Չնայած բավականին զարմանալի, առաջին հայացքից անգամ մի քիչ էլ վախեցնող է հնչում, սակայն փաստ է, որ Ռուսաստանում արդեն սկսվել է աշխարհում առաջին լողացող ատոմակայանի շինարարությունը: Այն նախատեսված է ինչպես անվտանգ ատոմային էներգիայի արտադրման, այնպես էլ մաքուր ջրի մատակարարման համար: Ի դեպ, այս ատոմակայանը շինարարության ավարտից հետո կկարողանա ապահովել 200 հազար բնակչի էլէկտրական էներգիայի պահանջները: Ակադեմիկոս Լոմոնոսովի անունը կրող կայանը կառուցվում է սուզանավերի համար նախատեսված նավաշինարանում: Չնայած այս նոր ատոմակայանը նախատեսված է ափամերձ շրջանների համար, այն լայն հնարավորություններ ունի: Այն կարող է էներգիա մատակարարել նաև հեռավոր գյուղեր, գիտական կայաններ և անգամ լողացող քաղաքներ: Ի դեպ, շինարարության ավարտը նախատեսված է մինչև 2020 թ-ը: Այս ատոմակայանը ի վիճակի կլինի արտադրել 70 մեգավատ էլեկտրաէներգիա, ինչը բավական է միջին մեծության քաղաքների մատակարարման համար: Բացի էներգիայի արտադրությունը, այս ատոմակայանը նախատեսված է նաև ջրի մաքրման և ջրի տեղական ռեսուրսների մեծացման համար: Այն ժամանակ, երբ ամբողջ աշխարհը քննարկում է Ճապոնիայի Ֆուկուսիմա ատոմակայանի ճակատագիրը, որի ավերվելուն հաջորդեցին ավերիչ ցունամին և ռադիոակտիվ նյութերի արտահոսքը, բավականին տարօրինակ է հնչում այնպիսի նախագծի իրականացումը, որտեղ համատեղված են ջուրն ու ատոմային էներգիան: Սակայն հարկ է նշել, որ վերոնշյալ կայանը օգտագործելու է ավելի քիչ հագեցած ուրան:

Այսօր Մոսկվայի Տրիֆոնովի անվան փողոցում տեղի ունեցավ ՀՀ տարածքից դուրս գտնվող Հայ առաքելական եկեղեցու ամենամեծ շինության՝ Հայ Առաքելական եկեղեցու Ռուսաստանի և Նոր Նախիջևանի թեմի վանական համալիրի բացման հանդիսավոր արարողությունը: Եկեղեցու բացման հանդիսավոր արարողությանը գլխավորում էր Հայ Առաքելական եկեղեցու առաջնորդ Գարեգին II-ը: Բացման հանդիսավոր արարողությանը ներկա էր երեկ Մոսկվա ժամանած ՀՀ նախագահ Սերժ Սարգսյանը, ԼՂՀ-ի նախագահ Բակո Սահակյանը, Մոսկվայի և Համայն ռուսիո պատրիարք Նորին Սրբություն Կիրիլը և այլ բարձրաստիճան հյուրեր Ռուսաստանից և Հայաստանից: Հայ Առաքելական եկեղեցու վանական համալիրի հիմնաքարի օծման արարողությունը տեղի է ունեցել 2004թ-ին Մոսկվայում: Տրիֆոնովի փողոցի վրա գտնվող վանքի հիմքում խորհրդանշական պարկուճը տեղադրել էր Մոսկվայի և Համայն ռուսիո հանգուցյալ պատրիարք Ալեքսի II-ն ու Գարեգին II-ը: Շինարարական աշխատանքները սկսվել են 2006թ-ին, իսկ Սուրբ խաչի օծման արարողությունը տեղի է ունեցել 2011թ-ին: Ինչպես նախկինում տեղեկացրել էինք, շինարարական աշխատանքերի ավարտը նախատեսված էր 2012 թ-ի վերջին: Եկեղեցու ճարտարապետն է Արտակ Ղուլյանը, իսկ համալիրը կառուցվել է բացառապես հայ և ռուս մեկենասների նվիրատվությունների շնորհիվ: Եկեղեցական համալիրի ընդհանուր մակերեսը կազմում է 13.2 հազար քառակուսի մետր: Տաճարի բարձրությունը 50 մետր է, իսկ գմբեթի տրամագիծը 21 մետր: Գլխավոր խաչի բարձրությունը կազմում է 7 մետր, իսկ մյուս 5 խաչերի բարձրությունը կազմում է 4 - ական մետր: Եկեղեցու պատերի վրա ընդհանուր առմամբ պատկերված է 72 խաչ: Եկեղեցական համալիրը ներառում է մայր տաճար, «Սուրբ Խաչ» փոքրիկ եկեղեցի, թեմի առաջնորդի նստավայր, կրթամշակութային և ադմինիստրատիվ մասնաճյուղեր, հանդիսությունների սրահ, թանգարան և 200 մեքենաների համար նախատեսված կայանատեղի: Ի դեպ, նմանատիպ Հայ Առաքելական եկեղեցու համալիր, որը ներառում է մայր տաճար և կրթական կենտրոն, բացի Մայր Աթոռ Սուրբ Էջմիածնից, աշխարհի որև է այլ վայրում չկա:

Սոչիի արվարձաններում՝ «Կարմիր բացատ» (Красная Поляна) լեռնային հանգստավայրի ճանապարհին, կառուցվում է յուրօրինակ զվարճանքների այգի: Հենց այս այգու տարածքում էլ կառուցվում է զբոսնելու համար նախատեսված աշխարհի ամենաերկար կախովի կամուրջը: Կառուցվող կամրջի ընդհանուր երկարությունը կազմում է 440 մետր և այն ձգվում է Մզիմտա գետի վրայով: Զվարճանքների լեռնային զբոսայգին կներառի նաև հսկայական ճոճանակ, «Թռչող աղվես» անվանումը կրող 2 ատրակցիոն, ռեստորան, բար և 300 ավտոմեքենայի համար նախատեսված ավտոկայանատեղի: Այս յուրօրինակ զբոսայգու շինարարությունը նախատեսվում է ավարտել այս տարվա վերջին: Նշենք, որ նմանատիպ զբոսայգիներ արդեն հաջողությամբ գործում են Գերմանիայում, Ֆրանսիայում, Չինաստանում, Ավստրալիայում և Սինգապուրում:

Հեղինակավոր Forbes ամսագիրը հրապարակել է Ռուսաստանի անշարժ գույքի «արքաների» վարկանիշային աղյուսակը, որում ընդգրկված 30 ներկայացուցիչներից 3-ը հայեր են։ «Տաշիր» հոլդինգի սեփականատեր Սամվել Կարապետյանը 3-րդ հորիզոնականում է։ ՌԴ-ում անշարժ գույքի վարձակալությունից ստացվող նրա տարեկան եկամուտը կազմում է 720 մլն ԱՄՆ դոլար։ Ի դեպ, անցած տարվա վերջին ընկերության կողմից հրավիրված մամուլի ասուլիսի ժամանակ հայտարարվել է, որ 2012 թ-ին ընկերության եկամուտը կկազմի 2.9 մլրդ ԱՄՆ դոլար: Սամվել Կարապետյանն անշարժ գույք ունի Մոսկվայում, Սանկտ Պետերբուրգում, Ռեուտովում, Յարոսլավլում, Բելգորոդում, Իվանովոյում, Կալուգայում, Սոչիում, Յալթայում, Վոլոգդայում, Տուլայում, Տվերում, Սմոլենսկում, Երևանում և այլուր։ Անցած տարվա հոկտեմբերին լուրեր տարածվեցին, որ ընկերությունը պատրաստվում է գործունեություն ծավալել նաև Սոչիում : Նրա ամենամեծ անշարժ գույքի համալիրներն են Մոսկվայում գտնվող «ՌԻՈ» առևտրի կենտրոնը՝ 300 հազար քառակուսի մետր տարածքով, և «Երևան պլազա»-ն՝ 80 հազար քառակուսի մետր տարածքով։ Սամվել Կարապետյանն առաջին գումարը վաստակել է Հայաստանում՝ 1990-ականների սկզբին, ապա տեղափոխվել է Կալուգա, որտեղ զբաղվել է մեծածախ առևտրով և տեքստիլի արտադրությամբ։ Այժմ «Տաշիր»-ը բազմապրոֆիլային ընկերություն է։ Ցուցակի 25-րդ տեղն է զբաղեցրել Դանիլ Խաչատուրովը, ով «Լեգիոն դեվելոփմենթ» (Legion Development) ընկերության սեփականատերն է։ Վարձավճարներից նրա տարեկան եկամուտը 80 մլն ԱՄՆ դոլար է կազմել։ Գործունեություն է ծավալում Մոսկվայում։ Խոշոր անշարժ գույքի համալիրներն են «Լեգիոն 1-ին» և «Լեգիոն 3-րդ»-ը՝ ընդհանուր 130 հազար քառակուսի մետր ընդհանուր մակերեսով։ Խաչատուրովը սկզբում զբաղվել է արժեթղթերի առքուվաճառքով, աշխատել է «Սլավնավթ»-ում, մասնակցել է «Ռոսգոսստրախ» -ի մասնավորեցմանը, որի գլխավոր տնօրենն է դարձել 2004 թ-ին։ Այժմ «Ռոսգոսստրախ» բանկի համասեփականատեր է։ Դանիլ Խաչատուրովը սիրում է զբաղվել էքստրեմալ սպորտաձևերով։ 26-րդ տեղը զբաղեցրել է Գագիկ Ադիբեկյանը։ Վարձավճարներից նրա տարեկան եկամուտը 70 մլն ԱՄՆ դոլար է կազմել։ Գործունեություն հիմնականում ծավալում է Մոսկվայում։ Խոշոր օբյեկտներն են «Ռոմանով դվոր» (43.500 քառակուսի մետր) և «Վրեմենա գոդա» (64.000 քառակուսի մետր) բիզնես կենտրոնները։ «ԱրԴի Գրուփ»-ի (RD group) սեփականատեր Գագիկ Ադիբեկյանը մոսկովյան շուկայի ամենահանելուկային մարդկանցից է։ 1997թ-ին նա վերանորոգել է Մոսկվայի կենտրոնում գտնվող «Ռոմանով դվոր» բիզնես կենտրոնը։ Թե ինչով է զբաղվել մինչ այդ, անհայտ է։ «ԱրԴի Գրուփ»-ը 2012 թ-ին ձեռք է բերել «Վրեմենա գոդա» առևտրի կենտրոնի 40 տոկոսը և այժմ, մամուլի տվյալներով, բանակցություններ է վարում մյուս 60 տոկոսի գնման շուրջ։ Forbes-ի ցուցակը գլխավորում է «Կիևյան Հրապարակ» (Киевская Площадь) ընկերությունը, որի սեփականատերերն են ծագումով ադրբեջանից Զարահ Իլիևը և Գոդ Նիսանովը, որոնց տարեկան եկամուտը վարձավճարներից կազմում է 1.1 մլրդ ԱՄՆ դոլար։ Երկրորդ տեղում «ԻԿԵԱ Մոս.» (IKEA Мос.) ընկերությունն է, որի սեփականատերն ազգությամբ շվեդ Ինգվար Կամպրադն ու իր ընտանիքն է։

Ֆլորիդա նահանգի Մայամի շրջանի անշարժ գույքի շուկայում նոր ռեկորդ է սահմանվել: Ինչպես տեղեկացնում է The Wall Street Journal պարբերականը, 47 մլն ԱՄՆ դոլար գումարով առանձնատունը ձեռք է բերել ազգությամբ ռուս անհայտ գնորդը: Վերջինիս ինքնությունը բացահայտել չի հաջողվել, քանի որ առուվաճառքն իրականացվել է ԱՄՆ-ում գրանցված մի ընկերության միջոցով: Ի դեպ, Forbes ամսագիրը նույնպես վկայում է, որ Մայամիի անշարժ գույքի շուկայում սա մինչ օրս գրանցված ամենաթանկ գործարքն է: Նոր առանձնատունը գտնվում է Բիսքեյն ծովածոցում (Biscayne Bay) տեղակայված հսկվող կղզու վրա: Աստեղ ապրում են շատ նշանավոր մարդիկ, ներառյալ Խուլիո Իգլեսիասը: 2790 քառակուսի մետր մակերեսով առանձնատանը կա 10 ննջասենյակ, 14 լոգասենյակ, մի քանի հյուրասենյակ, բար, ձայնագրման ստուդիա, մարզադահլիճ, գրադարան, մերսման սենյակ, 3-D կինոդահլիճ, արվեստի գործերի պահպանման սենյակ, լողավազան և գինիների մառան, որտեղ կարելի է հասնել միայն մատնահետքերը ստուգելուց հետո: Կզղում տեղակայված է նաև գոլֆի ակումբ: Նշենք, որ հատուկ այս առանձնատան համար Բահամյան կղզիներից մի քանի տոննա վարդագույն ավազ է բերվել: Այս հրաշալի առանձնատան շինարարությունը սկսվել է 2008 թ-ին: Շինարարությամբ զբաղվել են կառուցապատողներ Շլոմի Ալեքսանդրը (Shlomi Alexander) և Ֆելիքս Կոհենը (Felix Cohen): Տունը վաճառքի է հանվել 2011 թ-ին 60 մլն ԱՄՆ դոլարով, իսկ անցած տարվա ընթացքում վերջինիս առաջարկվող գինը իջել է մինչև 52 մլն ԱՄՆ դոլար: