Հարավային Չինաստանի Չժուհայ (Zhuhai) քաղաքում նախատեսվում է կառուցել նոր երկնաքեր, որը կունենա ձկան տեսք: Նորագույն դիտաաշտարակը նախագծել է «ԱրԷմՋեյԷմ» (RMJM) ճարտարապետական ընկերությունը: Իրենց գործունեության ընթացքում ընկերության ճարտարապետները հիմնականում ներշնչվել են Դոումեն (Doumen) շրջանի ջրային մշակույթով: Ի դեպ, երկնաքերը նախատեսվում է կառուցել 2 խոշորագույն գետերի միաձուլման հատվածում: Ըստ ծրագրի հեղինակների` շինարարության ավարտից հետո «Չժուհայի դիտաաշտարակ» (Zhuhai Observation Tower) անվանումը ստացած երկնաքերը կդառնա քաղաքի գլխավոր տեսարժան վայրը: Ըստ նախնական տվյալների` աշտարակի բարձրությունը կկազմի մոտ 100 մետր, իսկ երկնաքերի ամբողջ դիմային հատվածը պատված կլինի 1400 ծակոտկենավոր ալյումինե վահանակներով, որոնք էլ աշտարակին կհաղորդեն ձկան արտաքին տեսք: Սակայն պետք է նշել, որ բացի ձկան արտաքին տեսքից, այս երկնաքերը նաև պատկերելու է ձկան թռիչք: Վերջինս կազմված է լինելու 12 երկչափ կորերից, որոնք և երկնաքերին հաղորդելու են ջուրը ցատկող ձկան տեսք` միևնույն ժամանակ խորհրդանշելով Չժուհայ քաղաքի արագ զարգացումն ու ծաղկումը: Երկնաքերը լինելու է բազմաֆունկցիոնալ, այդ իսկ պատճառով բաժանվելու է 3 հիմնական գոտիների: Առաջին գոտում տեղակայվելու են հիմնականում առևտրային կենտրոններ և ռեստորաններ, երկրորդ գոտին բացառապես նվիրված է լինելու այցելուների հանգստին, իսկ ահա երրորդ և ամենաբարձր գոտին լինելու է դիտահարթակը, որն այցելուներին առաջարկելու է 360 աստիճան քաղաքի տեսարան:

3D-տպիչների հեղափոխությունը այնպիսի բարձունքի է հասել, որ այսօր շատերի տանը հնարավոր է տեսնել դրանք: Սակայն ինչ՞ կարելի է ասել այն գաղափարի մասին, որ նմանատիպ տպիչով տուն կառուցվի: Այսօր «ԴիՅուՍի Արքիթեքթս» (DUS Architects) ճարտարապետական բյուրոն Նիդեռլանդներից աշխատում է նմանատիպ նախագծի վրա և կառուցում է աշխարհի առաջին 3D-տպագիր տունը: 3D-տպիչի փոխարեն ընկերության մասնագետները օգտագործում են հսկայական մի սարքավորում, որի չափսերը 10 անգամ գերազանցում են սովորական 3D-տպիչի չափսերը: Վերոնշյալ սարքավորումը ստացել է «Կամերմեյքեր» (KamerMaker) անվանումը, որը թարգմանաբար նշանակում է «Սենյակներ կառուցող» (Room Builder): Շինանյութի փոխարեն տպիչը օգտագործում է «բիոպլաստիկ», որը, փոշու վերածելու արդյունքում, հնարավոր է ենթարկել երկրորդական վերամշակման: 3D-տպիչը հնարավորություն է տալիս էականորեն պակասեցնել շինարարական ծախսերը: Աշխարհի առաջին 3D-տպագիր տունը կառուցվում է պլաստմասե մասերից, որոնք տպվում են հենց տեղում,որից հետո պատրաստի հատվածներն իրար են ամրացվում: Յուրաքանչյուր առանձին հատվածի չափսը կազմում է մոտ 3 մետր, իսկ վերջինիս տպագրության համար անհրաժեշտ է լինում 1 շաբաթ: Ինչպես պնդում են «ԴիՅուՍի Արքիթեքթս» ճարտարապետական բյուրոյում, ընկերությունը պատրաստվում է ոչ միայն տունը տպել, այլև անհրաժեշտ ողջ կահույքը: Ի դեպ, ապագայում ընկերությունը նախատեսում է որպես շինանյութ օգտագործել նաև այլ նյութեր, մասնավորապես` փայտյա մանրաթելեր և բիովերամշակվող այլ նյութեր, որոնք կծառայեն որոշ ժամանակ, անյուհետև հեշտությամբ կվերամշակվեն: 2 տասնամյակ առաջ 3D-տպագիր առարկաների մասին գաղափարը թվում էր գիտական ֆանտաստիկա: Սակայն վերջին մի քանի տարիների ընթացքում 3D տպագրական արդյունաբերությունը զարգանում է ոչ թե տարեցտարի, այլ օրեցօր կամ ժամ առ ժամ: Այսօր 3D տպիչներով արդեն տպում են զենք, կոշիկ, ուտելիք և անգամ նավակներ: Այս ամենից հետո, բնականաբար, սպասելի էր նաև տպագրված տների շինարարությունը: Տպագրվող «Canal House» կոչվող տունը Ամստերդամի քաղաքապետը ներկայացրել է Բարակ Օբամային, վերջինիս երկիր կատարած պաշտոնական այցի ժամանակ:

Տեխնոլոգիաների հսկա Apple ընկերությունը իրավունք է ստացել Հյուսիսային Կարոլինայում կառուցել իր երրորդ արևային էլեկտրակայանը: Անցած շաբաթ Կլերմոնտ քաղաքի իշխանությունները հավանություն են տվել ընկերության կողմից ներկայացված նախագծին, որը ենթադրում է քաղաքային հողատարածքի օգտագործում նոր արևային էլեկտրակայան կառուցելու նպատակով: 405 հազար քառակուսի մետր մակերեսով էլեկտրակայանի կառուցման համար ներդրումը կկազմի 55 մլն ԱՄՆ դոլար: 17.5 մեգավատ հզորությամբ կայանի շինարարության ժամանակ նախատեսվում է ստեղծել 75 աշխատատեղ: Արևային էլեկտրակայանի շինարարության համար հատկացված հողատարածքը չի գտնվում քաղաքի սահմաններում: Պաշտոնական տվյալներով այն գտնվում է քաղաքային իշխանությունների արտատարածքային իրավասության տակ, այնուամենայնիվ իշխանությունները տարածքի տրամադրման որոշում են կայացրել: Ի դեպ, վերոնշյալ համաձայնագիրը մեկ այլ կետ էլ է նախատեսում, համաձայն որի, Apple ընկերության և քաղաքային իշխանությունների միջև տարածքների փոխանակում է կատարվել: Ընկերությունը քաղաքին է հատկացրել 2 հողատարածք, որոնք նախատեսված են կանաչ զբոսուղիների (արահետներ, հեծանվորդների և մարզիկների համար` շրջապատված բուսականությամբ), հանրային հանգստի և այլ հանրային միջոցառումների համար: Նշենք, որ շինարարության ավարտից հետո այս արևային էլեկտրակայանը կդառնա երրորդը: 20 մեգավատ հզորությամբ առաջին արևային էլեկտարակայանը ընկերությունը կառուցել է Հյուսիսային Կարոլինայի Մեյդեն քաղաքում, իսկ երկրորդ արևային էլեկտրակայանի, դարձյալ 20 մեգավատ հզորությամբ, շինարարությունը ավարտվել է 2013 թ-ին Կոնովերում: Նշենք, որ հենց այս կայաններն են սնում Մեյդեն քաղաքի iCloud տվյալների կենտրոնը էլեկտրաէներգիայով: Ինչպես պնդում է Apple ընկերությունը այսօր ընկերության բոլոր տվյալների կենտրոնները սնուցվում են բացառապես այլընտրանքային էներգիայով:

Չնայած այն փաստին, որ Դուբայն այսօր համարվում է աշխարհի խոշորագույն առևտրային կենտրոնի հայրենիքը (Dubai Mall), այնուամենայնիվ սա դեռ բավարար չէ: Դուբայի իշխանություններն օրերս ներկայացրել են նոր, ավելի խոշոր առևտրային կենտրոնի նախագիծ, որն իր չափսերով էականորեն կգերազանցի նախորդ տիտղոսակրին: Ըստ նախնական տվյալների` «Աշխարհի առևտրային կենտրոն» (Mall of the World) անվանումը ստացած նախագիծը կլինի ջերմակառավարվող յուրօրինակ «հետիոտնային քաղաք»: 4.5 մլն քառակուսի մետր մակերեսով մեգանախագիծը կկառուցվի «Համաշխարհային ցուցահանդես 2020»-ին (World Expo 2020) ընդառաջ և իր մեջ կներառի աշխարհի խոշորագույն առևտրային կենտրոնը, աշխարհի խոշորագույն ընտանեկան զվարճանքների փակ այգին, և 280 հազար քառակուսի մետր մակերեսով առողջարանային համալիր: Նշենք նաև, որ այս յուրօրինակ նախագծի բյուջեն գնահատվում է 6.8 մլրդ ԱՄՆ դոլար, իսկ ֆինանսավորումն ու շինարարությունն էլ նախատեսվում է իրականացնել մի քանի փուլերով: Նախագծի ներկայացման ժամանակ Դուբայի կառավարիչ շեյխ Մուհամեդ բին Ռաշիդ Ալ Մակթումը հայտարարել է, որ ինչպես և խոստացել էր, Դուբայը պետք է վերափոխի մշակութային, զբոսաշրջիկային և տնտեսական խոշորագուն կենտրոնի տարածաշրջանում բնակվող ավելի քան 2 մլրդ բնակչության համար: Այժմ շեյխ Մուհամեդն ամեն ինչ անում է իր առջև դրված նպատակի իրականացման համար: Ինչպես պնդում են նախագծի հեղինակները, այս նոր կենտրոնը տարեկան Դուբայ կբերի հավելյալ 180 մլն զբոսաշրջիկների, ինչպես նաև կնպաստի ընտանեկան զբոսաշրջության զարգացմանը: Ինչպես վերը նշվեց, այս յուօրինակ «բաց քաղաքում» կկառուցվի մոտ 743 հազար քառակուսի մակերեսով աշխարհի խոշորագույն առևտրային կենտրոնը, մոտ 100 հյուրանոց, որոնք զբոսաշրջիկներին կառաջարկեն 20 հազար սենյակ: Առևտրային կենտրոնը կլինի ջերմակառավարվող և իր մեջ կպարունակի 7 կիլոմետր երկարության առևտրային զբոսուղի: Այստեղ կտեղակայվի նաև աշխարհի խոշորագույն ընտանեկան զվարճանքների կենտրոնը` ծածկված հսկայական ապակե տանիքով, որը հնարավոր կլինի բացել ձմռանը: Կենտրոնում կգործի նաև մշակութային թաղամաս, որտեղ կկառուցվի Դուբայի խոշորագույն հանդիսությունների սրահը նախատեսված 15 հազար անձի համար:

2015 թ-ի հոկտեմբերին Մոսկվայի հյուսիս արևելքում գտնվող «Հյուսիսային» գյուղում կառուցվող Մոսկվայի ֆիզիկատեխնիկական ինստիտուտի տեխնոպարկի հարևանությամբ կհայտնվի նորագույն նանոմասնիկներով, «ձայնային» և լուսավոր գծանշումերով «Ռոսնանո» անվանումը կրող ասֆալտբետոնե ճանապարհ: Այս մասին հաղորդում է M24.ru կայքը` վկայակոչելով գիտության, արդյունաբերական քաղաքականության եւ ձեռնարկատիրության վարչության պետ Ալեքսեյ Կոմիսարովին: 655 մետր երկարությամբ և 15-18,5 մետր լայնությամբ նորարարական ճանապարհը կսկսվի Դոլգոպրուդնենսկ մայրուղուց: Նախագծի իրականացման համար կպահանջվի 5,6 մլն ԱՄՆ դոլար: Շինարարության ժամանակ կկիրառվի «կոլոիդա-նանոդիսպերսային և պոլիմերային բաղադրիչներով» ասֆալտբետոն ճանապարհի պիտանելիության ժամանակը երկարեցնելու համար: «Կայունացնող» հավելումները պետք է մեծացնեն ասֆալտի «պիտանելիությունը» երեք անգամ և խոչընդոտեն սառնամանիքների ժամանակ ճաքերի առաջացմանը: Ինչպես պնդում է կայքը, ճանապարհային պոլիմերային ժապավեններից պատրաստած նշագծումը ավելի կայուն կլինի ավտոմոբիլային անվադողերի ազդեցությանը: Բացի այդ, նոր ճանապարհի վրա փորձակում են լուսադիոդային նշագծում: «Անցուղիների» վրա, հնարավոր է, կանգնեցնեն 3D հոլոգրամա, որպեսզի վարորդները կանգնեցնեն մեքենան հետիոտային անցումների առաջ: «Ռոսնանոյում» առաջարկել են շինարարության ժամանակ օգտագործել նաև մանրացված ավտոմոբիլային անվադողեր: