Ապրիլի 21-ին միլիարդատեր Դոնալդ Թրամփը երկօրյա այցով կլինի Վրաստանում, տեղեկացնում է News-Georgia ինտերնետային պարբերականը՝ հղում կատարելով «Սիլք Ռոուդ Գրուփ» (Silk Road Group) ընկերության ներկայացուցչի հայտարարությանը: Նրա այցի ժամանակ Բաթում քաղաքում տեղի կունենա «Թրամփ Թաուեր» (Trump Tower) նախագծի շնորհանդեսը: Աշտարակի նախագծման աշխատանքներն արդեն ավարտված են, իսկ շինարարության համար անհրաժեշտ գումարը կսկսվի հավաքագրվել արդեն շնորհանդեսից հետո: Ինչպես ավելի վաղ տեղեկացրել էինք , 2 աշտարակների նախագծման և կառուցման համաձայնագիրը ստորագրվել էր անցյալ տարվա մարտ ամսին, Վրաստանի նախագահի Ամերիկայի Միացյալ Նահանգներ կատարած այցի ժամանակ, երբ Միխաիլ Սահակաշվիլին և միլիարդատեր Դոնալդ Թրամփը հանդիպել էին Մանհեթենի «Թրամփ Թաուեր»-ում տեղի ունեցած ընթրիքի ժամանակ: Ըստ նախնական տվյալների՝ աշտարակի շինարարության սկիզբը նախատեսվում է 2013 թ-ին, իսկ այդ աշխատանքները կվերահսկի «Սիլք Ռոուդ Գրուփ»-ի նախագահ Գեորգի Ռամիշվիլին: Թբիլիսիում և Բաթումում կառուցվելիք աշտարակների ընդհանուր բյուջեն գնահատվում է 250-300 մլն ԱՄՆ դոլար: Նշենք, որ «Թրամփ Թաուեր»-ը պետք է դառնա Սև ծովի ափին գտնվող ծովափնյա Բաթում քաղաքում կառուցվող «Սիլք Ռոուդ» համալիրի բաղկացուցիչ մասը: Աշտարակը կունենա 40 հարկ և 100 բնակարան: Ի դեպ, եթե 40 հարկ բարձրությունը Նյու Յորքի համար միջին չափանիշ է, ապա Բաթումի համար այն կրկնակի բարձր է, քան քաղաքի ամենաբարձր շինությունները:

Դավիթ Ազրիելին՝ «Ազրիելի Գրուփ» (Azrieli Group) ընկերության գլխավոր բաժնետերը, մարտի 25-ին ղեկավարել է 200 մետր բարձրությամբ «Սարոնա Կենտրոնի» (Sarona Center) հիմնարկեքի արարողությունը: 50 հարկանի, 400 մլն ԱՄՆ դոլար արժողությամբ աշտարակը կկառուցվի Թել-Ավիվի Կիրյա (Kirya) գործարար թաղամասում, տեղեկացնում է The Jerusalim Post-ը: 2016 թ-ին շինարարության ավարտից հետո «Սարոնա Կենտրոնը» կդառնա Իսրայելի խոշորագույն գրասենյակային աշտարակը: Ըստ նախնական տվյալների՝ աշտարակի 125 հազար քառակուսի մետր մակերեսը կզբաղեցնեն գրասենյակային տարածքները, ինչպես նաև այնտեղ կլինի 1.6 հազար ավտոմեքենայի համար նախատեսված կայանատեղի և 3 հարկանի առևտրային կենտրոն՝ 11 հազար քառակուսի մետր մակերեսով: Նշենք, որ շինարարության ավարտից հետո «Սարոնա Կենտրոնը» կդառնա երկրի բարձրությամբ երկրորդ աշտարակը՝ առջևում թողնելով միայն 244 մետր բարձրությամբ, 68 հարկանի բազմաֆունկցիոնալ «Մոշե Ավիվ Աշտարակին» (Moshe Aviv Tower): «Ազրիելի Գրուփ» ընկերությունը շինարարության համար նախատեսված հողատարածքը ձեռք է բերել Իսրայելի իշխանություններից 140 մլն ԱՄՆ դոլարով անցած տարի: Նշենք, որ այս նոր աշտարակը նախագծել է Իսրայելի հայտնի ճարտարապետ Մոշե Ցուրը (Moshe Zur) «Դավիթ Ազրիելի Արքիթեքթս» (David Azrieli Architects) ընկերության ճարտարապետների հետ համատեղ: Վերջիններս աշտարակը նախագծել են պարզ երկրաչափությամբ, իսկ գրավչություն հաղորդելու համար այնպես են արել, որ ամբողջ շինությունից բացվի հիասքանչ տեսարան դեպի ծովը:

Վենետիկի կառավարությունը հաստատել է «Լույսի պալատ» (Palais Lumiere)՝ 60 հարկանի երկնաքերի կառուցման նախագիծը, որի հեղինակը և հովանավորն է նորաձևության հայտնի ֆրանսիացի դիզայներ, ծագումով իտալացի Պիեռ Կարդենը: Այս մասին գրում է ճարտարապետության վերաբերյալ BDonline բրիտանական ինտերնետային պարբերականը: Նախատեսվում է, որ այս երկնաքերը կդառնա հսկայական նախագծի կենտրոնական լուծումը, որը պետք է իրականացվի պատմական քաղաքի հյուսիսային արվարձանում: Նշենք, որ Վենետիկի քաղաքապետ Լուկա Զայայի (Luca Zaia) խոսքերով, այս երկնաքերը Վենետիկի համար նույն արժեքը կունենա, ինչ «Էյֆելյան աշտարակը» Փարիզի համար: Աշտարակը նախատեսվում է կառուցել Վենետիկի Պորտո Մարգերա (Porto Marghera) կոչվող արդյունաբերական թաղամասում, 1.6 մլն քառակուսի մետր ընդհանուր մակերեսով տարածքի կենտրոնական հատվածում: 244 մետր բարձրությամբ երկնաքերը կազմված կլինի 6 սկավառակներից, որոնք հավասար հեռավորությամբ տեղակայված կլինեն 3 տարբեր բարձրությունների հիմնասյուների վրա: Հայտնի է, որ շինությունն իրենից կներկայացնի բազմաֆունկցիոնալ համալիր, որտեղ առաջնահերթ կլինեն նորաձևության և դիզայնի քոլեջները, ցուցասրահները, ինչպես նաև տարածքներ սկսնակ գործարարների համար: Տարբեր հրապարակումների համաձայն՝ համալիրում կլինեն նաև բնակարաններ, գրասենյակներ, խանութ-սրահներ, ռեստորաններ, կինոդահլիճ, հյուրանոց, դիտահարթակներ, բաց և փակ լողավազաններ, անգամ հիվանդանոց: Ըստ նախնական տվյալների՝ բնակելի տարածքները կզբաղեցնեն 35 հազար, ռեստորաններն ու հյուրանոցը 25 հազար, իսկ գրասենյակային տարածքները 115 հազար քառակուսի մետր տարածք: Նշենք, որ ավտոկայանատեղին կզբաղեցնի 100 հազար քառակուսի մետր, իսկ ահա կանաչ տարածքները 600 հազար քառակուսի մետր տարածք:

Մարտի 9-ին «Էրմիտաժ Գրուփ» (Hermitage Group) շինարարական ընկերության գլխավոր տնօրեն Էմին Իսկենդերովը The Wall Street Journal պարբերականին տրված հարցազրույցի ժամանակ հայտարարել է, որ ընկերությունը ստացել է Փարիզի Լա Դեֆանս (La Defense) գործարար թաղամասում «Էրմիտաժ Պլազա Թաուերս» (Hermitage Plaza Towers) նախագծի կառուցման շինթույլտվությունը: Ըստ պարբերականի տարածած տեղեկատվության՝ տարածքի նախապատրաստական աշխատանքները կսկսվեն այս ամիս, իսկ բուն շինարարությունը 2012 թ-ի վերջին կամ 2013 թ-ի սկզբին: 320 մետր բարձրությամբ երկվորյակ աշտարակները 2017 թ-ին՝ շինարարության ավարտից հետո, կդառնան ոչ միայն Ֆրանսիայի, այլև Եվրոպայի ամենաբարձր շինությունները, եթե իհարկե, մինչ այդ որևէ նոր նախագիծ չիրականացվի: Նախագծի ընդհանուր բյուջեն գնահատվում է 2.61 մլրդ ԱՄՆ դոլար: Նշենք, որ այս գումարից 916 մլն. ԱՄՆ դոլարը կտրամադրեն 4 բանկեր՝ 6.5 տոկոս տարեկան տոկոսադրույքով, իսկ 394 մլն ԱՄՆ դոլարը կներդնի հենց կառուցապատող ընկերությունը՝ «Էրմիտաժ Գրուփ»-ը: Մնացած 1.3 մլն ԱՄՆ դոլար գումարը կհավաքվի նախագծի բնակարանների և գրասենյակային տարածքների վաճառքից: Բնակարանների վաճառքը կիրականացվի շինարարությունը սկսվելուց 1 տարի անց, իսկ նվազագույն գումարը կկազմի 15.7 հազար ԱՄՆ դոլար քառակուսի մետրի համար: «Էրմիտաժ Պլազա Թաուերս» երկվորյակ աշտարակների նախագիծն իրականացրել է հանրաճանաչ Նորման Ֆոսթերի «Ֆոսթեր ընդ Փարթներս» (Foster and Partners) ճարտարապետական բյուրոն: Այն կազմված է 280 հազար քառակուսի մետր բազմաֆունկցիոնալ ընդհանուր տարածքից, որտեղ կլինեն 5-աստղանի հյուրանոց, 543 շքեղ բնակարան, 35 հազար քառակուսի մետր գրասենյակային և 50 հազար քառակուսի մետր առևտրային տարածքներ, ռեստորաններ, ինչպես նաև 20 հազար քառակուսի մետր մակերեսով հանրային գոտի:

4 տարի տևած շինարարական աշխատանքներից հետո Տոկիոյում ավարտվել է աշխարհի ամենաբարձր հեռուստաաշտարակի շինարարությունը, տեղեկացնում է The Telegraph պարբերականը: 634 մետր բարձրությամբ «Տոկիոյի Երկնային Ծառ» (Tokyo Sky Tree) հեռուստաաշտարակի շինարարությունը 2 ամսով հետաձգվել է անցած տարի Ճապոնիայում տեղի ունեցած ավերիչ երկրաշարժի, ցունամիի և ատոմային ճգնաժամի պատճառով: Սակայն ծրագրի գլխավոր կառուցապատողը վստահ է, որ հսկայական աղետի տարելիցի նախաշեմին աշտարակի շահագործման հանձնելը լավագույն ժամանակն է: Արդյունքում այն կնպաստի այս տարի զբոսաշրջության զարգացմանը, քանի որ բազմաթիվ այցելուներ ամբողջ աշխարհից կգան տեսնելու աշխարհի ամենաբարձր հեռուստաաշտարակը: Աշխարհի ամենաբարձր հեռուստաաշտարակը գտնվում է Տոկիոյի Սումիդա (Sumida) թաղամասի Ասակուսա (Asakusa) շրջանում: Ի դեպ, ««Տոկիոյի Երկնային Ծառ» աշտարակը աշխարհի երկրորդ ամենաբարձր շինությունն է Դուբայի 828 մետր բարձրությամբ «Բուրջ Խալիֆի»-ից հետո: Նշենք նաև, որ 4 տարվա ընթացքում աշտարակի շինարարական աշխատանքները իրականացնելիս ներգրավվել են մոտ 580 հազար մարդ, և ծախսվել է ավելի քան 800 մլն ԱՄՆ դոլար գումար: Այսօր աշտարակի շինարարությունն ավարտված է, կիսատ են միայն ներքին հարդարման որոշ աշխատանքներ: Ընկերության կառուցապատողը հեռուստաաշտարակի բացման հանրային հանդիսավոր արարողությունը նախատեսում է մայիսի 22-ին: