Ինչպես հայտարարել է նախագծի գլխավոր կառուցապատող արաբական «Թամիիր» (Tameer) ընկերությունը, աշխարհի ամենաբարձր բնակելի շենքի՝ 414 մետր բարձրությամբ «Փրինցես Թաուերի» (Princess Tower) շինարարությունն ավարտված է, տեղեկացնում է The National պարբերականը: Բնակելի աշտարակի շինարարությունը սկսվել է դեռևս 7 տարի առաջ 2005 թ-ին: Այն ունի 107 հարկ, որից 7-ը ստորգետնյա (նախատեսված ավտոկայանատեղիի համար), իսկ 100-ը վերգետնյա: «Փրինցես Թաուերում» տեղակայված են 763 շքեղ դասի բնակարաններ՝ 1-4 ննջարաններով, և փենթհաուսներ, իսկ ընդհանուր բնակարանների քանակը հասնում է 3100-ի: Ի դեպ՝ մասնագետների կարծիքով Դուբայի անշարժ գույքի շուկայում նոր բնակարանների ավելացումը կարող է էլ ավելի իջեցնել դրանց վաճառքի և վարձակալության գները: Ինչպես ավելի վաղ տեղեկացրել էր մեր կայքը, Միացյալ Արաբական Էմիրություններում անշարժ գույքի բումից՝ 2008 թ-ից հետո, շուկայում գույքի գները նվազել են մոտ 60 տոկոսով: Այսօր աշխարհի ամենաբարձր բնակելի շենքն է համարվում 337 մետր բարձրությամբ «Թորչ» (The Torch) աշտարակը, որը ևս գտնվում է Դուբայում: Դուբայում է իրականացվում նաև մեկ այլ նախագիծ ևս՝ «Փենթոմինիում» աշտարակը (Pentominium), որի բարձրությունը նախատեսվում է 516 մետր: Վերջինիս շինարարությունից հետո, այն կարող է «Փրինցես Թաուերից» վերցնել ամենաբարձրի տիտղոսը, եթե իհարկե շինարարությունն ավարտվի, քանի որ այն շատ անգամ արդեն հետաձգվել է:

Ադրբեջանում իրականացվող «Կասպյան կղզի» (Caspian Island) նախագծի շրջանակներում նախատեսվում է կառուցել 1050 մետր բարձրությամբ երկնաքեր: Ինչպես տեղեկացնում է ադրբեջանական APA լրատվական գործակալությունը, այս աշտարակը կարող է դառնալ ամենաբարձրն աշխարհում: Ըստ նախնական տվյալների՝ «Ադրբեջան աշտարակի» (Azerbaijan Tower) բարձրությունը պետք է լիներ 560 մետր, սակայն ծրագրի գլխավոր կառուցապատող «Ավեստա» (Avesta) ընկերությունը փոփոխել է նախկինում հայտարարված չափանիշները, մասնավորապես՝ բարձրությունը: 185 հարկանի աշտարակը նախատեսվում է շահագործման հանձնել 2018-2019 թթ-ին: Ինչպես ավելի վաղ հաղորդել էր մեկ այլ ադրբեջանական The First News լրատվական գործակալությունը, Ադրբեջանում արդեն սկսվել է նոր, «Կասպյան կղզի» քաղաքի շինարարությունը, որը կկառուցվի արհեստական կղզիների վրա: Նախատեսվում է, որ 25 տարի տևող շինարարությունից հետո, այս քաղաքում կապրի ավելի քան 1 մլն բնակիչ: Ըստ գործակալության տարածած տվյալների՝ արդեն 2016 թ-ին շահագործման կհանձնվի նախագծի 10 տոկոսը: Ի դեպ նշենք, որ այս նոր քաղաքն ամենևին էլ մատչելի չի լինի գնորդների համար՝ բնակարանների 1 քառակուսի մետրի գինը կկազմի ոչ պակաս, քան 4500 ԱՄՆ դոլար: Ջրի վրա կառուցված քաղաքի ընդհանուր մակերեսը կլինի 30 հազար քառակուսի մետր, որից 20 հազար քառակուսի մետրը կզբաղեցնեն բնակելի շենքերը, իսկ մնացած մասում կկառուցվեն առևտրային և ժամանցի կենտրոններ, մարզադահլիճներ, դպրոցներ, համալսարաններ և այլն: Ինչպես հայտարարել է կառուցապատողը՝ այս քաղաքում կլինի աշխարհի ամենաերկար՝ 150 կիլոմետր երկարությամբ զբոսուղին և ամենաբարձր՝ 1050 մետր բարձրությամբ երկնաքերը (մեկ այլ տվյալով մոտ 880մ), և այս քաղաքում չեն լինի լուսանշաններ, քանի որ այնտեղ փողոցները չեն հատվելու: Նախագծի բյուջեն կկազմի 125 մլրդ ԱՄՆ դոլար, և այն ամբողջությամբ կֆինանսավորվի մասնավոր հատվածի կողմից: Հոդվածագրի խոսքերով, այս նախագիծը չունի նմանատիպն ամբողջ աշխարհում, քանի որ վերջինիս շինարարությունն իրականացվում է արհեստական կառուցված կղզիների վրա: Սակայն նշենք, որ Բաքվի փորձն ամենևին էլ յուրօրինակ չէ: Ավելին` հոդվածագիրը մոռացել է, որ Դուբայում արդեն գոյություն ունի արհեստական «Արմավենու կղզի» (Palm Island) նախագիծը, որը բարձրությունից երևում է որպես տրոպիկական ծառ: Արաբական Միացյալ էմիրություններում գոյություն ունի նաև մեկ այլ հավակնոտ ծրագիր: Բանն այն է, որ այստեղ կառուցել են նաև արհեստական կղզիներ «Աշխարհի քարտեզի» (The world) տեսքով, որտեղ բնակելի տարածքը ամենաթանկարժեքն է աշխարհում: Օրինակ՝ փոքրիկ բնակարանն այստեղ արժե ոչ պակաս, քան 350 հազար ԱՄՆ դոլար: Ի դեպ՝ BBC-ի հաղորդմամբ, «Բարքլիս Քեփիթալ» (Barclays Capital) ընկերության վերլուծաբանները հայտարարել են, որ իրենք «ոչ առողջ կապ» են տեսնում երկնաքերերի կառուցման և դրան հաջորդող տնտեսական ճգնաժամի միջև: Նրանք մատնանշում են, որ շատ դեպքերում երկնաքերերի կառուցման համար հսկայական գումարներ ներդրած քաղաքները կամ պետությունները կանգնում են լուրջ ֆինանսական խնդիրների առաջ: Մասնավորապես՝ Նյու-Յորքում «Էմփայեր Սթեյթ Բիլդինգ» (Empire State building) երկնաքերի կառուցմանը հետևեց «Համաշխարհային ճգնաժամը» (Great Depression), իսկ Դուբայում էլ աշխարհի ամենաբարձր աշտարակի՝ «Բուրջ Խալիֆաի» (Burj Khalifa) շինարարությունից հետո Արաբական միացյալ էմիրությունները գրեթե սնանկացան: Տեսնենք, ինչ՞ կլինի Ադրբեջանում: Սակայն կանխատեսումները տխուր են՝ այդ քանակի անշարժ գույքի վաճառք և Ադրբեջանի նման «ոչ ժողովրդական» երկրում՝ ուղղակի երազանք է: Այսօր աշխարհի ամենաբարձր երկնաքերը «Բուրջ Խալիֆան» (Burj Khalifa) գտնվում է Արաբական միացյալ էմիրություններում (828 մետր): Էմիրություններում նաև նախատեսում էր կառուցվել 1400 մետր բարձրությամբ «Նակհիլ Թաուեր» (Nakheel tower) աշտարակը, որի շինարարությունը դեռևս սառեցված է: Մոտ 1 կիլոմետր բարձրությամբ երկնաքեր էլ նախատեսվում է կառուցել Քուվեյթում իրականացվող «Մետաքսե քաղաք» (City of Silk) նախագծի շրջանակներում: Սաուդյան Արաբիայի մայրաքաղաք Ջիդդայում էլ ծրագրել են կառուցել 1 կիլոմետրից ավել բարձրություն ունեցող «Քինգդոմ Թաուեր» (Kingdom tower) աշտարակը: Սակայն նշենք, որ այս բոլոր «նավթային» նախագծերը դեռ գոյություն ունեն միայն թղթի վրա, իսկ թե որը կիրականացվի և կվերցնի Դուբայի հսկայի «Չեմպիոնի» տիտղոսը, ցույց կտա ժամանակը:

2015 թ-ի օգոստոսին Գիզայի սարահարթին, եգիպտական բուրգերի մոտ բացվելու է աշխարհում խոշորագույն Եգիպտական մեծ թանգարանը (Grand Egyptian Museum), տեղեկացնում է ria.ru կայքը՝ հղում կատարելով Կահիրեյում տեղի ունեցած մամուլի ասուլիսի ժամանակ Եգիպտոսի հնությունների հարցերով նախարար Մուհամեդ Իբրահիմի (Mohammed Ibrahim) կատարած հայտարարությանը: Հունվարի 10-ին Կահիրեում ստորագրվել է Եգիպտական մեծ թանգարանի շինարարության վերջնական` երրորդ փուլի մասին պայմանագիրը: Շինարարությունն իրականացնելու են եգիպտական խոշորագույն Օրասքոմ (Orascom) և բելգիական Բեսիքս (Besix) շինարարական ընկերությունները: Ինչպես մամլո ասուլիսի ժամանակ հայտնել է Եգիպտոսի հնությունների հարցերով նախարար Մուհամեդ Իբրահիմը, շինարարության երրորդ փուլը տևելու է 40 ամիս, որի ընթացքում կառուցվելու է համալիրի 108 հազար քառակուսի մետր մակերեսով տարածքը: Ընդհանուր առմամբ, թանգարանային համալիրը տեղակայվելու է 480 քառակուսի մետրի վրա: Պարբերաբար ցուցադրվելու են 100 հազար ցուցանմուշներ, որոնք վերաբերում են եգիպտական պատմության տարբեր դարաշրջաններին: Միայն երրորդ փուլի շինարարության համար ծախսվելու է 830 մլն ԱՄՆ դոլար: Ճապոնիան տրամադրելու է 300 մլն ԱՄՆ դոլար արտոնյալ վարկ, իսկ եգիպտական կողմը` 150 մլն ԱՄՆ դոլար: Վարկի մարումը սկսվելու է թանգարանի բացումից 10 տարի անց` թանգարանի եկամուտների հաշվին: Բացի հիմնական շենքից, թանգարանում նախատեսված է ստեղծել կինոթատրոն, գրադարան, լսարաններ, խորհրդակցությունների սրահներ, երեխաների և սահմանափակ հնարավորություն ունեցող մարդկանց համար թանգարաններ, զվարճանքների կենտրոն, ցուցասրահ` ժամանակավոր ցուցադրությունների համար և զբոսայգիներ: Զբոսաշրջիկների հարմարավետության համար թանգարանային համալիրը Գիզայի բուրգերին է միանալու հատուկ ճանապարհով: Եգիպտոսի իշխանությունները հույս ունեն, որ Եգիպտական մեծ թանգարանը բացումից 5 տարի հետո ամեն տարի ընդունելու է 8 մլն այցելու: Զբոսաշրջիկների պահանջները բարելավելու համար անհրաժեշտություն կառաջանա նոր խանութներ բացել և կառուցել 40 նոր հյուրանոց: Մայրաքաղաքի Թահրիր «հեղափոխական» հրապարակում (Tahrir Square) գտնվող Կահիրեի թանգարանն արդեն չի տեղավորում եգիպտական մշակույթի բոլոր հուշարձանները: Սրանց մեծ մասը ժամանակի ընթացքում տեղափոխվելու են Եգիպտական մեծ թանգարան: Եգիպտոսի հնությունների հարցերով նախարարը մասնավորապես նշել է, որ Թութանհամոն փարավոնի դամբարանի գանձերի սրահը նոր թանգարանում նախորդի համեմատ ունենալու է 7 անգամ մեծ տարածք:

Ինչպես տեղեկացնում է Constructiondigital կայքը, երբ 2012 թ-ի գարնանը Տոկիոյում շահագործման հանձնվի Երկնային Ծառ (Tokyo Sky Tree) աշտարակը, այն կդառնա Ճապոնիայի ամենաբարձր կառույցը: 634 մետր բարձրությամբ աշտարակը գտնվում է Տոկիոյի Սումիդա (Sumida) թաղամասում: Շինարարության ավարտից հետո հեռարձակման աշտարակը կդառնա Ճապոնիայի խորհրդանիշը: Հսկայական ծառ հիշեցնող այս կառույցը նախագծել է Նիկկեն Սեկկեյ (Nikken Sekkei) ճարտարապետական բյուրոն, իսկ որպես գլխավոր կապալառու հանդես է եկել Օբայաշի Քորփորեյշնը (Obayashi Corporation): Ըստ նախնական տվյալների՝ աշտարակը կդառնա երկրի թվային հեռարձակման ցանցային կենտրոն: Երկնային Ծառը կունենա երկու դիտահարթակ՝ 350 և 450 մետր բարձրությունների վրա, որոնք հնարավորություն կտան այցելուներին հիանալ Տոկիոյի համայնապատկերով: Իմիջիայլոց, 450 մետրի դիտահարթակը կառուցման ավարտին կլինի աշխարհում ամենաբարձրը: Ավելի ցածր հարկերում կլինեն ռեստորաններ և առևտրային կենտրոններ: Ինչպես մենք գրել էինք նախկինում գրել էինք նախկինում հեռուստաաշտարակը կառուցվում է Obayashi կազմակերպության կողմից մշակված հատուկ հիմքերի վրա, ինչը կերաշխավորի աշտարակի բարձր կայունությունը երկրաշարժերի, ուժեղ քամիների և այլ ուժերի նկատմամբ:

Հունվարի 5-ին Մեքսիկայում հանդիսավոր բացվել է աշխարհի ամենաբարձր վանտային (կախովի) կամուրջը և միանգամից գրանցվել Գինեսի համաշխարհային ռեկորդների գրքում, հաղորդում է Constructiondigital կայքը: Հսկայական Բալուրեյթ Կամուրջը (Balurate Bridge) կախված է 152 պողպատե ճոպաններից և ունի 1100 մետր երկարություն, 20 մետր լայնություն և բաղկացած է 4 երթուղային շարքերից: Կամուրջի կենտրոնական թռիչքը հասնում է 520 մետրի: 1.42 մլրդ ԱՄՆ դոլար արժողությամբ նախագծի շինարարության 86 տոկոսն ավարտված է, իսկ վերջնական այն պատրաստ կլինի հունվարի վերջին: Մեքսիկայի նախագահ Ֆիլիպե Կալդերոնի (Felipe Calderon) խոսքերով, այս կամուրջը երկրի ամենատպավորիչ ենթակառուցվածքային նախագծերից է: Վերջինիս շնորհիվ կմիավորվեն հյուսիսային Մեքսիկայի բնակիչները: Բալուրեյթ Կամուրջն ամենաբարձր կետում ունի 403 մետր բարձրություն, և վերջինիս բացումը երկրի՝ Իսպանիայից ազատագրվելու 200-ամյա տարեդարձի միջողացումների շարքին է պատկանում: Կամուրջի շինարարությունը տևել է մոտ 4 տարի: Այն իրար է կապում Մեքսիկայի երկու նահանգներ՝ Մազալթանը (Mazatlan) և Դուրանգոն (Durango)` ապահովելով ուղիղ կապ Սատանայի Մայրուղով (Devil’s Backbone): Քննադատների կարծքիով, այս կամուրջի բացումը կավելացնի երկրում թմրանյութերի վաՃառքը, քանի որ արդեն հնարավոր կլինի վերջիններս տեղափոխել շատ ավելի արագ այս ճանապարհներով: Սակայն երկրի պաշտոնյաները համոզված են, որ կամուրջը կնպաստի տեղական համայնքների զարգացմանը: Լրացնենք, որ աշխարհի ամենաբարձր կախովի կամուրջը գտնվում է Չինաստանում: Siduhe կամուրջի բարձրությունը հասնում է 472 մետրի, իսկ թռիչքը՝ 900 մետրի: Որպեսզի ընթերցողների մոտ ռեկորդների հարցում շփոթմունք չառաջանա՝ նշենք, որ այս երկու կախովի կամուրջների տարբերությունը կառուցվածքների մեջ է: