Իրաքյան ծագումով աշխարհահռչակ բրիտանացի ճարտարապետ Զահա Հադիդը կիրականացնի աշխարհի ամենաշքեղ մետրոպոլիտենի կայարանի նախագծի իրականացումը, որը կկառուցվի Սաուդյան Արաբիայի մայրաքաղաք Էր-Ռիադում: Ըստ նախնական տվյալների՝ թագավորի անունը կրող ֆինանսական թաղամասում գտնվող համանուն (King Abdullah Financial District (KAFD) Metro Station) կայարանի ընդհանուր մակերեսը կկազմի 20,434 հազար քառակուսի մետր: Նախատեսվում է, որ նորակառույց ենթակառուցվածքը կհամապատասխանի իր թագավորական տիտղոսին և կդառնա ամենաշքեղն ու թանկն աշխարհում՝ մարմարե հատակներով և ոսկեզոծ պատերով: Նշենք նաև, որ Էր-Ռիադի 6 գծերից բաղկացած նոր մետրոպոլիտենի շինարարությունը սկսվել է նախորդ տարի և թագավորի հրամանով պետք է ավարտվի չորս տարուց: Մետրոպոլիտենի կայարանի գլխավոր ճարտարապետի խոսքերով՝ նախագծի վրա աշխատելիս նա ոգեշնչվել է Սաուդյան Արաբիայի անապատների ավազաթմբերով, որոնց սահուն եզրագծերն էլ փորձել է արտացոլել իր նախագծում: Համաձայն ներկայացված նախագծի՝ մետրոպոլիտենի մուտքը նույնպես կտարբերվի ավանդական նախասրահից. առջևում կկառուցվի յուրօրինակ մի շինություն, որտեղ կտեղակայվեն ավտոկայանատեղին և առևտրային համալիրը: Զահա Հադիդը նպատակ ունի լուծել բավականին լուրջ խնդիրներ՝ առավելագույնը օգտագործել արևի լույսը և միաժամանակ պաշտպանել տարածքը աշխարհի ամենակիզիչ արևի ճառագայթներից, իսկ ճարտարագետների օգնությամբ նախագծել ամենակատարելագործված օդափոխության և հովացման համակարգը:

Դուբայի «Զաբիլ Փարք» (Zabeel Park) այգում կառուցվում է 150 մետր բարձրությամբ շրջանակաձև նոր աշտարակ: Ըստ նախնական տվյալների՝ «Դուբայի Շրջանակ» (Dubai Frame) անվանումը ստացած նոր կառույցի շինարարությունը կավարտվի մյուս տարվա վերջին: 32.3 մլն ԱՄՆ դոլար արժողությամբ նախագիծը հաղթել է 2009 թ-ին հայտարարված «Դիսսենքրափ Էլեվայթոր» (ThyssenKrupp Elevator) ճարտարապետական մրցույթում, իսկ շինարարությունը սկսվել է անցած տարի: Ինչպես հաղորդում են լրատվամիջոցները, նոր աշտարակում կլինեն դիտահարթակներ և թանգարան, որոնք կկարողանան տարեկան 2 մլն այցելու ներգրավել: Նոր աշտարակը յուրօրինակ հուշարձան կդառնա, որը կառանձնացնի քաղաքի անցյալն ապագայից: Բանն այն է, որ «Դուբայի Շրջանակի» մի կողմից կերևա քաղաքի նոր ժամանակակից մասը՝ ներառյալ աշխարհի ամենաբարձր աշտարակը` «Բուրջ Խալիֆան», իսկ մյուս կողմից էլ քաղաքի պատմական առևտրային կենտրոնը՝ «Դեյրան» (Deira) և «Դուբայ Քրիք» (Dubai Creek) ծովածոցը: Ըստ նախնական տվյալների՝ «Դուբայի Շրջանակ» նախագիծն ամբողջությամբ թափանցիկ կլինի՝ հագեցած վերելակներով, որոնք այցելուներին կտեղափոխեն աշտարակի գագաթ՝ շրջանակի ապակեպատ հատակով հորիզոնական հատված: Առաջին հարկում կտեղակայվի թանգարան, որը կներկայացնի քաղաքի զարգացման պատմությունը: Իսկ ահա վերին հորիզոնականում կտեղակայվեն ապակեպատ հատակով բացօթյա սրճարանը և դիտահարթակները:

Դեռևս 2011թ-ի վերջին գերմանական «Պորշե Դիզայն Գրուփ» (Porsche Design Group) և տեղական «Դեզեր Փրոփերթիս» (Dezer Properties) ընկերությունները հայտարարեցին Մայամիում «երկնային ավտոտնակներ» պարունակող «Պորշե Աշտարակ» (Porsche Tower) նախագծի մասին: Երկու տարի առաջ այն ընդամենը նախագիծ էր, իսկ այսօր արդեն իրականություն: Ապրիլի 19-ին Մայամիում տեղի է ունեցել «Պորշե Աշտարակի» հիմնարկեքի հանդիսավոր արարողությունը: Աշտարակի հիմնական առավելությունն ապակե վերելակն է, որը պետք է բնակարանատերերի ավտոմեքենաները բարձրացնի դեպի «երկնային ավտոտնակներ»: Նոր աշտարակի շինարարությունը կտևի 33 ամիս, իսկ բացման հանդիսավոր արարողությունը տեղի կունենա 2016 թ-ի առաջին եռամսյակում: Ըստ նախնական տվյալների՝ յուրօրինակ 60-հարկանի աշտարակում կլինի 132 էլիտար բնակարան, որոնցից 50 տոկոսն արդեն վաճառված է: Նշենք, որ այդ բնակարանների վաճառքից գոյացած գումարը կազմում է 400 մլն ԱՄՆ դոլար: Աշտարակում կլինեն 390-1600 քառակուսի մետր մակերեսով բնակարաններ, որոնց գինը տատանվում է 4.5-25 մլն ԱՄՆ դոլարի սահմաններում: Չնայած «Պորշե Աշտարակն» իր բնակիչների համար նախատեսում է բազմաթիվ հարմարություններ, մասնավորապես՝ լողավազան, բացօթյա խոհանոց, սպա արևմտյան պատշգամբում, սպա-կենտրոն, բազմանշանակ ակումբ և օվկիանոսային տեսարանով պարասրահ, այնուամենայնիվ շինության հիմնական առավելությունը «երկնային ավտոտնակներն» ու «ավտոմեքենայի պարեկ» ծառայություններն են: Նշենք, որ այս տեխնոլոգիան նորություն չէ աշխարհում: Մասնավորապես 2012 թ-ի հոկտեմբերին Սինգապուրում բացվեց այնպիսի բարձրահարկ բնակելի երկնաքեր, որն առաջարկում է ավտոկայանատեղի անմիջապես ձեր բնակարանում՝ անկախ թե որ հարկում է այն գտնվում: Նոր 30 հարկանի «Հեմիլթոն Սքոթս» (Hamilton Scotts) երկնաքերը գտնվում է Օրչարդ-Ռոուդ (Orchard Road) շքեղ թաղամասում: Այն ունի յուրօրինակ վերելակ՝ նախատեսված ավտոմեքենաների համար, որոնց բարձրացնում է անմիջապես սեփականատերերի բնակարաններում գտնվող հյուրասենյակի հարևանությամբ տեղակայված ապակե ավտոտնակներ: Իսկ 2010 թ-ին հայտնի Հոլիվուդյան աստղ Նիկոլ Քիդմանը և իր ամուսին Կիտ Ուրբանը Մանհեթենի էլիտար թաղամասում՝ Չելսիում (Նյու Յորք), ձեռք էին բերել մի փենթհաուս, որը նույնպես ունի 32.5 քառակուսի մետր մակերեսով վերելակով հասանելի ավտոտնակ, որը խոհանոցի հետ նույն հարկում է գտնվում:

Լի դինաստիային (Ly Dynasty) բնորոշ վիշապի տեսքով նոր կամուրջը կառուցվել է Վիետնամում Հան գետի (Han River) վրա: Վեց շարք երթևեկություն ապահովող կամուրջի ընդհանուր երկարությունը կազմում է 666, իսկ լայնությունը 37.5 մետր: Վիշապանման կամուրջի շինարարությունը սկսվել է 2009 թ-ին, իսկ շինարարության համար ծախսվել է 4 տարի և 85 մլն ԱՄՆ դոլար: Նշենք, որ այս կամուրջը համարվում է խոշորագույնն աշխարհում իր տեսակի մեջ, և միակը հարավարևելյան Ասիայում, որը բաղկացած է այս երկարության պողպատե կամարից: Պողպատե կամարի երկարությունը կազմում է 166 մետր, իսկ վիշապի ընդհանուր երկարությունը, որը կշռում է 9000 տոննա, 568 մետր է: Բացի չափսերից և արտաքին տեսքից, այս կառույցը հետաքրքրական է նաև իր լուսավորությամբ: Կամուրջի վիշապանման հատվածի վրա տեղադրված է 2500 լուսադիոդային լամպեր: Սակայն կամուրջի հիմնական տպավորիչ առանձնահատկությունն այն է, որ վիշապն իրականում հրաշունչ է և անգամ կարողանում է թքել: Բայց նրա այս կախարդական հնարավորությունները կօգտագործվեն միայն տոնական օրերին: Նշենք, որ ճարտարապետական այս յուրօրինակ կառույցը նախագծել է «Լուիս Բերգեր Գրուփ» ընկերությունը (Louis Berger Group):

Մարտի 22-ին Կոպենհագենում բացվել է Եվրոպայի խոշորագույն ակվարիումը՝ «Կապույտ մոլորակը» (Blue Planet), որի նախագիծը մշակել է «3ԻքսԷն» (3XN) ճարտարապետական ընկերությունը: Ակվարիումն ընդհանուր առմամբ պարունակում է 7 մլն լիտր ջուր, որտեղ ապրում են բազմաթիվ ջրային կենդանիներ և բույսեր: Նախագծողների պնդմամբ, բացի ճանաչողական նպատակից, այս ակվարիումի կարևոր առաքելությունն է անհետացող տեսակների պահպանումը, ջրի որակի բարձրացումը, շրջակա միջավայրի պահպանումը, էկոլոգիական գիտակցության բարձրացումը: Նախագծի մշակումը սկսվել է դեռևս 2007 թ-ին, երբ միջազգային մրցույթի շրջանակներում տեղական «3ԻքսԷն» ճարտարապետական ընկերությունը հաղթեց նախագծի իրականացման իրավունքը: Նոր զարմանահրաշ ակվարիումը գտնվում է Էրեսուն (Øresund) նեղուցի ափին և ոլորապտույտ երթուղիներով ծովային միջավայրը ուսումնասիրելու նպատակով այցելուներին ընկղմում է ծովի հատակը: Համալիրի նախասրահում այցելուները կարող են ընտրել 4 ոլորապտույտներից մեկը, որոնք տանում են դեպի ցուցասրահներ: Այս ցուցասրահները ներկայացնում են մարջանի խութերը, օվկիանոսը, աֆրիկյան լճերը, ամազոնյան գետերը և այլն: «Կապույտ մոլորակում» այսօր բնակվում են 450 տեսակի ջրային կենդանի և բույս, մասնավորապես՝ 20 հազար ձկներ, շնաձկներ, ծովառյուծներ, գաճաճ կոկորդիլոսներ և այլ ջրային բնակիչներ: Ակվարիումի ջուրը ֆիլտրացվում և կրկին վերադառնում է ակվարիում փակ համակարգի միջոցով, իսկ ծովի ջուրն օգտագործվում է ակվարիումը մշտապես սառը պահելու նպատակով: Ի դեպ, ոլորապտույտ ցուցասրահներից մեկը տանիքից լուսավորվում է լուսարձակների միջոցով: