Տասներեք տարվա գործունեությունից հետո Google-ը որոշել է ունենալ իր սեփական հասցեն: Համացանցում ամենամեծ որոնողական ցանցի ղեկավարները որոշել են նախագծել և կառուցել ընկերության գլխավոր գրասենյակի շենքը: Շենքի նախագծման աշխատանքներով զբաղվելու է գերմանական Ինգենհովեն ճարտարապետական (Ingenhoven Architects) ընկերությունը: 2011 թ-ին Google-ը մտադիր է աշխատակազմը համալրել ևս 6 հազար մասնագետով, և սա շարունակական բնույթ է կրելու, ուստի նոր և մեծ գրասենյակը նաև անհրաժեշտություն է: Ինչպես տեղեկացնում է Mercury News ինտերնետային կայքը, Google-ն իր գլխավոր գրասենյակը կկառուցի Կալիֆորնիա նահանգում գտնվող փոքրիկ Մաունթին-Վյու (Mountain View) քաղաքում` Պալո-Ալտո (Palo Alto) քաղաքից հարավ Մոֆեթ (Moffett) դաշնային օդանավակայանի հարևանությամբ: Այս տարվա մարտին Google-ը և Մաունթին-Վյուի (Mountain View) քաղաքապետարանը համաձայնագիր են կնքել՝ ընկերությանը 53 տարով վարձակալության հանձնել 9,4 ակր հողատարածք: Նույն համաձայնագրով Google-ը պարտավորվել է վճարել 30 մլն դոլար կանխավճար: Նշենք, որ դեռևս 2007 թ-ին Google-ը և Մաունթին-Վյուի (Mountain View) քաղաքապետարանը մեկ այլ հողի (9,2 ակր) վարձակալության համաձայնագիր էին կնքել: Այս գործարքները թույլ կտան ինտերնետային հսկային սկսել կառուցապատման աշխատանքները և ստանալ մոտ 55 300 քռ. մ. գրասենյակային և հետազոտական տարածքներ: Ինգենհովեն ճարտարապետական ընկերությունն աշխարհում հայտնի է «կանաչ ճարտարապետության» ոլորտում իրականացված հետաքրքիր նախագծերով: Վերջինս նախագծեր է իրականացրել Եվրոպայում, Ասիայում և Ավստրալիայում, որոնց թվում են՝ Եվրոպական ներդրումային բանկի գլխավոր գրասենյակի շենքը՝ խողովակի տեսքով՝ պատրաստված պողպատից և ապակուց, Շտուտգարտի «էկոլոգիապես մաքուր» երկաթուղային կայանը, որը չունի ոչ մի թունավոր արտանետում, ինչպես նաև ջեռուցման, սառեցման և օդափոխության արհեստական համակարգեր: Google-ի ներկայացուցիչը Mercury News ինտերնետային կայքին հայտնել է, - «Մենք խնդրել ենք նախագծել ամենականաչ և հնարավորինս էկոլոգիապես ամենաանվնաս շենքը»: Այս նախագծի մանրամասները դեռևս հայտնի չեն, սակայն Մաունթին-Վյուի (Mountain View) քաղաքապետարանի ներկայացուցիչներն ասում են, որ շինարարությունը կսկսվի 2012 թ-ին:

Այս շաբաթ Նյու Յորքի Շինարարական Կոնգրեսը (Building Congress) հանդես է եկել հայտարարությամբ, համաձայն որի 2010թ-ին շինարարության ծավալները նվազել են 12%-ով և հավասարվել 2005թ-ի ցուցանիշներին: Չնայած քաղաքի տնտեսության կայունացմանը և նոր աշխատատեղերի ավելացմանը՝ 2010թ-ին կրճատվել են բնակելի և առևտրային շենքերի շինարարության ծավալները: Շինարարության ոլորտում 2010 թ-ին ծախսվել է $23.7 մլրդ, 2009 թ-ի $ 27.1 մլրդի փոխարեն: Շինարարության ծավալների նվազման հիմանական պատճառներից է 2009 թվականին երկու մեծ կառույցների՝ Յանկի Մարզադաշտի (Yankee Stadium) և Սիթի Ֆիլդի (Citi Field) շինարարության ավարտը: Ցածր ցուցանիշների պատճառ է նաև այն, որ անշարժ գույքի բումի ժամանակահատվածում, քաղաքում կառուցվում էր ավելի քան 34 հազար բնակարան կամ տուն, իսկ անցած տարի այդ թիվը կազմել է ընդամենը 5.4 հազար: Ինչպես տեղեկացնում են ուսումնասիրության հեղինակները, հսկայական տարբերության կա նաև պետական ֆինանսավորման դաշտում: Բանն այն է, որ 2009 թ-ի $15.7 մլրդի դիմաց, այս տարի ծախսվել է ընդամենը $13.5 մլրդ: 2010թ-ին շինարարության ոլորտում աշխատողների քանակը կրճատվել է 8.9 հազարով, կազմելով 111.8 հազար: Նման ցածր ցուցանիշ չի գրանցվել 2004թ-ից ի վեր: Իրավիճակը կարող էր ավելի ցավալի լիներ, եթե չլինեին երկու խոշոր կառույցների՝ Համաշխարհային Առևտրային Կենտրոնի (World Trade Center) և Բրուքլինի «Ատլանտիկ Յարդս» բասկետբոլային դաշտի (Atlantic Yards) շինարարությունը: 2007թ-ից սկսած, երբ շինարարության ծավալը կազմել էր $31 մլրդ, հաջորդ չորս տարիների ընթացքում ոլորտում գրանցվել է 23% անկում: Նյու Յորքի Շինարարական Կոնգրեսի (Building Congress) ուսումնասիրության համաձայն՝ 2011թ-ին շինարարության ոլորտում ծախսված գումարը կկազմի $24 մլրդ:

Ամերիկյան և բրիտանական կառուցապատող ընկերությունները փոխում են իրենց դիրքորոշումը: Համաշխարհային առաջատար կառուցապատողները հրաժարվում են մարդկային երևակայությունը ցնցող երկնաքերերի շինարարությունից հօգուտ ավելի ավանդական, բայց համեմատաբար եկամտաբերներ կառույցների: Bloomberg լրատվական գործակալությանը տրված հարցազրույցում բրիտանացի ճարտարապետ Քեն Շաթլուորթը (Նորման Ֆոսթերից) հայտարարել է, - «ցուցամոլության դարաշրջանն անցյալում է: Փողն է ամեն ինչ ղեկավարում, և եթե դու կարող ես կրկնակի մատչելի շինարարություն իրականացնել՝ դու դա կանես»: Ըստ տվյալների՝ Սիթիում կառուցվող որոշ երկնաքերեր, այնուամենայնիվ, կավարտվեն, սակայն դրանք, թերևս, կլինեն վերջինները: Օրինակ՝ մարտին Commercial Estates և Hammerson ընկերությունները, որ նախատեսում էին կառուցել 63 հարկանի աշտարակ, հայտարարեցին, թե փոխել են իրենց մտադրությունը, և շինությունը կունենա ընդամենը 32 հարկ: Hammerson ընկերության գործընկեր, փորձագետ Մարտին Ջեփսոնը նշել է, - «Բարձրահարկ շինությունը շատ ծախսատար կլիներ, դրա համար էլ մենք վերանայեցին նախագիծը»: Ինչպես հաղորդում է Bloomberg-ը նույն իրավիճակն է նաև Միացյալ Նահանգներում: Նյու Յորքում, որտեղ 2013 թվականին նախատեսվում է Համաշխարհային առևտրային կենտրոնի բացումը, մինչև այս տասնամյակի վերջ ընդամենը մի քանի երկնաքեր կկառուցվի: Ցածրահարկ և ավանդական շինությունների նկատմամբ հետաքրքրության աճը բացատրվում է երկնաքերերի ծախսատարությամբ: Այսպես՝ Լոնդոնում երկնաքեր աշտարակի 1 քառակուսի մետրի շինարարությունը 50-150 ֆունտ ստեռլինգով թանկ է, քան ավանդական շինությանը: Օրինակ՝ 46 հազար քառակուսի մետր ընդհանուր տարածք ունեցող երկնաքերի կառուցումը կազմում է մոտ 150մլն ֆունտ ստեռլինգ, որը կրկնակի թանկ է, քան ավանդական շենքի կառուցումը: Նման տարբերությունը պայմանավորված է որոշ հանգամանքներով՝ բարձրահարկ շինությանն անհրաժեշտ է հատուկ ինժեներական լուծումներ, բավականին ամուր հիմքեր և ճարտարապետական անսովոր և զարմացնող նախագծեր: Բացի վերոնշյալը երկնաքերերը ներդրումային տեսանկյունից անհրապույր են: Բանն այն է, որ սեփականատերերը, չեն կարող օգտագործել իրենց անշարժ գույքը մինչև շինարարության ավարտը: Այսինքն՝ նրանց ներդրումները բավական երկար ժամանակ եկամուտ չեն բերի: Սակայն հրապուրիչ երկնաքերերը ոչ բոլոր երկրներում են զիջում իրենց դիրքերը: Առավել զարգացած երկրներում երկնաքերերի բումը անցյալ դարի 70-90-ական թվականներն էին, իսկ այժմ արդեն նրանց փոխարինում են առավել ֆունկցիոնալ, կանաչ նախագծերը: Սակայն Ասիայում, որտեղ գրանցվում է ՀՆԱ-ի բավականին աճ, առաջիկա 20 տարում կգերիշխեն այն գաղափարները, որ պետք է կառուցել բարձր և հրապուրիչ: Իսկ դա նշանակում է, որ երկնաքերեր նախագծող ճարտարապետները դեռևս պահանջարկ կունենան, բայց արդեն Չինաստանում, Հնդկաստանում կամ էլ արաբական երկրներում:

Հայտնի ռուսական կոմպոզիտոր Իգոր Կրուտյը Նյու Յորքի հայտնի Plaza Hotel-ում էլիտար բնակարան է գնել՝ Կենտրոնական զբոսայգու հիանալի տեսարանով: Բնակարանը մոտ 557 քմ է և արժե ավելի քան $40 միլիոն: Ինչպես հաղորդում է The Wall Street Journal-ը, այս գործարքը համաշխարհային տնտեսական ճգնաժամի սկսվելուց հետո Նյու Յորքում վաճառված երկրորրդ ամենաթանկ բնակարանն է: Սակայն այս սեփականությունը Կրուտոյի Նյու Յորքյան միակ ձեռքբերումը չէ. 2003 թվականին 34 հարկանի Chatham բնակարանային համալիրում $6.1 միլիոնով նա ձեռք էր բերել շենքի 28-րդ հարկի կեսը, իսկ երեք տարի անց $7.4 միլիոն է վճարում հարևան բնակարանի համար, որն ավելի մեծ էր: 2009 թվականի ապրիլին Կրուտոյը $20 միլիոնով վաճառքի է հանում այս երկու բնակարանները, սակայն մինչ այսօր հաջողվել է վաճառել միայն մեծը, այն էլ $7 միլիոնով: Նշենք նաև, որ Նյու Յորքյան էլիտար բնակարանները Կրուտոյների ընտանիքի միակ անշարժ գույքերը չեն: Նրանց սեփականության տակ են Մոսկվայում մի քանի բնակարաններ, ինչպես նաև տներ Մայամիում և Յուրմալայում:

Նոր Տարվա նախօրեին հայտնի բոստոնյան Ջոն Հենքոք երկնաքերը (John Hancock Tower) գնել է Բոստոն Փրոփերթիսը՝ (Boston Properties) ԱՄՆ $ 930 մլն-ով: Այս շենքը պատկանում էր Նորմանդի Ռեալ Իսթեյթ (Normandy Real Estate Partners) և Ֆայվ Մայլ Քէփիտալ Փարթներս (Five Mile Capital Partners) ընկերություններին, ովքեր 18 ամիս առաջ այն ձեռք էին բերել աճուրդի ժամանակ՝ ընդամենը ԱՄՆ $ 660,6 մլն-ով: Մեկ ու կես տարվա ընթացքում անշարժ գույքի վերավաճառքից ունենալ այսպիսի շահույթ՝ փայլուն գործարք է, ինչը մասնակիորեն ԱՄՆ-ի անշարժ գույքի շուկայի քաոսային վիճակի արդյունք է: Նշենք, որ այս հայտնի երկնաքերի արժեքը 2006-ին մոտ ԱՄՆ$1.3 մլրդ է եղել: Երկնաքերի հատակների ընդհանուր մակերեսը կազմում է 158.000 քմ: 60 հարկանի և 241 մետր բարձրությամբ Ջոն Հենքոք երկնաքերը կառուցվել է 1976 և դեռևս պահպանում է Բոստոնի ամենաբարձրահարկ շենքի տիտղոսը: Շենքը նախագծել է I.M. Pei & Partners ճարտարապետական բյուրոն, որը սույն նախագծի համար 1977 թվականին Ամերիկյան Ճարտարապետության Ինստիտուտի կողմից արժանացավ Ազգային Պատվո մրցանակի: Մասնագետների կարծիքով, լինելով ամբողջովին ապակեպատ, շենքի ճակատները արտացոլում են շրջակա պատմական կառույցների պատկերները, ինչի շնորհիվ քաղաքի պատմական մասի ճարտարապետությունը չի տուժում: Այս «ապակե փորձը» I.M. Pei & Partners-ը իրականացրեց նաև Փարիզի պատմական մասում՝ Լուվրի հանրահայտ ապակե բուրգի նախագծման և շինարարության ժամանակ: Իհարկե այս անգամ, ապակե բուրգը բավական քննադատության արժանացավ: Շենքը կրում է Ամերիկյան հեղափոխության պատրիոտ, Ամերիկայի Անկախության հռչակագրի ամենահայտնի ստորագրության հեղինակ և Մասաչուսեթսի առաջին նահանգապետ՝ Ջոն Հենքոքի (1737-1793) անունը: Ջոն Հենքոք անունը կրում է մեկ երկնաքեր ևս ՝ Ջոն Հենքոքի Կենտրոնը Չիկագոյում: Նրա բարձրությունը 344 մետր է և այն 100 հարկանի է: