Հուլիսի 5-ին Յորքի դուքս արքայազն Էնդրյուն հանդիսավորությամբ բացեց «Բեկոր» (Shard) երկնաքերը: Բացման արարողության ժամանակ 310 մետր բարձրությամբ «Բեկորը» պաշտոնապես ճանաչվեց ամենաբարձրը Եվրոպայում: Նշենք, որ 2009 թ-ին երկնաքերի հիմնարկերքի արարողությունն իրականացրել էին Քաթարի վարչապետ շեյխ Համադ բին Ջասսիմ բին Ջաբեր Ալ Թանին (Hamad bin Jassem al-Thani), ում երկիրը հիմնականում ֆինանսավորել է նախագիծը, և արքայազն Էնդրյուն: 95-հարկանի երկնաքերն ունի ապակե ճակատ, որի մակերեսը համարժեք է 8 ֆուտբոլային դաշտերի համագումարին, իսկ շինարարության համար օգտագործված բետոնը կարող է լցնել ավելի քան 22 օլիմպիական լողավազան: Ըստ նախնական տվյալների՝ երկնաքերում կլինի հինգ-աստղանի հյուրանոց, գրասենյակային տարածքներ (600 հազար քառակուսի մետր), շքեղ ռեստորաններ, խանութ-սրահներ և 10 բնակարան (53-65 հարկերում), որոնց գինը կհասնի 78 մլն ԱՄՆ դոլարի: «Բեկոր» նախագծի ընդհանուր բյուջեն կազմել է 705.4 մլն ԱՄՆ դոլար: Ի դեպ, կառույցի 95 տոկոսը պատկանում է Քաթարի ներդրողներին: Թեմզա գետի հարավային ափին գտնվող երկնաքերի բացումն ազդարարում է միայն արտաքին աշխատանքների ավարտը, իսկ ներքին հարդարման աշխատանքերը դեռևս կշարունակվեն, և կառույցն ամբողջությամբ պատրաստ կլինի միայն 2013 թ-ին: Ռենցո Պիանոյի կողմից նախագծված 310 մետր բարձրությամբ երկնաքերը, դառնալով Եվրոպայի ամենաբարձր շինությունը, ետևում թողեց նախկին տիտղոսակրին՝ Ռուսաստանի մայրաքաղաքում գտնվող «Մոսկվա Աշտարակ» երկնաքերին: Սակայն «Բեկորն» էլ շուտով կզրկվի նոր ստացած տիտղոսից, քանի որ արդեն տարվա վերջին կրկին Մոսկվայում նախատեսվում է շահագործման հանձնել 322 մետր բարձրությամբ «Մերկուրի Սիթի» (Mercury City Tower) աշտարակը: Վերջերս Ֆրանսիան ևս հայտարարեց Եվրոպայի ամենաբարձր երկնաքերը կառուցելու նախագծի՝ «Էրմիտաժ Պլազա Թաուերս» -ի (Hermitage Plaza Towers) մասին, որի շինարարությունը դեռևս սկսված չէ, իսկ բարձրությունը կազմելու է 320 մետր, որը սակայն ցածր կլինի մոսկովյան նոր աշտարակից: Նշենք, որ «Բեկոր» երկնաքերի շինարարությունը Լոնդոնում հասարակական բազմաթիվ վեճերի և քննարկումների առիթ է դարձել: Մասնավորապես, ֆուտուրիստիկ շինությունը զայրացրել է ավանդապահներին, որոնք գտնում են, որ նորակառույց բետոնե և ապակե հսկաները կարող են փչացնել ճարտարապետական այնպիսի գլուխգործոցների տեսքը, ինչպիսիքն են՝ Խորհրդարանի շենքը (Houses of Parliament), և Սուրբ Պողոսի Տաճարը (St Paul's Cathedral), որն ավելի քան 250 տարի (1710-1962). եղել է Լոնդոնի ամենաբարձր շինությունը:
Ֆրանսիացի ֆուտբոլիստ Թիերի Անրին ցանկանում է ապամոնտաժել Լոնդոնի հյուսիսում գտնվող իր 9.5 մլն ԱՄՆ դոլար արժողությամբ առանձնատունը և փոխարենը կառուցել նորը, որը կներառի 12 մետր բարձրությամբ հսկա ակվարիում, տեղեկացնում է The Daily Mail պարբերականը: Նա ցանկանում է քանդել այն տունը, որը կառուցվել է ընդամենը 13 տարի առաջ՝ 1999 թ-ին, և համարվում է Մեծ Բրիտանիայի ժամանակակից ճարտարապետության լավագույն նմուշներից մեկը: Նոր կառուցվող առանձնատանը Անրին նախատեսում է տեղակայել 12 մետր բարձրությամբ 4 հարկանի ակվարիում, որի արժեքը կկազմի մոտ 400 հազար ԱՄՆ դոլար: Համաձայն մտահղացման՝ այն կձգվի ամբողջ տան բարձրությամբ՝ հիմքից մինչև տանիք: Հսկա ակվարիումը կպարունակի 25 հազար լիտր ջուր, և այնտեղ կարող են ապրել մոտ 300 ձուկ: Իրականում ակվարիումը բաղկացած կլինի 4 տարբեր մասերից՝ յուրաքանչյուր հարկում 1 մաս, բայց քանի որ այն կառուցվելու է օրգանական ապակուց, ապա արդյունքում, առաջին հայացքից, այն 1 ամբողջական կթվա: Կառուցման նման տարբերակը հեշտ է, իսկ պահելն ու մաքրելն էլ առավել մատչելի: Անրիի նոր տունն ավելի բարձր կլինի նախորդից և կներառի բար, կինոթատրոն ու լողավազան: Չնայած նրան, որ նոր տան կառուցումը կարժենա 3.2 մլն ԱՄՆ դոլար, ավարտված տան շուկայական արժեքը կլինի մոտ 16 մլն: Ֆուտբոլիստի նոր առանձնատանը կտեղադրվեն հսկայական ապակե վիտրաժներ, որոնք կնպաստեն բնական լույսի առավելագույն ներթափանցմանը, իսկ տանիքն էլ կլինի «կենսաբազմազան», որտեղ էլ կտնկվեն բազմաթիվ բույսեր ու ծառեր: Նշենք, որ Անրին վերջինն է հայտնիների երկար շարքում, ներառյալ Մադոննան, Բեքհեմները, Շերը, ինչպես նաև ֆուտբոլիստներ Ստիվեն Այրլենդը, Ջո Հարթը և Միկա Ռիչարդսը, ովքեր իրենց առանձնատներում ունեն հսկայական ակվարիումներ: Օրինակ՝ Այրլենդը մոտ 160 հազար ԱՄՆ դոլար է ծախսել իր 4 մետրանոց ակվարիումը կառուցելու համար, իսկ այժմ նախատեսում է խոհանոցի հատակի տակ շնաձկներ պահել: Ի դեպ, Անրիի գերհսկա ակվարիումը, կառուցումից հետո, հետևում կթողի բոլորին:
Ինչպես տեղեկացնում է inhabitat.com ինտերնետային կայքը, Մեծ Բրիտանիայի մայրաքաղաք Լոնդոնում ավարտվեց ԱրսելորՄիտտալ Օրբիթ դիտահարթակ-աշտարակի կառուցումը: Մնացել է միայն իրականացնել որոշ հարդարման աշխատանքներ, որոնք կավարտվեն մինչ ամառային Օլիմպիադայի սկիզբը: 114,5մ բարձրությամբ աշտարակ-արձանը, ամենաբարձր կետում կունենա դիտահարթակ Օլիմպիական քաղաքի և Լոնդոնի հիասքանչ տեսարաններով: Վերելակով բարձրանալուց հետո այցելուները կարող են ներքև իջնել նաև ոտքով՝ 455 աստիճանից բաղկացած ոլորապտույտ աստիճանավանդակով: Աշտարակը նախագծել է հնդկական ծագումով բրիտանացի ճարտարապետ Անիշ Կապուրը, իսկ մետաղական կառուցվածքների նախագծումը և հաշվարկը կատարել է Սեսիլ Բալմոնդը: Միանշանակ դժվար է գնահատել կառույցի ճարտարապետական արժեքը, բայց այն լրիվ համապատասխանում է հայտնի քանդակագործ-ճարտարապետի վառ և ֆուտուրիստական ոճին: Ինչպես գտնում է Սեսիլ Բալմոնդը, աշտարակը կդառնա Լոնդոնի պատվավոր տեսարժան վայրերից մեկը և նրանք արել են այն ամենը, որպեսզի իրենց նպատակին հասնեն: Կառույցի նպատակներից է, բացի դիտահարթակ ծառայելը, գովազդել լոնդոնյան Օլիմպիական խաղերի հիմնական հովանավորներից մեկին՝ պողպատի արտադրության հսկա, ԱրսելորՄիտտալ ընկերությանը: Այս տեսանկյունից կարելի է ասել, որ աշտարակը իր տեսքով լիովին հասել է իր նպատակին: Այս երկաթյա հսկայի կարևոր առավելություններից է այն, որ մետաղական կառուցվածքների 60% պատրաստված են վերամշակված պողպատից, ինչը և կառույցը դարձնում է մասնակի «կանաչ»:
Լոնդոնի «Քինգս Քրոսս» (King’s Cross) պատմական երկաթգծային կայարանում ավարտվել են հինգ տարի տևած վերականգնողական աշխատանքները, իսկ կայարանի բացման հանդիսավոր արարողությունը նախատեսված է մարտի 19-ին, տեղեկացնում է The Inhabitat կայքը: Վերականգնողական աշխատանքների նախագիծն իրականացրել են «Ջոն ՄաքԱսլան և Գործընկերներ» (John McAslan + Partners) ճարտարապետական գրասենյակի մասնագետները 3 մասով՝ կառույցների կրկնակի օգտագործում, վերականգնում և նոր շինարարություն: Տանիքները և որոշ շինություններ վերանորոգվել են և կրկին կօգտագործվել, կայարանի պատմական նշանակության շենքի ճակատը զգուշորեն և մանրակրկիտ վերանորոգվել է, իսկ ահա կայարանի արևմտյան մասում նոր տանիք է կառուցվել: Արևմտյան մասը ծածկում է 150 մետր թռիչքով ապակեպատ տանիքը, որն այս տարածքը լցնում է բնական լույսով: Բացի վերոնշյալը, 784 մլն ԱՄՆ դոլար արժողությամբ վերականգնողական ծրագրի ընթացքում բարելավվել են ուղևորների երթևեկության պայմանները, տեղադրվել են արևային ֆոտովոլտաիկ համակարգեր, ինչպես նաև երկաթգծային հարթակներում նոր լուսավորություն է տեղադրվել: Նշենք նաև, որ վերանորոգման աշխատանքներում ներգրավվել են 5 հազար մարդ, օգտագործվել է մոտ հազար տոննա պողպատ, 1 մլն հատուկ պատրաստված «պատմական» աղյուսներ և 5 մլն կերամիկական սալիկներ, 5 մլն մետր երկարությամբ լարեր: Քանի որ կայարանի շենքն ընդգրկված է առաջին մակարդակի պատմական շինությունների ցանկում, ապա վերականգնման ժամանակ մասնագետները պարտավոր էին աշխատանքները կազմակերպել այնպես, որ կայարանի ճակատը անփոփոխ մնար: Վերանորոգումն իրականացվել է մանրակրկիթ և բարձր մակարդակով, կառույցի դիմային հատվածը մնացել է անփոփոխ, զուգահեռ բացվել են ուղևորների և երկաթգծային աշխատողների համար նոր սրահներ, գրասենյակներ, ինչպես նաև սրճարաններ, բարեր ու առևտրային կենտրոններ: Մարտի 19-ի բացման հանդիսավոր արարողությունից հետո նորակառույց ապակեպատ տարածքը կդառնա կայարանի «սիրտը»: Այս տանիքը, որը գտնվում է պատմական ճակատի կողքին, երբեմնի գորշ ու մռայլ կայարանը վերածում է լուսավոր և երկար սպասված այցելության վայրի: Նշենք, որ «Քինգս Քրոսս» երկաթգծային կայարանը կառուցվել է 1852 թ-ին Լոնդոնի կենտրոնական հատվածի հյուսիսային մասում և անվանել ի պատիվ Լոնդոնի Քինգս Քրոսս շրջանի: Կայարանի կառուցման նախագիծն առաջին անգամ ներկայացվել է 1848 թ-ի դեկտեմբերի, իսկ վերջնական նախագիծը մշակել է ճարտարապետ Լյուիս Քյուբիթթը (Lewis Cubitt):
Ինչպես տեղեկացնում է ինտերնետային Inhabitat կայքը, «Բաքա Արքիթեքթս» (Baca Architects) ճարտարապետական բյուրոն թույլտվություն է ստացել կառուցել Մեծ Բրիտանիայի առաջին «ամֆիբիա» տունը: Համաձայն կայքի տարածած տեղեկատվության՝ նման նախաձեռնության հիմնական նպատակը մեծ գետերի ափամերձ շրջանների ջրասույզ լինելու վտանգի կանխարգելումն է: Ի դեպ, այս խնդիրը որը գլոբալ կլիմայական փոփոխությունների հետևանք է, ամբողջ աշխարհում համարվում է հրատապ լուծում պահանջողներից: Ճարտարագետների գաղափարի համաձայն՝ լողացող տունը ջրի մակարդակի բարձրացմանը զուգահեռ պիտի փոփոխի նաև իր մակարդակը: 70 քառակուսի մետր մակերեսով հարմարավետ տունը կկառուցեն Թեմզա գետի մի փոքրիկ կղզյակի վրա, Բաքինգեմշիր (Buckinghamshire) կոմսությունում: «Բաքա Արքիթեքթս» ճարտարապետական բյուրոն արդեն տարիներ շարունակ փորձեր է իրականացնում այս նախագծի շուրջ՝ թե ինչպես՞ պետք է կառուցել տունը, որպեսզի հեղեղումների ժամանակ այն մնա ջրի երեսին և «չլքի» իր հիմնական բնակավայրը: Նշենք, որ այս ընկերությունը երկրում համարվում է լավագույնը ափամերձ ճարտարապետության ոլորտում: Տունը կկառուցվի այնպես, որ գետի ջրի բնական մակարդակի ժամանակ վերջինիս հիմքն անշարժ լինի, իսկ հեղեղումների ժամանակ ջրի մակարդակին զուգահեռ այն բարձրանա: Տունը նախագծված է անգլիական դասական ոճով, սակայն հագեցած է բազմաթիվ էներգախնայող տեխնոլոգիաներով: Տանը շրջապատող այգին նախատեսված է որպես առաջին պաշտպանական գիծ հեղեղումների ժամանակ և ուժեղ ջրի հոսքի արգելք: Հեղեղումների ժամանակ այս տունը կարող է դիմակայել մինչև ջրի մակարդակի 10 մետր բարձրացման: Նշենք, որ տան շինարարությունը նախատեսված է իրականացնել այս տարի և ենթադրվում է, որ այն հանդես կգա որպես ջրհեղեղների դեմ պայքարի գործուն եղանակ:
