Հնդկաստանում սկսվել է աշխարհի ամենաբարձր արձանի շինարարությունը, այն բանից հետո, երբ Հնդկաստանի ազգային կուսակցության առաջնորդ, Հուջարաթ նահանգի գլխավոր նախարար Նարդերա Մոդին մասնակցել է 340 մլն ԱՄՆ դոլար արժողությամբ նախագծի հիմնարկեքի արարողությանը: Ինչպես տեղեկացնում է BBC-ն, Հնդկաստանի ազգային հերոս, երկրի սահմանադրության համահեղինակ և անկախության մարտիկ Սարդար Վալլաբհաիյի (Սարդար Պատել) արձանը կառուցվում է Հուջարաթ նահանգում, կղզու վրա: Հուշարձանի հաշվարկային բարձրությունը կկազմի 182 մետր, ինչը մոտ 2 անգամ ավել է, քան Նյու Յորքի «Ազատության արձանը», որի բարձրությունը կազմում է 93 մետր: Նշենք, որ ընդդիմադիր կուսակցության կողմից ֆինանսավորվող նախագիծը խիստ քննադատության է արժանացել՝ ուռճաչված բյուջեի պատճառով: Ներկայումս աշխարհի ամենաբարձր արձանը գտնվում է Չինաստանում: 153 մետր բարձրությամբ Վայրոչանա Բուդդայի արձանը կառուցվել է 2002 թ-ին: Երկրորդ տեղում է գտնվում Մյանմարում կառուցված 129 մետր բարձրությամբ Շակյամունի Բուդդայի արձանը, իսկ երրորդ տեղում 120 մետր բարձրությամբ Ամիտաբհա Բուդդայի արձանն է Ճապոնիայում:
Հանրահայտ ճարտարապետ Ֆրենկ Գերին կնախագծի Facebook-ի լոնդոնյան և դուբլինյան գլխավոր գրասենյակները: Լոնդոնում ճարտարապետը պետք է վերափոխի Ռիջենթս-փարքում արդեն գոյություն ունեցող ընկերության եռահարկ գրասենյակը, իսկ Դուբլինում նա լիովին ազատ կլինի ստեղծագործելու: Դուբլինյան գրասենյակը Գերին կկառուցի հիմքից իրեն բնորոշ յուրօրինակ ոճով: Նշենք, որ սոցիալական ցանցային հսկան Գերիի հետ համագործակցությունը սկսել է դեռևս անցած տարի, երբ ճարտարապետը վերափոխել է նրանց Մենլո Փարքում գտնվող գրասենյակը, որպեսզի հնարավոր լինի 2 անգամ ավելացնել աշխատակիցների քանակը: Լոնդոնում գտնվող եռահարկ գրասենյակը Գերին պետք է այնպես վերափոխի, որպեսզի այնտեղ ևս հնարավոր լինի տեղավորել 2 անգամ ավելի աշխատակիցների: Դուբլինյան գրասենյակը, որի ընդհանուր մակերեսը կկազմի 11 հազար քառակուսի մետր, կկառուցվի «Գրանդ Կանալ» հրապարակի մոտ: Նախագծի այլ մանրամասներ ընկերությունը չի հաղորդում, քանի որ այն դեռևս գտնվում է մշակման նախնական փուլում:
Թուրքիայում հոկտեմբերի 29-ին բացվել է աշխարհի առաջին թունելը, որն իրար է միացնում 2 տարբեր մայրցամաքներ: «Մարմարայ» անվանումը ստացած թունելն իրար է միացնում Թուրքիայի խոշորագույն քաղաքի` Ստամբուլի եվրոպական և ասիական հատվածները: Ստամբուլի երկաթգծային ցանցի արդիականացման շրջանակներում իրականացվող «Մարմարայ» նախագծի շինարարությունը տևել է 9 տարի: Նմանատիպ թունելի մասին առաջին անգամ բարձրաձայնել է Օսմանյան սուլթան Աբդուլ Մեջիդը 1860-ական թթ-ին, սակայն այն ժամանակվա տեխնիկական սուղ հնարավորությունների պատճառով նախագիծը չի իրականացվել: 2004 թ-ին դեռևս Ստամբուլի քաղաքապետ Ռեջեփ Թայիփ Էրդողանը քաղաքում իրականացվող մի շարք ծախսատար նախագծերի շարքում կանաչ լույս տվեց նաև այս թունելի շինարարությանը: «Մարմարայ» նախագծի առաջին փուլը, որի բյուջեն կազմել է 4.6 մլրդ ԱՄՆ դոլար, շահագործման է հանձնվել ժամանակացույցից 4 տարի ուշ: Թունելի ընդհանուր երկարությունը կազմում է 13.6 կիլոմետր, որից 1.4 կիլոմետրը ձգվում է 60 մետր խորության վրա՝ Բոսֆոր ծոցի հատակով, իսկ մնացյալ 12.2 կիլոմետրը ձգվում է ցամաքով և իրար է միացնում մետրոպոլիտենի 3 կայարաններ: Ի դեպ, ինչպես պնդում են նախագծի հեղինակները, այս թունելը կարող է դիմակայել հզոր երկրաշարժերին, ինչը խիստ կարևոր գործոն է սեյսմիկ ակտիվ այս գոտու համար:
Իսրայելը, որը վաղուց համարվում է արևային էներգետիկայի հիմնադիրներից մեկը, կիզիչ արևի երկիր է: Հաշվի առնելով ամբողջ տարվա ընթացքում ջերմացնող արևի առավելությունները` Իսրայելը նախատեսում է Նեգևի անապատում կառուցել 121 մեգավատ հզորությամբ արևային էլեկտրակայան, որը էլեկտրաէներգիայով կապահովի մոտ 40 հազար տներ: «Աշալիմ արևային էլեկտրակայան» (Ashalim power plant) անվանումը ստացած էլեկտրակայանի շինարարությունը նախատեսվում է սկսել 2014 թ-ին և ավարտել 2016 –ին: Շինարարության ավարտից հետո այն կդառնա Իսրայելի խոշորագույն արևային էլեկտրակայանը, և երկիրը մի քանի քայլով կմոտենա իր առջև դրված նպատակին, ինչը ենթադրում է մինչև 2020 թ-ն արտադրվող ընդհանուր էներգիայի 10 տոկոսը ստանալ այլընտրանքային աղբյուրներից: «Աշալիմ արևային էլեկտրակայանը» մշակվում է «Մեգալիմ արևային էներգիա» (Megalim Solar Power) ընկերության կողմից, որը կազմավորվել է ամերիկյան արևային էներգիայի մշակմամբ զբաղվող «Բրայթսորս Էներջի» (Brightsource Energy) և ֆրանսիական էներգետիկ և տրանսպորտային «Ալստոմ» (Alstom) ընկերությունների համագործակցության արդյունքում: Ըստ նախնական տվյալների` նախագծի շինարարության ընդհանուր բյուջեն կկազմի 1.1 մլրդ ԱՄՆ դոլար: Հարկ է նշել, որ «Բրայթսորս Էներջի» ընկերությունը նմանատիպ նախագծերի իրականացման բավականին փորձ ունի: Հենց այս ընկերությունն է կալիֆորնիական Մոխավե անապատում կառուցել 377 մեգավատ հզորությամբ աշխարհի խոշորագույն արևային «Իվանպահ» ջերմաէլեկտրակայանը: Իր նախագծերում «Բրայթսորս Էներջի» ընկերությունն օգտագործում է հելիոստատներով հայելիներ (այս սարքը հայելին պտտում է այնպես, որ միշտ այն հետևի արևի ճառագայթներին), որոնք արևի ճառագայթներն ուղղում են դեպի աշտարակներ, որտեղ առաջանում է տուրբիններն աշխատեցնող գոլորշին: Այս արևային ջերմային էլեկտրակայանը համարվում է ապագայում կառուցվելիք 3 նախագծերից մեկը: Ի դեպ, երբ երեք նախագծերն էլ գործարկվեն «Աշալիմ արևային էլեկտրակայանը» իր մեծությամբ կդառնա հինգերորդն աշխարհում: 250 մեգավատ հզորությամբ էլեկտրակայանն ի վիճակի կլինի ապահովել երկրի էլեկտրաէներգիայի պահանջարկի 2.5 տոկոսը: Նշենք, որ Հայաստանում 1060 ՄՎտ դրվածքային հզորությամբ միջուկային նոր էներգաբլոկի կառուցման համար, ըստ նախնական տվյալների, կպահանջվի 5,2-7,2 մլրդ. ԱՄՆ դոլար, բուն շինաշախատանքների համար՝ 5-7 տարի։ Ստացվում է, որ արևային էներգիայի օգտագործումը լինելով անվտանգ, տնտեսապես նույնպես առավել նպատակահարմար է դառնում (250 Մվտ-1.1 մլրդ ԱՄՆ դոլար): Տվյալ դեպքում նաև չի առաջանում վառելիքի կարիք, որն իր հերթին բերում է բացառիկ էներգետիկ անկախության: Իհարկե, Հայաստանում արևային օրերը զիջում են Իսրայելին, բայց անգամ այս հանգամանքում, պետք է լուրջ մտածել այս այլընտրանքի ակնհայտ նպատակահարմարության մասին...
Արաբական Միացյալ Էմիրություններում 7 մլրդ ԱՄՆ դոլար արժողությամբ «Մուհամեդ Բին Ռաշիդ Քաղաք» (Mohammad Bin Rashid City) նախագծի շրջանակներում կկառուցվի աշխարհի խոշորագույն արհեստական ծովածոցը: «Բյուրեղյա ծովածոց» (Crystal Lagoon) անվանումը ստացած նախագծի ընդհանուր մակերեսը կկազմի 40 հեկտար: Հարկ է նշել, որ շինարարության ավարտից հետո, «Բյուրեղյա ծովածոցը» իր հետևում կթողնի եգիպտական զբոսաշրջային Շարմ Էլ Շեյխ քաղաքում գտնվող 12 հեկտար ընդհանուր մակերեսով Գինեսսի գրքի ներկայիս ռեկորդակրին: Ծրագրի կառուցապատողը արդեն սկսել է աշխատանքները և հույս ունի արհեստական ծովածոցը շահագործման հանձնել արդեն 2020 թ-ին: Համաձայն նախագծի նախնական տարբերակի` ծովածոցի ափերին կտեղակայվեն կարիբյան ոճով կառուցված լայն ծովափեր, որտեղ այցելուները մաքուր և ֆիլտրված ջրում կկարողանան զբաղվել ջրային տարբեր մարզաձևերով: Ի դեպ, արհեստական ծովածոցի ջրի ֆիլտրման համար կօգտագործվի նորարարական մեթոդ, որը հնարավորություն կտա օգտագործել ավանդական ֆիլտրման եղանակների օգտագործած քիմիական նյութերի միայն 1 և էլեկտրաէներգիայի ծախսման միայն 2 տոկոսը: «Բյուրեղյա ծովածոցը» կկառուցվի «Մուհամեդ Բին Ռաշիդ Քաղաքի» «Դիսթրիքթ Ուան» (District One) բնակելի շրջանի կենտրոնում: 445 հեկտար ընդհանուր մակերեսով բնակելի շրջանում աշխարհի խոշորագույն արհեստական ծովածոցից բացի կլինեն շքեղ տներ, այգիներ, ջրային ուղիներ, արհեստական ծովափեր, հեծանվային երթուղիներ, մարզահրապարակներ, էլիտար խանութներ, ռեստորաններ, ավտոկայանատեղի և լոնդոնյան «Հայդ Փարքից» մեծ կանաչ գոտի: Նախագծի հեղինակների կարծիքով «Դիսթրիքթ Ուան» շրջանը կդառնա Դուբայի գեղատեսիլ վայրերից մեկը, որը կառաջարկի տարածաշրջանում առաջինն իր տեսակի մեջ նախագիծ, որտեղ քաղաքի կենտրոնում կլինեն բնակելի համալիրներ:
