Ամերիկյան Apple կորպորացիան դեռևս չի հասցրել ավարտին հասցնել իր նոր գլխավոր գրասենյակի շինարարությունը, սակայն արդեն ընտրել է մեկ այլ ամբիցիոզ նախագիծ իր երկրորդ գրասենյակի համար: Ինչպես տեղեկացնում է business Insider պարբերականը, «Սիլիկոնե հովտում» Apple ընկերության երկրորդ յուրօրինակ գլխավոր գրասենյակը կկոչվի «Սենթրալ ենդ Վոլֆ» (Central & Wolfe): Նորագույն գրասենյակային կենտրոնը նախատեսվում է կառուցել Կուպերտինո քաղաքից հյուսիս գտնվող Սեննիվեյլ (Sunnyvale) քաղաքում: Ըստ նախնական տվյալների՝ որպես շինարարության կառուցապատող ընկերություն հանդես կգա «Լենդբենք Ինվեսթմենթս» (Landmark Investments) ընկերությունը, իսկ նախագիծը կիրականացնի ամերիկյան «Էյջ Օ Քեյ» (HOK) ճարտարապետական ընկերությունը: Ինչպես պնդում է Quartz ինտերնետային պարբերականը, Apple ընկերությունը ոչ թե կգնի այս բազմաֆունկցիոնալ համալիրը, այլ վարձակալությամբ կվերցնի այն: Կառուցապատող ընկեկերության հետ պայմանագիրն արդեն կնքված է, սակայն դեռևս անհայտ են շինարարության ժամկետները: Նորագույն բազմաֆունկցիոնալ համալիրը նախատեսվում է կառուցել ԱՄՆ-ի ամենահանգիստ քաղաքներից մեկում՝ 7,3 հեկտար տարածքի վրա: Ըստ նախնական տվյալների՝ Apple ընկերության գլխավոր գրասենյակի շենքը կունենա եռաթերթ ծաղկի տեսք, որի թերթիկները կշրջապատեն 500 հանդիսատեսի համար նախատեսված բացօթյա ամֆիթատրոնը: Ամֆիթատրոնի հարևանությամբ կարող են տեղակայվել սրճարան, մարզասրահ, խորհրդակցությունների սրահ, խանութ-սրահ, վարսավիրանոց, բանկի մասնաճյուղ, քիմմաքրման կետ, լվացքատուն, որոշ մարզական հրապարակներ և անգամ հեծանիվների վերանորոգման կենտրոն: Նախագծի տարբերակիչ առանձնահատկությունը զբոսուղիների և կանաչ տարածությունների հսկայական քանակությունն է; Եթե հաշվի առնվի այն հսկայական այգին, որ պետք է կառուցվի շինության տանիքին, ապա «Սենթրալ ենդ Վոլֆ» համալիրի կանաչ մակերեսը կհասնի 79 տոկոսի, եթե հաշվի չառնվի՝ 53 տոկոսի: Քայլուղիների ընդհանուր երկարությունը կկազմի 3 կիլոմետր, որոնց կեսը կտեղակայվի անմիջապես համալիրի տանիքին: Ըստ նախնական տվյալների՝ համալիրի շենքը կունենա 6 հարկ, որից 2-ը ստորգետնյա՝ նախատեսված ավտոկայանատեղիի համար: Յուրաքանչյուր հարկի բարձրությունը կկազմի 4 մետրից ավելի, իսկ յուրաքանչյուր աշխատատեղի հեռավորությունը պատուհանից կկազմի 14 մետր: Յուրաքանչյուր աշխատակից ամֆիթատրոնի կենտրոնից իր աշխատատեղ կկարողանա հասնել 2,5 րոպեում: Համալիրում գրասենյակային տարածքների ընդհանուր մակերեսը կկազմի 68,7 հազար քառակուսի մետր: Նշենք նաև, որ համալիրը կառուցվելու է «բաց տարածություն» (open space) սկզբունքով, ինչը, ըստ նախագծի հեղինակների, հնարավորություն կտա ավելի սերտացնել շփումն աշխատակիցների միջև և ավելի կհեշտացնի առաջացած խնդիրների լուծումը:

Լոնդոնում պատրատվում են կառուցել թափանցիկ լողավազան, որը կտեղակայվի գետնից 35 մետր բարձրության վրա, տեղեկացնում է The Inhabitat կայքը: Ըստ նախնական տվյալների՝ բաց լողավազանն ամբողջությամբ կկախվի օդում և իրար կմիացնի 2 նորակառույց բարձրահարկերի «Նայն Էլմս» (Nine Elms) թաղամասում: Լողավազանի երկարությունը կկազմի 25 մետր, լայնությունը 5 մետր, իսկ խորությունը 3 մետր: Լողավազանի պատերն ու հատակը կկառուցվի 20 սանտիմետր հաստությամբ ապակուց: Իր տեսակի մեջ առաջին լողավազանը կդառնա Լոնդոնում կառուցվելիք 2000 բնակարան պարունակող «Դեսպանական այգիներ» (Embassy Gardens) բնակելի համալիրի մի մասը: Էլիտար բնակելի համալիրը կկառուցվի Լոնդոնի հարավում գտնվող «Բաթթերսի» թաղամասում, իսկ անմիջապես լողավազանից և համալիրի տանիքից յուրօրինակ տեսարան կբացվի դեպի «Վեսթմինսթերյան պալատ»: Ըստ նախնական տվյալների՝ նախագծի կառուցապատող ընկերությունն է «Բելլիմոր» (Ballymore) անգլիական ընկերությունը, լողավազանի կոնստրուկցիան նախագծել են «Արուփ» (Arup ), «Իքերսլի Օ՛Քալլագան» (Eckerseley O’Callaghan) և «Ռեյնոլդս» (Reynolds) ընկերությունները համատեղ: Բացի լողավազանից այս 2 բնակելի երկնաքերերը իրար կմիանան լողավազանին զուգահեռ քայլուղով: Նշենք, որ այս յուրօրինակ լողավազանի այցելուները կարող են դառնալ միայն «Դեսպանական այգիներ» համալիրի բնակիչները, իսկ այդ համալիրում անշարժ գույք հնարավոր կլինի ձեռք բերել նվազագույնը 944 հազար ԱՄՆ դոլարով: Լողավազանի և բնակելի համալիրի շինարարության ավարտը նախատեսված է 2017 թվականին:

Բրիտանական «Պոպուլուս» (Populous) ճարտարապետական ընկերությունը նախագծել է մարզադաշտ, որը նախատեսված է 2 տարբեր սպորտաձևերի համար: Շարժական հատակով մարզադաշտում հնարավոր կլինի խաղալ թե ամերիկյան, թե անգլիական ֆուտբոլ: Ի դեպ, այս նոր մարզադաշտը կառուցվում է «Տոտտենհեմ Հոտսպուր» (Tottenham Hotspur) անգլիական ֆուտբոլային ակումբի սեփական հարկի տակ խաղերն անցկացնելու նպատակով: Ինչպես տեղեկացնում է անգլիական ակումբի պաշտոնական կայքը, Լոնդոնի հյուսիսում կառուցվելիք մարզադաշտի բացման արարողությունը նախատեսված է 2018 թվականի ամռանը: Նոր մարզադաշտը նախատեսված է ավելի քան 61 հազար մարզասերի համար, իսկ տրիբունաներից մեկն ի վիճակի կլինի տեղավորել մոտ 17 հազար երկրպագուներ: Ի դեպ, շինարարության ավարտից հետո այս տրիբունան կդառնա ամենամեծ մշտական անշարժ հարթակը Մեծ Բրիտանիայում: Հիմնական մարզադաշտը բնական խոտածածկով նախատեսված է ավանդական ֆուտբոլի համար, իսկ արհեստական խոտածածկով պատված ստորգետնյա դաշտը՝ ամերիկյան ֆուտբոլի համար: Վերջինս ի վիճակի է հյուրընկալել նաև այլ սպորտաձևերի մրցելույթներ: Նորագույն մարզադաշտն այցելուներին նաև մեկ այլ հնարավորություն է ընձեռում: Մարզադաշտի տանիքը բաց է լինելու մարզասերների առաջ: Այստեղ 40 մետր բարձրության վրա տեղակայվելու է «Երկնային զբոսանք» (Sky Walk) անվանումը ստացած դիտահարթակը: Մարզադաշտի մուտքը նույնպես տարբերվելու է իր տեսակով: Վերջինս եռահարկ շինություն է, որտեղ տեղակայվելու են ֆուտբոլային ակումբի անվանական իրերի վաճառքով զբաղվող խանութ-սրահը, ակումբի ինտերակտիվ թանգարանը, և սրահ, որտեղ ցուցադրվելու են ակումբի մրցանակները: Այս բազմաֆունկցիոնալ մարզադաշտը կառուցվելու է Լոնդոնի հյուսիսում նախատեսված հսկայական «Նորթամբերլենդ Դեվելոփմենթ փրոջեքթ» (Northumberland Development Project) նախագծի շրջանակներում: Այս նախագծի շրջանակներում մարզադաշտի շուրջը կտեղակայվեն նաև 579 բնակարաններով 4 բնակելի շենքեր, բժշկական կենտրոն, հյուրանոց 180 համարներով, ինչպես նաև սրճարաններ և հանրային տարածքներ: Նախագծի բնակելի հատվածի նախագծմամբ զբաղվել է «Էլլիես և Մորրիսոն» (Allies and Morrison) ճարտարապետական ընկերությունը: Ըստ նախնական տվյալների՝ շենքերը կունենան 16-ից 32 հարկ, որոնցում կտեղակայվեն 1, 2 և 3 սենյականոց բնակարաններ յուրաքանչյուրը սեփական պատշգամբով: Նախատեսվում է կառուցել նաև 25 հազար քառակուսի մետր մակերեսով գրասենյակային տարածքներ, ինչպես նաև ստորգետնյա ավտոկայանատեղի նախատեսված 275 ավտոմեքենայի և 900 հեծանիվերի համար:

Ավստրալիական “Էլենբերգ Ֆրազեր” (Elenberg Fraser) ճարտարապետական ընկերությունը նախագծել է 226 մետր բարձրությամբ յուրօրինակ կորաձև երկնաքեր: Ինչպես պնդում են նախագծի հեղինակները, երկնաքերի ստեղծման ժամանակ նրանք ոգեշնչվել են հանրահայտ երգչուհի Բեյոնսեի «Ուրվական» (Ghost) երգի տեսահոլովակով: Երկնաքերի նախագծման ընթացքում վերջինիս ձևը նրանք ստացել են տեսահոլովակում երգչուհու շարժումների մոտիվներից: «Պրեմիեր Թաուեր» (Premier Tower) անվանումը ստացած երկնաքերը կկառուցվի Ավստրալիայի Մելբուրն քաղաքի Սպենսերի փողոցում: Այս յուրօրինակ նախագծի պատվիրատուն սինգապուրյան «Ֆրագրենս Գրուփ» (Fragrance Group) կառուցապատող ընկերությունն է: Ըստ նախնական տվյալների՝ 68 հարկանի երկնաքերում կտեղակայվեն 660 բնակարններ, հյուրանոց 160 համարներով և առևտրային կենտրոններ: Ինչպես պնդում են հեղինակները՝ երկնաքերի բոլոր բնակարաններից յուրօրինակ գեղեցիկ տեսարան կբացվի դեպի քաղաքային բնապատկերը երկնաքերի բարձրության և բարակության շնորհիվ: Ըստ հեղինակների տարածած հաղորդագրության՝ երկնաքերի արտաքին տեսքը այն զուտ յուրօրինակ դարձնելուն չէ միտված: Բանն այն է, որ կորաձև դիզայնը հնարավորություն է տալիս հավասարակշռել երկնաքերի կշիռը, պաշտպանել այն քամու ազդեցությունից և կանխարգելել տատանումները: Բացի այդ, բարձրահարկի նախագծման ընթացքում ճարտարապետները ջանացել են նվազագույնի հասցնել արտաքին միջավայրի վրա երկնաքերի ազդեցությունը: Նախագծի մանրամասները դեռևս չեն հայտարարվում, անհայտ են երկնաքերի ընդհանուր մակերեսը, ինչպես նաև շինարարության ժամկետները:

Վերջին 40 տարվա ընթացքում առաջին անգամ Փարիզի հարավային թաղամասում նախատեսվում է նորագույն երկնաքեր կառուցել: Շինարարության ավարտից հետո 2018 թվականին 42 հարկանի եռանկյունաձև «Տուր Տրայանգլ» (Tour Triangle) երկնաքերը կդառնա Փարիզի բարձրությամբ երրորդ երկնաքերը՝ զիջելով միայն 324 մետր բարձրությամբ «Էյֆելյան Աշտարակին» և 210 մետր բարձրությամբ «Մոնպառնանս» երկնաքերին: Այս յուրօրինակ բրգաձև աշտարակի շուրջ հավաքվել է բավականին հեղինակավոր շինարարական թիմ: Երկնաքերի նախագծման աշխատանքներով զբաղվում է շվեյցարական «Հերցոգ և դե Մյուրեոն» (Herzog & de Meuron's) ճարտարապետական ընկերությունը, իսկ հիմնական կառուցապատողը կլինի եվրոպական ամենահայտնի ընկերություններից մեկը՝ «Յունիբեյլ Ռոդամքոն» (Unibail Rodamco), որը պատրաստվում է ավելի քան 555 մլն ԱՄՆ դոլար գումար ներդնել այս նախագծի իրականացման նպատակով: Ըստ նախնական տվյալների՝ նորագույն բրգաձև աշտարակում կտեղակայվեն 70 հազար քառակուսի մետր մակերեսով գրասենյակներ, ռեստորաններ, մշակութային կենտրոններ, ինչպես նաև նախատեսվում է բացել մոտ 120 սենյակներից բաղկացած 4-աստղանի հյուրանոց: Այս նախագիծն առաջին անգամ հանրային քննարկման ներկայացվել է դեռևս 2008 թվականին, սակայն այն ժամանակ երկնաքերի կառուցումն անհնարին էր: Բանն այն է, որ 7 տարի առաջ երկրի օրենքները արգելում էին նման բարձրության շինություն կառուցել: Այսօր որոշ օրենքներ փոխվել են: Փոփոխություններ են կատարվել նաև նախագծում, մասնավորապես՝ սկզբում նախատեսվում էր գրասենյակային տարածքներին հատկացնել 80 հազար քառակուսի մետր մակերես, այսօր այն նվազել է: Ինչպես տեղեկացնում է France 24 լրատվական գործակալությունը, երկրորդ քվերակությամբ մայրաքաղաքի Քաղաքային խորհուրդը հաստատել է նախագիծը 87 կողմ և 74 դեմ ձայներով: Առաջին քվերակությունը տեղի էր ունեցել 2014 թվականի նոյեմբերին: Նախորդ անգամ պատգամավորների մեծամասնությունը դեմ էին արտահայտվել: Սակայն Փարիզի քաղաքապետ Էնն Իդալգոն կարողացել է բոյկոտել առաջին քվերակությունը՝ պատճառաբանելով, որ անմիջապես նիստից հետո որոշ տվյալներ դարձել են հանրությանը հասանելի: Այս անգամ տեղի է ունեցել բացառապես գաղտնի քվեարկություն: Շինարարության ավարտից հետո «Տուր Տրայանգլ» երկնաքերը կդառնա առաջին և միակ երկնաքերը Պորտ դե Վերսալ թաղամասում, քանի որ երկնաքերերի նախագծերը հիմնականում առաջարկվում են Փարիզի գործարար Լա Դեֆենս թաղամասում կառուցվելու նպատակով: Վերջին տարիների ընթացքում թաղամասի բնակիչները, հասարակական կազմակերպությունները և «Կանաչների քաղաքական կուսակցությունը» հիմնականում բողոքարկում էին երկնաքերի կառուցման բոլոր փորձերը: Ակտիվիստներին դուր չէր գալիս նախատեսված երկնաքերի էներգետիկ անարդյունավետությունը, շրջակա միջավայրին հասցվելիք հնարավոր վնասը և ճարտարապետական արդիական լուծումներով նախագծված կառույցի առկայությունը: Նշենք, որ մայրաքաղաքում կառուցված առաջին և վերջին երկնաքերը «Մոնպառնաս աշտարակ»-ն է, որի շինարարությունը ավարտվել է դեռևս 1973 թվականին: