Հնդկաստանը պատրաստվում է կառուցել աշխարհի խոշորագույն արևային էլեկտրակայանը: Ըստ նախնական տվյալների` վերջինիս նվազագույն հզորությունը կլինի 4000 մեգավատ, ինչը համահավասար է 4 լայնամասշտաբ ատոմային ռեակտորների հզորությանը: Փաստացիորեն, հնդկական էլեկտրակայանը մինչ այժմ կառուցված էլեկտրակայանների հզորությունը կգերազանցի 10 անգամ: «Ուլտրա-Մեգա Կանաչ Արևային Էլեկտրակայանի» (Ultra-Mega Green Solar Power Project) ընդհանուր մակերեսը կկազմի 77 հազար քառակուսի կիլոմետր: Համաձայն տարածված տվյալների` նախագծի առաջին 1000 մեգավատ հզորությամբ փուլը կավարտվի 3 տարում: 4,4 մլրդ ԱՄՆ դոլար բյուջեով այս նախագծի իրականացման համար համախմբվել են հնդկական 6 պետական ընկերություններ: Հնդկաստանի հյուսիսային Ռաջաստան նախանգում գտնվող Սամբհար աղի լճի հարևանությամբ էլ նախատեսվում է իրականացնել այս նախագիծը, որի շինարարությունը կտևի 7 տարի: Համաձայն նախագծի` այս արևային էլեկտրակայանի շահագործման ժամկետը կլինի ամենաքիչը 25 տարի: Հնդկաստանի իշխանությունների պնդմամբ` վերոնշյալ էլեկտրակայանը տարեկան կարտադրի 6.4 մլրդ կիլովատ-ժամ էլեկտրաէներգիա, ինչը հնարավորություն կտա տարեկան 4 մլն տոննայով կրճատել մթնոլորտ արտանետվող ածխաթթու գազի ծավալները: Նշենք, որ 2010 թ-ին Հնդկաստանի բոլոր արևային էլեկտրակայանների հզորությունը միասին կազմել է 17,8 մեգավատ, իսկ արդեն 2013 թ-ին հասել է 2208 մեգավատի: Համաձայն ավելի վաղ իշխանությունների որդեգրած քաղաքականության` 2022 թ-ին արդեն երկրում բոլոր արևային էլեկտրակայանների ընդհանուր հզորությունը պետք է հասնի 20 գիգավատի:

Reuters լրատվական գործակալության փոխանցմամբ Լոս Անջելեսում կառուցվող «Նյու Վիլշայեր Գրանդ Աշտարակի» (The New Wilshire Grand Tower) հիմնային աշխատանքների իրականացման ժամանակ իրականացվել է բետոնի ռեկորդային քանակությամբ լցոնում: Ընդհանուր առմամբ աշտարակի հիմքում լցոնվել է 38200 տոննա կշռով 16210 խորանարդ մետր բետոն: Այս ամենի իրականացման համար անհրաժեշտ է եղել 19 ժամ, որի ընթացքում մոտ 200 բետոնատար մեքենաներ կատարել են 2120 ուղերթ: Մասնագետները գտնում են, որ ամրանալու համար նմանատիպ քանակությամբ բետոնին անհրաժեշտ կլինի 2 շաբաթ, որի ընթացքում բետոնը կհովացվի հիմքում տեղադրված ջրի խողովակներով: Նշենք, որ բետոնի լցոնման արարողության ժամանակ ներկա են եղել նաև Գինեսի ռեկորդների գրքի ներկայացուցիչները, ովքեր արդեն հաստատել են նոր նվաճումը: Բետոնի անդադար լցոնման նախորդ ռեկորդը` ընդամենը 152 խորանարդ մետր, պատկանում է 1999 թ-ին կառուցված «Վենետիկյան հանգստավայր հյուրանոց, խաղատանը» (Venetian Resort Hotel and Casino), որը գտնվում է Լաս-Վեգասում: 335 մետր բարձրությամբ «Նյու Վիլշայեր Գրանդ Աշտարակի» բացումը նախատեսված է 2017 թ-ին: 73 հարկանի աշտարակում կտեղակայվեն 900 սենյակ ունեցող 5-աստղանի հյուրանոց, գրասենյակներ և առևտրային կենտրոններ: Շինարարության գլխավոր կառուցապատողը «Կորեական ավիաուղիներ» (Korean Airlines) ընկերությունն է, որը պատրաստվում է նախագծում ներդնել ավելի քան 1 մլրդ ԱՄՆ դոլար:

«Նոր Մոսկվայում» Յամոնտովո գյուղի շրջակայքում «ՄԻՑ» ընկերությունների խումբը կկառուցի 500 հազար քառակուսի մետր մակերեսով նոր միկրոշրջան, տեղեկացնում է «Կոմմերսանտ»-ը: Միկրոշրջանի շինարարության համար ընկերությունը 67 մլն ԱՄՆ դոլար գումարով ձեռք է բերել 56.4 հա հողատարածք: Նախագծի իրականացման ժամկետների մասին ոչինչ չ հաղորդվում, միայն նշվում է, որ, ըստ նախնական հաշվարկների, վերջինիս բյուջեն կկազմի 720 մլն ԱՄՆ դոլար: Նշենք, որ 2013 թ-ի տվյալներով «Նոր Մոսկվայում» գրանցվել է բնակելի շինարարության առավելագույն ծավալներ, ինչի շնորհիվ շահագործման հանձնված բնակարանների քանակը 2.5 անգամ գերազանցել է բնակեցվածներին: Ինչպես տեղեկացնում է «РБК» պարբերականը հղում կատարելով «Бест-Новострой» ընկերության վերլուծաբաններին` 2013 թ-ի սկզբին «Նոր Մոսկվայում» գտնվող 115 բնակելի կառույցների փոխարեն 2014 թ-ին դրանց թիվը հասել է 292-ի: Մոսկվայի տարածքների ընդլայնման նախագիծը խոշորագույնն է քաղաքի վարչական տարածքային բաժանման պատմության մեջ: Ըստ նախագծի` նախկին Մոսկվայի ընդհանուր մակերեսը մոտ 2.4 անգամ ընդլայնվել է Մոսկվայի մարզի տարածքների հաշվին: Նախագիծը պաշտոնապես հանրությանն է ներկայացվել 2011 թ-ի հունիսի 11-ին, իսկ 2012 թ-ի հուլիսի 1-ին այն պաշտոնապես հաստատվել է: Արդյունքում Մոսկվան աշխարհի տարածքով խոշորագույն քաղաքների 11-րդ հորիզոնականից բարձրացել է 6-րդ հորիզոնական:

Աշխարհի առաջին լողացող քաղաքը շուտով իրականություն կդառնա: «Ազատության նավ» անվանումը ստացած նախագիծը կներառի դպրոցներ, հիվանդանոցներ, այգիներ և անգամ օդանավակայան: Ըստ նախնական տվյալների` այս նորագույն քաղաքում կկարողանան տեղավորվել 50 հազար բնակիչներ և 30 հազար այցելուներ: Նշենք, որ իր հսկայական չափերի պատճառով, այս նավ-քաղաքը չի կարողանա մոտենալ և ոչ մի նավահանգստի: Տարվա 70 տոկոսն այն կխարսխի խոշորագույն քաղաքների մոտ, իսկ մնացած ժամանակահատվածում կլողա դեպի տարբեր քաղաքներ և երկրներ: Նախագծի գլխավոր կառուցապատող «Միջազգային Ազատության Նավ» (Freedom Ship International Inc.) կազմակերպությունը վստահեցնում է, որ նախագծի շինարարությունը շուտով կսկսվի: Սակայն միևնույն ժամանակ ընկերության փոխնախագահը նշում է, որ նախագծի բյուջեն կազմում է 10 միլիարդ ԱՄՆ դոլար, և ընկերությունը կարող է սկսել շինարարությունը եթե կարողանա հավաքել սկզբնական 1 մլրդ ԱՄՆ դոլարը: Այսօր ԱՄՆ կառավարության հետ նախագծի ֆինանսավորման վերաբերյալ բանակացություններ են տարվում: Շինարարության ավարտից հետո նավ-քաղաքը կունենա 1370 մետր երկարություն, ինչը 4 անգամ ավելի երկար է աշխարհահռչակ Queen Mary II զբոսաշրջային նավից: Այս նորագույն լողացող քաղաքը կունենա 25 հարկ, որտեղ կտեղակայվեն դպրոցներ, հիվանդանոցներ, գեղարվեստական պատկերասրահներ, խանութներ, այգիներ, խաղասրահներ, ակվարիում և օդանավակայան, որը կկարողանա սպասարկել մասնավոր և կոմերցիոն ոչ մեծ օդանավերի: Նշենք նաև, որ լողացող կառույցը կօգտագործի արևային և քամու էներգիա:

«Ջեդդա տնտեսական ընկերության» (Jeddah Economic Company) նորանշանակ գործադիր տնօրեն Մոնիբ Համմոուդը (Mounib Hammoud) հայտարարել է, որ «Արքայական Աշտարակի» (Kingdom Tower) հիմնային աշխատանքներն արդեն ավարտված են: Ինչպես նշում է Arab News լրատվական գործակալությունը, սա նշանակում է, որ շուտով կսկսվեն շինարարական աշխատանքներն արդեն հողի մակերևույթի վրա և դրանից բարձր: Նշենք, որ անցած տարվա հոկտեմբերին շինարարական Bauer ընկերությունը հայտարարել էր, որ Սաուդյան Արաբիայի մայրաքաղաք Ջեդդայում կառուցվելիք աշխարհի ամենաբարձր աշտարակի հիմքային աշխատանքները սկսելու վերաբերյալ պայմանագիրն արդեն ստորագրված է: Իսկ «Արքայական Աշտարակի» մասին առաջին անգամ հայտարարվել է 2011 թ-ի օգոստոսի 2-ին, երբ Սաուդյան Արաբիայի արքայազն, միլիարդատեր Ալվալիդ իբն Թալալը (Alwaleed bin Talal) և երկրի խոշորագույն կառուցապատող Բեն Լադեն Գրուփ (Bin Laden Group – հիմնված է աշխարհի, արդեն հանգուցյալ, համար 1-ին ահաբեկչի հոր կողմից) ընկերությունը համաձայնագիր ստորագրեցին՝ Կարմիր ծովի ափին գտնվող Ջեդդա քաղաքում կառուցել 1.2 մլրդ ԱՄՆ դոլար արժողությամբ աշխարհի ամենաբարձր երկնաքերը: Այս տարվա հուլիսի 20-ին Չինաստանի Չանշա (Changsha) նահանգում սկսվեց աշխարհի ամենաբարձր երկնաքերի շինարարությունը: «Բրոուդ Սըսթեյնեբլ Բիլդինգ» (Broad Sustainable Building) ընկերությունը նախատեսել էր 7 ամսում կառուցել 838 մետր բարձրությամբ երկնաքեր՝ օգտագործելով «հավաքովի» կառուցվածքներ: Սակայն մի քանի օր անց շինարարական աշխատանքները դադարեցվեցին փաստաթղթային խնդիրների պատճառով: