Լոնդոնում նախատեսվում է վերականգնել թագուհի Վիկտորիայի (գահ. 1837-1901) ժամանակաշրջանին պատկանող հիասքանչ «Բյուրեղապակյա դղյակը» (Crystal Palace): Նախագիծը համատեղ կիրականացնեն ճարտարապետական «Արուփ» (Arup) և չինական կառուցապատող ZhongRong Group ընկերությունները: Ըստ նախնական տվյալների` «Արուփ» ընկերությունը պատրաստել է վերականգնման այնպիսի նախագիծ, որը շատ մոտ է Ջոզեֆ Պակսթոնի նախագծած բնօրինակին: «Բյուրեղապակյա դղյակը» 1851 թ-ին «Հայդ Փարքում» կառուցվել է «Առաջին Համաշխարհային Ցուցահանդեսի» շրջանակներում` որպես ցուցասրահ: Ջոզեֆ Պանկթոնի գլխավորությամբ կառուցված ցուցասրահը ցուցահանդեսից հետո տեղափոխվել է մեկ այլ վայր` Հարավային Լոնդոնի Սայդենհեմ-Հիլլ արվարձան: Այնուհետև 1936 թ-ի հրդեհից հետո շինությունը այրվել է և մինչ օրս երբևէ չի վերականգնվել: Միայն վերջերս չինացի միլիարդատեր ZhongRong Group ընկերության հիմնադիր Նի Չժաոսինը հայտարարել է, որ պատրաստ է 800 մլն ԱՄՆ դոլար ներդնել պատմական շինությունը վերակառուցելու համար: Ինչպես արդեն նշել ենք, վերակառուցման նախագիծը շատ մոտ է բնօրինակին, որը ներառում էր հսկայական ստվերոտ զբոսայգի: «Արուփ» ընկերության նախագիծը ենթադրում է ոչ միայն շինության վերակառուցում, այլև այն շրջապատող 73 հեկտար ընդհանուր մակերեսով այգու վերականգնում: Զբոսայգում կլինեն ծառերով հագեցած զբոսուղիներ, իտալական ոճով կառուցված գեղեցիկ տեռասներ, սրճարան և այցելուների կենտրոն:
Կուպերտինոյի քաղաքային նախագծման Խորհուրդը հաստատել է Apple ընկերության նոր գլխավոր գրասենյակի նախագիծը, չնայած այն փաստին, որ վերջնական որոշումը պետք է ընդունվի 2014 թ-ի մայիսից ոչ շուտ: Այս յուրօրինակ գրասենյակային կառույցը հասարակությանն է ներկայացվել 2011 թ-ի կեսերին ընկերության հիմնադիր տնօրեն Սթիվ Ջոբսի կողմից: «Ֆոսթեր+Փարթներս» հանրահայտ ճարտարապետական ընկերության կողմից նախագծված և ինչպես Սթիվ Ջոբսն էր անվանում՝ աշխարհի լավագույն գրասենյակային համալիրի շինարարությունը նախատեսվում է ավարտել 2016 թ-ին: 260 հազար քառակուսի մետր ընդհանուր մակերեսով գրասենյակային համալիրը կկարողանա աշխատատեղով ապահովել 14 հազար աշխատակիցների: Համալիրում հիմնականում կլինեն գրասենյակային տարածքներ, ինչպես նաև մարզասրահ, լսարան, 3000 այցելուի համար նախատեսված սրճարան և 6000 ծառերով շրջապատված 600 այցելուի համար նախատեսված ռեստորան: Սթիվ Ջոբսի` առաջին անգամ նախագծի ներկայացումից հետո շատ բան է փոխվել, ինչպես գծագրերում, այնպես էլ բյուջեյում: Բանն այն է, որ նախագծի ընդհանուր բյուջեն 3 մլրդ ԱՄՆ դոլարից բարձրացել է 5 մլրդ-ի: Ենթադրվում է, որ շինարարության առաջին փուլում, որը նախատեսվում է սկսել 2014 թ-ի հունիսին, պետք է ապամոնտաժվի շինհրապարակում գտնվող 26 շինությունները և սկսվեն հողային աշխատանքները, իսկ ինքնաթափերը 6 ամիս և 24 ժամ շարունակ կիրականացնեն այս աշխատանքները:
Չինաստանի Շանսի նահանգի Սիան քաղաքի իշխանությունների անուշադրության հետևանքով բնակելի շենքը հայտնվել է նորակառույց մայրուղու տարածքում: Բազմաբնակարան շենքը կառուցվել է բնակիչներին մեկ այլ շրջանից տեղափոխելու նպատակով, որտեղ նախատեսված էր այգի կառուցել: Վերաբնակեցումից մի քանի ամիս անց պարզ է դառնում, որ քաղաքային իշխանությունները ճանապարհային ծանրաբեռնվածությունը թեթևացնելու նպատակով պլանավորել են այս տարածքով ավտոմայրուղի կառուցել: Հենց այդ ժամանակ էլ պարզվում է, որ իշխանությունները կառուցապատող ընկերությանը թույլ են տվել կառուցել շենքի մեկ ավելորդ հատված: Արդյունքում ստացվել է այնպես, որ շենքը զբաղեցնում է մայրուղու երթևեկելի 8 գծերից 4-ը: Շենքի բնակիչները դժգոհ են նմանատիպ հարևանությունից, սակայն կրկին տեղափոխվել համաձայն են միայն խոշոր փոխհատուցման պարագայում: Քաղաքային իշխանությունները հաշվարկել և եկել են այն եզրակացության, որ բնակիչներին տեղափոխելը և շենքն ապամոնտաժելը բավականին թանկ է, ուստի որոշել են ամեն ինչ թողնել այնպես, ինչպես կա: Չինաստանում շատ են հանդիպում նմանատիպ շինարարական պատահարներ: Մասնավորապես, 2012 թ-ի դեկտեմբերին նույն Շանսի նահանգում բարձրահարկ թաղամասի շինարարությունը որոշ առումով ներգրավեց տեղական գերեզմանատան մի հատվածը: Հանգուցյալներից մեկի հարազատները, մատնանշելով առաջարկված ցածր փոխհատուցումը, հրաժարվեցին վերահուղարկավորել մարմինը: Արդյունքում շինարարական աշխատանքերը ծավալվեցին հողե հսկա բլրի շուրջը, որտեղ թաղված էր հանգուցյալը: Կրկին անցած տարի չինական Վենլինգ քաղաքում ընտանեկան զույգը հրաժարվեց լքել իրենց կիսաքանդ տունը, որը նախատեսվում էր ապամոնտաժել նոր մայրուղի կառուցելու համար: Նրանց հնարավոր եղավ համոզել միայն մայրուղու կառուցման ավարտին, երբ փոխհատուցման գումարը 35.3 հազար ԱՄՆ դոլարից բարձրացավ մինչև 41.8 հազար: Շինարարների կամ տեղական իշխանությունների անուշադրության հետևանքով նմանատիպ դեպքեր գրանցվում են ամբողջ աշխարհում: Վերջերս իսպանական մի ընկերություն կառուցել էր 47 հարկանի երկնաքեր և «պատահաբար» մոռացել էր վերելակի մասին :
Հարյուրավոր տարիներ հոլանդացիները ծովի մակարդակից ցածր գտնվող վայրերից ջուրը հետ մղելու, ինչպես նաև ամբարտակներ կառուցելու նպատակով ներդրել են հսկայական ուժ և ֆինանսներ: Այսօր, սակայն, նրանք որոշել են ջրի դեմ պայքարելու փոխարեն այն օգտագործել` որպես հետագա կառուցապատման բաղկացուցիչ մաս կառուցելով աշխարհում առաջին լողացող բնակելի համալիրը: Հոլանդական «Վոթերստուդիո» (Waterstudio) ճարտարապետական ընկերությունը հանրությանն է ներկայացրել նորարական և շատ հետաքրքիր մի նախագիծ, որը ստացել է «Ցիտադել» (Citadel)` «լողացող տուն անվանումը»: Ըստ հեղինակների մտահղացման` «Ցիտադելը» կլինի շքեղ լողացող բնակելի համալիր` հագեցած նորարական և ժամանակակից տեխնոլոգիաներով: Նորագույն լողացող թաղամասի շինարարությունը նախատեսվում է սկսել արդեն հաջորդ տարվա սկզբին: Այն բաղկացած կլինի 60 բնակարաններից, որոնք կունենան «կանաչ» տանիք, սեփական այգի, նավահանգիստ փոքրիկ նավակի համար և ջերմոց: Ամբողջ համալիրը բաղկացած կլինի 180 մոդուլային էլեմենտներից համախմբված կենտրոնական բակի շուրջը: 73/128/2.8 մետր հաստությամբ բետոնե հիմքով բնակելի թաղամասը կունենա ավտոկայանատեղի և մայրցամաքի հետ կապող կամուրջ` նախատեսված շտապ օգնության և տեխնիկական սպասարկման մեքենաների համար: Ըստ նախնական տվյալների` «Ցիտադելը» կլողա 1.8 մետր ջրի մակարդակից բարձր, սակայն համալիրի ընդհանուր չափերը թույլ չեն տա բնակիչներին զգալ ջրի որևէ տատանում: Ի դեպ այս լողացող բնակարանները կօգտագործեն 25 տոկոսով ավելի քիչ էներգիա, քան իրենց ավանդական ցամաքային եղբայրները:
Ջերմուկում Hyatt հյուրանոցի շինարարությունը կավարտվի 2014 թ-ի աշնանը: Շինարարության ավարտից հետո աշխարհահռչակ Hyatt ապրանքանիշի հյուրանոցն իր հյուրերին կառաջարկի տարբեր մակարդակների 80 հյուրանոցային համարներ, սպա-կենտրոն, ջրային առողջարաններ, ռեստորաններ, լողավազաններ և մարզասրահներ: Ըստ նախնական տվյալների՝ նախագծում ներդրված գումարը կկազմի 15 մլն ԱՄՆ դոլար: Նշենք, որ հյուրանոցի շինարարությունը սկսվել էր 2009թ-ին: Նախագծի հեղինակն է ՀՀ կառավարությանն առընթեր Ճարտարապետության պետական կոմիտեի գործող նախագահ Նարեկ Սարգսյանը: Հյուրանոցի հարեւանությամբ նախատեսվում է նաև կառուցել Ջերմուկի քաղաքապետարանի նոր մասնաշենքը:
