Ինչպես տեղեկացնում է world construction network.com կայքը, Քաթարը երկրի ափամերձ գոտում նախատեսում է սկսել 500 ԱՄՆ դոլար արժողությամբ «Ամֆիբիա 1000» (Amphibious 1000) կիսասույզ նախագծի շինարարությունը: Հանգստավայրի ճարտարապետական նախագիծը իրականացրել է իտալական Ջանկառլո Զեմա Դիզայն Գրուփ (Giancarlo Zema Design Group) ընկերությունը: 1 կիլոմետր երկարությամբ հանգստավայրը կկառուցվի ծովափնյա արգելոցի կենտրոնում: Նախնական տվյալներով հանգստավայրը կազմված կլինի 2 մասից՝ ծովային և ցամաքային, ու բաղկացած կլինի բնակելի և գրասենյակային շենքերից, կենտրոնական ջրային այգուց, լողացող անցուղիներից, ստորջրյա ծովային ցուցահանդեսներից և այս բոլորը կշրջապատեն հիմնական աշտարակը, որտեղ կգտնվի գեղատեսիլ ռեստորանը: Հանգստավայրի ծովային հատվածում կլինի 4 հյուրանոց ստորջրյա սենյակներով: Ինչպես նաև նախատեսվում է կառուցել 80 անհատական լյուքս համարներ, որոնք կանվանվեն մեդուզաներ: Վերջիններս կունենան 4 հարկ, բացօթյա պատշգամբ, իսկ ամենաներքևում ստորջրյա սեփական հյուրասենյակ-ակվարիում: Հյուրանոցները շրջապատված կլինեն ջրային կյանքին վերաբերող թանգարանով և ցուցահանդեսներով: Իսկ ստրոջրյա ապակե թունելը այցելուներին կտեղափոխի ծովային այգու կենտրոնում գտնվող ստորջրյա դիտարան: Այցելուներին կղզի կտեղափոխեն 20 մետր երկարությամբ Տրիբոլիս (Trilobis) կոչվող ալյումինե զբոսանավերը, որոնք կունենան նաև սենյակներ ստորջրյա դիտումների համար:

Թայբեյ 101 երկնաքերը դարձել է աշխարհի ամենաբարձր «Կանաչ» կառույցը՝ արժանանալով LEED պլատինե վկայականի, էկոլոգիապես մաքուր շինությունների գնահատման ամենաբարձր մակարդակին: 509 մետր բարձրությամբ Թայբեյ 101 աշտարակը աշխարհի ամենաբարձր շինությունների ցուցակում գրավում է երկրորդ տեղը՝ զիջելով միայն 828 մետր բարձրությամբ Բուրջ Խալիֆաին: Վերջերս աշտարակը արդիականացվել է և համալրվել նորագույն էկոլոգիապես մաքուր տեխնոլոգիաներով: Աշտարակի արդիականացումն իրականացրել են էլեկտրոնային հսկա Սիմենս (Siemens) ընկերությունը՝ համագործակցելով ինտերիերի նախագծողներ Սթիվեն Լիչ Ասոշիեյթս (Steven Leach Associates) և Էկո Թեք Ինթերնեշնլ (Eco Tech International) ընկերությունների հետ: Մեկ այլ էլեկտրոնային աղբյուրի focustaiwan.tw-ի տվյալներով, շինության սերտիֆիկացումը 3 ռեկորդ է գրանցել՝ դառնալով աշխարհի ամենաբարձր «կանաչ» երկնաքերը (509 մետր), աշխարհի խոշորագույն «կանաչ» շինությունը (150 հազար քառակուսի մետր) և աշխարհի ամենաօգտագործվող «կանաչ» աշտարակը (90 վարձակալ): Շինության նորագույն տեխնոլոգիաները հնարավորություն են տալիս տարեկան խնայել 14.4 մլն կիլովատ ժամ էլեկտրաէներգիա, որը հավասար է 1.24 մլն ԱՄՆ դոլարի, բացի այդ օդում ածխաթթու գազի պարունակությունը հարաբերվում է 600-ը 1 մլն-ի, ինչն էլ հնարավորություն է տալիս աշտարակի վարձակալներին մշտապես մաքուր օդ շնչել: Հիշեցնենք, որ շենքի սեփականատերը՝ Թայբեյի ֆինանսական կենտրոն կորպորացիան 2009 թվականի նոյեմբերին հայտարարեց, որ մինչ 2011թվականի ամառը, Թայբեյ-101-ը կդառնա աշխարհի «ամենականաչ» ամենաբարձրահարկ շենքը LEED- ի ստանդարտներով (Leadership in Energy & Environmental Design- դա միջազգային ճանաչում ունեցող «կանաչ շինարարության» սերտիֆիկացման համակարգ է):

Օգոստոսի 2-ին Սաուդյան Արաբիայի արքայազն, միլիարդատեր Ալվալիդ իբն Թալալը (Alwaleed bin Talal) և երկրի խոշորագույն կառուցապատող Բեն Լադեն Գրուփ (Bin Laden Group – հիմնված է աշխարհի, արդեն հանգուցյալ, համար 1-ին ահաբեկչի հոր կողմից) ընկերությունը համաձայնագիր են ստորագրել՝ Կարմիր ծովի ափին գտնվող Ջեդդա քաղաքում կառուցել 1.2 մլրդ ԱՄՆ դոլար արժողությամբ աշխարհի ամենաբարձր երկնաքերը: Ինչպես տեղեկացնում է ctbuh.org կայքը, հազար մետր բարձրությամբ և 530 հազար քառակուսի մետր ընդհանուր մակերեսով Արքայական Աշտարակը (Kingdom Tower) հանդիսանում է 5.3 մլն քառակուսի մետր ընդհանուր մակերեսով Արքայական Քաղաք (Kingdom City) նախագծի գլխավոր կառույցը: Շինարարական աշխատանքներից հետո այս աշտարակը 172 մետրով կգերազանցի Էդրիան Սմիթի նախագծած (Skidmore, Owings and Merrill LLP), աշխարհի ներկայիս ամենաբարձր երկնաքերի՝ 828մ բարձրությամբ Բուրջ Խալիֆաի բարձրությունը: Արքայական Աշտարակը հանրությանը կառաջարկի բարձրակարգ բնակարաններ, հյուրանոց, գրասենյակային տարածքներ, ինչպես նաև այստեղ կտեղակայվի աշխարհի ամենաբարձր դիտահարթակը: Ծրագրի նախագիծն իրականացնում է ԱՍ+ՋիՋի (AS+GG) ճարտարապետական ընկերությունը: Նախագծման աշխատանքները ընթանում են արագ տեմպերով, իսկ շինարարական աշխատանքները շուտով կսկսվեն և արդեն հայտարարված է հիմքերի կառուցման աշխատանքների մրցույթ: Արքայական Քաղաքի շինարարական բյուջեն գնահատվում է 20 մլրդ ԱՄՆ դոլար, իսկ միայն աշտարակինը 1.2 մլրդ ԱՄՆ դոլար: Արքայական Աշտարակի բարձրությունը զարգացած վերելակային համակարգ է նախատեսում: Ըստ նախնական տվյալների՝ աշտարակը կսպասարկեն 12 շարժասանդուղք և 59 վերելակ, որից 5-ը երկխցիկանի (տեղադրված իրար վրա): Ի դեպ դիտահարթակ տանող վերելակները կաշխատեն 10 մետր/ վայրկյանում արագությամբ: Շինության մեկ այլ նախագծային առանձնահատկությունն էլ 157-րդ հարկում տեղակայված 30 մետր տրամագծով երկնային պատշգամբն է: Բացի աշտարակից ԱՍ+ՋիՋի ընկերությունը նախագծում է նաև 230 հազար քառակուսի մետր մակերեսով ափամերձ թաղամասը, որտեղ կլինեն բնակելի և առևտրային տարբեր շինություններ, առևտրի կենտրոն, գեղեցիկ բաց այգիներ և այլն:

Բարսելոնան՝ աշխարհի ամենագեղեցիկ քաղաքներից մեկը, ուր բնակվել և ստեղծագործել է աշխարհահռչակ կատալոնացի Գաուդին, համալրվեց ևս մեկ մասնագիտորեն ճանաչված ճարտարապետական գլուխգործոցով: Emporis Skyscraper Award 2010 հեղինակավոր ճարտարապետական մրցանակին արժանացել է Porta Fira (Պորտա Ֆիրա) հյուրանոցի շենքը, որը «b720 Arquitectos» և ճապոնական Toyo Ito & Associates ճարտարապետական ընկերությունների համատեղ ստեղծագործությունն է: Երկրորդ մրցանակին արժանացավ աշխարհի ամենաբարձր շենքը՝ Դուբայի Բուրջ Խալիֆան, իսկ երրորդ պատվավոր տեղը զբաղեցրեց Ֆրանսիայի հարավում՝ Մարսելում գտնվող Tour CMA CGM աշտարակը: Ժյուրին, որը բաղկացած է աշխարհի առաջատար փորձագետներից, գնահատել է բարսելոնյան երկնաքերի գեղագիտական նրբությունը և ներդաշնակությունը քաղաքային միջավայրին: Ամեն տարի այս մրցույթին մասնակցում են ավելի քան 100 մետր բարձրություն ունեցող շենքերը, իսկ մրցանակին արժանանում են ամենալավ դիզայնով և օգտագործման հարմարավետությամբ կառույցները: 26 հարկանի այս հինգ աստղանի հյուրանոցը 113 մետր բարձրություն ունի և պատված է կարմիր ուղղահայաց ալյումինե խողովակներով: Վերին հատվածում այս գլանաձև շենքը լայնանում է և զարմանալիորեն ներդաշնակվում է շրջակա քաղաքային միջավայրին: Նշենք, որ մեկ այլ մրցանակաբաշխության արդյունքներով, որն անցկացրել էր Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH), 2010 թվականի ամենալավ երկնաքերն է համարվել Լիդսի 70 մետրանոց Broadcasting Place «ժանգոտ» երկնաքերը, իսկ Դուբայի Բուրջ Խալիֆան արժանացել է մեկ այլ՝ CTBUH- 2010 Global Icon Award մրցանակի:

1 տարի է մնացել 2012 թ-ին Լոնդոնում կայանալիք ամառային օլիմպիական խաղերին, սակայն մայրաքաղաքի Սթրաթֆորդ թաղամասում կառուցվող Օլիմպիական Այգում (Olympic Park) արդեն պատրաստ են բոլոր 6 հիմնական օլիմպիական կառույցները, տեղեկացնում է Reuters.com լրատվական գործակալությունը: Հուլիսի 27-ին բացված ջրային մարզաձևերի կենտրոնը միացել է այս տարվա ընթացքում շահագործման հանձնված մյուս 5 կառույցներին՝ Օլիմպիական մարզադաշտին, հեծանվահրապարակին, ձեռքի գնդակի մարզահրապարակին, բասկետբոլային մարզահրապարակին և Միջազգային հեռարձակման կենտրոնին: Ջրային մարզաձևերի կենտրոնը կառուցելու համար փորվել և հեռացվել է ավելի քան 160 հազար տոննա հող: Ի դեպ, այդ աշխատանքների ընթացքում հայտնաբերվել են երկաթե դարին պատկանող որոշ առարկաներ և կմախքներ: Ընդհանուր 1.67 մլրդ ԱՄՆ դոլար արժողությամբ կենտրոնի շինարարական աշխատանքներն ավարտվել են նախատեսված ժամանակից 2 ամիս ուշ: Ուշացումը պատասխանատուները կապում են տանիքի և ջեռուցման համակարգերի տեղադրման ժամանակ առաջացած խնդիրների հետ: Ջրային մարզաձևերի կենտրոնում կա 50 մետր երկարությամբ 2 լողավազան, սուզվելու համար նախատեսված լողավազան և 17.5 հազար մարզասերի համար նախատեսված դահլիճ: Օլիմպիական Այգում դեռ շարունակվում են բարեկարգման աշխատանքները, մասնավորապես. հազարավոր ծառեր են տնկվում, կառուցվում են որոշ ժամանակավոր շենքեր, տեղադրվում են մարզիկների համար նախատեսված քաղաքի սարքավորանքները: 2012 թ-ի լոնդոնյան ամառային օլիմպիական խաղերի գլխավոր պատասխանատու Սեբաստիան Կոեի խոսքերով, երկիրը հպարտանալու իրավունք ունի, քանի որ օլիմպիական խաղերից 1 տարի առաջ, արդեն շահագործման են հանձնվել խաղերը սպասարկող 6 հիմնական կառույցները: