Ինչպես տեղեկացնում է constructiondigital կայքը, հղում կատարելով պաշտոնական աղբյուրներին, 6.08 մլրդ ԱՄՆ դոլար արժողությամբ Աբու Դաբի միջազգային օդանավակայանի (Abu Dhabi International Airport (ADIA)) նոր տերմինալի շինարարությունը կսկսվի 2012 թ-ին: Չնայած համաշխարհային տնտեսական ճգնաժամին՝ Միացյալ Արաբական Էմիրություններում շարունակում են իրականացնել բազմաթիվ շինարարական նախագծեր: Այսպես՝ 2012 թ-ին նախատեսվում է սկսել Աբու Դաբի միջազգային օդանավակայանի՝ 650 հազար քառակուսի մետր ընդհանուր մակերեսով նոր տերմինալի շինարարությունը: Ըստ նախնական տվյալների՝ նոր տերմինալը շահագործման կհանձնվի 2017 թ-ին և կսպասարկի ավելի քան 30 մլն ուղևոր: Օդանավակայանի ղեկավարությունը շինարարությունն իրականացնելու համար ստացել է 6 դիմում- հայտ աշխարհի տարբեր երկրներից, այդ թվում՝ Գերմանիայից, Հարավային Աֆրիկայից և ԱՄՆ-ից: Շինարարության իրականացման վերջնական պայմանագիրը կստորագրվի 2012 թ-նի առաջին եռամսյակում: Ըստ նախանական տվյալների՝ նոր տեմինալի հսկա շենքը կունենա աշխարհի ամենաերկար ծածկող կամարները, որոնց բարձրությունը կհասնի 52 մետրի: Նոր տերմինալում կլինի նաև շքեղ հյուրանոց, սպա-կենտրոն, ռեստորաններ, բարեր և 20-25 հազար քառակուսի մետր մակերեսով առևտրային կենտրոններ: Այս կառույցները կգտնվեն 8.4 հազար քառակուսի մետր մակերեսով, միջերկրական և անապատային բնաշխարհով, փակ այգու շրջակայքում: Ինչպես տեղեկացնում է օդանավակայանի պաշտոնական կայքը, նախապատրաստական աշխատանքները սկսվել են դեռևս 2009 թ-ի փետրվարի, իսկ շինարարության իրականացման նպատակով մրցույթ է հայտարարվել այս տարվա հունվարին: Աբու Դաբի միջազգային օդանավակայանն իր առաջին չվերթն իրականացրել է 1982 թ-ին: Այն գտնվում է մայրաքաղաքի կենտրոնից 30 կիլոմետր հեռավորության վրա, որտեղ գտնվում է Էթիադ Էյրվեյս (Etihad Airways) ընկերության գլխավոր գրասենյակը:
Մարտի աղետալի երկրաշարժից հետո, Ճապոնիայի կառավարությունը որոշել է արմատական քայլեր ձեռնարկել նման իրավիճակի կրկնությունը բացառելու նպատակով: Կառավարությունը հայտարարել է, որ նախատեսում է մայրաքաղաքից 400 կիլոմետր արևմուտք կառուցել «Պահեստային Տոկիո», տեղեկացնում է constructiondigital.com կայքը: Նորակառույց քաղաքի նպատակն է ամբողջությամբ փոխարինել մայրաքաղաքին հերթական աղետի ժամանակ: «Պահեստային Տոկիոն», որը կկառուցվի այժմյան «Իթամի» օդանավակայանի տարածքում, կունենա պետական կառավարման համար անհրաժեշտ բոլոր ենթակառուցվածքները և ոչ միայն: Ըստ նախնական տվյալների՝ նոր քաղաքում կկառուցվեն նաև գրասենյակային և բնակելի շենքեր, հյուրանոցներ և հանգստավայրեր: Նախատեսվում է նաև, որ պահեստային քաղաքը, որը ստացել է «Պահեստային միասնական քաղաք-թաքստոց բիզնեսի և զբոսաշրջության համար» անվանումը (Integrated Resort, Tourism, Business and Backup City) կլինի աշխարհի ամենաբարձր աշտարակի տունը: Այնուամենայնիվ, շատերն իրենց հարց են տալիս՝ ինչպես կարող է 200 հազար մարդու համար նախատեսված քաղաքը փոխարինել 35 մլն բնակչություն ունեցող քաղաքին: Նախագիծն արդեն հավանության է արժանացել երկրի նախկին վարչապետ Նաոտո Կանի և Առևտրի նախկին նախարար Բանրի Կաիեդայի կողմից: Պետական պաշտոնյաները հավաստիացնում են, որ նախագծի ֆինանսավորման 90 տոկոսը կիրականացվի մասնավոր հատվածի միջոցներով:
Ինչպես տեղեկացնում է Yahoo.com կայքը, նոյեմբերի 1-ին Ալժիրի նախագահ Աբդել-ազիզ Բութեֆլիքի գլխավորությամբ տեղի է ունեցել «Մեծ մզկիթի» հիմնարկեքի արարողությունը: 1.3 մլրդ ԱՄՆ դոլար արժողությամբ համալիրը կառուցումից հետո կդառնա աշխարհի մեծությամբ երրորդ մզկիթը: Մզկիթը կկառուցի չինական պետական «Չայնա սթեյթ քոնսթրաքշն էնջինիերինգ» (China State Construction Engineering) ընկերությունը, որն անցած ամիս հաղթել է ներկայացված մրցույթում: Նախնական տվյալներով շինարարությունը կավարտվի 4 տարուց: Ալժիրի «Մեծ մզկիթը» կկառուցվի մայրաքաղաքի Մուհամադիա կոչվող հատվածում, Ալժիրյան ծովածոցի ափին: Նախագծի համաձայն՝ մզկիթի մինարեթի բարձրությունը կկազմի 270 մետր, իսկ աղոթքի գլխավոր սրահը կկարողանա տեղավորել 120 հազար ուխտավորների: Մզկիթում կլինի նաև հսկա լսարան և 2000 հոգու համար նախատեսված գրադարան: Այսօր Ալժիրի մայրաքաղաքում գոյություն ունի 3 մեծ մզկիթ՝ «Ջամմա Էլ-Ջադիդը», որի շինարարությունը սկսվել է 1660 թ-ին, «Ջամմա Էլ-Քեբիրը», որը կառուցվել է 11-րդ դարում և «Քեթչաուա» մզկիթը՝ կառուցված 17-րդ դարում Օսմանյան կայսրության օրոք:
Ինչպես տեղեկացնում է PanARMENIAN.net կայքը, Գառնու միջնադարյան կամուրջը կվերականգնվի ԱՄՆ դեսպանների մշակութային արժեքների պահպանության հիմնադրամի աջակցությամբ: Վերականգնողական աշխատանքները կսկսվեն 2012 թ-ին, իսկ մինչ այդ կհայտարարվի մրցույթ շինաշխատանքներն իրականացնելու նպատակով: Ըստ ՀՀ մշակույթի նախարարի տեղակալ Արև Սամուելյանի, դժվար է ստույգ ասել՝ ինչքան կտևեն ամրակայման աշխատանքները, սակայն, ըստ նախնական հաշվարկների, 1-1.5 տարին բավական կլինի: Միջնադարյան կամուրջի ամրակայման աշխատանքների նպատակով հիմնադրամը ՀՀ մշակույթի նախարարությանն է հատկացրել 110 հազար ԱՄՆ դոլար: Գառնու միջնադարյան կամուրջը կառուցված է Ազատ գետի վրա: Հայաստանի միջնադարյան ճարտարապետության ինժեներական նշանակություն ունեցող այս կամուրջը կառուցվել է 11-րդ դարում: ՀՀ պետական բյուջեի միջոցների հաշվին մշակույթի նախարարության պատվերով արդեն իսկ կազմվել է հուշարձանի վերականգնման, ամրակայման նախագծանախահաշվային փաթեթը և 2010 թ-ին կատարվել են ամրակայման ու վերականգնման որոշակի աշխատանքներ: Կամուրջը կիսաշրջանաձև միաթռիչք թաղով կառույց է, որի աջափնյա խելը հենված է 4-5 մետր բարձրություն ունեցող բնական ժայռին: Խելերը կառուցված են կրաշաղախով կապակցված ճեղքված բազալտե, իսկ թաղը և ճակատային որմնակամարները կարմիր և սև հարթատաշ տուֆե շարվածքով: Երթևեկելի հատվածն աջ ափից թեքությամբ իջնում է ձախ ափ: ԱՄՆ դեսպանների մշակութային արժեքների պահպանության հիմնադրամը ստեղծման գաղափարը հաստատվել է ԱՄՆ կոնգրեսի կողմից 2000թ-ի աշնանը և այդ ժամանակվանից ի վեր հիմնադրամի ներքո իրականացվել են մշակութային արժեքների պահպանության 640 ծրագրեր աշխարհի 100 երկրներում, որոնց իրականացմանն ուղղվել է շուրջ 26 միլիոն ԱՄՆ դոլար:
Ինչպես տեղեկացնում է Reuters լրատվական գործակալությունը, հոլանդացի ճարտարապետ Ռեմ Կոլհասի (Rem Koolhaas) ընկերության մասնագետները հայտարարել են, որ, չնայած անվերջանալի ձգձգումների, չինական հեռուստաաշտարակի գլխավոր գրասենյակի շենքը վերջապես շահագործման կհանձնվի նոր տարում: Այս հեռուստաաշտարակը մյուս երկու հանրահայտ նախագծերի՝ Նորման Ֆոսթերի (Norman Foster) նախագծած օդանավակայանի նոր տերմինալի և ֆրանսիացի ճարտարապետ Պոլ Անդրեի (Paul Andreu) ձվաձև ազգային թատրոնի հետ Պեկինի նոր կենտրոնական գործարար թաղամասում (Beijing's central business district) պետք է շահագործման հանձնվեր մինչև 2008 թ-ի Օլիմպիական խաղերը: Սակայն Օլիմպիական խաղերը տեղի ունեցան, իսկ ազգային հեռուստաաշտարակի շենքն այդպես էլ շահագործման չհանձնվեց: Մեկ այլ ինտերնետային աղբյուրի՝ e-archtect-ի տվյալներով, 600 հազար քառակուսի մետր ընդհանուր մակերեսով նախագծի շինարարությունը սկսվեց 2004 թ-ին Պեկինի գործարար թաղամասում՝ նախկին մոտոցիկլետների գործարանի փոխարեն: 2007 թ-ին ավարտվեց 2 թեքված աշտարակների շինարարությունը, 2008 թ-ի մարտին ավարտվեցին կառույցի պողպատե կոնստրուկցիաների մոնտաժման աշխատանքները, իսկ հեռուստաաշտարակի բացումը նախատեսված էր 2009 թ-ին: Սակայն, ճարտարապետի հավաստմամբ, նույն տարում հեռուստաշատարակի հարևանությամբ գտնվող հյուրանոցում բռնկված հրդեհից տուժեց նաև հեռուստաաշտարակի շենքը՝ այդպիսով հետաձգելով բացման ժամկետը: 600 մլն եվրո ընդհանուր արժողությամբ նախագիծը բաղկացած է երկու շենքից: 230 մետր բարձրությամբ և 405 հազար քառակուսի մետր ընդհանուր մակերեսով Չինաստանի կենտրոնական հեռուստատեսության գլխավոր գրասենյակի (China Central Television Headquarters, CCTH) շենքում կիրականացվի նորությունների կառավարում, ռադիոհեռարձակում և հեռուստածրագրերի պատրաստում: Երկրորդ շենքում, 116 հազար քառակուսի մետր ընդհանուր մակերեսով Հեռուստատեսության մշակութային կենտրոնում (Television Cultural Center, TVCC) կլինի հյուրանոց, այցելուների կենտրոն, հսկա հասարակական թատրոն և ցուցասրահներ:
