգում, Գերմանիա, 2005 թ-ին, «Ֆաենո» (Phaeno) գիտական կենտրոնը Վոլֆսբուրգում, Գերմանիա, 2006 թ-ին և «Նորդ Փարք» (Nord Park) երկաթգիծը Ինսբուրգում, Ավստրիա, 2008 թ-ին:

Ինչպես տեղեկացնում է Chinadaily ինտերնետային աղբյուրը, Պեկինում նախատեսվող ամենաբարձր աշտարակի կառուցապատողները հայտարարել են, որ նախագծի հիմարկեքի արարողությունը նախատեսված է սեպտեմբերի 19-ին: Նախագծի պատվիրատուն «ՍիԱյԹիԱյՍի Գրուփ» (CITIC Group - China International Trust and Investment Corporation)), ընկերությունն է, որը դեռ նախորդ տարվա դեկտեմբերի 21-ին քաղաքի կենտրոնական գործարար թաղամասում (Central Business District) ձեռք էր բերել 11.478 քառակուսի մետր տարածքի իրավունք՝ վճարելով 563 մլն ԱՄՆ դոլար: Ընկերությունը նախատեսում է կառուցել 510 մետր բարձրությամբ և 104 հարկանի աշտարակ, սակայն վերջնական նախագիծը դեռ հաստատված չէ և ընկերությունը սպասում է մունիցիպալ կառավարության թույլտվությանը: Նոր կառուցվող երկնաքերը կանվանվի «Չժունգո Զուն» (Zhongguo Zoon), ինչը նշանակում է Չինաստանի գավաթ: Ըստ նախնական տվյալների՝ շինարարությունը կավարտվի 5-7 տարուց, և արդյունքում երկնաքերը կունենա 350 հազար քառակուսի մետր հատակների ընդհանուր մակերես: Աշտարակը կկառուցվի քաղաքի կենտրոնական գործարար թաղամասի հյուսիսային հատվածում, որտեղ գտնվում են մի շարք հայտնի միջազգային կազմակերպությունների գրասենյակներ: Այստեղ է գտնվում նաև Պեկինի ներկայիս ամենաբարձր Չինաստանի համաշխարհային առևտրային կենտրոնի «3-րդ Աշտարակը» (Tower 3): Նշենք, որ երկնաքերի նախագծում գերակշռում են չինական ավանդական մշակույթի տարրերը, իսկ շինարարության ավարտից հետո այն քաղաքի բնակիչներին կհիշեցնի չինական հնագույն քաղաքները և լավագույնս կներկայացնի մայրաքաղաքը: