Այս տարվա սկզբին Google ընկերությունը հայտարարել էր, որ Լոնդոնի հանրահայտ «Քինգս Քրոսս» (King’s Cross) կայարանի հարևանությամբ նոր գլխավոր գրասենյակ կկառուցի , որի բյուջեն գնահատվում էր մոտ 1.6 մլրդ ԱՄՆ դոլար: Օրերս տարբեր լրատվամիջոցներ ներկայացրել են ընկերության լոնդոնյան գլխավոր գրասենյակի նախագծի պատկերը: Նորագույն գրասենյակային համալիրը նախագծել է «Օլլֆորդ Հոլլ Մոնագան Մորրիս» (Allford Hall Monaghan Morris) ճարտարապետական ընկերությունը: Ըստ ընկերության ներկայացրած տվյալների՝ գրասենյակային համալիրի ընդհանուր մակերեսը կկազմի 270 հազար քառակուսի մետր և այն կունենա 11 հարկ: Google-ը պատրաստվում է «Քինգս Քրոսս» կայարանի հարևանությամբ կառուցվելիք նոր գրասենյակում կենտրոնացնել Լոնդոնում գտնվող իր ներկայիս 2 գրասենյակների աշխատանքը, որոնք այժմ գտնվում են Վիկտորիա (Victoria) և Քովենթ-Գարդեն (Covent Garden) շրջաններում: Ինչպես նորագույն նախագծերի մեծ մասը, այս շենքը ևս կլինի էկոլոգիապես մաքուր՝ ճարտարապետները մտադիր են ստանալ BREEAM կանաչ շենքերի սերտիֆիկացման (Բրիտանիա) ամենաբարձր գնահատականը, ինչպես նաև արժանանան Ամերիկյան LEED Պլատինե հավաստագրման: Նոր համալիրը կկառուցվի օգտագործելով պողպատե կոնստրուկցիաներ, ապակի և խաչաձև-սոսնձված փայտանյութ: Վերջին տասնամյակում գրեթե անհնար է որևէ մեկին զարմացնել Լոնդոնում կառուցվելիք նախագծերով, սակայն այնպիսի տեխնոլոգիական հսկաներ, ինչպիսիքն են՝ Apple-ը, Google-ը և Facebook-ը, կարողացել են հասնել այնպիսի աստիճանի, որ ցանկացածի հետաքրքիր է՝ ինչ են նրանք կառուցում և ինչպիսի պայմաններում պիտի աշխատեն աշխարհի ամենաստեղծագործ և ՏՏ խելոք մարդիկ: Ընկերության նորագույն նախագիծը, որոնք շատերը նաև անվանում են «գետնաքեր», կլինի բազմահարկ, որը մի ծայրում կունենա 7 հարկ, որն էլ աստիճանաբար կհասնի 11 հարկի շենքի մյուս ծայրում: Շենքը հիմնականում կկառուցվի փայտից, ինչը հնարավորություն կտա շինարարության ընթացքում 40 տոկոսով կրճատել մթնոլորտ արտանետվող ածխաթթու գազի քանակը: Հարկ է նշել, որ առաջին անգամ նման լայնամասշտաբ համալիրի կառուցման ժամանակ ներքին կոնստրուկցիաները կկառուցվեն պողպատից և խաչաձև-սոսնձված փայտանյութից: Նորագույն համալիրում կլինեն 67 հազար քառակուսի մետր մակերեսով գրասենյակներ, 4600 քառակուսի մետր մակերեսով առևտրային տարածքներ և 1860 քառակուսի մետր մակերեսով կայանատեղի հեծանիվների համար:
«Ադջայե Ասոշիեյթս» (Adjaye Associates) ճարտարապետական ընկերությունը մշակել է դիտարան և ուսումնական կենտրոն հուշարձանի նախագիծ՝ ի պատիվ կաթնասունների, սողունների, թռչունների և վայրի բնության այլ վերացած տեսակների: Նոր քարե շինությունը վեր կխոյանա Անգլիայի Պորտլենդ կղզում, «Բովերս Քուորրի» քարհանքի (Bowers Quarry) տեղում: 30 մետր բարձրությամբ հուշարձանը կներառի ցուցասրահ, տեղեկատվական կենտրոն և դիտարան: Նոր նախագիծը մշակվել է «Բովերս Քուորրի» (Bowers Quarry) քարհանքի համար, որը 1700-ական թվականներից ի վեր հանդիսանում է պորտլենդյան քարի աղբյուր և որտեղ գտնվել են վերացած հնադարյան հարյուրավոր կենդանիների և բույսերի մնացորդներ: Ըստ նախնական տվյալների՝ գալարաձև կառույցը ամբողջությամբ նվիրված կլինի բուսական և կենդանական աշխարհի մահացած և այստեղ հայտնաբերված 860 տեսակներին, որոնց պատկերները կքանդակվեն կառույցի քարե ճակատային հատվածի վրա: Կառույցի ներսում կլինի «կենսաբազմազանության զանգակատուն», որն ամեն անգամ կահազանգի որևէ նոր տեսակի վերացման մասին: Կառույցի արտաքին հարդարումը կիրականացվի վերամշակված նյութերով և տեղական բնական քարով:
Սաուդյան միլիարդատեր Ալ Վալիդ բին Թալալը հայտարարել է, որ պատրաստվում է կառուցել 1.6 կիլոմետր բարձրությամբ երկնաքեր աշխարհի խոշորագույն քաղաքներից մեկում: Մասնավորապես նա առանձնացրել է ՝ Մոսկվան, Շանհայը, Լոնդոնը կամ Նյու Յորքը՝ քաղաքներ, որ հավակնում են դառնալ այս երկնաքերի հայրենիքը: Բացի այդ նա Դուբայի հայտնի կառուցապատող Emaar Properties ընկերության նախագահ Մուհամեդ Ալաբարին (Mohammed Alabbar) առաջարկել է միանալ իրականացնելու այս նախագիծը: Ալ Վալիդը չի մանրամասնել՝ ինչպես է ֆինանսավորվելու նախագիծը, և երբ է սկսվելու ու ավարտվելու երկնաքերի շինարարությունը, բայց նա հայտնել է, որ հետաքրքրված երկրները պետք է առաջարկեն շահագրգռող պայմաններ, հարկային արտոնություններ և պետական աջակցություն: Համաձայն փորձագետների՝ աշխարհի ամենաբարձր երկնաքերի նախագծողները հանդիպելու են մի շարք դժվար լուծելի խնդիրների, մասնավորապես՝ բարձր հարկեր խմելու ջրի մատակարարմանը: Եթե ենթադրվող երկնաքերը կառուցվի, ապա այն իր հետևում կթողնի աշխարհի ներկայիս ամենաբարձր շինությունը՝ 828 մետր բարձրությամբ «Բուրջ Խալիֆան», ինչպես նաև Ջիդդայում կառուցվող 1 կիլոմետր բարձրությամբ «Արքայական աշտարակին»: «Արքայական աշտարակի» հողային աշխատանքները սկսվել են ընթացիկ տարում, իսկ շինարարությունը նախատեսվում է ավարտել 2017 թ-ին: 1.2 մլն ԱՄՆ դոլար բյուջեով նախագիծը կներառի հյուրանոցներ, առևտրային և բնակելի տարածքներ:
Սաուդյան Արաբիայի կառավարությունը որոշել է մուսուլմանների սուրբ քաղաք Մեդինայի (Medinah) մոտ կառուցել նոր քաղաք ուխտավորների համար: Նոր քաղաքը կտեղակայվի Մարգարեի մզկիթի՝ Մասջիդ ալ-Նաբավիի մոտ և կունենա 1.6 մլն քառակուսի մետր ընդհանուր մակերես: Այն ի վիճակի կլինի հյուրընկալել մոտ 200 հազար ուխտավորների, ովքեր ամեն տարի գալիս են Մեդինա: Սրբազան քաղաքում կկառուցվեն երկաթուղային և ավտոմոբիլային կայարաններ, հյուրանոցային ցանց, 400 հիվանդի համար նախատեսված հիվանդանոց և այն բոլոր ենթակառուցվածքները, որոնք անհրաժեշտ են հարմարավետ կացության համար: Ըստ նախնական տվյալների՝ նախագիծը կֆինանսավորվի ինչպես մասնավոր, այնպես էլ պետական ներդրումների արդյունքում: Ենթադրվում է, որ շինարարությունը կսկսվի մոտակա ամիսներին:
Ամերիկյան ճարտարագիտական «ԷյԻՔՕՄ Թեքնոլոջի Քորփորեյշն» (AECOM Technology Corporation) ընկերությունը և բրիտանական «Զահա Հադիդ Արքիթեքթս» (Zaha Hadid Architects) ճարտարապետական բյուրոն միավորվել են Կատարի Ալ-Վակրա (Al Wakrah) պատմական շրջանում նախագծելու 2022 թ-ի ֆուտբոլի աշխարհի առաջնության համար նախատեսված մարզական կառույցը: Նախագծի մանրամասները դեռևս չեն հրապարակվում, սակայն AECOM ընկերության տվյալներով, նոր մարզադաշտը հագեցած կլինի այնպիսի էներգախնայող տեխնոլոգիաներով, որոնք հնարավորություն կտան անապատի կիզիչ արևի տակ գտնվող մարզադաշտը հովացնել: Ալ-Վակրա պատմական շրջանը հայտնի է իր հարուստ մշակութային ժառանգությամբ, մասնավորապես՝ հնագիտական վայրերով, իսլամական ճարտարապետությամբ և պատմական կառույցներով, ուստի և կառույցի գլխավոր ճարտարապետի առջև կարևորագույն խնդիր է դրված նախագծել այնպիսի մարզադաշտ, որը չի խաթարի շրջանի պատմական կերպարը: Ըստ նախնական տվյալների՝ մարզադաշտի շինարարությունը կսկսվի ընթացիկ տարում և արդեն 2022 թ-ին Ալ-Վակրայում կհայտնվի 45 հազար հանդիսատեսի համար նախատեսված մարզադաշտ, որը հետագայում այլ միջոցառումների համար կարող է փոխակերպվել մինչև 20 հազար նստատեղով մարզադաշտի: Կառույցը շրջապատված կլինի կանաչ տարածությամբ, որտեղ բույսերի կողմից արտադրվող թարմ թթվածինը կօգնի հովացնել և մաքրել օդը: Ալ-Վակրայում կառուցվելիք մարզադաշտը միակ մարզական կառույցը չէ, որ նախագծել է աշխարհահռչակ ճարտարապետ Զահա Հադիդը: 2013 թ-ին Հադիդին հաջողվեց հաղթել Ճապոնիայի մայրաքաղաք Տոկիոյում կառուցվելիք մարզադաշտի նախագծման մրցույթում: Բացի այդ նա է նախագծել նաև Լոնդոնի 2012 թ-ի Օլիմպիական խաղերի գլխավոր կառույցներից մեկը՝ «Ջրային մարզաձևերի կենտրոնը»:
