Ինչպես տեղեկացնում է Reuters լրատվական գործակալությունը, Google ինտերնետային ընկերությունը Լոնդոնի Թեք Սիթի (Tech City) թաղամասում 7-հարկանի շինության վարձակալության պայմանագիր է ստորագրել: Ընկերությունը նախատեսում է այդ շենքում հիմնել գրասենյակ, որտեղ կաշխատեն սկսնակները և նորարարություններ մշակողները: Արևելյան Լոնդոնի Թեք Սիթիում տեխնոլոգիական կենտրոն հիմնելու գաղափարը ներկայացրել է Մեծ Բրիտանիայի վարչապետ Դեյվիդ Քամերոնը (David Cameron) դեռևս 2010 թ-ի նոյեմբերին: Բացի Google-ից այդ գաղափարը ողջունել են նաև կապի օպերատոր Vodafone ընկերությունը, Facebook սոցիալական ցանցը, Intel միկրոչիպերի արտադրողը և այլ խոշոր բարձր տեխնոլոգիական ընկերություններ: Կենտրոնում, որը նախատեսվում է բացել 2012 թ-ին, կաշխատեն նաև ինտերնետ-տեխնոլոգիաների ոլորտում գործարարությանը աջակցող խորհրդատուներ, ինչպես Google-ից, այնպես էլ այլ ընկերություններից: Ըստ Bloomberg լրատվական գործակալության տվյալների՝ Google-ի կողմից վարձակալված նոր շինության ընդհանուր մակերեսը կազմում է 2.323 քառակուսի մետր, իսկ վարձավճարը 7.8 մլն ԱՄՆ դոլար 10 տարվա համար: Վարձակալության պայմանագիրը ստորագրված է 10 տարով, մինչև 2022 թ-ը: «Հարմար շինություն գտնելն առաջին կարևոր քայլն էր: Հուսով ենք՝ առաջիկա ամիսներին կկարողանանք հայտարարել այն ընկերությունների անունները, ում հետ աշխատելու ենք, և թե ինչպես են նրանք օգտագործելու վարձակալված տարածքը», - հայտարարել է Google ընկերության Բրիտանիայի մասնաճյուղի տեխնոլոգիական բաժնի տնօրեն Դեյվիդ Սինգլթոնը (David Singleton), ավելացնելով՝ «Արևելյան Լոնդոնը արդեն համարվում է հարյուրավոր բրիտանական սկսնակների տունը, և ունի տնտեսական աճի, նոր աշխատատեղերի ստեղծման հսկա պոտենցիալ»:
Ավստրալիայի խոշորագույն քաղաքը՝ Սիդնեյը, գեր-էլիտար բնակարանների գների թանկացման ցուցանիշով դարձել է առաջատարն աշխարհի հզոր ֆինանսական կենտրոնների շարքում: Ինչպես նշված է Savills ընկերության հաշվետվության մեջ, 2011 թ-ի առաջին կիսամյակում Սիդնեյում նման բնակարանների գները բարձրացել են 40 տոկոսով: Ընկերության մասնագետների կարծիքով Հոնկոնգը, Տոկիոն, Փարիզը, Լոնդոնը, Մոսկվան, Նյու Յորքը, Շանհայը, Սինգապուրը, Մումբայը և Սիդնեյը համարվում են համաշխարհային ֆինանսական խոշորագույն կենտրոններ, և ամենահայտնի քաղաքները, որոնք գրավիչ են գեր-էլիտար բնակարնների շուկայում ներդրումների տեսանկյունից: Արդյունքում գեր-էլիտար բնակարանների գներն այս քաղաքներում գնալով թանկանում են: Այս ոլորտում բնակարանների գները 2011 թ-ի առաջին կիսամյակում թանկացել են նաև Փարիզում՝ 23 տոկոսով, Սինգապուրում՝ 16 տոկոսով, Հոնկոնգում՝ 10 տոկոսով և Մումբայում՝ 7 տոկոսով: Պետք է նշել, որ գեր-էլիտար բնակարանների ամենաբարձր գները գրանցվել են Հոնկոնգում: Նման բնակարանների 1 քառակուսի մետրի արժեքը Հոնկոնգում կազմում է 113 հազար ԱՄՆ դոլար: Սա ավելին է քան Տոկիոյում՝ 1 քառակուսի մետրի դիմաց 87 հազար ԱՄՆ դոլար, Փարիզում՝ 1 քառակուսի մետրի դիմաց 55 հազար ԱՄՆ դոլար և Լոնդոնում՝ 1 քառակուսի մետրի դիմաց 50 հազար ԱՄՆ դոլար:
Սեպտեմբերի 15-ին մայրաքաղաքի Մալաթիա-Սեբաստիա վարչական շրջանում տեղի ունեցավ ժամանակակից չափանիշներին համապատասխան կառուցված հեծանվահրապարակի բացման արարողությունը, հաղորդում է «Արմենպրես» լրատվական գործակալությունը: Նոր հեծանվահրապարակի շինարարությունը սկսվել էր 2010 թվականի հունիսին՝ Երևանի քաղաքապետարանի և «Ռենկո ԱրմԷստեյտ» ՍՊԸ-ի միջեւ կնքված պայմանագրի համաձայն: Հայաստանի Հանրապետությունում հեծանվասպորտի զարգացման նպատակով, իտալական ընկերության կողմից կառուցված հեծանվահրապարակը հագեցած է ժամանակակից սարքավորանքով, անվտանգության համակարգով, ունի մարզասրահներ, բժշկական և դոպինգի ստուգման սենյակ, մարզիչների համար նախատեսված գրասենյակ, բացօթյա 250 մեքենայի համար նախատեսված կայանատեղի և այլ հարմարություններ: Հեծանվահարապարակը ունի 250 մետր երկարությամբ վազքուղի և 3200 հանդիսատեսի համար նախատեսված դահլիճ: Վազքուղին կառուցվել և ծածկվել է բարձրորակ փայտով, ինչը մարզիկներին թույլ կտա գրանցել արագության լավ արդյունքներ:
Պեկինում սկսվել է նոր հսկա օդանավակայանի շինարարությունը, որն իր մակերեսով հավասար կլինի Բերմուդյան կղզիներին և կունենա 9 թռիչքուղի, տեղեկացնում է The Telegraph-ը: Նոր օդանավակայանը կանվանվի «Պեկին-Դեքսինգ միջազգային օդանավակայան» (Beijing Daxing International airport), և շինարարության ավարտից հետո՝ 2015 թ-ին, օրեկան կսպասարկի մոտ 370 հազար ուղևոր Չինաստանի մայրաքաղաքը դարձնելով աշխարհի ամենածանրաբեռնված ավիացիոն հանգույցը: Համեմատության համար նշենք, որ Երևանի նորաբաց Զվարթնոց օդանավակայանի ուղևորափոխադրման հնարավորությունը մոտ 40 անգամ պակաս է այս Չինական հսկայի հնարավորություններից: Դեռևս 3 տարի առաջ Պեկինում բացվեց Սեր Նորման Ֆոսթերի նախագծված Մայրաքաղաքային օդանավակայանի (Beijing Capital Airport) 3-րդ տերմինալը, որն իր մակերեսով ավելի մեծ է, քան Լոնդոնի Հիթրոու (Heathrow) օդանավակայանի 5 տերմինալները միասին: Սակայն երկրի ավիացիոն ուղեվորափոխադրումների բումը դարձրեց Չինաստանի ներկայիս օդային ենթակառուցվածքները չափազանց հագեցած: Գոյություն ունեցող Մայրաքաղաքային օդանավակայանը ի վիճակի է տարեկան սպասարկել 75 մլն ուղևոր: Ի դեպ, անցած տարի օդանավակայանի ուղևորահոսքը կազմել է 73 մլն, և, մասնագետների կարծիքով, 2 տարի անց օդանավակայանն այլևս ի վիճակի չի լինի սպասարկել աճող ուղևորահոսքը: Ինչպես նշում է երկրի Քաղաքացիական ավիացիայի նախարար Լի Ջիքսինգը, «Մայրաքաղաքային օդանավակայանի թռիչքացուցակն այնքան հագեցած է, որ անհրաժեշտության դեպքում անհնար է որևէ նոր թռիչք ավելացնել»: Հաշվի առնելով բոլոր խնդիրները` Չինաստանում որոշեցին նոր օդանավակայան կառուցել 54 քառակուսի կիլոմետր տարածքի վրա, որը գտնվում է Պեկինի Դեքսինգ (Daxing)՝ արվարձանում, (և կպահանջվի 1 ժամ մայրաքաղաք հասնելու համար:) մայրաքաղաքից 1 ժամ հեռավորության վրա: Նախատեսվում է օդանավակայանի շինարարությունից հետո դեպի մայրաքաղաք ընդլայնել ինչպես մետրոպոլիտենը, այնպես էլ կառուցել նոր արագընթաց երկաթգիծ: Նոր օդանավակայանը կսպասարկի ոչ միայն Պեկինը, այլև Տիանջինը (Tianjin) և Հեբեյի մի մասը (Hebei): Ըստ նախնական տվյալների՝ Պեկին-Դեքսինգ օդանավակայանը կունենա 9 թռիչքուղի, որոնցից 8-ը կունենան քաղաքացիական նշանակություն, իսկ 1-ը ռազմական: Պետք է նշել, որ օդանավակայանը կառուցվում է այնպիսի վայրում, որը նոսր է բնակեցված, չկան շատ շինություններ և, անհրաժեշտության դեպքում, հնարավոր է ընդլայնել այն՝ կառուցելով հավելյալ թռիչքուղիներ:
Ինչպես տեղեկացնում է The National ինտերնետային կայքը, համաձայն նախատեսված գրաֆիկի՝ Աբու-Դաբիի Քորնիչ (Corniche) թաղամասում, կամ դրա շրջակայքում առաջիկա ամիսների ընթացքում շահագործման կհանձնվեն մի քանի երկնաքերեր, որոնք պարունակում են մոտ 1400 լյուքս կարգի բնակարաններ: Նախագծերը համալրված են սպասարկման ժամանակակից միջոցներով, այդ թվում՝ լողավազաններ տանիքներում, ֆիթնես-ակումբներ և այլն: Ռեքս անշարժ գույքի (Rex Real Estate) գործակալության տնօրեն Ալմեր Ագմիրենի (Almer Agmyren) խոսքերով, որոշ մարդիկ Դուբայից վերադառնում են Աբու-Դաբի ապրելու, քանի որ մայրաքաղաքում ևս աստիճանաբար կառուցվում են բարձր մակարդակի շինություններ: Առաջիկա ամիսներին շինարարությունը կավարտվի և շահագործման կհանձնվեն՝ Էթիհադ Աշտարակը (Etihad Towers), որը գտնվում է Էմիրեյթս Փէլիս (Emirates Palace) հյուրանոցի մոտ, 47-հարկանի Սեբա Աշտարակը (Seba Tower), որն առավել հայտնի է Ալ Էյն Աշտարակ (Al Ain Tower) անունով, ինչպես նաև Նեյշն Աշտարակը (Nation Towers): Քլաթթոնս (Cluttons) խորհրդատվական ընկերության մասնագետ Սթիվ Մորգանի խոսքերով, Քորնիչ թաղամասում կառուցվող ցանկացած նախագիծ թանկագին զարդ է դառնում այդ հիանալի պսակի մեջ: Էթիհադ Աշտարակի առաջին 885 բնակարանները վարձակալության համար հասանելի կդառնան այս տարվա հոկտեմբերից: 67 քառակուսի մետր մակերեսով, մեկ ննջարանով բնակարանների տարեկան վարձը կսկսի մոտ 27 հազար ԱՄՆ դոլարից, իսկ 160 քառակուսի մետր ընդհանուր մակերեսով երկու ննջարաններով բնակարաններինը՝ 61.3 հազար ԱՄՆ դոլարից: 732 քառակուսի ընդհանուր մակերեսով փենթհաուսների վարձակալությունը տարեկան կկազմի 265 հազար ԱՄՆ դոլար: Համարժեք գներով հոկտեմբերի վերջին կսկսեն վարձակալության հանձնվել նաև Ալ Էյն Աշտարակի բնակարանները, իսկ ահա Նեյշն Աշտարակն արդեն շահագործման կհանձնվի մյուս տարվա գարնանը:
